Marg 11 - Gabri Maja

Jesu andaŋ a cay ƴaa-di-gumu di Jerusalɛm

¹ Jesu dan̰ ka-aye-cay-tɨbayi tɨbayge ba mɨnde dan̰ cay ƴaa-di-gumu di Jerusalɛm. Lee gɨ kan bugoŋge mɨnde dan̰ cay gulɔŋn̰əŋ ga Bɛdɨpaje bɨ, Betani bɨ, di woy kɨway garma gɨ teeyige Olibɨye ɨni na, Jesu gɨy ka-aye-cay-tɨbayi won̰ge sɔɔ tumoyi.

² Bɨ yege hɨn̰: «Ɨragɨŋ a cay gulɔŋ gɨ woy cɨndɨgɨŋ kɔ. Kɨɗɨn̰ ga kɨŋ kɨya bugoŋ a kɨbɨ cay gulɔŋ gɨŋ na, kɨŋ kɨya wɔɔ karɨn̰ kura̰ ga kan saɗɨge dugo ga cay pɨna wo̰ ungo na kardɨge naŋ ƴee. Pɨndɨrgegɨŋ bɨ, ɨren̰gɨŋ danage.

³ Ma hɨn̰ gɨ ungo na ɨngɨrgɨŋ hɨn̰: “Kɨŋ lee hɨnga ga nee le na kɨya wa ga na?” Dɨbiigɨŋ cay nee yayigɨŋ hɨn̰: “Na Ba-gulɔŋ ba geye bɨ, ban kɨya jogɨn̰ bɨgɨŋ haw kɛ daa bɨ.”»

⁴ Ka-aye-cay-tɨbay Jesu orge bɨ wayge karɨn̰ kura̰ ga kan saɗɨgege dugo a te gɨyəŋ gɨŋ kɨbɨ-ƴaa gɨŋ doŋ. Bɨ kan pɨndɨrgege.

⁵ Kalaŋ ga pɨna duroy kalaŋ ga ɨrege nee le, ɨngɨrgege hɨn̰: «Kɛ kɨŋ lee na wa wo̰ ga? Kɛ kɨŋ pɨndɨr karɨn̰ kura̰ le na kɨya wa ga?»

⁶ Kan dɨbɨgege cay nee hɨn̰ gɨ Jesu ba yege le wo̰. Ɨni na, kan ɗege orɨn̰ge.

⁷ Kan ɨrgan̰ge dan̰ karɨn̰ kura̰ le bɨn̰ge Jesu. Bɨ kan torge badɨge kage ga cay kamdɨge gaŋ labge cay karɨn̰ kura̰ gaŋ le bɨ, Jesu nay som cay nee.

⁸ Kalaŋ kondɨ labge badɨge kage ga kan tobɨ cay kamdɨge gaŋ cay gɨsəŋ gaŋ tumoyi te gɨyəŋ gɨŋ bɨ, kan ga pɨna wadɨldege kobɨ hayaŋ ga bɨra duroy yage gɨŋ labdege dugo cay gɨsəŋ gaŋ tumoyi bɨ.

⁹ Dɨmdɨrdi kalaŋ ga gorge tumoyi bɨ, ga gorge kardi bɨ, dege sɨle yen̰ge hɨn̰: «Gusoŋ-tɔgɛ na gɨ da Kumu! Kuɗa gɨ tɔrɛ-kɨbɨ wɨya kɨya cay ungo gɨ ɨrga dan̰ guson̰ Ba-gulɔŋ!

¹⁰ Kuɗa gɨ Kumu tɨra-kɨbi cay dɔɔ-ƴaa di ba kɨya ɨrga, dɔɔ-ƴaa di da mon̰ɨna Dabid. Gusoŋ-tɔgɛ na gɨ da Kumu a gɨɗɨgɨ-Kumu gɨŋ!»

¹¹ Kɨɗɨn̰ ga Jesu bugoŋ a cay ƴaa-di-gumu di Jerusalɛm dɨŋ ɨni na, ban or andaŋ a duroy ƴaa-di-da-Kumu dɨŋ. Kardi nee kɨɗɨn̰ ga ban sol hɨnga nɔm ga nɨwrii daa coŋ ɨni na, ban dan̰ ka-aye-cay-tɨbayi ga mɔjɨ-cayge-sɔɔ andaŋge a cay ƴaa-di-gumu dɨŋ coŋ orge a cay gulɔŋ gɨ Betani, kɨya wa tɨwa lee borundo ɨni.

Jesu ɓɨsɨ tuguyɔŋ

¹² Wan̰dodo, kɨɗɨn̰ ga kan andaŋge a cay gulɔŋ gɨ Betani gɨŋ coŋ ɨni na, kuroŋ lee Jesu.

¹³ Ban sɨlga hɨyadi tuguyoŋ dan̰ kabɨn̰do hen̰ tumoyi ɨni na, ban or kɨya sɔlɛ kɛ ɗi na gɨ wɔɔ dan̰ wɔɔdo nee ga. Ama kɨɗɨn̰ ga ban bugoŋ gusoo ɨni na, ban way na kabɨn̰do ƴɔbɨ, kɨya wa na kɨdɨrɛ gɨ da wɔɔdi tuguyɔŋ naŋ ƴee.

¹⁴ Ɨni na, Jesu yen̰ tuguyɔŋ le hɨn̰: «Ungo kɨya dɔɔ wɔɔde naŋ bɨrɨŋ ɨni.» Bɨ ka-aye-cay-tɨbayi jege kɔl koyi gɨ ban ye le.

Jesu a duroy ƴaa-di-da-Kumu dɨŋ

¹⁵ Kan bugoŋge a cay ƴaa-di-gumu di Jerusalɛm dɨŋ ɨni na, Jesu andaŋ a duroy gulɔŋ ƴaa-di-da-Kumu dɨŋ bɨ ay te tɔɔ ka-lɔɔ gɨyaw bɨ, ka-kɨle hɨnga bɨ, ga woyge boy nee nɔm coŋ. Tabɨl di da ka-kɨlange gursu bɨ, sɨya sɔmɛ gɨ da ka-lɔɔ gɨyaw ga da guun̰əŋ ga bɛdɨrdɛŋ bɨ le, ban nongɨlde layde coŋ bɨ.

¹⁶ Ban ɗa ungo wo̰ aya hɨnga pɨdɨn̰ a duroy ƴaa-di-da-Kumu dɨŋ naŋ.

¹⁷ Ɨni na, ban gɨlge hɨnga yen̰ hɨn̰: «Kumu ye a duroy magtubu toy dɨŋ hɨn̰: “Kɨya tɔgɛge ƴaanɨ, na ƴaa di kalaŋ kɨya olɨn̰ge Kumu nee di da te wɔɔ gɨ da kalaŋ nɔm.” Ama kɨŋ-gandi kɨŋ bɨloo leen̰ kɨɗɨn̰ wɔsɛ ga da ka-hase.»

¹⁸ Kɨɗɨn̰ ga ka-cay ka-bɔgɛ kɨbar dan̰ ka-gɨlɨn̰ kalaŋ gasɨn̰-kɔl gɨ da Moyis solge hɨn̰ wo̰ ɨni na, malge gɨyəŋ gɨ ni dɨɗii coŋ, kɨya wa kan hɨndariige kɨya gɨ hɨnga ga ban gɨlɨn̰ dɨmdɨrdi kalaŋ le dor turnoyge.

¹⁹ Kɨɗɨn̰ ga tɨwa lee borundo ɨni na, Jesu dan̰ ka-aye-cay-tɨbayi andaŋge a cay ƴaa-di-gumu dɨŋ coŋ.

Jesu bɨ sɨyadi tuguyɔŋ di hay bɨ

²⁰ Wan̰dodo dan̰ jogɨɗu cururu kɨɗɨn̰ ga kan pɨdege te gɨyəŋ gɨŋ na, kan solge tuguyɔŋ le hay ayɨn̰ toy a caa bɨrɨŋ andɨn̰ sarɨna gɨŋ.

²¹ Pɨyɛr hɨn a cay kɔl gɨ Jesu ba ye gɨŋ le ɨni na, ban ye hɨn̰: «Ba-gɨlɨn̰ kalaŋ hɨnga, sɨla tuguyɔŋ di ji ba ɓɨsoo le hay kuyɔm coŋ.»

²² Ɨni na, Jesu dɨbɨge cay nee yege hɨn̰: «Bɨgagɨŋ kuduroygɨŋ a cay Kumu dan̰ aye kudurɔ gɨ osi.

²³ Aŋ yəgɨŋ daa waŋ na cɨndi, hɨn̰ gɨ ungo na aya noyi bɨn̰ garma gɨ kɛ le yan̰ hɨn̰: “Sa a kɨɗɨn̰ ga kɛ gaŋ coŋ ɨra bɔɔ a kuray gɨ gumu gɨŋ na”, kɨya lɔɔ gusɨge, hɨn̰ gɨ ban na ɨrɨm kɔl kuduroy sɔɔ sɔɔ a ɗugoy naŋ bɨ, bɨga kuduroy cay nee dan̰ ɗugoy di pɨna gɨ hɨnga ga ban ye le na kɨya lɔɔ gusɨge bɨ.

²⁴ Na toy di hɨn̰ wo̰ ma, maŋ yəgɨŋ daa waŋ: Hɨnga nɔm ga kɨŋ ɨngɨrɨn̰ Kumu dan̰ gɨyəŋ gɨ da ɔlɛ le, bɨgagɨŋ kuduroygɨŋ cay nee gɨ kɨŋ na way hɨnga ga nee le leen̰ cɨndi na, kan kɨya bɨgɨŋ.

²⁵ Bɨ kɨɗɨn̰ ga kɨŋ na ɨr daa, kɨɗɨn̰ ɔlɛ gɨŋ ma hɨn̰ gɨ kɔl na dayagɨŋ dan̰ ungo na, kɨŋ ɗa kuduroygɨŋ jala cayi, ɗe Baygɨŋ gɨ som a gɨɗɨgɨ-Kumu gɨŋ ɗe kuduroyi jal cay hɨnga kagɨŋ ga dan̰ gɨyəŋdɨge naŋ bɨ.

²⁶ [Ama hɨn̰ gɨ kɨŋ na ɗa kuduroygɨŋ jala cay kamdɨgɨŋ naŋ na, Baygɨŋ gɨ som a gɨɗɨgɨ-Kumu gɨŋ kɨya ɗɔɔ kuduroy jalɨwa cay ɨsɨna kogɨŋ gɨŋ naŋ bɨ.»]

Na waŋ ba bɨn̰ Jesu dɔnɔ ga

²⁷ Jesu dan̰ ka-aye-cay-tɨbayi jogɨge orge a cay ƴaa-di-gumu di Jerusalɛm dɨŋ. Kɨɗɨn̰ ga Jesu gor duroy gulɔŋ ƴaa-di-da-Kumu dɨŋ na, ka-cay ka-bɔgɛ kɨbar bɨ, ka-gɨlɨn̰ kalaŋ gasɨn̰-kɔl gɨ da Moyis bɨ, kan ga muɗoldoŋ bɨ, ɨrgage gusii bɨ.

²⁸ Kan ɨngɨriige yege hɨn̰: «Kɛ na dan̰ dɔnɔ di da waŋ ma mɨn̰ leen̰ dan̰ hɨnga ga nee le ga? Wala na waŋ ba bɨn̰ dɔnɔ di ni leen̰ dan̰ gɨye gɨ nee le ga?»

²⁹ Jesu dɨbɨge cay nee yege hɨn̰: «Ɨŋ orɨn̰ dan̰ kɔl pɨna gɨ ni ɨngɨrgɨŋ bɨ. Hɨn̰ gɨ kɨŋ na dɨbəŋ cay nee na, ɨŋ kɨya yogɨŋ kɨɗɨn̰ ga ɨŋ saygan̰ dan̰ dɔnɔ di ni leen̰ hɨnga ga nee le nee bɨ.

³⁰ Batɛm da Ja̰ le, sayga na gusi Kumu wala sayga na gusi kalaŋ ga ɨndəŋ ga? Dɨbəŋgɨŋ cay nee.»

³¹ Ama kan say man̰-kɔl cay nee duroyge bɨ, yen̰ge gusɨge kɔl yege hɨn̰: «Hɨn̰ gɨ na na yayi hɨn̰: “Na sayga naa gusi Kumu na”, ban kɨya yona hɨn̰: “Kɨya wa ma mana na bɨga kuduroyna cayi naŋ ga?”

³² Ama na ɓala gɨ ni yɔ hɨn̰: “Sayga naa gusi kalaŋ naŋ bɨ.” Kan yege hɨn̰ wo̰ na kɨya gɨ kan hɨndarge na dɨmdɨrdi kalaŋ bɨ, geyge mɔndɛge kuduroyge naŋ. Kɨya wa kalaŋ leege Ja̰ leen̰ na ba-yɔɔ-kɔl-gɨ-Kumu-ba-yɔɔ gɨ cɨndi.»

³³ Na toy di hɨn̰ wo̰ ma, kan jɨga dɨbiige cay nee yeyige hɨn̰: «Ni sɨla naŋ.» Bɨ Jesu jɨga dɨbɨge cay nee yege hɨn̰: «Naa hɨn̰ wo̰ na, ɨŋ-bandi kalɨn̰ ma ɨŋ kɨya yogɨŋ ungo gɨ ba bəŋ dan̰ dɔnɔ ma maŋ leen̰ dan̰ gɨye gɨ nee le naŋ bɨ.»