Matɨyo 15 - Gabri Maja

Hada da te kalaŋ ga Ɨsɨrayɛl

¹ A boy ɨlgedi gɨ nee le, kalaŋ ga ni Parɨsɨn̰a dan̰ ka-gɨlɨn̰ kalaŋ gasɨn̰-kɔl gɨ da Moyis, saygage Jerusalɛm ɨrgage gusi Jesu bɨ, ɨngɨriige hɨn̰:

² «Kɨya wa ma ka-aye-cay-tɨban̰ leege hɨnga hangɨɗɨn̰ge cay hada ga da mon̰inagɨŋ ga? Kɨya wa ma kan pɨlge kobɨge dan̰ te gɨyəŋ gɨ da hada, pa dɨm ma dan̰ge dɔɔ naŋ ga?»

³ Ɨni na, ban dɨbɨge cay nee yege hɨn̰: «Ama kɨŋ-gandi, na kɨya wa ma magɨŋ hangɨɗɨ te tumɔ da Kumu bɨ, kɨŋ leen̰ hɨnga ga ni te hada kagɨŋ ga?

⁴ Kɨya wa Kumu ye hɨn̰: “Ji aya cay ban̰ bɨ ƴon̰ bɨ daa.” Ban ye ɗaŋ coŋ hɨn̰: “Waŋ waŋ gɨ na ɓɨsɨ bay naŋ le ƴoyi na, kan na dɨɗiige coŋ.”

⁵ Ama kɨŋ-gandi kɨŋ ye hɨn̰: “Hɨn̰ gɨ ungo na yan̰ bay naŋ le, ƴoyi ya hɨn̰: Kandi-wɔɔ ga ɨŋ kɨya jɨbɨn̰ toygɨŋ le, ɨŋ ay si dan̰ cɨndɨge kɨya cay Kumu coŋ,

⁶ na kɨŋ ye hɨn̰: Ba-gulondi na ɨran̰ dan̰ kɔl cay naŋ. Hɨn̰ wo̰ na ojɨ gɨ ban na kɨya jɨbe te bay dan̰ ƴoyi naŋ.” Na toy di hɨn̰ wo̰ na, kɨŋ mondɨ kɔl gɨ da Kumu coŋ bɨ, kɨŋ leen̰ hɨnga dan̰ te gɨyəŋ gɨ da hada kogɨŋ.

⁷ Kɨŋ ka-yɔɔ-kɔl-kɨbɨgɨŋ-sɔɔ-sɔɔ le, kɔl gɨ ba-yɔɔ-kɔl-gɨ-Kumu-ba-yɔɔ, Ijay ba ye gɨsɨn̰ caygɨŋ na dan̰ gɨyəŋdi. Kɨɗɨn̰ ga ban ye hɨn̰:

⁸ “Kalaŋ ga kɛ le ayge canɨ daa na dan̰ kɨbɨge kalɨn̰ wo̰ ƴɔbɨ, Ama kuduroyge na, kan geyəŋge naŋ.

⁹ Kan leege gɨye hɨnge na kalɨn̰ wo̰, Kɨya gɨ hɨnga ga kan gɨlɨn̰ kalaŋ le, Na gasɨn̰-kɔl gɨ da kalaŋ ƴɔbɨ.”»

Hɨnga ga lee gɨ ungo mɨdagɨn̰ tumoy Kumu

¹⁰ Jesu te kalaŋ nɔm bɨ yege hɨn̰: «Jagɨŋ kɔl hɨnge bɨ, sɨlagɨŋ duroy bɨ.

¹¹ Na hɨnga ga ungo dobɨ kɨbi ba lɔɔ gɨ ungo mɨdagɨn̰ tumoy Kumu naŋ. Ama na hɨnga ga andɨgaŋ kɨbɨ ungo doŋ ba lɔɔ gɨ ungo bɨlɨn̰ ungo gɨ mɨdagi tumoy Kumu.»

¹² Ɨni na, ka-aye-cay-tɨbay Jesu sɨygɨge mɨnde gusi bɨ, yeyige hɨn̰: «Kɔl gɨ ji ba yen̰ Parɨsɨn̰an̰əŋ le dɨbge sɨya kɛ, ji sol han̰ ga?»

¹³ Ɨni na, ban dɨbɨge cay nee yege hɨn̰: «Hɨya nɔm gɨ Banɨ gɨ som a daa nii na bɨsana naŋ na, kan kɨya dɔrɛ coŋ.

¹⁴ Ɗagegɨŋ, kan na ka-bɨbe ga ƴomge sɨya gɨ da kamdɨge ka-bɨbe dorɨn̰ tumoyge. Ma hɨn̰ gɨ ba-bɨbe na ƴɨma sɨya gɨ da mɨgayi ba-bɨbe dɨran̰ tumoy na, kan sɔɗɨmɔm toge dɨŋ kɨya laydaŋge a te guduru gɨŋ.»

¹⁵ Pɨyɛr ay kɔl yen̰ Jesu ye hɨn̰: «Dɨrani te kɨradi-kɔl gɨ nee le.»

¹⁶ Ɨni na, Jesu dɨbii cay nee yeyi hɨn̰: «Hɨnga le kɨŋ-gandi kalɨn̰ ma, kɨŋ sɨla duroy kɔl gɨ kɛ le naŋ ga?

¹⁷ Kɨŋ sol gɨ hɨnga nɔm ga ungo di a kɨbi le, or na a kuduroy pa dɨm ma andaŋ gusi coŋ le kɛ, kɨŋ sɨla wo̰ naŋ ga?

¹⁸ Ama hɨnga ga andɨgaŋ a kɨbɨ ungo le sayga na a kuduroy, na hɨnga ga nee le ba lɔɔ gɨ ungo bɨlɨn̰ ungo gɨ mɨdagi tumoy Kumu.

¹⁹ Kɨya wa ɨrɨme ga ɨsɨn bɨ, ɨrɨme gɨ ni dɨɗɨn̰ ungo bɨ, yɔyɛ tama wala bara gɨ da mɨgan̰ bɨ, gɨye lɔɔ gɨ da yɔyɛ dan̰ gangɨ caa bɨ, geye hase bɨ, pɔyɛ kɔl se cay kalaŋ bɨ, yagɨde kɨɗɨn̰ bɨ, saygage na kuduroy ungo.

²⁰ Na hɨnga ga nee le, ba lɔɔ ɗe gɨ ungo bɨlɨn̰ ungo gɨ mɨdagi, tumoy Kumu. Ama dɔɔ hɨnga dɨle pɨle kɔbɔ, kɨya lɔɔ gɨ ungo kɨya bɨləŋ ungo gɨ mɨdagi tumoy Kumu naŋ.»

Tama di tɔɔ ɗaŋ bee kudurɔ cay Jesu

²¹ Jesu say a kɨɗɨn̰ ga nee gaŋ orɨn̰ a cay gɨsəŋ ga Tir gaŋ bɨ Sido̰ gaŋ bɨ.

²² Bɨ ga ma, tama di pɨna wo̰ di a cay gɨsəŋ ga ɗaŋ gaŋ ga Kana ɨrga gusii, ɨle guso gan̰ gɔsɛ ye hɨn̰: «Ba-gulɔŋ, Kungay Dabid, sɨla cɨn̰-n̰age tɨnge! Turnɔ di ɨsɨni di pɨna wo̰, leen̰ tɨrɨmonɨ mɨrɨn̰tɨn̰i gɨɗaŋ.»

²³ Ama Jesu duboo kɔl wo̰ cay nee naŋ. Ɨni na, ka-aye-cay-tɨbayi ɨrgage mɨnde gusii bɨ, yeyige hɨn̰: «Taya coŋ, kɨya gɨ hɨndi kobɨ kardɨnagɨŋ sowɨlɨn̰ cay nagɨŋ tɔgɨ.»

²⁴ Jesu duboo cay nee yoo hɨn̰: «Kumu gɨyigəŋ na gusi te wɨn̰je gɨ da Ɨsɨrayɛln̰əŋ ƴɔbɨ, kan woyge na hɨn̰ gamge ga da Kumu ga kayaŋge.»

²⁵ Ama tama le ɨrga mɨnde gusii bɨ, poy gɨbaa dugo tumoyi bɨ, yeyi hɨn̰: «Ba-gulɔŋ, laa danaŋ!»

²⁶ Jesu duboo cay nee yoo hɨn̰: «Aye mapa da karɨn̰aŋ dɨbɨn̰ karɨn̰ gaye na, na hɨnga ga uja ga ni lɔɔ naŋ.»

²⁷ Ɨni na, hɨndi dɨbii cay nee yeyi hɨn̰: «Na cɨndi, Ba-gulɔŋ, ama ɓɨragɨ na, karɨn̰ gaye didege na bugɗi dɔɔ gɨ gunguldoŋ dugo a te tabɨl da ka-gulondɨge gaŋ.»

²⁸ Ɨni na, Jesu duboo cay nee yoo hɨn̰: «Ay tama, aye kudurɔ kɛɛ gumu! Ɗa ɗe woy bɨne hɨn̰ gɨ me ba gey wo̰.» Kɨɗɨn̰di ga nee gaŋ le bɨ, tɨrɨmɔɔ le poɗɨ.

Jesu poɗɨ ka-hɔmɨn̰ɛ ga toyge kan̰dɨge kan̰dɨge

²⁹ Jesu say a cay gɨsəŋ ga Tir dan̰ Sido̰, an̰ gɨyəŋ gɨ a kɨway kuray gɨ gumu taa taa gɨ Galile. Ban nay a cay garma gɨ pɨna wo̰ gɨŋ somɨn̰ nee.

³⁰ Ɨni na, dɨmdɨrdi kalaŋ ɨrgage gusi dan̰ ka-ɔrɛ modo bɨ, ka-bɨbe bɨ, dan̰ kalaŋ ga kobɨge, naŋ le, tɨbayge puydoŋ bɨ, dan̰ ka-məŋ bɨ, dan̰ ka-hɔmɨn̰ɛ ga ɗaŋ dan̰ kondige coŋ bɨ. Beegege dugo tɨbay Jesu bɨ, ma ban poɗɨge.

³¹ Lee gɨ kɨɗɨn̰ ga dɨmdɨrdi kalaŋ solge ka-tɨge ga yege kɔl bɨ, solge kalaŋ ga kobɨge naŋ le, tɨbayge puydoŋ jɨga bɨləŋ ban̰di nee kuɗa bɨ, ka-ɔrɛ modo ga orge dan̰ durɔ bɨ, solge ka-bɨbe jɨgage sol kɨɗɨn̰ bɨ ɨni na, turnoyge gɨre kayaŋ tɔgɨ bɨ, kan hɨramge Kumu gɨ da Ɨsɨrayɛl bɨ.

Jesu bɨn̰ ban̰aŋ dubu-poɗɨn̰ hɨnga ga ni dɔɔ

³² Jesu te ka-aye-cay-tɨbayi bɨ yege hɨn̰: «Dɨmdɨrdi kalaŋ ga kɛ le, cɨndɨge ləŋ cɨn̰-n̰age tɔgɨ, kɨya gɨ kan somge durnɨ leen̰ wɔlɛ sɨbɨ ɨni bɨ, hɨnga dɔɔdɨge unɔ bɨ. Lee gɨ ɨŋ gey ɗoge ɔrɛ tage dɨle bɨge hɨnga ga ni dɔɔ naŋ. Gajanaŋ ma togɨyge da unɔ a te gɨyəŋ gɨŋ.»

³³ Ɨni na, ka-aye-cay-tɨbayi yeyige hɨn̰: «Kalaŋ le kondɨge tɔgɨ. Ni gɨ wɔɔ hɨnga ga ni dɔɔ na ani duroy dal di kɛ dɨŋ le ɗe kan diige ɓalge ga?»

³⁴ Jesu ɨngɨrge yege hɨn̰: «Na mapa mɨna ma magɨŋ orɨn̰ ga?» Kan dɨbiige cay nee yeyige hɨn̰: «Na jurgum bɨ, gusa ga n̰ən̰əŋ dḛ bɨ.»

³⁵ Kardi nee ɨni na, Jesu yen̰ dɨmdɨrdi kalaŋ ɗe na somge dugo.

³⁶ Ban ƴee mapa ga jurgum le bɨ, gusan̰əŋ le bɨ, leen̰ Kumu ho’o cay nee pa dɨm ma boy dugo bɨn̰ ka-aye-cay-tɨbayi ɗe gosɨnɨn̰ge dɨmdɨrdi kalaŋ le ƴee.

³⁷ Kan nɔm diige sɨdɨldəŋge. Te dɔɔ gɨ ba le, ka-aye-cay-tɨbayi le, donge wandɨn̰ gɔy jurgum.

³⁸ Kalaŋ ga diige dɔɔ le, kan ga ban̰aŋ ɓalge dubu-poɗɨn̰, dɨle ɗɔngɨsɛ kandɨ dan̰ karɨn̰aŋ coŋ.

³⁹ Kɨɗɨn̰ ga Jesu ɗe dɨmdɨrdi kalaŋ orge coŋ ɨni na, ban nay duroy koburo gɨ gumu taa taa gɨŋ, orɨn̰ a cay gɨsəŋ ga Magadan gaŋ.