Magtubu di Pol wal bɨn̰ kalaŋ ga Rɔm 12 - Gabri Maja

Ayagɨŋ gusɨgɨŋ ɗəndəŋ bɨn̰ Kumu

¹ Ay karmɨnɨ ga ban̰aŋ dan̰ ga kandɨ, ɨŋ dobɨ bandɨ kuduroygɨŋ na kol sɔlɛ cɨn̰-n̰age da Kumu di kɨŋ way, waŋ waŋ kalɨn̰ ma duroygɨŋ aya gusi bɨn̰ Kumu, hɨn̰ hɨnga ga ni bogɨn̰ kɨbar ga woy bɨra bɨ, ga woy dan̰ cɨndɨge bɨ, ga ƴee cɨn̰ Kumu bɨ. Gɨ nee le mana n̰ɨre Kumu gɨ dan̰ gɨyəŋdi.

² Kan̰agɨŋ kɔbɛ ɨrɨme gɨ da kalaŋ ga ɨndəŋ ga a cay gɨsəŋ gaŋ kɛ coŋ, ama ɗagɨŋ gusɨgɨŋ bɨn̰ hɨnga-sɔlɛ ga hɨrwa ga Kumu bɨgɨŋ le ɗe bɨlgɨŋ. Na kɨɗɨn̰dɨge ga nee gaŋ le na, kɨŋ kɨya ɓale dɔrɛ cɨn̰ hɨnga ga kuduroy Kumu gey: Gɨ na hɨnga ga ɗari bɨ, hɨnga ga ƴee cɨn̰ Kumu bɨ, hɨnga ga duroŋ cɨrɛɗ bɨ.

³ Dan̰ gɨyəŋ gɨ da ɗarwa di Kumu bəŋ, ɨŋ yən̰ kalaŋ ga woyge duroygɨŋ pɨna pɨna nɔm, ɗɔɔ gɨ kan orɨn̰ge dan̰ ɨrɨme gɨ ɗɨn̰ cayge naŋ, ama kuɗa gɨ kan ɨran̰ dan̰ ɨrɨme gɨ dan̰ gɨyəŋdi gɨ ɓal togɨyge gɨ or pɨna dan̰ aye kudurɔ koge gɨ Kumu bɨge.

⁴ Sɨlagɨŋ, ungo le kuyoŋdi-gusi na pɨna hayi dan̰ kɨway gusi ga kondi tɔgɨ. Ama waŋ waŋ kalɨn̰ ma orɨn̰ dan̰ gɨye-lɔɔdi gɨ ojɨ cayi cayi.

⁵ Kona na-gandi kalɨn̰ ma woy gɨlɨn̰ na hɨn̰ wo̰ bɨ. Na woy gɨlɨn̰ na hɨn̰ kɨway kuyoŋdi-gusu wo̰. Na gandi ga na kondɨ le nana kuyoŋdi-gusu gɨ pɨna hayi, te bugoŋ pɨna dan̰ Kɨris. Waŋ waŋ kalɨn̰ ma orɨn̰ dan̰ gɨye-lɔɔdi.

⁶ Na orɨn̰ dan̰ hɨnga ga ni bee-kalɨn̰ ga toyge kan̰dɨge kan̰dɨge dan̰ gɨyəŋ gɨ da ɗarwa di Kumu lee danana. Hɨn̰ gɨ Kumu na bɨn̰ ungo dɔnɔ di ni yɔɔ-kɔl-gɨ-Kumu-ba-yɔɔ na, kuɗa gɨ ban ya ɗe or pɨna dan̰ aye kudurɔ.

⁷ Hɨn̰ gɨ Kumu na bɨn̰ ungo dɔnɔ di ni leen̰ gɨye a duroy ka karme na, kuɗa gɨ ban laa gɨye. Hɨn̰ gɨ Kumu na bɨn̰ ungo jɨba di ni gɨlɨn̰ kalaŋ hɨnga na, kuɗa gɨ ban gɨlge.

⁸ Hɨn̰ gɨ Kumu na bɨn̰ ungo dɔnɔ di ni dobɨn̰ bandɨ kuduroy karmii na, kuɗa gɨ ban dɨba bandɨ kuduroyge. Hɨn̰ gɨ Kumu na bɨn̰ ungo cɨn̰-arɨn̰a di ni bee hɨnga na, kuɗa gɨ ban laa dan̰ wandɨ di cɨla. Hɨn̰ gɨ Kumu na bɨn̰ ungo cɨn̰-muɗɔlɛ gɨ ni dɔrɛ tumoy karmii na, kuɗa gɨ ban dɨra tumoyge dan̰ gusi-hɨmbalwa. Hɨn̰ gɨ Kumu na bɨn̰ ungo cɨn̰-arɨn̰a di ni sɔlɛ cɨn̰-n̰age di da kalaŋ na, kuɗa gɨ ban jɨbɨ toyge dan̰ gusi-mɔwa.

⁹ Kuɗa gɨ geye kogɨŋ nare cɨn̰-kɨɗɨn̰ naŋ. Gɨrgɨŋ ɗagɨŋ ɨsɨna coŋ dan̰ gɨre gɨ daa, ama lun̰doŋgɨŋ kardi hɨnga ga ɗari usa.

¹⁰ Kuɗa gɨ kɨŋ gey gusɨgɨŋ duroygɨŋ hɨn̰ karmen̰əŋ wo̰. Kuɗa gɨ waŋ waŋ kalɨn̰ ma ungula gusi gɨ ni dɨbe hurɔmɔ cay mɨgayi.

¹¹ Kuɗa gɨ gusɨgɨŋ-hɨmbalagɨŋ a te gɨye gɨ da Ba-gulɔŋ gɨŋ, lɔɔgɨŋ dabɨr kɨbɨ nee naŋ. Kuɗa gɨ gɨye koyi lɔɔ ɗugoygɨŋ.

¹² Kuɗa gɨ kɨŋ laa gusi-mɔwa a cay ɨrɨmedɨgɨŋ gɨ kɨŋ bee a cay Kumu bɨ, dɨbɨgɨŋ ɗugoygɨŋ duroy hɨnga ga ni cɨn̰-kula gaŋ bɨ, ulagɨŋ Kumu daa daa dɨle gusi-mare bɨ.

¹³ Kuɗa gɨ kɨŋ jɨbɨ te kalaŋ ga woyge dan̰ cɨndɨge ga orɨn̰ge dan̰ n̰agedi hɨnga. Ƴɨmagɨŋ kɨrge gusɨgɨŋ dan̰ gusi-mɔwa.

¹⁴ Tɨragɨŋ-kɨbɨgɨŋ a cay kalaŋ ga ka-gɨlgɨŋ cɨn̰. Ho’o tɨragɨŋ-kɨbɨgɨŋ cayge wala ɓɨsgegɨŋ naŋ.

¹⁵ Laagɨŋ gusi-mɔwa dan̰ kalaŋ ga leege gusi-mɔwa bɨ, ɨlgɨŋ dan̰ kalaŋ ga ɨlege bɨ.

¹⁶ Sɨmagɨŋ te bugoŋ pɨna gɨŋ duroygɨŋ. Sɔlɛgɨŋ gusɨgɨŋ leen̰ kalaŋ ga gɨmdəŋ cɨn̰ kamdɨgɨŋ naŋ bɨ, gɨ ɨrɨme gɨ ni gɨlɨn̰ gusɨgɨŋ unɔ kuduroygɨŋ bɨ. Kɨŋ ɗɔɔ ba sɔlɛ gusɨgɨŋ leen̰ ka-muɗɔlɛ.

¹⁷ Hɨn̰ gɨ ungo na laagɨŋ ɨsɨna na, jogɨn̰gɨŋ dan̰ ɨsɨna daa bii ban̰di nee naŋ. Kuɗa gɨ lɔɔ hɨnga ga ɗari ba ƴɨma kuduroygɨŋ a cɨn̰ kalaŋ nɔm.

¹⁸ Hɨn̰ gɨ kɨŋ na ɓala na, laagɨŋ hɨnga nɔm ga gangɨdɨge woy a kobɨgɨŋ le, ɗe agɨŋ somɨn̰ dan̰ gusi-dɔbɛ dan̰ kalaŋ nɔm.

¹⁹ Ay kɨŋ ga ɨŋ lee-toygɨŋ. Ɗagɨŋ baa gɔjɛ-baa cay gusɨgɨŋ kogɨŋ kɨŋ-gandi gaŋ, ɗagɨŋ kuduroy-hɔmɛ di da Kumu ɗe lee gɨye kɔɔ, kɨya wa walge a duroy Magtubu di da Kumu dɨŋ yege hɨn̰: «Na ɨŋ-bandi ba kɨya gɔjɛ-baa, Na ɨŋ-bandi ba kɨya bɨn̰ kalaŋ pɨna pɨna nɔm, Cay kobɨge dan̰ gɨyəŋ gɨ da gɨye-lɔɔdɨge.» Na Ba-gulɔŋ ba yɔ.

²⁰ Ama Ba-gulɔŋ dɨbɨ cay nee ɗaŋ coŋ ye hɨn̰: «Hɨn̰ gɨ kurɔŋ na laa ba-baadɨn̰ na, bii hɨnga ga ni dɔɔ. Hɨn̰ gɨ gɨmase na dayi na, bii kaŋ ga ni sɔɔ. Hɨn̰ gɨ ji na laa hɨn̰ wo̰ na, Woy gɨlɨn̰ hɨn̰ gɨ ji na don naa, Kurji tɨwa di ƴee man̰ bee a cayi wo̰.»

²¹ Ɗɔɔgɨŋ ɨsɨna bɔyɛ kɨmbɨl caygɨŋ naŋ, ama kɨŋ laa hɨnga ga ɗari bɨyan̰-kɨmbɨl a cay ɨsɨna.