Matɨyo 8 - Gabri Maja

Jesu dor mada gusi ungo

¹ Jesu gɨsɨn cay garmagɨŋ dugo bɨ, dɨmdɨrdi kalaŋ kobge kardi.

² Bɨ ga ma, ba-mada gɨ pɨna wo̰, ɨrga gusi mɨnde poyi gɨbayi dugo tumoyi bɨ yeyi hɨn̰: «Ba-gulɔŋ, kɔgɨɗɔ, hɨn̰ gɨ ji na gey na, ji kɨya ɓale dɔrɛ mada le gusɨnɨ coŋ. Kɨya wa ji orɨn̰ dan̰ dɔnɔ di ni leen̰ ɗe gusɨnɨ ləŋ mɨra».

³ Jesu ay kobi ɨsɨbɨn̰ ungo le bɨ yeyi hɨn̰: «Ho’o, ɨŋ gey gɨ mada le duroŋ gusɨn̰ coŋ! Ɗe gusɨn̰ leen̰ mɨra.» Kɨɗɨn̰di ga nee gaŋ le bɨ, mada le duroŋ gusi coŋ.

⁴ Kardi nee Jesu yeyi hɨn̰: «Ja kuɗa: Yɔ koldi bɨn̰ ungo haw kɛ ɗe sol gɨ mada le na duroŋ gusɨn̰ naŋ. Ama ɨra gɨle gusɨn̰ a da ka-bɔgɛ kɨbar ɗe kan kobɨge sol kɛ mada le duroŋ gusɨn̰ leen̰ cɨndi haa bɨ ga. Ɨni na, mɨn̰ da orɨn̰ dan̰ hɨnga ga ni n̰ɨre bɨn̰ ka-bɔgɛ kɨbar, hɨn̰ gɨ gasɨn̰-kɔl gɨ da Moyis ba ye ojɨn̰ cay kalaŋ ga mada toge ba duroŋ gusɨge coŋ le, bɨ ba-bɔgɛ kɨbar le kɨya bɔgɛ kɨbar bɨn̰ Kumu. Hɨn̰ wo̰ na, kalaŋ nɔm kɨya sɔlɛge hɨn̰ gɨ mada le na duroŋ gusɨn̰ coŋ bɨ, kan kɨya ɓalege bugoŋ pɨna danan̰ bɨ.»

Jesu poɗɨ guyɔŋ gɨ da ba-cay asɨgar ga aru

⁵ Jesu bugoŋ a cay ƴaa di Kapɛrnɔm ɨni na, gumu gɨ da asɨgarn̰əŋ gɨ pɨna wo̰, gɨ na ungo gɨ Rɔm ɨrga gusi lee n̰age gusii,

⁶ ye hɨn̰: «Ba-gulɔŋ, guyɔŋ hɨnge hɔmɨn̰ɛ mɨrayi bɨ, gusi leeyi gɨɗaŋ bɨ, won̰ cay gasɨlaŋ gaŋ ƴen̰ tange nee.»

⁷ Jesu dɨbii cay nee yey hɨn̰: «Ɨŋ-bandi, ɨŋ kɨya ɔrɛ kɨya poɗii.»

⁸ Ama gumu gɨ da asɨgarn̰əŋ yey hɨn̰: «Ba-gulɔŋ, ɨŋ ɓala gɨ ji kɨya dɔbɛ can̰ a te ƴaa tɨnge dɨŋ naŋ. Ama Ji na aya noy ƴɔbɨ na, ɨŋ sol gɨ guyɔŋ hɨnge le gusi kɨya ɗoyi.

⁹ Ɨŋ ye hɨn̰ wo̰ na kɨya gɨ ɨŋ-bandi kalɨn̰ ma, ka-canɨ woyge nee bɨ. Ɨŋ-bandi kalɨn̰ ma ɨŋ orɨn̰ dan̰ asɨgarn̰əŋ ga ɨŋ som cayge bɨ. Hɨn̰ gɨ ɨŋ na yan̰ gɨ pɨna ya hɨn̰: “Ɨra” na ban or bɨ, ɨŋ na yan̰ gɨ ɗaŋ hɨn̰: “Jɨge” na ban jɨga bɨ, ɨŋ na yan̰ dan̰ guyɔŋ hɨnge hɨn̰: “Laa hɨnga ga kɛ na”, ban lee bɨ.»

¹⁰ Kɨɗɨn̰ ga Jesu je kɔl gɨ nee le na kɔl kayi yɔd bɨ, ban yen̰ kan ga kobɨge kardi le hɨn̰: «Aŋ yəgɨŋ daa waŋ na cɨndi, ɨŋ sɨla aye kudurɔ gɨ gɨlɨn̰ hɨn̰ wo̰ le, a gusi ungo pɨna wo̰ a cay gɨsəŋ ga Ɨsɨrayɛl gaŋ naŋ ƴee.

¹¹ Aŋ yəgɨŋ, kalaŋ dan̰ kondɨwayge kɨya sɔge jɨn̰ te kumu dan̰ kɨɗɨn̰ ɗɔbɛ ga da tɨwa bɨ, ɨrgage sɔmɛge kɨbɨ hɨnga ga ni dɔɔ ga ni gusi-mɔwa ga gumu, dan̰ Abɨraham bɨ, Isag bɨ, Jagob bɨ, boy dɔɔ-ƴaa di daa nii dɨŋ.

¹² Ama kɨŋ ga Kumu lee dɔɔ-ƴaa ojɨn̰ caygɨŋ le, kan kɨya taygɨŋge bogɨgɨŋ doŋ pɨrɨŋ duroy dɨlɨm dɨŋ. A boy kɨɗɨn̰ ga nee gaŋ le, kan kɨya ɨlege bɨ, lɔydɛge gasɨndɨge kɛɗɛɗɛ kɛɗɛɗɛ bɨ.»

¹³ Kardi nee ɨni na, Jesu yen̰ gumu gɨ da asɨgarn̰əŋ ga aru le hɨn̰: «Jɨga ɨra tan̰! Ɗa ɗe woy hɨn̰ wo̰ kol can̰, hɨn̰ gɨ ji ba been̰ kuduron̰ cay nee le.» Ɨni na, guyɔŋ le poɗɨ duroy tɨwado di nee dɨŋ le.

Jesu poɗɨ ka-hɔmɨn̰ɛ dan̰ kondige

¹⁴ Jesu or andaŋ a duroy ƴaa di da Pɨyɛr dɨŋ ɨni na, sol Pɨyɛr malgi a cay gasɨlaŋ hɔmɨn̰ɛ gaŋ. Guso ɨl cəŋ hɨn̰ tɨwa wo̰.

¹⁵ Ban ɨsɨbɨ kɔbɔ bɨ, guso gɨ ɨl cəŋ le, ayaŋ caa coŋ. Lee gɨ hɨndi de say daa bɨ solɨn̰ kardi.

¹⁶ Dan̰ borundo, kan ɨrgan̰ge dan̰ kalaŋ ga turnɔn̰əŋ ga ɨsɨndəŋ woy kuduroyge dan̰ kondɨwayge gusi Jesu. Ban tay turnɔ ga ɨsɨndəŋ dan̰ kɔl pɨna ƴɔbɨ bɨ, poɗɨn̰ ka-hɔmɨn̰ɛ nɔm bɨ.

¹⁷ Ban lee hɨnga ga nee le, ɗe kɔl gɨ ba-yɔɔ-kɔl-gɨ-Kumu-ba-yɔɔ Ijay ba ye le, ɗe na or kɨɗɨn̰dɨge gaŋ: «Ban ay modo tonagɨŋ bɨ, don hɔmɨn̰ɛ konagɨŋ nɔm cayi bɨ.»

Kalaŋ ga geyge kɔbɛ kardi Jesu

¹⁸ Jesu sol dɨmdɨrdi kalaŋ nɨwɨrege cayi cɨɗɨgɨ ɨni na, ban ay noy bɨn̰ ka-aye-cay-tɨbayi yege hɨn̰: «Haɗanagɨŋ kaŋ ana orgɨŋ jɨn̰ kɨwa gɨ nii gɨŋ.»

¹⁹ Ba-gɨlɨn̰ kalaŋ gasɨn̰-kɔl gɨ da Moyis gɨ pɨna wo̰, ɨrga gusi bɨ yey hɨn̰: «Ba-gɨlɨn̰ kalaŋ hɨnga, ɨŋ kɨya kɔbɛ kardɨn̰ a boy kɨɗɨn̰ gaŋ nɔm ga ji kɨya orɨn̰ nee gaŋ.»

²⁰ Jesu dɨbɨn̰ ungo le cay nee yey hɨn̰: «Gajaŋ kalɨn̰ ma orɨn̰ge dan̰ umboŋdɨge nee bɨ, cɨɗəŋ ga daa orɨn̰ge dan̰ ƴaadɨge nee bɨ, ama ɨŋ-bandi Kurɨn̰-ungo le, ɨŋ wa kɨɗɨn̰ ga ni dobɨn̰ canɨ nee naŋ.»

²¹ Ungo gɨ ɗaŋ duroy ka-aye-cay-tɨbayi yey hɨn̰: «Ba-gulɔŋ, ɗaŋ aŋ or ɨmge banɨ pa dɨm.»

²² Jesu jɨga dɨbii cay nee yey hɨn̰: «Kɨba karɨnɨ, bɨ ɗa kalaŋ ga woyge hɨn̰ kalaŋ ga madɨrdaŋ wo̰ tumoy Kumu le, ɗe ɨmɨgege tɨma toge.»

Kal gɨ gumu gɨ duroŋ le Jesu nari

²³ Jesu nay boy koburo gɨ gumu gɨŋ ɨni na, ka-aye-cay-tɨbayi kobge kardi.

²⁴ Bɨ ga ma, kal gɨ gumu duroŋ a cay kuray gɨ gumu taa taa gɨŋ, lee gɨ mɛw gey ƴɔɔ cay koburo gɨ gumu le daa. Ama Jesu na woy na kuŋ kayi kɔjɨ hayi.

²⁵ Ka-aye-cay-tɨbayi ɨrgage mɨnde gusi bɨ, lɨbiige yen̰ge hɨn̰: «Ba-gulɔŋ, gɨrni nee! Ni kɨya mundoŋ.»

²⁶ Jesu yege hɨn̰: «Kɨŋ ga aye kudurɔ kogɨŋ ɓala hɨnga naŋ ƴee, kɨŋ hɨndar na kɨya wa ga?» Ɨni na, ban say ɨre daa al kal bɨ kuray gɨ gumu taa taa bɨ, kɨɗɨn̰ jɨga ɨre ɗɨngɨrɨŋ dugo.

²⁷ Kɔl kay kalaŋ bɨ, yege hɨn̰: «Ungo gɨ kɛ le na waŋ, ma kal bɨ, kuray gɨ gumu taa taa bɨ, jege kɔl kɨbi wo̰ ga!»

Jesu tay turnɔ ga ɨsɨndəŋ kuduroy kalaŋ sɔɔ

²⁸ Jesu haɗɨ kuray gɨ gumu taa taa orɨn̰ bugoŋ a cay gɨsəŋ ga da kalaŋ ga Gadara gaŋ ɨni na, kalaŋ won̰ge sɔɔ ga turnɔn̰əŋ ga ɨsɨndəŋ woy kuduroyge andaŋge cay kamɨn̰aŋ gaŋ yalge cɨndi. Turnɔn̰əŋ ga nee le, gɨlɨn̰ kalaŋ ga nee le cɨn̰ tɔgɨ bɨ, kalaŋ ga nee le leege terɨn̰ tɔgɨ bɨ. Lee gɨ ungo ɓala aye gɨyəŋ gɨ nee le naŋ.

²⁹ Bɨ ga ma, kan kaydege gɔsɛ yen̰ge hɨn̰: «Kurɨn̰-Kumu, na wa ma mɨn̰ gey gusɨni ga? Ji ɨrga na kɨya looni mɨrɨn̰tɨn̰i tumoy wɔlɛ koni ga?»

³⁰ Amge gɔsɨyɔŋn̰əŋ dan̰ kondige ɗe na diige hɨnga sɛdɨ danage dan̰ kɨɗɨn̰ ga nee le.

³¹ Turnɔn̰əŋ ga ɨsɨndəŋ le olge Jesu yeyige hɨn̰: «Hɨn̰ gɨ ji na tayani na, gɨyni duroy gɔsɨyɔŋn̰əŋ ga ba ɨrege kɛ le.»

³² Kɨɗɨn̰ ga nee le, Jesu yege hɨn̰: «Ɨragɨŋ!» Bɨ kan andaŋge kuduroy kalaŋ ga sɔɔ le coŋ, orɨn̰ge andɨn̰ge duroy gɔsɨyɔŋn̰əŋ le. Bɨ ga ma, gɔsɨyɔŋn̰əŋ le nɔm asɨraŋge dan̰ gɨre gɨ daa diriri bɨ, laydaŋge ɗurɔm ɗurɔm duroy kuray gɨ gumu taa taa gɨŋ, sɨn̰ge kaŋ madɨrdɨn̰ge nɔm kɨbɨge.

³³ Ka-ame gɔsɨyɔŋn̰əŋ le bugoŋge daa dan̰ gɨre bɨ orge a cay ƴaa-di-gumu dɨŋ, dorɨn̰ge kardi hɨnga ga ba lee gusɨge le nɔm bɨ, kardi kɔl gɨ da kalaŋ ga turnɔn̰əŋ ga ɨsɨndəŋ woy kuduroyge le bɨ.

³⁴ Bɨ ga ma, kalaŋ ga a cay ƴaa di Gadara dɨŋ nɔm ɨrgage gusi Jesu. Kɨɗɨn̰ ga kan soliige ɨni na, oliige gɨ ban na andaŋ coŋ ɗa cay gɨsəŋ kage bɨge.