Marg 6 - Gabri Maja

Kalaŋ ga Najarɛt bɨgage kuduroyge cay Jesu naŋ

¹ Jesu say a kɨɗɨn̰ ga nee gaŋ le, jogɨn̰ a cay gɨsəŋ ga ban malgɨn̰ nee gaŋ. Ka-aye-cay-tɨbayi kobɨge kardi.

² Kɨɗɨn̰ ga wɔlɛ gɨ ni dorɨn̰ gɨlale gɨ da Jubɨn̰əŋ bugoŋ ɨni na, ban ay te gɨlɨn̰ kalaŋ hɨnga a duroy ƴaa-daye-di-da-Jubɨn̰əŋ dɨŋ. Kalaŋ ga somge togɨyige le kondɨge bɨ kɔl kayge sɛl sɛl kol cayi bɨ. Lee gɨ kan ɨngɨrɨn̰ gusɨge hɨn̰: «Kɛ hɨnga ga ni gɨle ga nee le ban saygan̰ danage na a ani ga? Kɛ cɨn̰-muɗɔlɛ di kan ba bii di kɛ le ban saygan̰ na a ani ga? Kɛ na waŋ ba bii dan̰ dɔnɔ ma ban leen̰ hɨnga ga ni beli ga ungo sɨla cay pɨna naŋ hɨn̰ wo̰ ga?

³ Kɛ ban na ba-lɔɔ gɨye sɨya naŋ ga? Kɛ ban na kurɨn̰ Mari bɨ, ban na Jag bɨ, Joses bɨ Jud bɨ, Simo bɨ, kurɨndɨge naŋ ga? Bɨ kɛ karmii ga kandɨ wɨyage duroyni kɛ naŋ ga?» Jesu woy gɨlɨn̰ na hɨn̰ gundi sɨya gɨ de tɨbayige wo̰.

⁴ Ɨni na, Jesu yege hɨn̰: «Ba-yɔɔ-kɔl-gɨ-Kumu-ba-yɔɔ le na a cay ƴaadi dɨŋ ƴɔbɨ bɨ, na a te wandɨ toy dɨŋ ƴɔbɨ bɨ, na a ƴaadi dɨŋ ƴɔbɨ bɨ, ma kalaŋ kɨya dibiige hurɔmɔ cayi naŋ.»

⁵ Lee gɨ Jesu ɓala lɔɔ hɨnga ga ni beli pɨna nɛŋ a kɨɗɨn̰ ga nee gaŋ naŋ. Ama naa hɨn̰ wo̰ kalɨn̰ ma, ban dɨbɨ kobi na a cay ka-hɔmɨn̰ɛ ga pɨna gaŋ ƴɔbɨ bɨ poɗɨge.

⁶ Kɔl kayi Jesu sɛl sɛl kɨya cay aye kudurɔ koge gɨ wɨyge. Ɨni na, Jesu gor a cay gulɔŋ ga nɨwɨre cay Najarɛt gɨlɨn̰ kalaŋ hɨnga nee.

Jesu gɨy ka-aye-cay-tɨbayi ga mɔjɨ-cayge-sɔɔ

⁷ Jesu te ka-aye-cay-tɨbayi ga mɔjɨ-cayge-sɔɔ gusii bɨ gɨyge sɔɔ sɔɔ. Ban bɨge dɔnɔ a cay turnɔ ga ɨsɨndəŋ.

⁸ Ban ay noy bɨge bɨ yege hɨn̰: «Kɨɗɨn̰ ga kɨŋ kɨya bugoŋ gɨyəŋ kɨya ɔrɛ na, ayegɨŋ hɨnga ga ni tɨrga kobɨgɨŋ naŋ, ama na jor ƴɔbɨ. Ayegɨŋ mapa naŋ bɨ, sangɨ naŋ bɨ, sɨle boy sɔndurɔŋ dɨŋ kobɨgɨŋ naŋ bɨ.

⁹ Tɨbagɨŋ gɨyabe tɨbayigɨŋ ama tɔbɛgɨŋ badɨge cay kamdɨge gaŋ won̰ sɔɔ naŋ.»

¹⁰ Kardi nee ɨni na, ban yege ɗaŋ coŋ hɨn̰: «Ƴaa di ani ani di kɨŋ kɨya andaŋ nee na, sɨmagɨŋ nee bɨrɨŋ gɨ kɨŋ kɨya son̰ orɨn̰.»

¹¹ Ma hɨn̰ boy kɨɗɨn̰ ga pɨna kalaŋ na ƴɨmagɨŋge gusɨge naŋ bɨ, jage kɔl kogɨŋ naŋ bɨ na, kɨŋ andaŋ a kɨɗɨn̰ ga nee gaŋ le coŋ bɨ, ɗagɨdagɨŋ bundu di cay tɨbayigɨŋ dɨŋ ɗɨga ɗɨga dɨran̰ naji togɨŋ bɨgagɨŋ cayge ɗe gɨl gɨ kan na lee ɨsɨna tumoy Kumu.

¹² Ɨni na, kan sayge orge tɔgɛ bɛrnɛ yen̰ge hɨn̰: «Bɨlgɨŋ gɨye-lɔɔdɨgɨŋ.»

¹³ Kan tayge turnɔ ga ɨsɨndəŋ dan̰ kondiige bɨ, yoɗɨn̰ge ka-hɔmɨn̰ɛ sɔŋ dan̰ kondiige bɨ, kan poɗɨgege bɨ.

Dɨɗɨge Ja̰ ba-lɔɔ batɛm

¹⁴ Kɨlma Ɛrɔd je kol Jesu kɨya gɨ gusondi ye ƴee kɨɗɨn̰. Lee gɨ kalaŋ yege hɨn̰: «Naa Ja̰ ba-lɔɔ batɛm naa ba bɔyɛ lɨbe, duroy kalaŋ ga madɨrdaŋ gaŋ, na toy di hɨn̰ wo̰ ma ban na orɨn̰ dan̰ dɔnɔ di ni loon̰ hɨnga ga ni beli ga nee le.»

¹⁵ Ga ɗaŋ yege hɨn̰: «Naa Eli.» Ga ɗaŋ coŋ yege hɨn̰: «Naa ba-yɔɔ-kɔl-gɨ-Kumu-ba-yɔɔ gɨ gɨlɨn̰ dan̰ ka-yɔɔ-kɔl-gɨ-Kumu-ba-yɔɔ ga jɨne naa ba bɔyɛ lɨbe.»

¹⁶ Kɨɗɨn̰ ga Ɛrɔd je kɔl gɨ nee le ɨni na, ban ye hɨn̰: «Na Ja̰ gusi gɨ ɨŋ wal cayi le ba bɔyɛ lɨbe.»

¹⁷ Tumɔ Ɛrɔd gɨy asɨgar kayi orge ƴɔmɛge Ja̰ saɗɨdiige dan̰ mɔrɨyɔŋ bɨ dɨbiige dangay dɨŋ. Ɛrɔd ƴomii na kɨya cay tamdi Ɛrɔdɨyadɨ. Tumɔ hɨndi na tam kurɨndi Pilib bɨ, kardi nee Ɛrɔd gusi say ƴoo.

¹⁸ Na kɨya gɨ Ja̰ tumɔ yen̰ Ɛrɔd hɨn̰: «Ji ɨran̰ dan̰ gɨyəŋ gɨ ni ƴɔɔ tam kurɨndɨn̰ naŋ.»

¹⁹ Ɛrɔdɨyadɨ ƴom Ja̰ dan̰ kudurɔɔ tɔgɨ. Hɨndi gey diɗii ama ɓala naŋ.

²⁰ Kɨya wa Ɛrɔd been̰ Ja̰ ba-lɔɔ batɛm kɔl nee, kɨya gɨ ban sol Ja̰ naa ungo gɨ dan̰ durɔ ɗɨngar bɨ, naa ungo gɨ woy dan̰ cɨndi bɨ, lee gɨ ban gamii. Na cɨndi kɔl gɨ da Ja̰ lee gɨ ɨrɨmedi or jɨn̰ kɛ kɛ, ama naa hɨn̰ wo̰ kalɨn̰ ma Ɛrɔd dor sɨmayi jen̰ kɔl koyi dan̰ gusi-mɔwa.

²¹ Ama wɔlɛ gɨ ɗaŋ gɨŋ Ɛrɔdɨyadɨ way gɨyəŋ. Na boy wɔlɛ gɨ Ɛrɔd leen̰ kɨdɨrɛ gɨ da wɔɔdi. Ban lee hɨnga ga ni dɔɔ molɨn̰ kalaŋ kayi ga gɨmdəŋ bɨ, gɨmdəŋ ga da asɨgar kayi bɨ, kɛrɨmbɛlɛŋ ga a cay gɨsəŋ ga Galile gaŋ bɨ.

²² Ɛrɔdɨyadɨ turmɔ ɨrga andaŋ a kɨɗɨn̰ ga ni dɔɔ gaŋ, san̰ sɔɔ tumoyge lee gɨ Ɛrɔd bɨ, kan ga ban molge bɨ gusɨge mooge tɔgɨ kol caa. Kɨlma yen̰ turmɔ le hɨn̰: «Ɨngɨrəŋ hɨnga ga me gey ɨŋ kɨya bɨne.»

²³ Ban ɓɨse gusi ye hɨn̰: «Hɨnga ga ani ani ga me na ɨngɨrəŋ na ɨŋ kɨya bɨne, ko naa dɔɔ-ƴaa tɨnge kalɨn̰ ma ɨŋ kɨya gaye duroy nee bɨne.»

²⁴ Turmɔ le andaŋ doŋ or ɨngɨrɨn̰ ƴɔɔ hɨn̰: «Kɛ na wa ma maŋ ɨngɨrii ga?» Ɨni na, ƴɔɔ duboo cay nee yo hɨn̰: «Ɨngɨrii cay Ja̰ ba-lɔɔ batɛm.»

²⁵ Kɔl gɨ kɨbɨna kɛ bɨ hɨndi jɨga kɨlaw gusi kɨlma ɨngɨrii ye hɨn̰: «Hɨnga ga ɨŋ gey haw kɛ le na cay Ja̰ ba-lɔɔ batɛm a boy subɨra gɨŋ.»

²⁶ Kɔl gɨ nee le lee gɨ cɨn̰ kɨlma kula, ama kɨya cay ɓɨse gɨ ban ɓɨsɨ gusi tumoy ka-mɔlɛ kayi le ban gey naroo naŋ.

²⁷ Kɔl gɨ kɨbɨna kɛ bɨ kɨlma gɨy asɨgar ba game ka-dangay pɨna, ayɨn̰ noy bii ɗe gɨ ban na ɨren̰ dan̰ cay Ja̰ ba-lɔɔ batɛm. Asɨgar le or wale cay Ja̰ ba-lɔɔ batɛm a duroy dangay dɨŋ.

²⁸ Bɨ ɨrgan̰ dan̰ cayi le boy subɨra gɨŋ bɨn̰ turmɔ le. Ɨni na, turmɔ le orɨn̰ bɨn̰ ƴɔɔ.

²⁹ Kɨɗɨn̰ ga ka-aye-cay-tɨbayi Ja̰ ba-lɔɔ batɛm jege koldi ɨni na, kan ɨrgage ayge gundi orɨn̰ dɨbe boy umboŋdi kamɨn̰aŋ ga kan hɨrɨmge a gasɨbi garma gɨŋ.

Jesu bɨn̰ ban̰aŋ dubu-bay hɨnga ga ni dɔɔ

³⁰ Ka-gɨre-gɨye dayaŋge gusi Jesu bɨ doriige kardi hɨnga nɔm ga kan leege bɨ, kardi hɨnga nɔm ga kan gɨlɨn̰ kalaŋ bɨ.

³¹ Ɨni na, Jesu yege hɨn̰: «Ɨregɨŋ danaŋ ana orgɨŋ walaŋ a kɨɗɨn̰ ga kalaŋ unɔ nee gaŋ dorɨn̰ gɨlale lam.» Kɨya wa kalaŋ dan̰ kondiige ɨrgage bɨ jogɨge bɨ, lee gɨ Jesu dan̰ ka-aye-cay-tɨbayi waage kɨɗɨn̰ ga ni dɨn̰ dɔɔ naŋ bɨrɨŋ.

³² Kardi nee na kan nayge boy koburo gɨ gumu taa taa gɨŋ, kɨya orɨn̰ walaŋ kɨɗɨn̰ ga kalaŋ unɔge nee.

³³ Kɨɗɨn̰ ga kan dor toyge na, kalaŋ kondɨ solgege te ɔrɛdɨge gɨŋ kɨya wa kan solge kɨɗɨn̰ ga kan or jɨn̰ nee. Lee gɨ kalaŋ ga a cay gulɔŋ gɨ durdɨne gaŋ andaŋge bɨ gɨrege kardɨge dan̰ tɨbayige orɨn̰ge bugoŋ tumoyge.

³⁴ Kɨɗɨn̰ ga Jesu gɨsɨn duroy koburo gɨ gumu gɨŋ na, ban sol dɨmdɨrdi kalaŋ dan̰ kondiige somge amiige. Cɨndɨge leeyi cɨn̰-n̰age kɨya wa kan woy gɨlɨn̰ hɨn̰ gamge ga ba sɔlɛ kardɨge unɔ wo̰. Ɨni na, ban ay te gɨlge hɨnga dan̰ kondiige.

³⁵ Kɨɗɨn̰ ga tɨwa kaga ɨni na, ka-aye-cay-tɨbayi ɨrgage mɨnde gusii bɨ yeyige hɨn̰: «Kɨɗɨn̰ ga kɛ le, na kɨɗɨn̰ ga kalaŋ unɔge nee bɨ, tɨwa kaga ɨni bɨ.

³⁶ Kuɗa gɨ ji yage ɗe kan orge duroy karɨn̰ gulɔŋn̰əŋ ga woyde mɨnde mɨnde bɨ, cay gulɔŋn̰əŋ bɨ, malɨn̰ hɨnga ga ni dɔɔ.»

³⁷ Ama ban dɨbɨge cay nee yege hɨn̰: «Naŋ. Kɨŋ gusɨgɨŋ bɨgegɨŋ hɨnga ga ni dɔɔ.» Kan yeyige hɨn̰: «Hay! Ji gey gɨ ni na bɨn̰ kalaŋ ga nee le hɨnga ga ni dɔɔ ga? Ji gey gɨ ni na ɨra kɨle mapa gɨ ni gursu di ɓal cay kobɨ ba-lɔɔ gɨye gɨ ni wɔlɛ aru sɔɔ bɨge ga?»

³⁸ Ɨni na, ban yege hɨn̰: «Kɨŋ orɨn̰ na dan̰ mapa mɨna kobɨgɨŋ ga? Ɨragɨŋ sɔlɛ.» Kɨɗɨn̰ ga kan baga sɔlɛ na kan jɨgage yeyige hɨn̰: «Mapa bay bɨ, gusa sɔɔ bɨ.»

³⁹ Ɨni na, Jesu ay noy bɨge gɨ kan na daya kalaŋ cay hɛɗɨmɛ ga bɨra gaŋ sɨman̰ge dugo dan̰ kɨɗɨn̰dɨge kɨɗɨn̰dɨge.

⁴⁰ Lee gɨ kan korge kalaŋ kardɨ gusɨge aru, aru bɨ, toyge-bay, toyge-bay bɨ.

⁴¹ Ɨni na, Jesu ƴee mapa ga bay bɨ gusa ga sɔɔ bɨ, ayɨn̰ cɨndi jɨn̰ daa torɨn̰-kɨbi cay nee pa dɨm ma boy mapa le dugo bɨn̰ ka-aye-cay-tɨbayi ɗe kan na gusɨnan̰ge kalaŋ ƴee. Kardi nee, gusa ga sɔɔ le kalɨn̰ ma Jesu gosɨnɨge cay nee bɨ.

⁴² Kan nɔm diige sɨdɨldəŋge.

⁴³ Kardi nee donge te mapa ga baa bɨ te gusa ga sɔɔ ga baa bɨ, wandɨn̰ gɔy mɔjɨ-cay-sɔɔ orɨn̰ge.

⁴⁴ Ban̰aŋ ga diige mapa le na kalaŋ dubu bay.

Jesu or a cay kaŋ gaŋ

⁴⁵ Kɔl gɨ kɨbɨna kɛ bɨ, Jesu ay noy bɨn̰ ka-aye-cay-tɨbayi ɗe na nayge boy koburo gɨ gumu taa taa gɨŋ, ɗe kan na haɗɨn̰ kuray orɨn̰ tumoyi jɨn̰ kɨwa gɨ cay ƴaa-di-gumu di Bɛtsayda dɨŋ, ama ban dan̰ gusi som kɨbɨ kuray gɨŋ kɨya yon̰ dɨmdɨrdi kalaŋ ɗe na orge.

⁴⁶ Kɨɗɨn̰ ga Jesu yen̰ kalaŋ ɗe na orge ɨni na, ban nay a cay garma gɨŋ kɨya ɔlɛ Kumu.

⁴⁷ Kɨɗɨn̰ ga tɨwa le borɨndo na, koburo gɨ gumu le bugoŋ duroy kuray gɨ gumu gɨŋ bɔb, Jesu baa kan̰di hayi dugo kɨbɨ kuray gɨŋ.

⁴⁸ Ban solge gɨ kan haɗɨge kuray dan̰ gɨlale kɨya gɨ kal yal cɨndɨge. Ɓal hɨn̰ te kɨɗɨn̰ wo̰ na, Jesu or a cay kuray gɨ gumu gɨŋ orɨn̰ jɨn̰ gusɨge. Ban gey pɨdɨge orɨn̰.

⁴⁹ Ama kɨɗɨn̰ ga kan soliige te ɔrɛ a cay kuray gɨ gumu gɨŋ hɨn̰ wo̰ na, kan ɨrɨmge kuduroyge gɨ naa turnoy ungo. Lee gɨ kan kaydege gɔsɛ.

⁵⁰ Kɨya wa kan nɔm soliige lee gɨ hundɔrɔ gɨ gumu baa toyge. Kɔl gɨ kɨbɨna kɛ bɨ, Jesu yege kɔl hɨn̰: «Hundɔrɔgɨŋ naŋ, na ɨŋ-bandi Jesu ƴɨmagɨŋ kuduroygɨŋ usa.»

⁵¹ Kardi nee ɨni na, ban nay danage duroy koburo gɨ gumu taa taa gɨŋ bɨ, kal ɨre dugo. Lee gɨ kɔl kayge sɛl sɛl yɔd.

⁵² Na cɨndi, kan solge Jesu lee beli gɨ da mapa, ama kan sɨlage duroy naŋ kɨya wa kuduroyge osu.

Jesu poɗɨ ka-hɔmɨn̰ɛ a cay gɨsəŋ ga Jenejarɛt gaŋ

⁵³ Kɨɗɨn̰ ga kan haɗɨge kuray gɨ gumu coŋ ɨni na, kan bugoŋge a cay gɨsəŋ ga Jenejarɛt saɗɨn̰ge koburo gɨ gumu taa taa le dugo kɨbɨ kuray gɨŋ.

⁵⁴ Kɨɗɨn̰ ga kan gɨsɨnge duroy koburo gɨŋ dugo ɨni na, kɔl gɨ kɨbɨna kɛ bɨ kalaŋ solge gɨ naa Jesu.

⁵⁵ Ɨni na, kan say gorge a cay gɨsəŋ ga nee gaŋ nɔm. Bɨ ayge te ɨrgan̰ dan̰ ka-hɔmɨn̰ɛ a cay gasɨlaŋ jala gaŋ a kɨɗɨn̰ ga ani ani ga kan je gɨ ban na ɨre nee.

⁵⁶ Kɨɗɨn̰ ga ani ani ga Jesu orɨn̰ nee, naa a cay gulɔŋn̰əŋ gaŋ naŋ le, naa a cay ƴaa-di-gumu dɨŋ naŋ le, naa a cay karɨn̰-gulɔŋ gaŋ kalɨn̰ ma, kalaŋ ɨrgan̰ge dan̰ ka-hɔmɨn̰ɛ a gɛgɛr gɨŋ bɨ, oliige gɨ ban na ɗage ɗe ɨsɨbɨge kɨbɨ badɨge kayi. Bɨ kalaŋ nɔm ga ba ɨsɨbiige le poɗɨge.