Kɔl-gɨ-Ɗari gɨ Lug wal 19 - Gabri Maja

Jesu bɨ Jase bɨ

¹ Jesu andaŋ boy cay ƴaa-di-gumu di Jerigo bɨ gay dan̰ tɨbayi daa.

² Bɨ ga ma, ungo gɨ pɨna wo̰ som nee teeyige Jase. Ban na ba-cay ka-hɔgɛ lambo bɨ, ban na ba wɔɔ hɨnga bɨ.

³ Ban mal gɨyəŋ ay na sol dan̰ tɨdi kɛ, Jesu na waŋ ga. Ama ban ɓala naŋ, kɨya dɨmdɨrdi kalaŋ bɨ kɨya gɨ ban na ungo gɨ gɔju bɨ.

⁴ Na toy di hɨn̰ wo̰, ma ban gɨre tumɔ or nɔɔ cay ɓolin̰ gɨŋ ay na solɨn̰ Jesu dan̰ tɨdi, kɨya wa ban kɨya pɨde na dan̰ gɨyəŋ gɨ nee le.

⁵ Kɨɗɨn̰ ga Jesu bugoŋ a kɨɗɨn̰ ga nee gaŋ le na, ban ay cɨndi daa bɨ yeyi hɨn̰: «Jase bɨya gusɨn̰ cɛd gɨsɨn dugo kɨya gɨ labɨde na, naa wa wa kalɨn̰ ma ɨŋ na kɨrga kon̰.»

⁶ Jase boy gusi cɛd gɨsɨn dugo ƴom Jesu gusi dan̰ gusi-mɔwa.

⁷ Kɨɗɨn̰ ga kalaŋ ba solge hɨn̰ wo̰ na, kan nɔm n̰amge kɔl yege hɨn̰: «Jə! Ungo le or bɨle na kɨrga gɨ da ba-lɔɔ ɨsɨna.»

⁸ Ama Jase say da tumoy Ba-gulɔŋ yeyi hɨn̰: «Ba-gulɔŋ, haw kɛ na hɨnga wɔɔnɨ nɔm le, ɨŋ kɨya gɔsɨnɛ dugo kɨɗɨn̰ sɔɔ bɨ, aye kɨɗɨn̰ pɨna gɔsɨnin̰ ka-n̰age bɨ, ma hɨn̰ gɨ ɨŋ na usɨma ungo ƴan̰ hɔgɛ koyi na, ɨŋ kɨya bɔgɛ kamdɨge cay nee cay poɗɨn̰ jogɨn̰ bii daa bɨ.»

⁹ Jesu jɨga dɨbii cay nee yeyi hɨn̰: «Labɨde pɔɗɛ andaŋ a duroy ƴaa gɨ kɛ le, kɨya wa ji kalɨn̰ ma ji na kungay Abɨraham bɨ.

¹⁰ Kɨya wa ɨŋ-bandi Kurɨn̰-ungo le, ɨŋ ɨrga na kɨya male bɨ, ɨrgan̰ dan̰ kan ga kayaŋ bɨ, a boy pɔɗɛ gɨŋ.»

Kɨradi-kɔl gɨ ojɨ cay sɨle di ni lɔr

¹¹ Kalaŋ si sɨmayge kɨya jon̰ kɔl gɨ da Jesu. Kɨɗɨn̰ ga kalaŋ sɨge sɨmayge kɨya jon̰ kɔl koyi na, ban ay kɨradi-kɔl yege kɨya gɨ baa mɨnde gɨ kan kɨya bugoŋ Jerusalɛm. Kɨya wa kalaŋ ɨrɨmge hɨn̰ gɨ Ban na kɨya ɗɔɔ te dɔɔ-ƴaa toyi naa kɨɗɨn̰ ga ban na kɨya bugoŋ a Jerusalɛm.

¹² Ban yege hɨn̰: «Ungo gɨ pɨna wo̰ toy na Kɨlma, ban som cay tɨbay kɨya sɔ ɔrɛ cay gɨsəŋ ga hen̰ gaŋ ɗe Kɨlma gɨ pɨna wo̰ gɨ gumu na dobii tɨrɨmbala cayi pa dɨm ma, may na kɨya jɨga dɔɔ tɨrɨmbala ƴee.

¹³ «Pa dɨm ma ban kɨya ɗɔɔ gusi ɔrɛ ƴee na, ban te gɔyɔŋ kayi ga mɔjɨ duroy kamdɨge, gɔsɨnge waŋ waŋ kalɨn̰ ma, gursu di ni lɔr di kɨle do kondɨ tɔgɨ pɨna pɨna bɨ, yege hɨn̰: “Laan̰gɨŋ gɨyaw dan̰ gursu di nee le bɨrɨŋ gɨ ɨŋ kɨya jɨgan̰.”

¹⁴ Ama kalaŋ ga cay gɨsəŋ kayi gaŋ ga pɨna duroyge ƴomiige dan̰ kuduroyge. Bɨ kan say gɨyge ka-ƴɔbɛ kardi kɨya yen̰ Kɨlma gɨ gumu le, ye hɨn̰: “Ni gey gɨ ungo gɨ nee le na gɨ dɔɔ cayni naŋ.”

¹⁵ «Kɨɗɨn̰ ga kan dobiige tɨrɨmbala cayi ɨni na, ban jɨga a cay gɨsəŋdi gaŋ. Ɨni na, ban ay noy teen̰ gɔyɔŋ kay ga ban ba gosɨnɨge gursu di ni lɔr le ay na solɨn̰ kaŋdo ga kan wayge.

¹⁶ Ban gɨ ba cay wase ɨrga bɨ, yeyi hɨn̰: “Ba-gulɔŋ, gursu di ni lɔr di ji ba bəŋ le, ɨŋ way kaŋdo mɔjɨ ɗaŋ cay nee.”

¹⁷ Ba-gulɔŋ le yeyi hɨn̰: “Kuɗa na ase naŋ, ji na guyɔŋ gɨ kuɗa, tumɔ ɨŋ been̰ gɨye kobɨn̰ dḛ wo̰, ama ji leen̰ gɨye dan̰ kuduroy ga pɨna. Na toy di hɨn̰ wo̰ ma, ɨŋ dobɨn̰ tɨrɨmbala a cay ƴaa ga gɨmdəŋ won̰ mɔjɨ.”

¹⁸ Ban gɨ ba cay sɔɔdɨge ɨrga bɨ, yeyi hɨn̰: “Ba-gulɔŋ, gursu di ni lɔr di ji ba bəŋ le, ɨŋ way kaŋdo bay ɗaŋ cay nee.”

¹⁹ Ba-gulɔŋ yen̰ ban gɨ nee le hɨn̰: “Ji kalɨn̰ ma ɨŋ dobɨn̰ tɨrɨmbala a cay ƴaa ga gɨmdəŋ won̰ bay bɨ.”

²⁰ Ban gɨ ɗaŋ ɨrga bɨ, yeyi hɨn̰: “Ba-gulɔŋ, sɨla, gursu ton̰ di ni lɔr di ji ba bəŋ le ba kɛ, ɨŋ gam a kɨbɨ badɨge gaŋ dɔmɔmɔ.”

²¹ Ɨŋ hɨndarin̰ kɨya gɨ ji na ungo gɨ dɨmbɨre bɨ, hɨnga ga ji bɨga da naŋ kalɨn̰ ma mɨn̰ ay bɨ, gasa ga ji gɨsɨ naŋ kalɨn̰ ma mɨn̰ wal bɨ.

²² Ba-gulɔŋ yeyi hɨn̰: “Ji na guyɔŋ gɨ ɨsɨni, kɔl kon̰ gɨ andaŋ kɨbɨn̰ ba kɨya bɔyɛ kɔl can̰: Ji sol gɨ ɨŋ naa ungo gɨ dɨmbɨre bɨ, ɨŋ ay hɨnga ga ɨŋ sii daa naŋ bɨ, ɨŋ wal gasa ga ɨŋ gɨsɨ naŋ bɨ.

²³ Hɨn̰ wo̰ na, kɨya wa ma mɨn̰ bɨga gursu tɨnge baŋkɨ dɨŋ naŋ ga? Ɗe a te jɨganɨ gɨŋ na, ɨŋ kɨya ƴɔɔ dan̰ kaŋdo cay nee naŋ ga?”

²⁴ Kardi nee ban yen̰ kan ga ba ɨrege nee le hɨn̰: “Ƴɨmagɨŋ guyɔŋ le, dɨragɨŋ gursu toy di ni lɔr le kobi coŋ bɨ, bɨn̰gɨŋ ban gɨ ba-orɨn̰ dan̰ lɔr mɔjɨ le.”

²⁵ Kan jɨga dɨbii cay nee yeyige hɨn̰: “Ba-gulɔŋ, ban orɨn̰ dan̰ gursu di ni lɔr mɔjɨ ɨni!”

²⁶ Ban dɨbɨge nee yege daa waŋ: “Waŋ waŋ gɨ na ɨran̰ dan̰ hɨnga kobi na, kan kɨya bii kamdɨge cay nee. Ama waŋ waŋ gɨ na ɨran̰ dan̰ hɨnga kobi naŋ na, ga dḛ ga ban bee kuduroy cay nee kalɨn̰ ma, kan kɨya dɔrɛ kobi cɔd coŋ bɨ.

²⁷ Ama ojɨ cay ka-baanɨ ga geyge gɨ ɨŋ na gɨ dɔɔ cayge naŋ le, ƴɨmagegɨŋ ɨren̰ danage tumonɨ dɨɗɨgegɨŋ cɨnɨ kɛ.”»

²⁸ Kɨɗɨn̰ ga Jesu ye kɔl le hɨn̰ wo̰ ɨni na, ban ba tumoy dɨmdɨrdi kalaŋ le, ay gɨyəŋ gɨ nay jɨn̰ Jerusalɛm.

Andaŋ gɨ da Jesu a Jerusalɛm

²⁹ Kɨɗɨn̰ ga Jesu tɨbayi baa mɨnde dan̰ cay gulɔŋ gɨ Bɛdɨpaje bɨ, Betani di woy kɨway garma gɨ teeyige Olibɨye ɨni na, ban gɨy ka-aye-cay-tɨbayi sɔɔ tumoyi.

³⁰ Ban yege hɨn̰: «Ɨragɨŋ a cay gulɔŋ gɨ woy cɨndɨgɨŋ kɔ. Kɨɗɨn̰ ga kɨŋ kɨya bugoŋ a kɨbɨ cay gulɔŋ gɨŋ na, kɨŋ kɨya wɔɔ karɨn̰ kura̰ ga kan saɗɨge dugo, gɨ cay pɨna wo̰ ungo na kardɨge naŋ ƴee. Pɨndɨriigɨŋ bɨ, ɨren̰gɨŋ danayi.

³¹ Bɨ hɨn̰ gɨ ungo na ɨngɨrgɨŋ hɨn̰: “Na kɨya wa ma magɨŋ pɨndɨrge ga na?” Dɨbiigɨŋ cay nee yaygɨŋ hɨn̰: “Na Ba-gulɔŋ ba geye”.»

³² Kan ga Jesu ba gɨyge le say orge bɨ, wayge hɨn̰ gɨ Ban ba yege le.

³³ Kɨɗɨn̰ ga kan ɨre pɨndɨre karɨn̰ kura̰ le na, ka-gɨlondɨge yege hɨn̰: «Kɨya wa ma magɨŋ pɨndɨre karɨn̰ kura̰ le ga?»

³⁴ Kan jɨga dibiige cay nee yege hɨn̰: «Na Ba-gulɔŋ ba geye.»

³⁵ Kan ɨrgan̰ dan̰ karɨn̰ kura̰ le bɨn̰ Jesu. Bɨ kan torge badɨge kage ga kan tobɨ cay kamdɨge gaŋ labɨ cay karɨn̰ kura̰ gaŋ le bɨ, ayige ɗey nay som cay nee.

³⁶ Bɨ kɨɗɨn̰ ga ban ɨre or te gɨyəŋ gɨŋ na, kalaŋ torge badɨge kage labɨdege cay gɨyəŋ gaŋ ɗeyge or cay nee.

³⁷ Kɨɗɨn̰ ga ban bugoŋ mɨnde dan̰ cay ƴaa-di-gumu di Jerusalɛm dan̰ gɨyəŋ gɨ gɨsɨn ɗe garma gɨ kan teeyige Olibɨye kardɨge na, dɨmdɨrdi kalaŋ ga ka-aye-cay-tɨbayi nɔm say ayge te lɔɔ gusi-mɔwa bɨ, hɨramɨn̰ge Kumu dan̰ tumoyge di daa kɨya cay belin̰əŋ nɔm ga kan sol dan̰ tɨdɨge le.

³⁸ Kan yege hɨn̰: «Tɔrɛ-kɨbɨ wɨya kɨya cay kɨlma, Gɨ ɨrga dan̰ guson̰ Ba-gulɔŋ. Gusi-dɔbɛ wɨya kɨya cay kalaŋ ga a daa nii bɨ, Gusoŋ-tɔgɛ na gɨ da Kumu gɨ a daa gɨɗɨgɨ-Kumu gɨŋ bɨ.»

³⁹ Parɨsɨn̰an̰əŋ ga pɨna wo̰ ga duroy dɨmdɨrdi kalaŋ le, yen̰ge Jesu hɨn̰: «Ba gɨlɨn̰ kalaŋ hɨnga, ala ka-aye-cay-tɨban̰ dɨm.»

⁴⁰ Jesu jɨga dɨbɨge cay nee yege hɨn̰: «Aŋ yəgɨŋ, hɨn̰ gɨ kan na sɨma munduŋ kalɨn̰ ma, orun̰əŋ kɨya dɔgɛge sɨle.»

Jesu ɨle kɨya cay Jerusalɛm

⁴¹ Kɨɗɨn̰ ga Jesu bugoŋ mɨnde dan̰ cay ƴaa-di-gumu di Jerusalɛm na, ban sɔlɔɔ bɨ, ɨle dan̰ kaŋdi cɨndi kol caa.

⁴² Bɨ ban ye hɨn̰: «Hɨn̰ gɨ labɨde, me ni na sɨla hɨnga ga kɨya bɨne gusi-dɔbɛ na, kɨya kuɗa tɔgɨ. Ama haw kɛ na hɨnga ga me kɨya lɔɔ unɔ. Kɨya gɨ hɨnga ga nee le wosɨ gusɨge.

⁴³ Boy wɔlɛ gɨ kɨya caga le, ka-baade kɨya mɔnɛge gɨsəŋ nɨwrɨn̰ cɛɛ daa bɨ, kɨya nɨwrɨn̰ cɛɛ daa cɨɗɨgɨ bɨ, kan kɨya jengɨnege ayɨn̰ kɨɗɨn̰ daa nɔm bɨ.

⁴⁴ Kan kɨya radɨne me-hɨndi bɨ, kalaŋ kɛɛ ga somge duroy gulɔŋ kɛɛ gɨŋ muɗɔgɨ bɨ. Kan kɨya ɗɔɔ oru pɨna kalɨn̰ ma daa cay mɨgayi gɨŋ naŋ, kɨya wa cɨnde hangaŋ a cay wɔlɛ gɨ Kumu ɨrgan̰ kɨya cɛɛ le naŋ.»

Jesu duroy ƴaa-di-da-Kumu dɨŋ

⁴⁵ Kardi nee na Jesu andaŋ a duroy gulɔŋ gɨ duroy ƴaa-di-da-Kumu dɨŋ bɨ, ay te tɔɔ ka-lɔɔ gɨyaw ga a boy nee.

⁴⁶ Ban yege hɨn̰: «Kumu ye a duroy magtubu toy dɨŋ hɨn̰: “Ƴaanɨ kɨya wɔyɛ na ƴaa di kalaŋ kɨya olɨn̰ Kumu nee.” Ama kɨŋ-gandi, kɨŋ bɨloo leen̰ “kɨɗɨn̰ wɔsɛ ga da ka-hase.”»

⁴⁷ Jesu gɨlge hɨnga a duroy gulɔŋ gɨ da ƴaa-di-da-Kumu dɨŋ dan̰ wɔlɛ pɨna pɨna. Bɨ ka-cay ka-bɔgɛ kɨbar nɔm bɨ, ka-gɨlɨn̰ kalaŋ gasɨn̰-kɔl gɨ da Moyis bɨ, kalaŋ kage ga gɨmdəŋ bɨ, malge gɨyəŋ age na dɨɗii.

⁴⁸ Ama kan sɨla hɨnga ga kan kɨya lɔɔ naŋ. Kɨya wa kalaŋ nɔm somge jege kɔl koyi dan̰ kuduroyge ga pɨna.