Marg 16 - Gabri Maja

Jesu boy lɨbɨ

¹ Wɔlɛ gɨ ni dorɨn̰ gɨlale gɨ da Jubɨn̰əŋ kaga dan̰ borundo. Ɨni na, Mari di cay gulondo na Magɨdala bɨ, Salomɛ bɨ, Mari di ni Jag ƴoyi bɨ, kɨlge sɔŋ ɨdɨr kɨya orɨn̰ tɨdɨrdege a cay gundi Jesu.

² Dan̰ wɔlɛ gɨ ni dɨmasɨ dan̰ te jogɗu cururu kɨɗɨn̰ ga tɨwa ay te andaŋ na, kan orge a cay kamɨn̰aŋ gaŋ.

³ A te gɨyəŋ gɨŋ na kan ɨngɨrɨn̰ge gusɨge hɨn̰: «Kɛ na waŋ ba kɨya noŋgɨlɛ garma gɨ kan lɨgɨn̰ge kɨbɨ kamɨn̰aŋ le bɨna ga?»

⁴ Ama kɨɗɨn̰ ga kan ayge cɨndɨge daa na, kan solge gɨ garma le nunguloŋ coŋ ɨni. Ama garma le na gɨ gumu tɔgɨ.

⁵ Kan andaŋge boy umboŋ kamɨn̰aŋ gaŋ le ɨni na, kan solge marɨna gɨ pɨna wo̰ gɨ dobɨ gumɔjɨ gɨ sɨngɨɗɨ bɛrɛ tɨrɨjɨ gusi som a cay kɔbɔ gɨ bara gɨŋ, lee gɨ hundɔrɔ leege gɨɗaŋ.

⁶ Ama ban yege hɨn̰: «Hundɔrɔgɨŋ naŋ. Ɨŋ sol gɨ kɨŋ mal na Jesu gɨ Najarɛt gɨ kan gagɨliige a cay sɨya-gɨ-dagɨli gɨŋ le. Ban unɔ kɛ. Ban boy lɨbɨ ɨni. Sɨlagɨŋ kɨɗɨn̰ ga tumɔ kan ba dibii nee ba kɛ.

⁷ Ama ɨragɨŋ haw kɛ yan̰gɨŋ ka-aye-cay-tɨbayi bɨ, Pɨyɛr bɨ yagegɨŋ hɨn̰: “Ban de tumoygɨŋ a Galile. Na a nee ma kɨŋ kɨya solii, hɨn̰ gɨ ban ni ba yəgɨŋ le.”»

⁸ Kan andaŋge doŋ duroy kamɨn̰aŋ gaŋ coŋ bɨ, beege toyge daa dan̰ gɨre dorɨn̰ge toyge sɛdɨ dan̰ kamɨn̰aŋ, kɨya wa kan saydege jag jag bɨ turnoyge gɨre kayaŋ bɨ ama yan̰ge ungo kɔl gɨ nee le naŋ, kɨya wa hundɔrɔ leege.

Jesu gɨl gusi bɨn̰ Mari di Magɨdala

⁹ [Jesu boy lɨbɨ dan̰ te jogɗu cururu dan̰ wɔlɛ gɨ ni dɨmasɨ. Kalaŋ ga soliige cay wase le na Mari di cay gulondo na Magɨdala di Jesu tay turnɔ ga ɨsɨni won̰ jurgum a gusoo coŋ le.

¹⁰ Mari or dɔrɛ koldi bɨn̰ kan ga tumɔ somge dan̰ Jesu. Kan somge duroy n̰age dɨŋ bɨ, ɨle gɨŋ bɨ kol cayi.

¹¹ Hɨndi yege hɨn̰: «Jesu som-bɨra bɨ, ɨŋ solii dan̰ cɨnɨ bɨ.» Ama kɨɗɨn̰ ga kan ba jege kɔl gɨ hɨndi ba yege le ɨni na, kan bɨgage kuduroyge cay nee naŋ.

Jesu andaŋ a cay ka-aye-cay-tɨbayi ga sɔɔ

¹² Kardi nee ɨni na, ka-aye-cay-tɨbay Jesu sɔɔ saygage Jerusalɛm a yage gɨŋ, ama orge na jɨn̰ cay gulɔŋ gɨ pɨna wo̰ gɨŋ. Jesu andaŋ dus cayge. Ama ban lee gusi hɨn̰ ungo gɨ ɗaŋ wo̰.

¹³ Kan jogɨge a cay tɨbayige dɨŋ a cay ƴaa-di-gumu di Jerusalɛm dɨŋ yen̰ge te kan ga baa ama kan bɨgage kuduroyge cay nee naŋ.

Jesu andaŋ a cay ka-aye-cay-tɨbayi

¹⁴ Kardi nee ɨni na, ban andaŋ dus a cay kan ga mɔjɨ-cayge-pɨna, kɨɗɨn̰ ga somge kɨbɨ hɨnga ga ni dɔɔ gaŋ. Ban san̰ danage kɨya cay bɔgɛ kudurɔ koge cay kɔl gɨŋ naŋ bɨ, kɨya cay kuduroy-dɨmbɨrwa koge bɨ. Kɨya wa kan kan̰ bɔgɛ kuduroyge a cay kɔl gɨ da kalaŋ ga soliige kɨɗɨn̰ ga ban boy lɨbɨ.

¹⁵ Kardi nee ban yege hɨn̰: «Ɨragɨŋ a cay gɨsəŋ gaŋ nɔm, tɨgagɨŋ bɛrnɛ di da Kɔl-gɨ-Ɗari bɨn̰gɨŋ kalaŋ a kɨɗɨn̰ gaŋ nɔm.

¹⁶ Ungo gɨ kɨya bɔgɛ kuduroy cay nee bɨ, kɨya lɔɔ batɛm bɨ na, kɨya pɔɗɛ. Ama ungo gɨ na bɨga kuduroy cay nee naŋ na, kɔl kɨya ƴɔmɛ cayi.

¹⁷ Kalaŋ ga na bɨgage kuduroyge cay nee na, kɨya lɔɔge hɨnga ga ɗɨn̰ cɨn̰-kɨɗɨn̰ ga ba kɛ: “Kan kɨya taye turnɔ ga ɨsɨndəŋ dan̰ gusonɨ bɨ, kɨya yɔɔge kɔl dan̰ kɨbɨ gɨ hɨrɨwa bɨ.

¹⁸ Kɨɗɨn̰ ga kan na ƴɨma kumbulo dan̰ kobɨge bɨ, sage hɨnga ga kɨya dɨɗe kalaŋ bɨ kalɨn̰ ma, kɨya looge hɨnga pɨna naŋ. Kan kɨya dɨbege kobɨge cay ka-hɔmɨn̰ɛn̰əŋ bɨ, kan kɨya pɔɗɛge bɨ.”»

Jesu jogu gusi Kumu

¹⁹ Kardi nee kɨɗɨn̰ ga Ba-gulɔŋ Jesu dɨɗɨ kɨbɨ yɔɔ kɔl danage ɨni na, Kumu ayi orɨn̰ danayi gɨɗɨgɨ-Kumu gɨŋ, lee gɨ ban som kɨway bay a cay kobi gɨ bara gɨŋ.

²⁰ Ama ka-aye-cay-tɨbay Jesu na, gorge a kɨɗɨn̰ gaŋ nɔm teen̰ge bɛrnɛ di da Kɔl-gɨ-Ɗari. Ba-gulɔŋ lee gɨye danage, bɨge tɔgɨ di ni leen̰ hɨnga ga ɗɨn̰ cɨn̰-kɨɗɨn̰, ɗe kalaŋ na solɨn̰ge gɨ bɛrnɛ di kan ba teege le naa kɔl gɨ cɨndi.]