Kɔl-gɨ-Ɗari gɨ Lug wal 21 - Gabri Maja

Bee hɨnga ga da tama di kudurɔ ma

¹ Jesu ay tɨdi daa solɨn̰ kalaŋ, ka-wɔɔ hɨnga a duroy ƴaa-di-da-Kumu dɨŋ ga ɨre beege hɨnga bee kage, a boy hɨnga ga kan been̰ nare nee gaŋ.

² Ɨni na, ban sol tama di kudurɔ ma di ɗe-n̰age, ɨrgan̰ dan̰ sisi sɔɔ bee bɨ.

³ Jesu say yege hɨn̰: «Na cɨndi! Aŋ yəgɨŋ da waŋ, tama di kudurɔ ma di ɗe-n̰age le, bee hɨnga ɗɨn̰ kan ga ɗaŋ nɔm.

⁴ Kɨya wa kalaŋ ga nee le nɔm, donge na kɨbɨ gursu toge di kondi ɨrgan̰ bee. Ama hɨndi na, hɨndi ay na kagadi hɨnga wɔɔdo ga ni amɨn̰ guso bee.»

Jesu ye kol ƴaa-di-da-Kumu di kɨya mundoŋ

⁵ Kalaŋ ga pɨna wo̰, ɨrege arge kɔl ojɨn̰ cay ƴaa-di-da-Kumu bɨ, kan yege gɨ ƴaa le na kuɗa tɔgɨ, dan̰ oru ga kan gaɗɨn̰ge bɨ, dan̰ hɨnga ga ni bee ga kalaŋ si a duroy ƴaa gɨŋ le bɨ. Ama Jesu yege hɨn̰:

⁶ «Hɨnga ga kɨŋ ba sol kɛ le, wɔlɛ kɨya caga gɨ oru pɨna kalɨn̰ ma, kɨya sɔmɛ cay mɨgay gɨŋ daa naŋ: Kan kɨya jɨdɨrdayge dugo gɔrɔrɔ gɔrɔrɔ.»

Hɨnga ga kɨya lɔɔ gusɨge tumoyi wɔlɛ gɨ ni bon̰ kɔl

⁷ Kan say ɨngɨriige yege hɨn̰: «Ba-gɨlni hɨnga, hɨnga ga nee le kɨya lɔɔ gusɨge na wɔlɛ gɨ ani gɨŋ ga? Bɨ na hɨnga di wa ba kɨya gɨlni gɨ hɨnga ga nee le, na woy mɨnde ga?»

⁸ Jesu say dɨbɨge cay nee yege hɨn̰: «Ɗagɨŋ muɗɔlɛ a cay gusɨgɨŋ. Ɗɔɔgɨŋ ungo nargɨŋ bogɨgɨŋ kayaŋ naŋ ɨni. Kɨya wa dɨmdɨrdi kalaŋ kɨya ɨrgage dan̰ gusoŋnɨ bɨ, yɔɔge hɨn̰: “Kɨris ban gɨ Kumu dorii le, na ɨŋ-bandi.” Bɨ kan kɨya sɔ yɔ hɨn̰: “Wɔlɛdi ɓal ɨni.” Ama kɨŋ na, kɔbɛgɨŋ kardɨge naŋ ɨni.

⁹ Kɨɗɨn̰ ga kɨŋ na ja koldi wɔrɨn̰ɛ bɨ, noy kalaŋ ga san̰ dan̰ gusɨge bɨ na, hundɔrɔ gɨŋ naŋ. Kɨya wa naa wa wa kalɨn̰ ma, hɨnga ga nee le kɨya ɨrga tumɔ pa dɨm. Ama kagadɨge na kɔl gɨ kɨbɨna kɛ naŋ.»

¹⁰ Ɨni na, ban yege ɗaŋ coŋ hɨn̰: «Te mon̰ gɨ pɨna kɨya dɨbe kɨmbɨl dan̰ te mon̰ gɨ ɗaŋ bɨ, dɔɔ-ƴaa di pɨna kɨya sɔ dɨbe kɨmbɨl dan̰ dɔɔ-ƴaa di ɗaŋ bɨ.

¹¹ Cay gɨsəŋ kɨya yɨbagɨde gusɨge dan̰ kɨɗɨn̰ kɨɗɨn̰ yɨbag yɨbag bɨ, badra di gumu kalɨn̰ ma kɨya bɔɔ dan̰ kɨɗɨn̰ kɨɗɨn̰ bɨ, hɔmɨn̰ɛ gɨ gumu kɨya bɔɔ bɨ. Hɨnga ga lee hundɔrɔ kɨya andaŋ bɨ, hɨnga ga ni beli ga ɗɨn̰ cɨn̰-kɨɗɨn̰ ga gɨmdəŋ kɨya andaŋ gɨɗɨgɨ-Kumu gɨŋ bɨ.

¹² «Ama tumɔ pa dɨm ma ɗe hɨnga ga nee le na ɨrga na, kan kɨya ƴomgɨŋ bɨ, kan kɨya gɨlgɨŋ cɨn̰-n̰age bɨ, kan kɨya se kɔl cay gɨŋ a duroy ƴaa-daye-di-da-Jubɨn̰əŋ gaŋ bɨ, kan kɨya bogɨgɨŋ dangay bɨ, kan kɨya tolgɨŋge orɨn̰ge danagɨŋ tumoy kɛrɨmbɛlɛŋ gaŋ bɨ, tumoy ka-kɨbɨ kɛrɨmbɛlɛŋ ga gɨmdəŋ kɨya gusoŋnɨ.

¹³ Hɨnga ga nee le, kɨya bɨgɨŋ gɨyəŋ gɨ ni yon̰ kɔl gɨ cɨndi gɨ ojɨn̰ canɨ.

¹⁴ Sɨlagɨŋ kuɗa, kɔl gɨ kɨŋ kɨya dɨbɨge cay nee gɨ ni dorɨn̰ kɔl caygɨŋ le, ɨrɨme gɨŋ koldi kuduroygɨŋ tumɔ naŋ.

¹⁵ Kɨya wa kɔl gɨ ni cɨn̰-muɗɔlɛ gɨ ɨŋ-bandi ɨŋ kɨya bɨgɨŋ le, ungo pɨna a duroy ka-baadɨgɨŋ kalɨn̰ ma, kɨya ɓale gange, wala dɨbɨgɨŋ kɔl cay nee naŋ.

¹⁶ Kandɨgɨŋ ga ka-woogɨŋ bɨ, karmɨgɨŋ bɨ, kandɨgɨŋ bɨ, ka-pogɨn̰igɨŋ bɨ, kɨya aye caygɨŋ bɨn̰ ka-dɔɔ cay ƴaa bɨ, ka-dɔɔ-ƴaa kɨya dɨɗe ga pɨna kondɨwa duroygɨŋ bɨ.

¹⁷ Kalaŋ nɔm kɨya ƴomgɨŋge dan̰ kuduroyge kɨya cay gusonɨ.

¹⁸ Ama teɗi caygɨŋ pɨna kalɨn̰ ma, kɨya duroŋ bɔɔ dugo naŋ.

¹⁹ Na dan̰ ƴɔmɛ kuduroy-osɨwa kogɨŋ ma, magɨŋ kɨya wan̰ pɔɗɛ.

Kɔl gɨ kan kɨya bɔyɛ a cay Jerusalɛm

²⁰ «Wɔlɛ gɨ pɨna ka-baadɨgɨŋ dan̰ kondige kɨya ɨrga nɨwɨre cay ƴaa-di-gumu di Jerusalɛm daa. Kɨɗɨn̰ ga kɨŋ na sɨla na, sɨlagɨŋ hɨn̰ gɨ mundoŋ kɔ ba mɨnde.

²¹ Ɨni na, ɗa gɨ kalaŋ ga a cay gɨsəŋ ga Jude le, gɨrge ɨra a cay garman̰əŋ gaŋ bɨ, ɗa gɨ kan ga somge a Jerusalɛm le, andaŋge doŋ bɨ, ɗɔɔ gɨ kan ga baa boy yagegɨŋ jɔgɛge a boy cay ƴaa-di-gumu dɨŋ naŋ bɨ.

²² Kɨya wa wɔlɛdi gɨ nee le, na wɔlɛ gɨ Kumu kɨya bon̰ kɔl ɗe kɔl gɨ ka-yɔɔ-kɔl-gɨ-Kumu-ba-yɔɔ, walge duroy magtubu dɨŋ nɔm le, or kɨɗɨn̰ diige gaŋ.

²³ Boy wɔlɛdi gɨ nee le, kandɨ ga ka-kuroŋ bɨ, kan ga ka-bɨn̰ karɨn̰aŋ kobɨn̰ bɨ le, cɨn̰-n̰age kɨya bɔɔ cayge. Kɨya wa dɔgɛ bɨn̰a kɨya lɔɔ kalaŋ ga cay gɨsəŋ gaŋ bɨ, kuduroy-hɔmɛ di da Kumu kɨya bɔɔ cay kalaŋ ga nee le bɨ.

²⁴ Kan kɨya dɨɗɨge dan̰ pəlɨm bogɨge dugo bɨ, kan kɨya donge orɨn̰ danage dangay a cay gɨsəŋ ga ɗaŋ gaŋ bɨ, te wɔɔ gɨ da kalaŋ ga toyge na Jubɨ naŋ kɨya cagage ɗɔdɨrdɛ Jerusalɛm dugo dan̰ tɨbayge bɨrɨŋ gɨsɨn̰ wɔlɛ gɨ da kalaŋ ga toyge na Jubɨ naŋ kɨya ɔrɛ kɨɗɨn̰di gaŋ.

Caga gɨ da Kurɨn̰-ungo

²⁵ «Hɨnga ga ɗɨn̰ cɨn̰-kɨɗɨn̰ kɨya lɔɔ gusɨge boy tɨwa di daa dɨŋ bɨ, boy kɨdɨrɛ gɨŋ bɨ, boy dɛsɨɗɛŋ gaŋ bɨ. A cay gɨsəŋ gaŋ na, te wɔɔ gɨ da kalaŋ kɨya sɔmɛge dan̰ hundɔrɔ kɨya noy kaŋdi kuray gɨ gumu taa taa gɨ say dan̰ togii bɨ, kɨya mɛw ga te pɨj pɨj bɨ.

²⁶ Hundɔrɔ kɨya dɨɗe ban̰aŋ kɨɗɨn̰ ga kan kɨya ɨrɨme kɨya cay hɨnga ga ba kɨya andaŋ a cay gɨsəŋ gaŋ, kɨya wa dɔnɔ di da hɨnga ga gɨɗɨgɨ-Kumu gaŋ kɨya yɨbagdaŋ.

²⁷ Ɨni na, kalaŋ ga cay gɨsəŋ gaŋ kɨya sɔlɔŋge ɨŋ-bandi Kurɨn̰-ungo dan̰ tɨdɨge, ɨrga cay gɨrɨmbale gaŋ dan̰ dɔnɔ di gumu bɨ, dan̰ asɨn̰a gɨ gumu bɨ.

²⁸ Kɨɗɨn̰ ga hɨnga ga nee le, na aya te lɔɔ gusɨge na, ƴɨmagɨŋ gusɨgɨŋ usa bɨ ayagɨŋ caygɨŋ daa sɨlan̰gɨŋ kɨɗɨn̰ bɨ, kɨya wa wɔlɛ gɨ kɨŋ kɨya dorɨn̰ caygɨŋ wɨyga mɨnde.»

Jesu dor kɔl gɨ da tuguyoŋ

²⁹ Jesu say dor kɨradi-kɔl yege hɨn̰: «Sɨlagɨŋ tuguyoŋ dan̰ hayeŋ ga ɗaŋ nɔm.

³⁰ Kɨɗɨn̰ ga kɨŋ ba sol kabɨn̰dɨge ba jɨbɨ laɗɨ na, kɨŋ sol leen̰ cɨndi gɨ marɨm ba mɨnde.

³¹ Na hɨn̰ wo̰ bɨ, kɨɗɨn̰ ga kɨŋ na sɨla hɨnga ga nee le na bugoŋ na, sɨlagɨŋ gɨ dɔɔ-ƴaa di da Kumu ba mɨnde ɨni.

³² Aŋ yəgɨŋ daa waŋ na cɨndi: Hɨnga ga nee le kɨya andaŋ tumɔ pa dɨm ma, kalaŋ ga somge cay gɨsəŋ gaŋ nɔm haw kɛ toyge kɨya ayaŋ ƴee.

³³ Gɨɗɨgɨ-Kumu dan̰ cay gɨsəŋ kɨya pɨdege, ama kɔl hɨnge na kɨya pɨde naŋ bɨrɨŋ.

Ɗagɨŋ muɗɔlɛ cay gusɨgɨŋ

³⁴ «Ɗagɨŋ muɗɔlɛ cay gusɨgɨŋ. Ɗɔɔgɨŋ gɨ ɨrɨme kol hɨnga ga kɨŋ gey dan̰ wɔlɛ pɨna pɨna, lɔɔ gɨ kɨŋ hale gɨybɨŋ cay caga hɨnge ɨŋ-bandi Kurɨn̰-ungo le naŋ. Naŋ na, ɨŋ kɨya andaŋ caygɨŋ dus.

³⁵ Wɔlɛ gɨ nee le, kɨya nɔngɨrɛ kalaŋ nɔm ga somge cay gɨsəŋ gaŋ, hɨn̰ bura wo̰.

³⁶ Sɨmagɨŋ cay tɨbay gɨŋ dɨŋ bɨ, ulan̰gɨŋ Kumu daa daa ɗe ban bɨgɨŋ tɔgɨ agɨŋ mɨn̰ɨn̰ cay hɨnga nɔm ga ba kɨya andaŋ caygɨŋ bɨ, agɨŋ ɨrɨn̰ daa tumonɨ ɨŋ-bandi Kurɨn̰-ungo bɨ.»

³⁷ Dan̰ tɨwa di ɨni na, Jesu gɨlɨn̰ kalaŋ kɔl a duroy gulɔŋ ƴaa-di-da-Kumu dɨŋ, ama dan̰ borundo na, ban ordɨrde a cay garma gɨ kan teege Olibɨye gɨŋ sɔmɛ nee bɨrɨŋ jogɨɗu.

³⁸ Dan̰ wɔlɛ pɨna pɨna, kalaŋ andɨgaŋge hɨraŋ orge a duroy gulɔŋ ƴaa-di-da-Kumu dɨŋ kɨya jon̰ kɔl koyi.