Pilib 3 - Gabri Maja

Gɨyəŋ gɨ ni bɨlɨn̰ durɔ ɗɨngar

¹ Gɨ ojɨ cay te kɔl gɨ ba baa na, ay karmɨnɨ ga ban̰aŋ dan̰ ga kandɨ, laagɨŋ gusi-mɔwa cay bugoŋ gɨ kɨŋ bugoŋ pɨna dan̰ Ba-gulɔŋ. Jɔgɛ wale magtubu bɨgɨŋ ojɨn̰ cay hɨnga ga pɨna hage ga ɨŋ ba yəgɨŋ koldɨge tumɔ le usaŋ naŋ. Ɨŋ jɨga ye hɨn̰ wo̰ ɗaŋ, na ɗe gɨ na laa danagɨŋ.

² Ɗagɨŋ muɗɔlɛ a cay gusɨgɨŋ gɨŋ ujan̰ cay kalaŋ ga woyge hɨn̰ gaye wo̰! Kan na ka-lɔɔ gɨye dan̰ ɨrɨme ga ɨsɨni. Kan solge wale ban̰a leen̰ hɨnga ga ɗari tɔgɨ bɨ, aŋ yəgɨŋ ɗaŋ coŋ ɗagɨŋ muɗɔlɛ a cay gusɨgɨŋ gɨŋ kɨya cayge.

³ Kan yege gɨ ke naa ka-wale ban̰a, ama na ni-gandi ma na ka-wale ban̰a ga leen̰ cɨndi. Kɨya wa ni-gandi ni lee gɨye bɨn̰ Kumu na dan̰ gɨyəŋ gɨ da Turnɔ ɗe-kuduroy-bɛrɛ bɨ, ni de jorgɨyni na te bugoŋ pɨna dan̰ Jesu-Kɨris bɨ, ni bɨga kuduroyni na a cay hɨnga ga uja cay kuyoŋdi-gusɨni gɨŋ naŋ bɨ.

⁴ Hɨn̰ gɨ ɨŋ na gey na, ɨŋ-bandi kalɨn̰ ma ɨŋ ɓal gɨ ni bɔgɛ kuduronɨ a cay kuyoŋdi-gusɨnɨ gɨŋ bɨ. Hɨn̰ gɨ ungo na ɨrɨm gɨ ɗi na orɨn̰ dan̰ gɨyəŋ gɨ ni bɔgɛ kuduroy a cay hɨnga ga da kuyoŋdi-gusi gɨŋ na, ɨŋ-bandi kalɨn̰ ma ɨŋ ɨrɨm ɗɨn̰ koyi coŋ ƴee.

⁵ Wɔɔŋge lee wɔlɛ margɨm bɨ walaŋge ban̰a, ɨŋ na a te wɔɔ gɨ da te wɨn̰je gɨ da Ɨsɨrayɛl bɨ, a te wɨn̰je gɨ da Bɛ̰jamɛ̰ gɨŋ bɨ, ɨŋ na Əbɨro gɨ Əbɨron̰əŋ ba wɔɔŋge bɨ. Gɨ ojɨn̰ cay hɨnga ga ni lɔɔ ga da gasɨn̰-kɔl ga da Jubɨn̰əŋ na, ɨŋ na a te kalaŋ ga da Parɨsɨn̰an̰əŋ gaŋ.

⁶ Gɨ ojɨ cay gusi-hɨmbalwa na, ɨŋ lun̰doŋ kardi gasɨn̰-kɔl osu bɨrɨŋ gɨ ɨŋ gɨlɨn̰ Ka-Daye cɨn̰-gɨle-cɨn̰ gɨɗaŋ. Ungo wo̰ kɨya ɓale dɨbe kɔl canɨ gɨ ɨŋ na hangɨɗɨ cay gasɨn̰-kɔl naŋ, kɨya wa ɨŋ bee kɔl cay nee ɗəndəŋ.

⁷ Ama hɨnga ga tumɔ ɨŋ ba bee kuduronɨ cay nee kɨya won̰ hɨnga le, ɨŋ say ɗege coŋ bɨ ɨŋ solge hɨn̰ hɨnga ga kalɨn̰ wo̰ dugo kɨya cay Kɨris.

⁸ Ho’o, ɗɨn̰ gɨ nee le na, sɔlɛ Jesu-Kɨris Ba-gulonɨ say kuɗa ɗɨn̰ hɨnga nɔm bɨ, ɨŋ sol hɨnga ga ɗaŋ leen̰ hɨnga ga kalɨn̰ wo̰ dugo bɨ. Kɨya cay Kɨris na, ɨŋ ɗe hɨnga nɔm ga ɨŋ orɨn̰ coŋ. Hɨnga ga tumɔ na ga ɗari cɨnɨ le, ɨŋ solge leen̰ hɨnga ga mɨdagi ɗe aŋ na wan̰ hɨnga ga ɗari ga gumu. Hɨnga ga nee le na bugoŋ pɨna dan̰ Kɨris.

⁹ Ɨŋ gey gɨ bugoŋ hɨnge pɨna danayi na duroŋ cɨrɛɗ. Na toy di hɨn̰ wo̰ ma, ɨŋ gey lɔɔ gusɨnɨ leen̰ ungo gɨ dan̰ durɔ ɗɨngar dan̰ gɨyəŋ gɨ da lɔɔ hɨnga ga gasɨn̰-kɔl ojɨ naŋ. Ama ɨŋ gey bɨle ungo gɨ dan̰ durɔ ɗɨngar dan̰ gɨyəŋ gɨ da kuduronɨ ga ɨŋ bɨn̰ Kɨris, kɨya wa gɨyəŋ gɨ Kumu bɨlɨn̰ kalaŋ durɔ ɗɨngar le, na gɨyəŋ gɨ da aye kudurɔ.

¹⁰ Ɨŋ wɨraŋde na ɗe gɨ aŋ na solɨn̰ Kɨris bɨ, dɔnɔ di da bɔyɛ lɨbe koyi bɨ. Ɨŋ wɨraŋde na ɗe gɨ aŋ na bugoŋ pɨna danayi boy cɨn̰-gɨle-cɨn̰ toyi dɨŋ bɨ, ɗe aŋ na gɨlɨn̰ hɨn̰ ban wo̰ boy tɨmaydi dɨŋ bɨ.

¹¹ Na toy di hɨn̰ wo̰ ma, dan̰ gɨyəŋ gɨ ani ani kalɨn̰ ma, Kumu bɔyɔŋ lɨbəŋ duroyi kalaŋ ga madɨrdaŋ gaŋ bɨ.

Gɨre cɨndɨn̰ jɨn̰ gusi Jesu

¹² Hɨnga ga ɨŋ ba gɨre koldɨge le ɨŋ ɨsɨma dan̰ kɔbɔŋ mɛj naŋ ƴee bɨ, ɨŋ duroŋ cɨrɛɗ naŋ ƴee bɨ. Ama ɨŋ gɨre cɨnɨ jɨn̰ cay hɨnga ga woy tumonɨ, ɗe aŋ na osɨmɨn̰ hɨnga ga ɨŋ gɨre koldɨge le dan̰ kɔbɔŋ mɛj, hɨn̰ Jesu-Kɨris kalɨn̰ ma ba ɔsɨmɔŋ dan̰ kobi wo̰ bɨ.

¹³ Ay, karmɨnɨ ga ban̰aŋ dan̰ ga kandɨ, ɨŋ ɨrɨm hɨn̰ gɨ ɨŋ na ɨsɨma hɨnga dan̰ kɔbɔŋ mɛj naŋ ƴee, ama ɨŋ lee na hɨnga pɨna nɛŋ: Ɨŋ ɗe kuduronɨ hal gɨybəŋ a cay hɨnga ga ɨŋ ɗe karɨnɨ, ƴomɨn̰ gusɨnɨ osu won̰ kɨbɨ gɨre gɨŋ ojɨn̰ cay hɨnga ga woy tumonɨ.

¹⁴ Ɨŋ gɨre cɨnɨ jɨn̰ gusi hɨnga ga woy tumonɨ ɗe aŋ na wan̰ hɨnga ga ni cay-kɔbɔ ga Kumu tena koldɨge te bugoŋ pɨna dan̰ Jesu-Kɨris ɗe ana na orgɨŋ wɔɔ a gɨɗɨgɨ-Kumu gɨŋ le.

¹⁵ Kuɗa gɨ na-gandi nɔm ga cɨndɨna naa a te aye kudurɔ gɨŋ le, na kɨba ɨrɨme gɨ pɨna hayi gɨ nee le. Ama hɨn̰ gɨ hɨnga ga pɨna na wɨya, ma te tumoygɨŋ na ɓalɨn̰a cay nee naŋ kalɨn̰ ma, Kumu kɨya haŋge cɨndɨgɨŋ cay nee.

¹⁶ Ama naa hɨn̰ wo̰ kalɨn̰ ma, kuɗa gɨ na or cɨndɨna tumɔ a te gɨyəŋ gɨ na ba ɨre boy nee bɨrɨŋ gɨsɨn̰ labɨde le.

¹⁷ Ay, karmɨnɨ ga ban̰aŋ dan̰ ga kandɨ, kuɗa gɨ kɨŋ-gandi nɔm kɨŋ ƴɨla gɨye-lɔɔnɨ. Hɨnga ga kalaŋ kɨya ƴɔlɛ le, ni-gandi ni lee ɨni. Na toy di hɨn̰ wo̰ ma, kuɗa gɨ cɨndɨgɨŋ wɨya a cay kan ga leege gɨye-lɔɔ gɨ ni ba gɨlge le.

¹⁸ Ɨŋ ye kɔl gɨ nee le, kɨya wa kalaŋ ga geyge kɔl gɨ da sɨya-gɨ-dagɨli gɨ da Kɨris naŋ woyge nee dan̰ kondiige, hɨn̰ gɨ ɨŋ ba yəgɨŋ tɨba kondɨ le, ma maŋ jɨga yəgɨŋ haw kɛ dan̰ kaŋdi cɨnɨ.

¹⁹ Kalaŋ ga nee le a dɨɗe kɨbi gɨŋ na kan kɨya mundoŋ. Kɨya wa kumu koge na kuduroyge bɨ, gusoŋ-tɔgɛ koge woy na boy hɨnga ga di dasi gaŋ bɨ, kan na hɨnga ga ƴom kuduroyge le, na hɨnga ga a cay gɨsəŋ gaŋ kɛ ƴɔbɨ.

²⁰ Ama na-gandi na, na na kalaŋ ga cay ƴaadɨna na a gɨɗɨgɨ-Kumu gɨŋ. Gɨɗɨgɨ-Kumu na kɨɗɨn̰ ga ba-pɔɗɛ kalaŋ Ba-gulondɨna Jesu-Kɨris gɨ na ba som gamii le, kɨya sayga nee ɨrga a cay gɨsəŋ gaŋ.

²¹ Jesu kɨya bɨle kuyoŋdi-gusɨna gɨ togi unɔ gɨ kɨya mare le, ɗe bɨle woy hɨn̰ kuyoŋ-gusu gɨ orɨn̰ dan̰ gusoŋ-tɔgɛ wo̰. Ban kɨya lɔɔ hɨnga ga nee le, na dan̰ dɔnɔ di ban orɨn̰ kɨya dobɨn̰ hɨnga nɔm a te dɔnɔ toyi dɨŋ.