Matɨyo 16 - Gabri Maja

Kalaŋ ga ni Parɨsɨn̰a bɨ Sadusɨn̰ɛ bɨ geyge gɨ Jesu na laa hɨnga ga ni beli

¹ Kalaŋ ga ni Parɨsɨn̰a bɨ, Sadusɨn̰ɛ bɨ, ɨrgage mɨnde gusi Jesu, bɨ ɨngɨriige kɔl pɨna malɨn̰ge kɨbi. Yeyige hɨn̰: «Laa hɨnga ga ɗɨn̰ cɨn̰-kɨɗɨn̰ pɨna ɗe gɨl gɨ dɔnɔ ton̰ na sayga naa gusi Kumu ani sol.»

² Ɨni na, ban dɨbɨge cay nee yege hɨn̰: [«Tɨwa na ɗɨba dugo na, kɨŋ ye hɨn̰: “Kumu na kɨya ɔngɛ naŋ, kɨya gɨ gɨɗɨgɨ-Kumu na yɨle pen̰.”

³ Bɨ te kɨɗɨn̰ na, kɨŋ ye hɨn̰: “Kumu na kɨya ɔngɛ, kɨya gɨ gɨɗɨgɨ-Kumu na yɨle pen̰ bɨ, dobɨ ɨndi tɨlɨm bɨ.” Lee gɨ kɨɗɨn̰ ga kɨŋ na sɨla gɨɗɨgɨ-Kumu na, kɨŋ sol hɨnga ga kɨya lɔɔ gusɨge. Ama na uja naa cay hɨnga ga kɨya lɔɔ gusɨge haw kɛ na, kɨŋ sɨla dɔrɛ toyge naŋ.]

⁴ Te kalaŋ ga haw kɛ ga ɨsɨn bɨ, ga ka-bɨle kardɨge bɨn̰ Kumu bɨ, malge na sɔlɛ-hɨnga ga ɗɨn̰ cɨn̰-kɨɗɨn̰. Ama kan kɨya lɔɔ hɨnga ga ɗɨn̰ cɨn̰-kɨɗɨn̰ ga ɗaŋ bɨge naŋ, na ga da Jonasɨ pɨna hage ƴɔbɨ.» Kardi nee ban say ɗege, orɨn̰ kɨɗɨn̰ ga ɗaŋ gaŋ.

Subugu da kalaŋ ga ni Parɨsɨn̰a bɨ Sadusɨn̰ɛ bɨ

⁵ Jesu dan̰ ka-aye-cay-tɨbayi haɗɨge kuray. Kɨɗɨn̰ ga kan bugoŋge kɨwa gɨ ni gɨŋ ɨni na, ka-aye-cay-tɨbayi halge gɨybəŋ cay aye mapa kobɨge.

⁶ Ɨni na, Jesu yege hɨn̰: «Ɗagɨŋ muɗɔlɛ cay gusɨgɨŋ kɨya cay subugu da kalaŋ ga ni Parɨsɨn̰a bɨ Sadusɨn̰ɛ bɨ.»

⁷ Ɨni na, kan ɨrɨmge kuduroyge yege hɨn̰: «Gajanaŋ, ma na kɨya cay mapa gɨ na aya kobɨnagɨŋ naŋ le.»

⁸ Ama Jesu sol ɨrɨme koge, lee gɨ ban dɨbɨge cay nee yege hɨn̰: «Na kɨya wa ma magɨŋ ɨrɨm kɨya cay mapa gɨ unɔ kobɨgɨŋ ga? Kɨŋ kalaŋ ga aye kudurɔ kogɨŋ ɓala hɨnga naŋ!

⁹ Kɨŋ sɨla duroyi naŋ ƴee ga? Kuduroygɨŋ hal gɨybəŋ cay mapa ga bay, ga ɨŋ bɨn̰ kalaŋ dubu-bay le ga? Wala kuduroygɨŋ hal gɨybəŋ cay gɔyn̰əŋ ga kɨŋ hogɨn̰ ban̰di dɔɔ boy nee le ga?

¹⁰ Kuduroygɨŋ hal gɨybəŋ, cay mapa ga jurgum, ga ɨŋ bɨn̰ kalaŋ ga dubu-poɗɨn̰ le ga? Wala kuduroygɨŋ hal gɨybəŋ, cay gɔyn̰əŋ ga kɨŋ hogɨn̰ te dɔɔ gɨ ba boy nee orɨn̰ le ga?

¹¹ Na kɔl gɨ da mapa ma maŋ yagɨŋ koldi naŋ. Kɛ kɨŋ lee na mɨna ma magɨŋ sɨla duroy kɔl gɨ kɛ le naŋ ga? Ɨŋ yəgɨŋ gɨ kɨŋ ɗɔɔ kuduroygɨŋ nargɨŋ cay subugu da kalaŋ ga ni Parɨsɨn̰a bɨ, Sadusɨn̰ɛ bɨ naŋ.»

¹² Kɨɗɨn̰ ga nee le, kan solge gɨ ban yege gɨ kuduroyge na alage naŋ, naa cay subugu di kan dorɨn̰ge mapa naŋ. Ama na cay hɨnga ga kalaŋ ga ni Parɨsɨn̰a bɨ Sadusɨn̰ɛ bɨ, ba gɨlɨn̰ge kalaŋ le.

Pɨyɛr ye gɨ Jesu naa ban gɨ Kumu dorii

¹³ Jesu bugoŋ a cay gɨsəŋ ga Sejare ga a Pilib ɨni na, ban ɨngɨrɨn̰ ka-aye-cay-tɨbayi yege hɨn̰: «Ɨŋ-bandi Kurɨn̰-ungo le, kalaŋ yege gɨ ɨŋ naa waŋ ga?»

¹⁴ Kan dɨbiige cay nee yeyige hɨn̰: «Ga pɨna yege hɨn̰ ji naa Ja̰ ba-leen̰ kalaŋ batɛm. Ga ɗaŋ yege hɨn̰ ji naa Eli ba-yɔɔ-kɔl-gɨ-Kumu-ba-yɔɔ. Kan ga ɗaŋ coŋ yege hɨn̰ ji naa Jeremi ba-yɔɔ-kɔl-gɨ-Kumu-ba-yɔɔ naŋ le, ba-yɔɔ-kɔl-gɨ-Kumu-ba-yɔɔ gɨ pɨna wo̰ duroy kamdi.»

¹⁵ Jesu jɨga ɨngɨrge ɗaŋ coŋ yege hɨn̰: «Ma kɛ kɨŋ-gandi kɨŋ ye kogɨŋ na mɨna bɨ ga?»

¹⁶ Simo Pɨyɛr dɨbii cay nee yeyi hɨn̰: «Ji na Kɨris ban gɨ Kumu dorii, Kurɨn̰-Kumu gɨ som dan̰ cɨndi le.»

¹⁷ Kɨɗɨn̰di ga nee gaŋ le, Jesu dɨbii cay nee yeyi hɨn̰: «Tumoy wolwa woy kol can̰, Simo kurɨn̰ Jonasɨ, kɨya gɨ na Banɨ gɨ ba som a daa nii ba haŋge cɨndɨn̰ a cay hɨnga ga nee le, wala na ungo gɨ ɨndi naŋ.

¹⁸ Ama ɨŋ-bandi ɨŋ ye hɨn̰: Ji na Pɨyɛr, duroy na garma, bɨ ɨŋ-bandi ɨŋ kɨya gaɗe te Ka-Daye kange a cay garma gɨ nee gɨŋ le bɨ. Dɔnɔ da tɨma kɨya ɓale lɔɔ hɨnga danaa naŋ.

¹⁹ Ɨŋ-bandi ɨŋ bɨn̰ lakɨlen̰əŋ ga ni kɨbɨ-ƴaa dɔɔ-ƴaa di a gɨɗɨgɨ-Kumu dɨŋ. Hɨnga ga ji kɨya saɗe a cay gɨsəŋ gaŋ na, kan kɨya saɗege a daa nii bɨ, hɨnga ga ji kɨya pɨndɨre a cay gɨsəŋ gaŋ kɛ na, kan kɨya pɨndɨrege a gɨɗɨgɨ-Kumu gɨŋ bɨ.»

²⁰ Kardi nee Jesu ay noy bɨn̰ ka-aye-cay-tɨbayi, gɨ kan na gɨ yon̰ ungo gɨ ɗi naa Kɨris ban gɨ Kumu dorii le naŋ pa pa.

Jesu ye kɔl tɨmaydi bɨ bɔyɛ lɨbedi bɨ

²¹ Jesu ay te yon̰ ka-aye-cay-tɨbayi boy tɨwado di nee dɨŋ le waŋ daa ye hɨn̰: «Na wa wa kalɨn̰ ma ɨŋ kɨya ɔrɛ Jerusalɛm, ɗe aŋ wan̰ cɨn̰-n̰age tɔgɨ kobɨ ga muɗoldoŋ bɨ, ka-cay ka-bɔgɛ kɨbar bɨ, ka-gɨlɨn̰ kalaŋ gasɨn̰-kɔl gɨ da Moyis bɨ, kan kɨya dɨɗəŋge bɨ. Ama wɔlɛ sɨbɨdi gɨŋ na, ɨŋ kɨya bɔyɛ lɨbe.»

²² Ɨni na, Pɨyɛr corii kan̰di bɨ, ɗali ye hɨn̰: «Ba-gulɔŋ, Kumu kɨya amɨn̰, ban kɨya nare ɗe hɨnga ga nee le leen̰ naŋ! Na hɨn̰ wo̰ naŋ, hɨnga ga hɨn̰ wo̰ le kɨya andaŋ can̰ naŋ.»

²³ Ɨni na, Jesu bɨle cɨndi jɨn̰ cay Pɨyɛr bɨ yeyi hɨn̰: «Sidan aya guse sɛdɨ coŋ gusɨnɨ! Ji na gundi sɨya gɨ ba dɔgɛ tɨbanɨ. Kɨya wa ɨrɨme gɨ a kuduron̰ le, na ɨrɨme gɨ da Kumu naŋ, ama na ɨrɨme gɨ da kalaŋ ga ɨndəŋ.»

²⁴ Kardi nee na, Jesu yen̰ ka-aye-cay-tɨbayi hɨn̰: «Hɨn̰ gɨ ungo na gey aye-cay-tɨbanɨ na, kuɗa gɨ ban aya gusi dɨbɨ coŋ, ayan̰ sɨya-gɨ-dagɨli gɨ kan gagɨlɨn̰ge ungo gɨ kɔl ƴom cayi nee yanan̰ gusi kɨya dogɨn̰ nerɨn̰ bɨ, marɨn̰ bɨ.

²⁵ Kɨya wa waŋ waŋ gɨ na gey pɔɗɛ gusi le, kɨya wɔɔ mundoŋ. Ama waŋ waŋ gɨ na mɨnda gusi coŋ kɨya canɨ na, ban kɨya jɨga wɔɔ gusi le ɗaŋ.

²⁶ Hɨn̰ gɨ ungo na ɨran̰ dan̰ hɨnga wɔɔ ga a cay gɨsəŋ gaŋ nɔm ma na mɨnda gusi coŋ na, kɨya andii na wa ga? Naŋ le, na wa ma ungo kɨya bee kɨya ƴon̰ ban̰di gusi ga?

²⁷ Kɨya wa Kurɨn̰-ungo kɨya caga dan̰ ka-ƴɔbɛ kayi ga daa nii bɨ, dan̰ gusoŋ-tɔgɛ da Bayi bɨ. Kɨɗɨn̰di ga nee gaŋ le, ban kɨya bɨn̰ kalaŋ cay kobɨge pɨna pɨna nɔm gɨsɨn̰ cay gɨye-lɔɔdɨge lɔɔdɨge.

²⁸ Aŋ yəgɨŋ daa waŋ na cɨndi: Kalaŋ ga pɨna duroy kalaŋ ga ɨrege kɛ le, kɨya sɔlɛge Kurɨn̰-ungo kɨɗɨn̰ cagadi gɨŋ hɨn̰ kɨlma wo̰ pa dɨm ma kɨya marege ƴee.»