Kɔl-gɨ-Ɗari gɨ Lug wal 13 - Gabri Maja

Jesu gɨlɨn̰ kalaŋ gɨ kan na bɨl gɨye-lɔɔdɨge naŋ na kan na kɨya mare

¹ Kɨɗɨn̰ ga nee le, kalaŋ ga pɨna andaŋge cayi doriige kɔl gɨ ojɨ cay kalaŋ ga Galile ga ɨrege beege kɨbar bɨ, a boy tɨwadi di nee dɨŋ le Piladɨ dɨɗɨge.

² Jesu dɨbɨge cay nee yege hɨn̰: «Kalaŋ ga Galile ga kan dɨɗɨge le, kɨŋ ɨrɨm hɨn̰ gɨ kan naa ka-lɔɔ ɨsɨna ɗɨn̰ kamdɨge nɔm ga Galile ma hɨnga ga nee le na andaŋ cayge ga?

³ Naŋ, aŋ yəgɨŋ, ama hɨn̰ gɨ kɨŋ na bɨl gɨye-lɔɔdɨgɨŋ naŋ na, kɨŋ kɨya mare nɔm na hɨn̰ kan wo̰ bɨ.

⁴ Bɨ kɨŋ je kɔl gɨ da kalaŋ ga mɔjɨ-cayge-margɨm, ga ƴaa di kan gaɗɨge sɨngɨɗɨ daa di Sɨlɨwe, ba dusoŋ cayge dɨɗɨge le. Ma kɛ kɨŋ ɨrɨm hɨn̰ gɨ kalaŋ ga nee le, na leege ɨsɨna tɔgɨ ɗɨn̰ge kalaŋ ga ɗaŋ ga somge a cay ƴaa-di-gumu di Jerusalɛm nɔm ga?

⁵ Naŋ, aŋ yəgɨŋ, ama hɨn̰ gɨ kɨŋ na bɨl gɨye-lɔɔdɨgɨŋ naŋ na, kɨŋ kɨya mare nɔm na hɨn̰ kan wo̰ bɨ.»

Kɨradi-kɔl gɨ ojɨ cay tuguyoŋ di wɔɔdo unɔ

⁶ Kardi nee, Jesu ay kɔl dan̰ kɨradi yege hɨn̰: «Bara gɨ pɨna wo̰ orɨn̰ dan̰ tuguyoŋ di ban buson duroy yagedi suru koyi dɨŋ. Ban godɨrde kɨya male wɔɔdo, ama ban wa wɔɔdo pɨna nɛŋ naŋ.

⁷ Ɨni na, ban yen̰ dan̰ ba-ame yagedi suru le ye hɨn̰: “Sɨla! Labɨde ɓal ɨlge sɨbɨ gɨ ɨŋ ɨre gudɨrga mal wɔɔdi tuguyoŋ le, ama ɨŋ wa wɔɔdo pɨna nɛŋ naŋ bɨrɨŋ. Sɨroo dɨboo coŋ! Kɨya wa ma maŋ kɨya ɗɔɔ ƴɔɔ kɨɗɨn̰ kalɨn̰ wo̰ dugo ga?”

⁸ Ama ba-ame yagedi suru le, dɨbi cay nee yey hɨn̰: “Kɨlma, ɗa ɗe woy ɨlge pɨna nee ƴee. Aŋ pay umboŋ toy nee nɨwrɨn̰ caa been̰ gasɨn̰ nare nee sol ƴee.

⁹ Gajanaŋ ɨlge gɨ ɗaŋ hɨndi kɨya wɔɔ ƴee: Naŋ na, mɨn̰ da sɨroo dɨboo coŋ ƴee.”»

Jesu poɗɨ tama di kongi

¹⁰ Jesu gɨlɨn̰ kalaŋ kɔl dan̰ wɔlɛ gɨ ni dorɨn̰ gɨlale a duroy ƴaa-daye-di-da-Jubɨn̰əŋ di pɨna wo̰ dɨŋ.

¹¹ Sɨla! Tama di pɨna wo̰ di ɗe hɔmɨn̰ɛ ɨre nee. Ɓal ɨlge mɔjɨ-cay-margɨm turnɔ di ɨsɨni ƴɔmɔɔ kɔngɔɔ bɨ, hɨndi ɓala dɔrɛ caa daa ɨrɨn̰ dan̰ durɔ naŋ bɨrɨŋ.

¹² Kɨɗɨn̰ ga Jesu sol tama di nee le na, ban too bɨ yoo hɨn̰: «Tama, modo tɛɛ duroŋ cɛɛ coŋ.»

¹³ Jesu dɨbɨ kobi caa bɨ, kɔl gɨ kɨbɨna kɛ bɨ, hɨndi dor caa daa bɨ, ay te hɨrame Kumu.

¹⁴ Ama ba-sɔmɛ cay ƴaa-daye-di-da-Jubɨn̰əŋ le, kuduroy hɔmii kɨya gɨ Jesu pɔɗɔɔ dan̰ wɔlɛ gɨ ni dorɨn̰ gɨlale gɨ da Jubɨ. Ɨni na, ban ay kɔl yen̰ dɨmdɨrdi kalaŋ le yege hɨn̰: «Wɔlɛ gɨ ni loon̰ gɨye won̰ jii. Na boy wɔlɛ gɨ nee le ma ojɨ gɨ kɨŋ kɨya ɨrga ɗe kan na poɗɨgɨŋ nee, ama na dan̰ wɔlɛ gɨ ni dorɨn̰ gɨlale gɨ da Jubɨ naŋ.»

¹⁵ Ba-gulondɨnagɨŋ dɨbii cay nee yeyi hɨn̰: «Kɨŋ ka-yɔɔ-kɔl-kɨbɨgɨŋ-sɔɔ-sɔɔ le! Kɛ, boy wɔlɛ gɨ ni dorɨn̰ gɨlale gɨ da Jubɨ le, waŋ waŋ kalɨn̰ ma a duroygɨŋ pɨndɨr si koyi kɨbɨ bəgɨrə gɨŋ naŋ le, kura̰ toyi ɨran̰ bɨge kaŋ naŋ ga?

¹⁶ Tama di nee le kalɨn̰ ma na kungay Abɨraham bɨ, sɨla ɓal ɨlge mɔjɨ-cay-margɨm, gɨ sidan saɗoo dan̰ hɔmɨn̰ɛ gɨ nee le. Ma kɛ, na mɨna ma uja gɨ ɨŋ gɨ pɨndɨroo daa dan̰ wɔlɛ gɨ ni dorɨn̰ gɨlale gɨ da Jubɨn̰əŋ naŋ ga?»

¹⁷ Kɔl gɨ Jesu ba ye le, dɨbɨ dasi cay ka-baadi nɔm, ama dɨmdɨrdi kalaŋ nɔm ga baa le leege gusi-mɔwa kɨya cay hɨnga ga ɗari ga ɗɨn̰ cɨn̰-kɨɗɨn̰ ga ban lee nɔm le.

Kɨradi-kɔl gɨ ojɨ cay cɨn̰ mutardɨ

¹⁸ Ɨni na, Jesu dor kɨradi-kɔl gɨ ɗaŋ coŋ ye hɨn̰: «Kɛ dɔɔ-ƴaa di da Kumu le gɨlɨn̰ na dan̰ wa ga? Na wa ma maŋ kɨya aye gɨsɨn̰ ga?

¹⁹ Sɨlagɨŋ hɨndi woy gɨlɨn̰ na hɨn̰ cɨn̰ hɨya gɨ n̰ən̰əŋ gɨ teeyige mutardɨ gɨ ungo ay gɨsɨ boy yage koyi gɨŋ. Hɨndi say andaŋ malgɨ bɨ, bɨle hɨya gɨ cɨɗəŋ ga daa ɨrgage leege ƴaadɨge cay nee.»

Kɨradi-kɔl gɨ ojɨ cay subugudi mapa

²⁰ Jesu ye ɗaŋ coŋ hɨn̰: «Kɛ na wa ma maŋ kɨya aye gɨsɨn̰ dan̰ dɔɔ-ƴaa di da Kumu ga?

²¹ Sɨlagɨŋ! Hɨndi woy gɨlɨn̰ na hɨn̰ subugu di tama ay bee duroy kɨrbaŋdi gɛmɛ gɨŋ gɨ hal ɓal kɔl wongɨsɨn̰ daa. Lee gɨ kɨrbaŋ gɨ wongɨsi le sodɨ nɔm.»

Kɨbɨ gɨyəŋ gɨ dḛḛ

²² Jesu boy gɨyəŋ or gay duroy ƴaa ga gɨmdəŋ gɨmdəŋ dan̰ karɨn̰ ƴaa ƴaa, gɨlɨn̰ kalaŋ hɨnga orɨn̰ cɨndi tumɔ jɨn̰ Jerusalɛm.

²³ Ungo gɨ pɨna wo̰ ɨngɨrii ye hɨn̰: «Ba-gulɔŋ, na kalaŋ lam wo̰ ƴɔbɨ ba kɨya wɔɔge pɔɗɛ le ga?» Jesu dɨbii cay nee yeyi hɨn̰:

²⁴ «Ko na wa wa kalɨn̰ ma laagɨŋ agɨŋ andɨn̰ dan̰ kɨbɨ gɨyəŋ gɨ sɛlgɛgɛ. Aŋ yəgɨŋ daa waŋ, kondɨwadi kalaŋ kɨya malege gɨyəŋ age na andɨn̰ nee ama kɨya ɓalege naŋ.

²⁵ «Kɨɗɨn̰ ga ba-gulondi ƴaa kɨya sɔ daa bɨ, kɨya lɨge kɨbɨ-ƴaa na, kɨŋ ga kɨŋ baa doŋ le, kɨŋ kɨya aye te tɔgɛ kɨbɨ-ƴaa bɨ; yɔɔ hɨn̰: “Ba-gulɔŋ, Ba-gulɔŋ, hanga kɨbɨ-ƴaa bɨni!” Ama ban kɨya dɨbɨgɨŋ cay nee yɔɔ hɨn̰: “Ɨŋ sɨla kɨɗɨn̰ ga kɨŋ saygan̰ nee naŋ!”

²⁶ Ɨni na, kɨŋ kɨya aye te yɔɔ hɨn̰: “Ni na ka-dɔɔ danan̰ bɨ, ka-sɔɔ danan̰ bɨ, ji gɨlɨn̰ kalaŋ kɔl a kɨɗɨn̰ kani ga woli gaŋ bɨ.”

²⁷ Ban kɨya yogɨŋ ɗaŋ coŋ hɨn̰: “Ɨŋ sɨla kɨɗɨn̰ ga kɨŋ saygan̰ nee naŋ! Ƴɨmagɨŋ gusɨgɨŋ kɨbɨnɨ coŋ, kɨŋ nɔm ga ka-lɔɔ ɨsɨna!”

²⁸ Na kɨɗɨn̰ ga nee gaŋ le ma magɨŋ kɨya ɨle bɨ, lɔydɛ gasɨndɨgɨŋ kɛɗɛɗɛ kɛɗɛɗɛ kɨɗɨn̰ ga kɨŋ kɨya sɔlɛ Abɨraham bɨ, Isag bɨ, Jagob bɨ, ka-yɔɔ-kɔl-gɨ-Kumu-ba-yɔɔ nɔm, duroy dɔɔ-ƴaa di da Kumu dɨŋ, ama kɨŋ-gandi na, kan kɨya nargɨŋ dɨbe tɨbaygɨŋ nee.

²⁹ Kalaŋ kɨya sɔge jɨn̰ te kumu dan̰ kɨɗɨn̰ ɗɔbɛ ga da tɨwa bɨ, jɨn̰ te golo dan̰ manga bɨ, kɨya ɨrgage sɔmɛge kɨbɨ hɨnga ga ni dɔɔ ga ni gusi-mɔwa ga gumu gaŋ, a duroy dɔɔ-ƴaa di da Kumu dɨŋ.

³⁰ Ɨni na, kalaŋ ga pɨna ga karu kɨya bɨlege wɔyɛge kalaŋ ga tumɔ bɨ, kalaŋ ga pɨna ga tumɔ, kɨya bɨlege wɔyɛge kalaŋ ga karu bɨ.»

Jesu ɨle a cay Jerusalɛm

³¹ Kɨɗɨn̰ ga nee le, Parɨsɨn̰an̰əŋ ga pɨna ɨrgage gusi Jesu yeyge hɨn̰: «Andaŋ ɨra kɨɗɨn̰ ga ɗaŋ gaŋ, kɨya wa Ɛrɔd Antipas malɨn̰ kɨya dɨɗɨn̰.»

³² Ban dɨbɨge nee yege hɨn̰: «Ɨragɨŋ yan̰ gɨjaŋ gɨ ba jɨba gɨ kɛ le: “Sɨla! Labɨde bɨ, wan̰do bɨ, ɨŋ kɨya tɔɔ turnɔ ga ɨsɨndəŋ bɨ, pɔɗɛ ka-hɔmɨn̰ɛ bɨ, na ɗaŋdo ma maŋ kɨya dɨɗe kɨbɨ gɨye hɨnge ƴee.

³³ Ɨŋ kɨya ɔrɛ dan̰ cɨnɨ tumɔ jɨn̰ Jerusalɛm labɨde gaɗ gaɗ bɨ, wan̰do bɨ, ɗaŋ do bɨ, kɨya gɨ ba-yɔɔ-kɔl-gɨ-Kumu-ba-yɔɔ le, ɓala gɨ kan kɨya dɨɗiige kɨɗɨn̰ ga ɗaŋ gaŋ naŋ, ama na a Jerusalɛm.”

³⁴ «Ay Jerusalɛm! Ay Jerusalɛm! Me-hɨndi di ɗe dɨɗe ka-yɔɔ-kɔl-gɨ-Kumu-ba-yɔɔ bɨ! Ɗe wɔrɨn̰dɛ kalaŋ ga Kumu gɨygɨge gusee dan̰ oru dɨɗɨge bɨ! Cay mɨna ma, maŋ gey daye karɨnde gusɨnɨ hɨn̰ gɨ tɔɗɔ ba dayɨn̰ karɨndo tɔɔ, ama kɨŋ kan̰ ɗɔŋ lɔɔ coŋ!

³⁵ Sɨlagɨŋ! Haw kɛ na, Kumu kɨya dɔrɛ kobi coŋ ɗogɨŋ cay ƴaa togɨŋ kobɨgɨŋ. Aŋ yəgɨŋ daa waŋ, kɨŋ kɨya sɔlɔŋ naŋ bɨrɨŋ gɨ wɔlɛdi kɨya ɓale bɨ, kɨŋ kɨya yɔ hɨn̰: “Tɔrɛ-kɨbɨ na wɨya kɨya cay ungo gɨ ɨrga dan̰ guson̰ Ba-gulɔŋ.”»