Pilib 2 - Gabri Maja

Ayagɨŋ cay tɨbay Jesu

¹ Hɨnga ga beena pɨna dan̰ Kɨris ga dobɨ bandɨ kuduroyna wɨya nee naŋ ga? Hɨnga ga bɨna tɔgɨ a te geye gɨŋ wɨya nee naŋ ga? Kɨŋ bugoŋ pɨna te Turnɔ di da Kumu ɗe saɗɨna pɨna le naŋ ga? Kuduroyna ga woy a cay gusɨna wɨya nee naŋ ga? Sɔlɛ cɨn̰-n̰age da gusɨna wɨya nee naŋ ga? Ho’o woy nee.

² Hɨn̰ wo̰ na, bugoŋgɨŋ pɨna ɗe gusi-mɔwa tɨnge duroŋ cɨrɛɗ. Kuɗa gɨ geye gɨ pɨna hayi gɨ nee le, ba ƴɔmɛ kuduroygɨŋ bɨ, kuɗa gɨ ɨrɨmedɨgɨŋ wɨya pɨna bɨ, hɨnga ga kɨŋ kɨya male lɔɔ le na bɔgɛ toygɨŋ pɨna.

³ Lɔɔgɨŋ hɨnga pɨna wo̰ dan̰ gɨyəŋ gɨ da jangɨ naŋ bɨ, dan̰ gɨyəŋ gɨ da dɔgɛ jɔrgɔ gɨ kalɨn̰ wo̰ dugo naŋ bɨ. Ama dan̰ dɔbɛ-ca na, kuɗa gɨ waŋ waŋ kalɨn̰ ma sɨla mɨgayi hɨn̰ gɨ gumu ɗii.

⁴ Ɗɔ gɨ waŋ waŋ kalɨn̰ ma se cɨndi kardi hɨnga ga ojɨ cayi toyi ƴɔbɨ naŋ, ama kuɗa gɨ ban si cɨndi ujan̰ cayi hɨnga ga da kamdi bɨ.

⁵ Kuɗa gɨ haldɨgɨŋ gɨ kɨŋ kɨya orɨn̰ le bugoŋ pɨna dan̰ hal gɨ da Jesu-Kɨris.

⁶ Kɨris le hɨnga nɔm ga a gusi, Gɨl gɨ ban naa Kumu hɔlɔlɔ. Ama ɓalɨn̰a gɨ ban ɓalɨn̰ dan̰ Kumu le, Ban ƴɨma kardɨge naŋ.

⁷ Ban gusi koyi ɗe hɨnga Nɔm ga ban orɨn̰ le coŋ, Dan̰ kuduroy geye koyi. Bɨ bɨle guyɔŋ. Ban bɨle woy hɨn̰ ungo wo̰ bɨ, Kalaŋ soliige leen̰ ungo gɨ ɨndi bɨ.

⁸ Ban dobɨ cayi dugo dan̰ kuduroy geye koyi, Lee gɨ jen̰ kɔl kɨbɨ Kumu bɨrɨŋ marɨn̰, Marɨn̰ tɨma di a cay sɨya-gɨ-dagɨli gɨŋ.

⁹ Na toy di hɨn̰ wo̰ ma, Kumu ayi ɗey daa cay hɨnga nɔm bɨ, Bii gusoŋ gɨ ɗɨn̰ cay gusoŋn̰əŋ nɔm bɨ.

¹⁰ Ɗe gɨ dan̰ guson̰ Jesu na, Kalaŋ ga a gɨɗɨgɨ-Kumu gaŋ bɨ, cay gɨsəŋ gaŋ bɨ, te gɨsəŋ gaŋ bɨ, Nɔm na poyɨn̰ge mɨrɛgi tumoyi bɨ,

¹¹ Ɗe gɨ kɨbɨ te wɔɔ gɨ da kalaŋ nɔm ye gɨ Jesu-Kɨris naa Ba-gulɔŋ, Kɨya dɨbɨn̰ gusoŋ-tɔgɛ cay bayi Kumu.

Bɨlgɨŋ asɨn̰a a duroy kalaŋ

¹² Ay karmɨnɨ ga ɨŋ lee-toygɨŋ, kɨŋ je kɔl kɨbɨ Kumu dan̰ wɔlɛ pɨna pɨna, hɨn̰ boy wɔlɛ gɨ ɨŋ ba won̰ duroygɨŋ le. Haw kɛ gɨ ɨŋ ba unɔ duroygɨŋ kalɨn̰ ma, kɨŋ je kɔl kɨbɨ Kumu ɗɨn̰ gɨ tumɔ coŋ. Leedɨdɨn̰ gɨye a cay pɔɗɛ kogɨŋ gɨŋ dan̰ bɔgɛ kɔl bɨ dan̰ lɔɔ pag pag bɨ.

¹³ Ho’o, na Kumu gusi ba lɔɔ gɨye kuduroygɨŋ bɨ, bɨgɨŋ kuduroy-geye dan̰ tɔgɨ ɗe agɨŋ na leen̰ hɨnga ga ɗari ga ban ojɨ.

¹⁴ Laagɨŋ hɨnga nɔm dɨle yon̰ cɔɗ cɔɗ bɨ, dɨle man̰e kɔl cay nee bɨ,

¹⁵ ɗe agɨŋ bɨlɨn̰ kalaŋ ga masadɨge unɔ bɨ, duroŋge mɨra bɨ, karɨn̰ Kumu ga hɨnga ga ɨsɨni dḛ wo̰ cɨlge naŋ bɨ, ga sɨmage duroy kalaŋ ga dan̰ durɔ ɗɨngar gaŋ naŋ, naŋ bɨ, duroy kalaŋ ga mundoŋ coŋ ga a cay gɨsəŋ gaŋ kɛ naŋ bɨ. Wɨyagɨŋ duroyge hɨn̰ dɨngɛ di asɨn̰ duroy dɨlɨm dɨŋ wo̰,

¹⁶ kɨya gɨlɨn̰ kɔl gɨ ni somɨn̰-bɨra. Hɨn̰ gɨ kɨŋ na bɨl wɨya hɨn̰ wo̰ na, ɨŋ kɨya ɓale aye canɨ daa a boy wɔlɛ gɨ Kɨris kɨya cagan̰ gɨŋ. Bɨ na hɨnga ga nee le ba kɨya gɨle gɨ gɨye hɨnge nɔm bɨ gɨlale hɨnge nɔm bɨ le, na hɨnga ga kɨya ban̰ gusɨnɨ naŋ.

¹⁷ Ko hɨn̰ gɨ na uja gɨ kɨbarnɨ na gɨ bugoŋ dugo hɨn̰ cɛrɛ di suru gɨ kan beege a cay hɨnga ga ni bogɨn̰ kɨbar hɨn̰ gɨ kɨŋ ba leede wo̰ bɨn̰ Kumu kɨya cay aye kudurɔ kogɨŋ kalɨn̰ ma, mɔŋ bɨ, ɨŋ kɨya lɔɔ gusi-mɔwa danagɨŋ nɔm bɨ.

¹⁸ Kɨŋ-gandi kalɨn̰ ma, kuɗa gɨ kɨŋ laa gusi-mɔwa bɨ, kɨŋ laa gusi-mɔwa danaŋ bɨ.

Timote bɨ Epapərodit bɨ

¹⁹ Kardi nee lam wo̰ na, ɨŋ sol leen̰ cɨndi gɨ Ba-gulɔŋ Jesu kɨya haŋge gɨyəŋ bəŋ gɨ ni gɨyɨn̰ Timote gusɨgɨŋ. Ɗe kɨɗɨn̰ ga ban se gusɨgɨŋ jɨge na, na dɨban̰ bandɨ kuduronɨ dan̰ kɔl kogɨŋ gɨ ban kɨya ɨrga dɔrɔŋ le.

²⁰ Timote pɨna hayi ma na ba gɔsɨnɛ kɔl gɨ ƴom kuduronɨ danaŋ, lee gɨ ban sol kol caygɨŋ leen̰ cɨndi.

²¹ Kalaŋ nɔm malge na hɨnga ga kɨya ɨrgan̰ dan̰ ɗarwa di da kuyoŋdi-gusɨge koge ƴɔbɨ, ama na hɨnga ga kɨya ɨrgan̰ dan̰ ɗarwa kol cay Jesu-Kɨris naŋ.

²² Ama ban na gɨl doŋ gɨ ɗi naa ungo gɨ ɨre a cay tɨbay dɨŋ. Hɨn̰ gɨ kɨye ba ɨrɨn̰ durdi bayi leen̰ gɨye le, Timote kalɨn̰ ma ɨre a kɨbɨ gɨye gɨ da tɔgɛ bɛrnɛ Kɔl-gɨ-Ɗari gɨŋ danaŋ bɨ.

²³ Ɨŋ sol gɨ na ban ma maŋ kɨya gɨyii gusɨgɨŋ, kɨɗɨn̰ ga ɨŋ na sɨla kɔl gɨ uja canɨ arɨn̰a.

²⁴ Ɨŋ-bandi kalɨn̰ ma, ɨŋ si kuduronɨ pɨna na cay Ba-gulɔŋ, gɨ na baŋ mɨnde gɨ ɨŋ-bandi dan̰ gusɨnɨ kalɨn̰ ma, ɨŋ kɨya ɔrɛ gusɨgɨŋ.

²⁵ A boy ɨrɨme hɨnge gɨŋ na, ojɨ gɨ ɨŋ na gɨyɨn̰ dan̰ kurɨnɨ Epapərodit gɨ lee gɨye danaŋ bɨ, ni ɨre kɨbɨ wɔrɨn̰ɛ gɨŋ pɨna le bɨgɨŋ. Na cɨndi, na kɨŋ-gandi ba gɨyɨn̰ danayi bəŋ ɗe na ɨrgan̰ dan̰ hɨnga ga ɨŋ or n̰agedɨge bəŋ.

²⁶ Ama tabɨlaŋdɨgɨŋ nɔm leeyi tɔgɨ bɨ, jɔɔ gɨ kɨŋ je kɔl hɔmɨn̰ɛdi le say bii ɨrɨme tɔgɨ.

²⁷ Na cɨndi, tumɔ hɔmɨn̰ɛ leeyi tɔgɨ, bay mɨnde gɨ ban kɨya mare. Ama Kumu sol cɨn̰-n̰age toyi, ban sɨla na cɨn̰-n̰age toyi ban kan̰di ƴɔbɨ naŋ, ama ban sol cɨn̰-n̰age tɨnge ɨŋ-bandi bɨ. Ɗe cɨn̰-kula hɨnge san̰ cay mɨgay gɨŋ coŋ naŋ.

²⁸ Ɨŋ mal gɨ ni jɔgɛ gɨyɨn̰ danayi bɨgɨŋ haw, ɗe kɨɗɨn̰ ga ban na bugoŋ gusɨgɨŋ na, gusɨgɨŋ na moogɨŋ bɨ, ɨŋ-bandi kalɨn̰ ma ɗugonɨ na ba dugo bɨ.

²⁹ Na toy di hɨn̰ wo̰ ma, kuɗa gɨ kɨŋ ƴɨmayi gusɨgɨŋ dan̰ gusi-mɔwa gɨɗaŋ dan̰ guson̰ Ba-gulɔŋ. Aŋ yəgɨŋ, kalaŋ ga hɨn̰ wo̰ le, kuɗa gɨ kɨŋ bɨge hurɔmɔ.

³⁰ Kɨya wa ba mɨnde gɨ ban ni kɨya mare kɨya cay gɨye gɨ da Kɨris. Ban ay gusi dɨbɨ coŋ ƴen̰ ban̰dɨgɨŋ leen̰ gɨye kɨya gɨ toygɨŋ hen̰.