Magtubu di Pol wal bɨn̰ kalaŋ ga Rɔm 11 - Gabri Maja

Kumu ɗa te wɨn̰je gɨ da Ɨsɨrayɛl coŋ naŋ

¹ Aŋ ɨngɨrgəŋ ɗaŋ coŋ sol: Kɛ, Kumu ɗe te kalaŋ kayi ga na te wɨn̰je gɨ da Ɨsɨrayɛl le coŋ yɔd ga? Cə, na hɨn̰ wo̰ naŋ bɨrɨŋ! Ɨŋ-bandi dan̰ gusɨnɨ kalɨn̰ ma ban pɔɗɔŋ bɨ, ɨŋ na a te wɨn̰je gɨ da Ɨsɨrayɛl gɨŋ bɨ, a te mon̰ gɨ da Abɨraham gɨŋ bɨ, a te wɔɔ gɨ da Bɛ̰jamɛ̰ gɨŋ bɨ.

² Kumu ɗa te kalaŋ kayi ga ban torge tumɔ ɓɨrag hayi le coŋ naŋ. Kɛ kɔl gɨ walge a duroy Magtubu di da Kumu dɨŋ ojɨn̰ cay ba-yɔɔ-kɔl-gɨ-Kumu-ba-yɔɔ Eli le, kɨŋ hal gɨybəŋ cay nee ga? A kɨɗɨn̰di ga pɨna gaŋ na, ban yen̰ kɔl Kumu bɨ, ɨlɨn̰ gusi a cay te wɨn̰je gɨ da Ɨsɨrayɛl tumoy Kumu. Eli ɨle gusi ye hɨn̰:

³ «Ay Ba-gulɔŋ, sɨla kan dɨɗɨge ka-yɔɔ-kɔl-gɨ-Kumu-ba-yɔɔ kan̰ coŋ bɨ, dosdege kɨɗɨn̰ kan̰ ga kan gaɗɨge kɨya bogɨn̰ kɨbar nee nɔm coŋ bɨ. Na ɨŋ-bandi pɨna hange ba bɔɔ bɨ, kan malge gɨ ni dɨɗəŋ nee coŋ ƴee bɨ.»

⁴ Ama kɔl gɨ Kumu jɨga dɨbii cay nee le, kɨŋ sol ga? Ban ye hɨn̰: «Ɨŋ gam kalaŋ duroyge won̰ dubu jurgum, ga pɨyage gɨbayge tumoy kula gɨ ni Baal gɨŋ naŋ.»

⁵ Haw kɛ kalɨn̰ ma, na hɨn̰ wo̰ bɨ, te kalaŋ ga baa ga Kumu torge le baage nee ƴee, kan na kalaŋ ga Kumu torge dan̰ gɨyəŋ gɨ da ɗarwa toyi.

⁶ Ama hɨn̰ gɨ hɨnga ga nee le na laa gusɨge naa dan̰ gɨyəŋ gɨ da ɗarwa na, laa gusɨge na dan̰ gɨyəŋ gɨ da gɨye-lɔɔdɨge naŋ. Hɨn̰ gɨ Kumu na tɨrage naa dan̰ gɨyəŋ gɨ da gɨye-lɔɔdɨge na, ɗarwa kɨya bɨle na ɗarwa naŋ ɨni.

⁷ Kɛ, ni gɨ yɔ na wa ga? Te wɨn̰je da Ɨsɨrayɛl waage hɨnga ga kan malge le naŋ. Ama na kalaŋ ga Kumu torge ƴɔbɨ ba wɔɔge. Toyge ga baa na, ɗugoyge say dɨmbɨre.

⁸ Hɨn̰ gɨ ba walge a duroy Magtubu di da Kumu dɨŋ yege hɨn̰: «Kumu gɨygɨn̰ dan̰ turnɔ di ni kuŋ a cayge bɨ, Lee gɨ cɨndɨge sɨla kɨɗɨn̰ naŋ bɨ, Sɨmayge ja kɔl naŋ bɨ, Bɨrɨŋ gɨsɨn̰ labɨde.»

⁹ Ɨni na, kɨlma Dabid kalɨn̰ ma ye hɨn̰: «Kuɗa gɨ hɨnga ga ni dɔɔ, Ga da gusi-mɔwa kage Bɨl boy di ɗe gɨybige bɨ, Bɨl bandɨ di kan kɨya bɔɔ nee bɨ, Bɨl gundi sɨya gɨ ba dɔgɛ tɨbayge Ɗe cay kɔbɔ gɨ da gɨye-lɔɔdɨge, Gɨ ɨsɨni ɓalɨn̰ dan̰ kɨbɨge bɨ.

¹⁰ Kuɗa gɨ cɨndɨge dɨba ɨndi; Ɗe solɨn̰ge kɨɗɨn̰ naŋ bɨrɨŋ ɨni bɨ, Laa gɨ ɗe kan gɨlge-cɨn̰ bɨrɨŋ, Gɨ kardɨge gongɨrdɨn̰ toy nee bɨ.»

¹¹ Aŋ ɨngɨrgɨŋ ɗaŋ coŋ sol: Dɔgɛ gɨ te wɨn̰je gɨ da Ɨsɨrayɛl ba de tɨbayige a gundi sɨya gɨŋ le, na ɗe gɨ ban na baa yɔd dan̰ cɨndi ga? Cə, na hɨn̰ wo̰ naŋ bɨrɨŋ! Ama dan̰ gɨyəŋ gɨ da hɨnga ga dan̰ gɨyəŋdɨge naŋ ga Jubɨn̰əŋ leege le, kalaŋ ga toyge na Jubɨ naŋ wan̰ge pɔɗɛ ɨni, ɗe jangɨ na leen̰ Jubɨn̰əŋ.

¹² Hɨn̰ gɨ hɨnga ga dan̰ gɨyəŋdɨge naŋ ga Jubɨn̰əŋ leege, na ɨren̰ dan̰ ɗarwa a cay te wɨn̰je gɨ da kalaŋ ga a cay gɨsəŋ gaŋ nɔm bɨ, hɨn̰ gɨ bɔɔ gɨ kan ba na ɨren̰ dan̰ tɔrɛ-kɨbɨ gɨ gumu a cay kalaŋ ga toyge na Jubɨ naŋ bɨ na, kɛ kɨɗɨn̰ ga te wɨn̰je gɨ da Ɨsɨrayɛl na jɨge a te gɨyəŋ gɨŋ na, gɨ bɨle na tɔrɛ-kɨbɨ gɨ gumu cɨla coŋ naŋ ga?

Pɔɗɛ gɨ da kalaŋ ga toyge na Jubɨ naŋ

¹³ Haw kɛ na, aŋ yəgɨŋ kɨŋ-gandi ga na te kalaŋ ga toyge na Jubɨ naŋ. Ɨŋ-bandi na, ɨŋ na ba-gɨre-gɨye gɨ Kumu gɨyəŋ kol te kalaŋ ga toyge na Jubɨ naŋ. Ɨŋ lee gusi-mɔwa gɨɗaŋ a cay gɨye hɨnge gɨ gusondi ye.

¹⁴ Bɨ ɨŋ lee gɨye gɨ nee le ɨrɨmɨn̰ gɨ karmɨnɨ ga ni kɨbarnɨ ga na Jubɨ na laan̰ge jangɨ koldi, aŋ na poɗɨn̰ kan ga pɨna duroyge.

¹⁵ Hɨn̰ gɨ cɔrɛ gɨ Kumu ba cor Jubɨn̰əŋ ɗege sɛdɨ le, na laa ɗe gɨ kalaŋ ga a cay gɨsəŋ gaŋ na bugoŋge pɨna dan̰ Kumu na, kɛ wɔlɛ gɨ Kumu na jɨga ƴɨmage gusi ɗaŋ coŋ na gɨ bɨle wɔyɛ na mɨna mɨna coŋ ga? Kalaŋ ga mage kɨya bɔyɛge lɨbe!

¹⁶ Ama sɨlagɨŋ, hɨn̰ gɨ ji na aya cay gasa kan̰ ga cay wase si dan̰ cɨndɨge bɨn̰ Kumu na, kɛ toyge di baa kalɨn̰ ma gɨ wɔyɛ dan̰ cɨndɨge naŋ ga? Hɨn̰ gɨ sarnay hɨya na wɨya dan̰ cɨndi na, kɛ kobɨn̰i kalɨn̰ ma gɨ wɔyɛ dan̰ cɨndɨge naŋ ga?

¹⁷ Te wɨn̰je gɨ da Ɨsɨrayɛl woy gɨlɨn̰ na hɨn̰ hɨyadi olibɨye gɨ woy ɨndi gɨ sɨrdɨrdege kobɨn̰i ga pɨna coŋ wo̰. Ji gɨ na Jubɨ naŋ le, ji woy gɨlɨn̰ na hɨn̰ kobɨ hɨyadi olibɨye gɨ caa gɨŋ wo̰. Kan ayɨn̰ge bɨ, sɨlɨyɨn̰ge dan̰ hɨya gɨ woy a ɨndi a ban̰dɨ kobɨn̰i ga sɨdɨrdege coŋ le. Na toy di hɨn̰ wo̰ ma, ji-bandi kalɨn̰ ma, ji kɨya sɔmɛ-bɨra na kɨya cay sarnayn̰əŋ ga ɗadɨrdaŋ dan̰ kobɨn̰i ga baa.

¹⁸ Na hɨn̰ wo̰ ma, uja gɨ ji kɨya dɔgɛ jorgɨn̰ a cay kobɨn̰i ga sɨdɨrdege coŋ naŋ. Hɨn̰ gɨ ji na gey dɔgɛ jorgɨn̰ kalɨn̰ ma, ɨrɨm gɨ ji-bandi ba bɨn̰ sarnay hɨya sɔmɛ-bɨra naŋ, ama na sarnay hɨya ba bɨn̰ ji-bandi sɔmɛ-bɨra.

¹⁹ Gajanaŋ, ji kɨya yɔ hɨn̰: «Ba-gulondi yage le sɨdɨrde kobɨ hɨyan̰əŋ ga nee le coŋ na gɨ ay na sɨlɨn̰əŋ ɨŋ-bandi a ban̰dɨge.»

²⁰ Kɔl kon̰ na cɨndi. Ama hale gɨybəŋ naŋ, kan sɨdɨrdege coŋ na kɨya gɨ kan bɨgage kuduroyge a cay Kumu naŋ, ama ji-bandi na ji som ban̰dɨge na kol bɔgɛ kudurɔ kon̰ ƴɔbɨ. Dɔgɛ jorgɨn̰ naŋ. Ɗa muɗɔlɛ a cay gusɨn̰ gɨŋ.

²¹ Hɨn̰ gɨ Kumu na dɨra cɨn̰ kobɨ hɨyan̰əŋ ga ɓɨrag naŋ na, ji-bandi kalɨn̰ ma, ban kɨya dɔrɛ cɨndɨn̰ naŋ bɨ.

²² Ɨrɨm a cay ɗarwa di da Kumu dɨŋ bɨ, a cay osɨwa koyi gɨŋ bɨ. Ban gɨl osɨwa koyi dan̰ kalaŋ ga andaŋge a te gɨyəŋ gɨŋ coŋ, ama ban sol cɨn̰-n̰age ton̰ tɔgɨ kɨɗɨn̰ ga ji na sɨma usa a te ɗarwa toyi dɨŋ. Hɨn̰ gɨ ji na ɨr usa cay nee naŋ na, ji-bandi kalɨn̰ ma kan kɨya sɨrɨn̰ coŋ bɨ.

²³ Te wɨn̰je gɨ da Ɨsɨrayɛl kalɨn̰ ma, hɨn̰ gɨ kan ni na ɗa kuduroy-dɨmbɨrwa koge coŋ na, Kumu ni kɨya jɨgan̰ danage sɨlɨn̰ɨge a ban̰dɨge di tumɔ dɨŋ di kan somɨn̰ nee gaŋ, kɨya wa Kumu orɨn̰ dan̰ dɔnɔ di ni jɨga sɨlɨn̰ɨge nee ɗaŋ.

²⁴ Na cɨndi, ji-bandi le ji na kobɨ hɨyadi olibɨye gɨ caa gɨŋ gɨ Kumu an̰ sɨlɨn̰ɨn̰ a hɨyadi olibɨye gɨ busoni a ƴaa dɨŋ, kɨɗɨn̰ ga nee le na kɨɗɨn̰ ga uja na can̰ ɓɨrag naŋ. Naa hɨn̰ wo̰ na, kɨya osɨwa dan̰ Kumu gɨ ni jɨgan̰ dan̰ kobɨ hɨyan̰əŋ ga ban sɨrge coŋ le naŋ bɨ, ban kɨya sɨlɨn̰ɨge a ban̰dɨge di ɓɨrag dɨŋ ɗaŋ coŋ bɨ.

Pɔɗɛ gɨ da te wɨn̰je gɨ da Ɨsɨrayɛln̰əŋ

²⁵ Ay karmɨnɨ ga ban̰aŋ dan̰ ga kandɨ, ɨŋ gey yogɨŋ hɨnga ga woy kɨɗɨn̰ wɔsɛdɨge gaŋ. Ɨŋ gey gɨ kɨŋ na sɨla toyge kuɗa. Naŋ na, kɨŋ da lɔɔ gusɨgɨŋ leen̰ ga muɗoli. Ga pɨna duroy te wɨn̰je gɨ da Ɨsɨrayɛl gɨŋ bɨləŋge ka-kuduroy osɨwa bɨ, kan kɨya bɔgɛ kuduroyge a cay Jesu-Kɨris naŋ bɨ. Kuduroy-osɨwa toge di nee le, kɨya wɔyɛ bɨrɨŋ gɨsɨn̰ na kɨɗɨn̰ ga te kalaŋ ga toyge na Jubɨ naŋ nɔm ga Kumu torge le na pɨɗan̰ge ƴɔbɨ.

²⁶ Dan̰ gɨyəŋ gɨ nee le na, te wɨn̰je gɨ da Ɨsɨrayɛl nɔm koge gɨŋ kɨya pɔɗɛge, hɨn̰ gɨ ba walge a duroy Magtubu di da Kumu dɨŋ yege hɨn̰: «Ban gɨ ba kɨya poɗɨge kɨya sɔɔ na a Sin̰o. Ban kɨya dɔrɛ Jagob kongɨn̰ii te ɨsɨna koge gɨŋ coŋ.

²⁷ Gɨ nee le mana saɗe kɨbɨ pɨna ɓɨse gusu, Gɨ ɨŋ kɨya lɔɔ danage, Kɨɗɨn̰ ga ɨŋ kɨya dorɨn̰ ɨsɨna koge coŋ.»

²⁸ Gɨ ojɨ cay Kɔl-gɨ-ɗari na, te wɨn̰je gɨ da Ɨsɨrayɛl woyge na ka-baa ga da Kumu kol cay ɗarwa togɨŋ kɨŋ-gandi ga na Jubɨ naŋ. Ama ojɨn̰ cay dɔrɛ gɨ Kumu dorgɨŋ na, Kumu lee-toyige kol cay mon̰iige.

²⁹ Hɨn̰ gɨ Kumu na bɨn̰ ungo hɨnga ga ni bee-kalɨn̰ na, ban jɨga ƴa kobi daa naŋ bɨ. Hɨn̰ gɨ ban na tɨga ungo na, ban jɨga tayayi naŋ bɨ.

³⁰ Jɨne naa, kɨŋ hangɨɗɨ cay kɔl kɨbɨ Kumu, ama haw kɛ na Kumu sol cɨn̰-n̰age togɨŋ, kɨya wa te wɨn̰je gɨ da Ɨsɨrayɛl hangɨɗɨ cay kɔl.

³¹ Koge kan kalɨn̰ ma na hɨn̰ wo̰ bɨ, haw kɛ na kan haŋdɨge cay kɔl lee gɨ Kumu solɨn̰ cɨn̰-n̰age togɨŋ. Ama Kumu lee hɨn̰ wo̰, kɨya solɨn̰ cɨn̰-n̰age toge kardi nee bɨ.

³² Kumu ɗe kalaŋ ga ɨndəŋ nɔm ɗe na hangɨɗɨn̰ge cay kɔl kɨya wa kagadi gɨŋ na, Kumu kɨya sɔlɛ cɨn̰-n̰age di da kalaŋ ga ɨndəŋ nɔm ɓalɨn̰a dɛj dɛj.

Kumu gumu lee hundɔrɔ tɔgɨ

³³ Na cɨndi, kandi-wɔɔ ga da Kumu ɗɨn̰ cɨn̰-kɨɗɨn̰. Cɨn̰-muɗɔlɛ koyi bɨ, hɨnga-sɔlɛ kayi bɨ, kagadɨge unɔ. Cɨn̰-muɗɔlɛ di da dɔɔ-ƴaa toyi ɗɨn̰ cɨn̰-kɨɗɨn̰. Gɨyəŋ gɨ da lɔɔ hɨnga kayi dor turnoy kɨɗɨn̰ bɨrɨŋ gɨ ungo ɓala dɔrɛ toyge naŋ,

³⁴ hɨn̰ gɨ Magtubu di da Kumu ba ye hɨn̰: «Kɛ, na waŋ ba sɔlɛ ɨrɨme gɨ da Ba-gulɔŋ Kumu ga? Naŋ le kɛ, na waŋ ba bɨle ba bogii kɔl kuduroy ga?»

³⁵ «Kɛ, na waŋ ba bɨn̰ Kumu tugɨla, Ɗe Kumu na jɨgen̰ daa bii ban̰di nee ga?»

³⁶ Ho’o, hɨnga nɔm sayga na gusi Kumu bɨ, woy haw kɛ na dan̰ gɨyəŋ koyi bɨ, kol cayi bɨ. Kuɗa gɨ gusoŋ-tɔgɛ wɨya kol cayi dan̰ tumoyi! Ɗa-ɗe-woy-hɨn̰-wo̰!