Matɨyo 14 - Gabri Maja

Dɨɗɨge Ja̰ ba-lɔɔ batɛm

¹ A boy ɨlge di gɨ nee le, guson̰ Jesu ye tɔgɨ. Lee gɨ ba sɨmay kɨlma Ɛrɔd gɨ dii cay gɨsəŋ ga Galile.

² Ɨni na, Ɛrɔd yen̰ marɨne ka-gɨye kayi hɨn̰: «Ungo gɨ nee le, na Ja̰ ba-lɔɔ batɛm gɨ ma le ba bɔyɛ lɨbe. Na toy di hɨn̰ wo̰ ma, ban wan̰ dɔnɔ tɔgɨ di ni leen̰ hɨnga ga ni beli ga nee le.»

^3-4 Sɨlagɨŋ maana di kɔl da tɨmay Ja̰ ba-lɔɔ batɛm. Ɛrɔd ƴee Ɛrɔdɨyadɨ leen̰ tamdi. Hɨndi na tam kurɨndi Pilib. Ɨni na, Ja̰ yen̰ Ɛrɔd hɨn̰: «Ji ɨran̰ dan̰ gɨyəŋ gɨ ni ƴɔɔ tama di nee le naŋ.» Ɨni na, Ɛrɔd gɨy kalaŋ orge ƴɔmɛge Ja̰ bɨ saɗɨdiige dɨbiige dangay dɨŋ.

⁵ Ojɨn̰ cay kɔl gɨ nee le, Ɛrɔd gey dɨɗe Ja̰ hayi, ama ban hɨndar dɨmdɨrdi kalaŋ, kɨya gɨ kan solge Ja̰ leen̰ ba-yɔɔ-kɔl-gɨ-Kumu-ba-yɔɔ.

⁶ Ama wɔlɛ gɨ Ɛrɔd ɨre lee kɨdɨrɛ gɨ da wɔɔdi ɨni na, Ɛrɔdɨyadɨ turmɔ say sɔɔ tumoy kalaŋ ga ɨrgage kɨɗɨn̰ mɔlɛ gɨŋ. Sɔɔ gɨ hɨndi say le ƴee cɨn̰ Ɛrɔd tɔgɨ.

⁷ Lee gɨ Ɛrɔd ɓɨsɨ gusi boo yo hɨn̰: «Ko me na ɨngɨr naa wa wa kalɨn̰ ma, ɨŋ kɨya bɨne.»

⁸ Ɨni na, Ɛrɔdɨyadɨ gosɨr turmɔ na yan̰ Ɛrɔd hɨn̰: «Bəŋ cay Ja̰ ba-lɔɔ batɛm a duroy subɨra gɨŋ.»

⁹ Kɔl gɨ kɛ le, mon̰ kɨlma naŋ, ama kɨya cay ɓɨse gɨ ban ɓɨsɨ gusi bɨ, kɨya cay cɨn̰ kalaŋ ga ban molge bɨ na, ban ay noy be gɨ kan na ɨra ɨrɨn̰ge dan̰ cay Ja̰ le boo.

¹⁰ Ban gɨy ungo or wale cay Ja̰ a dangay dɨŋ.

¹¹ Ɨrgan̰ge dan̰ cay Ja̰ le a duroy subɨra gɨŋ, bɨn̰ge turmɔ le bɨ hɨndi orɨn̰ bɨn̰ ƴɔɔ.

¹² Ka-aye-cay-tɨbay Ja̰ ɨrgage ayge gundi, orɨn̰ge ɨmgege. Kardi nee kan orge dɨbɨn̰ge Jesu koldi sɨmayi.

Jesu bɨn̰ ban̰aŋ dubu-bay hɨnga ga ni dɔɔ

¹³ Jesu je dɨngəsɨ di nee le ɨni na, ban say ɗe kɨɗɨn̰ ga nee le coŋ. Nay duroy koburo gɨŋ orɨn̰ a kɨɗɨn̰ ga kalaŋ unɔ nee gaŋ. Ama dɨmdɨrdi kalaŋ jege, lee gɨ kan andaŋge a cay ƴaa-ga-gɨmɨdoŋ ga bongi nee gaŋ, kobɨn̰ge kardi dan̰ tɨbayige gorɨn̰ge a kɨbɨ kuray gɨŋ jɨraŋ jɨraŋ.

¹⁴ Kɨɗɨn̰ ga Jesu andaŋ duroy koburo gɨ gumu gɨŋ doŋ kɨbɨ kuray gɨŋ na, ban sol dɨmdɨrdi kalaŋ somge amiige. Ban sol cɨn̰-n̰age toge tɔgɨ, lee gɨ ban poɗɨn̰ ka-hɔmɨn̰ɛ kage.

¹⁵ Na borundo ɨni, ka-aye-cay-tɨbay Jesu ɨrgage gusi yeyige hɨn̰: «Kɨɗɨn̰ ga kɛ le, na kɨɗɨn̰ ga kalaŋ unɔge nee bɨ, tɨwa kaga ɨni bɨ, kuɗa gɨ ji yan̰ dɨmdɨrdi kalaŋ le ɗe orge duroy cay gulɔŋn̰əŋ gɨŋ, kɨlege hɨnga ga ni dɔɔ.»

¹⁶ Jesu dɨbɨge cay nee yege hɨn̰: «Uja gɨ kan kɨya ɔrɛ wo̰ naŋ. Kɨŋ-gandi gusɨgɨŋ bɨgegɨŋ hɨnga ga ni dɔɔ.»

¹⁷ Ɨni na, kan dɨbiige cay nee yeyige hɨn̰: «Ni ɨran̰ dan̰ hɨnga pɨna naŋ, na mapa bay bɨ gusa sɔɔ ƴɔbɨ bɨ, ba wɔyɛ kɛ.»

¹⁸ Ɨni na, Jesu yege hɨn̰: «Ɨren̰gɨŋ bəŋ kɛ.»

¹⁹ Ɨni na, ban yen̰ dɨmdɨrdi kalaŋ le yege hɨn̰: «Sɨmagɨŋ dugo a cay hɛɗɨmɛ gaŋ.» Ban lobɨ mapa ga bay dan̰ gusa ga sɔɔ le, ayɨn̰ cɨndi daa torɨn̰-kɨbi cay nee bɨ. Ban boy mapa le dugo bɨ, bɨn̰ ka-aye-cay-tɨbayi ɗe kan na gusnan̰ge dɨmdɨrdi kalaŋ le.

²⁰ Kalaŋ nɔm diige sɨdɨldəŋge jɨŋ jɨŋ. Toyge ga ba le, ka-aye-cay-tɨbayi hogɨge ɓal gɔy mɔjɨ-cay-sɔɔ.

²¹ Kalaŋ ga diige hɨnga le, ɓalge na hɨn̰ ban̰aŋ dubu-bay wo̰, dɨle ɗɔngɨsɛ kandɨ dan̰ karɨn̰aŋ coŋ.

Jesu or a cay kaŋ gaŋ

²² Kɨɗɨn̰ ga kan gosɨnɨn̰ge kalaŋ hɨnga ga ni dɔɔ coŋ ɨni bɨ ga ma, Jesu ay noy bɨn̰ ka-aye-cay-tɨbayi na nage duroy koburo gɨŋ, haɗan̰ge ɨran̰ge tumoyi. Ɗi na kɨya yon̰ kalaŋ ɗe na orge ɨndi pa dɨm ma, may na kɨya ɔrɛ kardɨge ƴee.

²³ Kɨɗɨn̰ ga ban lee gɨ kalaŋ nɔm orge coŋ ɨni na, ban dor gusi sɛdɨ nan̰ a cay garma gɨŋ olɨn̰ Kumu. Borundo ba cayi a kɨɗɨn̰ ga nee gaŋ le kan̰di hayi.

²⁴ Koburo gɨ gumu gɨ ka-aye-cay-tɨbayi nayge duroy nee le bugoŋ hen̰ duroy nee ɨni bɨ, mɛw te koburo tɔgɨ bɨ, kɨya gɨ kal yal cɨndɨge.

²⁵ Kɨɗɨn̰ ga kɨɗɨn̰ ba ɨndi pɨrɨm pɨrɨm ƴee na, Jesu or a cay kaŋ gaŋ tɨlɛ tɨlɛ orɨn̰ jɨn̰ gusɨge.

²⁶ Kɨɗɨn̰ ga ka-aye-cay-tɨbayi soliige te ɔrɛ cay kaŋ gaŋ ɨni na, turnoyge duroŋ gusɨge, lee gɨ kan yege hɨn̰: «Na turnoy ungo gɨ ma!» Kɨɗɨn̰ ga nee le, kan kaydege gɔsɛ dan̰ hundɔrɔ.

²⁷ Ama kɨɗɨn̰di ga nee gaŋ le bɨ, Jesu yege kɔl ye hɨn̰: «Ƴɨmagɨŋ kuduroygɨŋ usa na ɨŋ-bandi Jesu, kɨŋ ɗɔɔ ba hundɔrɔ.»

²⁸ Ɨni na, Pɨyɛr yey hɨn̰: «Ba-gulɔŋ hɨn̰ gɨ naa ji-bandi na, aya noy bəŋ aŋ orɨn̰ cay kaŋ gaŋ orɨn̰ gusɨn̰.»

²⁹ Ɨni na, Jesu yey hɨn̰: «Ɨre.» Kɨɗɨn̰di ga nee gaŋ le bɨ, Pɨyɛr gɨsɨn duroy koburo gɨŋ dugo, ay te ɔrɛ cay kaŋ gaŋ tɨlɛ tɨlɛ orɨn̰ jɨn̰ gusi Jesu.

³⁰ Ama kɨɗɨn̰ ga ban sol gɨ kal dor dan̰ togi na, hundɔrɔ leeyi. Ban ay te ɗɨrme ɨni na, ban dor noy daa ye hɨn̰: «Ba-gulɔŋ, pɨɗaŋ!»

³¹ Kɨɗɨn̰di ga nee gaŋ le bɨ, Jesu dobɨ kobi ƴomii bɨ, yey hɨn̰: «Aye kudurɔ kon̰ ɓala hɨnga naŋ. Na kɨya wa ma mɨn̰ man̰ dan̰ gusɨn̰ ga?»

³² Kɨɗɨn̰ ga kan nayge duroy koburo gɨŋ ɨni na, kal ɨre dugo ɗɨngɨrɨŋ.

³³ Kalaŋ nɔm ga somge duroy koburo gɨŋ le, poyge gɨbayge dugo tumoy Jesu n̰ɨriige bɨ, yeyige hɨn̰: «Ji na Kurɨn̰-Kumu leen̰ cɨndi han̰.»

Jesu poɗɨ ka-hɔmɨn̰ɛ a cay gɨsəŋ ga Jenejarɛt gaŋ

³⁴ Jesu dan̰ ka-aye-cay-tɨbayi dɨɗɨge kɨbɨ haɗe kuray gɨ gumu taa taa bɨ, bugoŋge a cay gɨsəŋ ga Jenejarɛt gaŋ.

³⁵ Kalaŋ ga a cay gɨsəŋ ga nee le solge gɨ naa Jesu na, ƴobge a cay ƴaan̰əŋ ga a cay gɨsəŋ ga nee le nɔm ɨni na, kan ɨrgan̰ge dan̰ ka-hɔmɨn̰ɛ nɔm gusi.

³⁶ Kalaŋ oliige gɨ ban na ɗage ɗe age na ɨsɨbɨ kɨbɨ badɨge kayi ɗay. Kalaŋ nɔm ga ba ɨsɨbiige le poɗɨge.