Kɔl-gɨ-Ɗari gɨ Lug wal 10 - Gabri Maja

Gɨye gɨ Jesu bɨn̰ ka-aye-cay-tɨbayi ga toyge-jurgum-cayge-sɔɔ

¹ Kardi nee na, Ba-gulɔŋ Jesu tor ka-aye-cay-tɨbayi ga ɗaŋ toyge-jurgum-cayge-sɔɔ, gɨyge sɔɔ sɔɔ tumoyi a cay ƴaa ga gɨmdəŋ gaŋ, dan̰ cay karɨn̰ ƴaa nɔm ga ban gey ɔrɛ nee.

² Ban yege hɨn̰: «Kalaŋ gɨlɨn̰ na hɨn̰ yage gɨ woli gɨ gasadɨge naa ɨni, ama kalaŋ ga ka-lɔɔ gɨye duroy nee dḛ wo̰. Na toy di hɨn̰ wo̰ ma, ulagɨŋ Kumu Ba-gulondi yage le ɗe gɨyɨn̰ dan̰ ka-lɔɔ gɨye daye cɨn̰ gasa le.

³ Ɨragɨŋ! Ama sɨlagɨŋ, ɨŋ gɨygɨŋ na hɨn̰ karɨn̰ gamge duroy gaye ga coŋ gaŋ wo̰.

⁴ Kɨɗɨn̰ ga kɨŋ kɨya bugoŋ gɨyəŋ ɔrɛ na, ayegɨŋ magɨla di gursu naŋ bɨ, sangɨ naŋ bɨ, gɨyabe naŋ bɨ, ɨregɨŋ dugo te gɨyəŋ gɨŋ naŋ bɨ.

⁵ «Duroy ƴaa di ani ani di kɨŋ na ɨra boy nee na, yan̰gɨŋ kalaŋ ga duroy ƴaa di nee le hɨn̰: “Gusi-dɔbɛ di da Kumu baa danagɨŋ” pa dɨm.

⁶ Ma hɨn̰ gɨ kɨŋ na wa ungo pɨna gɨ ba-ƴɔɔ gusi-dɔbɛ di da Kumu, na sɨma cay tɨbay dɨŋ kəgəgə ay na wan̰ gusi-dɔbɛ na wɨya duroy ƴaa di nee le na, gusi-dɔbɛ di da Kumu kɨya bɔɔ danayi, naŋ na gusi-dɔbɛ togɨŋ kɨya jɨga waygɨŋ.

⁷ Sɨmagɨŋ a duroy ƴaa di nee le, daagɨŋ bɨ, saagɨŋ hɨnga ga kan kɨya bɨgɨŋ bɨ. Kɨya wa ba-lɔɔ gɨye le, orɨn̰ dan̰ cay kobi. Orɛgɨŋ dan̰ kɨbɨ ƴaa ƴaa naŋ.

⁸ Cay ƴaa-di-gumu di ani ani di kɨŋ na ɨra nee ma kalaŋ ga cay ƴaa-di-gumu di nee le, na ƴɨmagɨŋ gusɨge na, daagɨŋ hɨnga ga kan bɨgɨŋge.

⁹ Pɨɗagɨŋ ka-hɔmɨn̰ɛ ga cay ƴaa-di-gumu di nee le bɨ, yan̰gɨŋ kalaŋ ga cay ƴaa di nee le, hɨn̰: “Dɔɔ-ƴaa di da Kumu bugoŋ mɨnde gusɨgɨŋ.”

¹⁰ Ama cay ƴaa-di-gumu di ani ani ma magɨŋ na ɨra boy nee, ma kan na ƴɨmagɨŋ gusɨge naŋ na, andaŋgɨŋ ɨragɨŋ kɨɗɨn̰ ga woli gaŋ bɨ, yagɨŋ hɨn̰:

¹¹ “Ni gagɨde bundu di tɨbayni di ni cay ƴaa togɨŋ di gumu le ɗɨga ɗɨga dorɨn̰ naji cayni coŋ, ɗe gɨl gɨ kan leege ɨsɨna tumoy Kumu. Ama sɨlagɨŋ gɨ dɔɔ-ƴaa di da Kumu bugoŋ mɨnde gusɨgɨŋ.”

¹² «Aŋ yəgɨŋ daa waŋ na cɨndi: Wɔlɛ gɨ kan kɨya kayde kɔl le, kɔl gɨ kan kɨya bɔyɛ a cay kalaŋ ga cay ƴaa di nee le, kɨya osɨwa tɔgɨ ɗɨn̰ cay kɔl gɨ Kumu kɨya bɔyɛ a cay kalaŋ ga ɨsɨndəŋ ga cay ƴaa-di-gumu di Sɔdɔm.

¹³ Kɨŋ kalaŋ ga cay ƴaa-di-gumu di Korasḛ le, cɨn̰-n̰age kɨya bɔɔ cay gɨŋ! Kɨŋ kalaŋ ga cay ƴaa-di-gumu di Bɛtsayda le, cɨn̰-n̰age kɨya bɔɔ cay gɨŋ! Kɨya beli di kan lee duroy gɨŋ kɛ le, hɨn̰ gɨ naa kan ni na laa tumɔ naa a cay ƴaa-di-gumu di da kalaŋ ga ɨsɨndəŋ ga Tir dan̰ Sido̰ na, kalaŋ ga cay ƴaa di nee le, ni kɨya tɔbɛge badɨge ga ni n̰age somɨn̰ duroy bundu dɨŋ, gɨle hɨn̰ gɨ kan na bɨle gɨye-lɔɔdɨge jɨne hage ɨni.

¹⁴ Na ban ma, wɔlɛ kayde kɔl gɨŋ le, kɔl gɨ kɨya ƴɔmɛ cay ƴaa-di-gumu di nee le, kɨya osɨwa tɔgɨ ɗɨn̰ kɔl gɨ kɨya ƴɔmɛ cay Tir dan̰ Sido̰.

¹⁵ Kɨŋ kalaŋ ga cay ƴaa-di-gumu di Kapɛrnɔm, kɨŋ ɨrɨm kuduroygɨŋ hɨn̰ gɨ kɨŋ na kɨya sɔ bɨrɨŋ ɔrɛ gɨɗɨgɨ-Kumu gɨŋ ga? Naŋ! Kɨŋ kɨya gɨsɨne boy tɨwa di ƴee dan̰ cɨndo dɨŋ.»

¹⁶ Ban jɨga yen̰ ka-aye-cay-tɨbayi yege hɨn̰: «Waŋ waŋ gɨ na ja kɔl kogɨŋ na, je na kɔl hɨnge bɨ. Waŋ waŋ gɨ na jɨbɨgɨŋ sɛdɨ coŋ na, jɨbəŋ na ɨŋ-bandi sɛdɨ coŋ bɨ. Waŋ waŋ gɨ na jɨbəŋ sɛdɨ coŋ na, jɨb na ban gɨ ba gɨyigəŋ sɛdɨ coŋ bɨ.»

Ka-gɨye ga toyge-jurgum-cayge-sɔɔ jɨgage

¹⁷ Kan ga toyge-jurgum-cayge-sɔɔ le jɨgage dan̰ gusi-mɔwa bɨ, yege hɨn̰: «Ba-gulɔŋ, turnɔn̰əŋ ga ɨsɨndəŋ kalɨn̰ ma leege hɨnga nɔm ga ni ba yege kɨɗɨn̰ ga ni te gusondɨn̰.»

¹⁸ Jesu dɨbɨge cay nee hɨn̰: «Kɨɗɨn̰ ga ɨŋ sol kɨɗɨn̰ ɗɛ na, ɨŋ sol sidan sayga daa baa dugo hɨn̰ wɨlɨn̰e gɨ da Kumu wo̰.»

¹⁹ Sɨlagɨŋ! Ɨŋ bɨgɨŋ dan̰ dɔnɔ di ni ɗɔdɨrɨn̰ cay kari dan̰ ɗɨsɨni dugo bɨ, ɨŋ bɨgɨŋ dan̰ dɔnɔ di ni ɗorin̰ cay ɗe-baadɨgɨŋ Sidan dugo bɨ. Hɨnga pɨna ga ɨsɨni ga kɨya loogɨŋ unɔ bɨ.

²⁰ Naa hɨn̰ wo̰ kalɨn̰ ma, lɔɔgɨŋ gusi-mɔwa kɨya cay turnɔn̰əŋ ga ɨsɨndəŋ ga jege kɔl kɨbɨ gɨŋ ƴɔbɨ naŋ, ama laagɨŋ gusi-mɔwa kɨya gusondɨgɨŋ gɨ kan ɗege duroy magtubu di woy a daa nii a da Kumu.

Jesu gɨlɨn̰ ka-aye-cay-tɨbayi Kumu naa waŋ ga

²¹ A kɨɗɨn̰di ga nee gaŋ le bɨ, Turnɔ ɗe-kuduroy-bɛrɛ lee gɨ gusi-mɔwa walɨn̰ kuduroy Jesu bɨ, ye hɨn̰: «Banɨ, ji Ba-gulɔŋ hɨnga nɔm ga daa nii dan̰ ga cay gɨsəŋ gaŋ, ɨŋ hɨramɨn̰ kɨya gɨ ji gɨlɨn̰ karɨn̰aŋ hɨnga ga ji wosɨn̰ kalaŋ ga muɗoldoŋ dan̰ ka-sɔlɛ hɨnga. Ho’o Banɨ, na ban ma na hɨnga ga ji ojɨ dan̰ kuduroy geye kon̰.»

²² Ɨni na, ban yen̰ kalaŋ ga ba ɨrege nee le, yege hɨn̰: «Banɨ bəŋ dan̰ dɔnɔ a cay hɨnga nɔm. Kurɨn̰-Kumu le na waŋ ga? Ungo pɨna sɨla naŋ, ama na Banɨ ƴɔbɨ. Bay na waŋ ga? Ungo pɨna sɨla naŋ, ama na Kurondi ƴɔbɨ. Ungo gɨ Ɨŋ dorii pa dɨm ma maŋ kɨya gɨlii Banɨ, ɗe ban na solii ƴee.»

²³ Ɨni na, Jesu pɨlɨn̰ jɨn̰ cayge bɨ, yege dan̰ kan̰dɨge yege hɨn̰: «Tumoy wolwa woy kol caygɨŋ, kɨya cay hɨnga ga kɨŋ ba sol dan̰ cɨndɨgɨŋ kɛ le.»

²⁴ Aŋ yəgɨŋ: «Ka-yɔɔ-kɔl-gɨ-Kumu-ba-yɔɔ dan̰ kondɨwayge bɨ, kɛrɨmbɛlɛŋ ga jɨne dan̰ kondɨwayge bɨ, geyge age na sol hɨnga ga kɨŋ ba sol kɛ le, ama kan sɨlage naŋ. Kan geyge age na je kɔl gɨ kɨŋ ba je kɛ le, ama kan jage naŋ.»

Kɨradi-kɔl gɨ da Ungo gɨ Samari gɨ lee ɗarwa

²⁵ Bɨ ga ma, ba-gɨlɨn̰ kalaŋ gasɨn̰-kɔl gɨ da Moyis gɨ pɨna wo̰ gɨ gey gɨybe Jesu, say ɨngɨrii kɔl ye hɨn̰: «Ba-gɨlni kɔl, kɛ, na wa ma ojɨ gɨ ɨŋ gɨ lɔɔ maŋ gɨ wan̰ pɔɗɛ gɨ ni somɨn̰-bɨra dan̰ tumonɨ ga?»

²⁶ Jesu jɨga ɨngɨrii ye hɨn̰: «Na kɔl di wa ma kan walge duroy magtubu gasɨn̰-kɔl dɨŋ ga?» Na kɔl di wa ma mɨn̰ ɗongɨsɨ duroy nee ga?

²⁷ Ungo le, dɨbii cay nee yeyi hɨn̰: «“Ba-gulondɨn̰ Kumu le, ji kɨya ɗoyi jam cɨndɨn̰ gaŋ dan̰ ɗugon̰ di pɨna bɨ, dan̰ kuyoŋdi-gusɨn̰ nɔm bɨ, dan̰ togɨn̰ nɔm bɨ, dan̰ ɨrɨme dɨn̰ nɔm nee bɨ.” Bɨ “Ɗɔɔ kamdɨn̰ jam cɨndɨn̰ gaŋ, hɨn̰ gɨ ji ba geyɨn̰ kuyoŋdi-gusɨn̰ wo̰ bɨ.”»

²⁸ Jesu jɨga dɨbii cay nee yeyi hɨn̰: «Ji dɨbəŋ cay nee dan̰ gɨyəŋdi han̰. Ji na laa hɨnga ga nee le nɔm na, ji kɨya sɔmɛ dan̰ cɨndɨn̰.»

²⁹ Ama ba-gɨlɨn̰ kalaŋ gasɨn̰-kɔl gɨ da Moyis le, gey dɔrɛ dasi cayi. Ɨni na ban yen̰ Jesu ye hɨn̰: «Ho’o, ama waŋ ma na mɨganɨ ga?»

³⁰ Ɨni na, Jesu jɨga dɨbii cay nee yeyi hɨn̰: «Ungo gɨ pɨna wo̰ sayga Jerusalɛm gɨsɨn kɨya ɔrɛ jɨn̰ Jerigo, ɨni na ban baa kobɨ kalaŋ ga ka-kuduroy-ɨndɨwa. Kan ƴomiige torɨn̰ge badɨge kayi dan̰ hɨnga wɔɔdi nɔm bɨ, teyige bɨrɨŋ siige kɨbɨ tɨma dɨŋ bɨ. Dɨbiige saw dugo bɨ, ɗen̰ gusɨge orɨn̰ge.

³¹ Ba-bɔgɛ kɨbar gɨ pɨna wo̰, ayga gɨyəŋ gɨ nee le. Kɨɗɨn̰ ga ban sol ungo le na, ban cangɨ daa cɨra or ɔrɛ koyi.

³² Kardi nee ungo gɨ pɨna wo̰, gɨ a te wɨn̰je gɨ da Lebi gɨŋ bugoŋ a kɨɗɨn̰ gaŋ ga nee le bɨ. Kɨɗɨn̰ ga ban sol ungo gɨ nee le na, ban cangɨ daa cɨra or ɔrɛ koyi.

³³ Ama ungo gɨ pɨna wo̰ gɨ Samari gɨ or tɨrga toyi hayi te gɨyəŋ gɨ nee le bɨ. Kɨɗɨn̰ ga ban bugoŋ mɨnde gusi na, ban solii bɨ, tɨdi leeyi cɨn̰-n̰age tɔgɨ.

³⁴ Ban sɨygɨ mɨnde gusi, hande tii ɨya coŋ bɨ, beeyi sɔŋ dan̰ cɛrɛ di suru nee bɨ, ayɨn̰ dan̰ kɨbɨ badɨge saɗɨdɨn̰ dan̰ tudo le daa. Bɨ ayi sii cay kura̰ toyi dɨŋ orɨn̰ danayi a duroy ƴaa di da kɨrge dɨŋ, ɗe kan na amayige kuɗa.

³⁵ Kɨɗɨn̰ ga kɨɗɨn̰ wol na, ban dor gursu toyi di ɓal cay kobɨ ba-lɔɔ gɨye gɨ ni wɔlɛ sɔɔ te magɨla koyi gɨŋ, bɨn̰ gumu gɨ da ba-ame ƴaa kɨrge bɨ, yeyi hɨn̰: “Kɔgɨɗɔ, ama ungo gɨ kɛ le kuɗa bəŋ. Kɨɗɨn̰ ga ɨŋ na jɨge na, hɨnga nɔm ga ji ba mondɨ ɗɨn̰ cay gursu di ɨŋ ba bɨn̰ le, ɨŋ kɨya jogɨn̰ bɨn̰ daa.”»

³⁶ Jesu jɨga yen̰ ba-gɨlɨn̰ kalaŋ gasɨn̰-kɔl gɨ da Moyis le hɨn̰: «A boy ɨrɨme kon̰ gɨŋ kɛ, duroy kalaŋ ga sɨbɨ kɛ le, na waŋ ba gɨle gusi loon̰ mɨgay ungo gɨ ba bɔɔ a kobɨ kalaŋ ga ka-kuduroy-ɨndɨwa le ga?»

³⁷ Ba-gɨlɨn̰ kalaŋ gasɨn̰-kɔl gɨ da Moyis le, dɨbii cay nee yeyi hɨn̰: «Na ban gɨ ba sol cɨn̰-n̰age da mɨgay.» Ɨni na, Jesu jɨga yeyi hɨn̰: «Ɨra bɨ, ji kalɨn̰ ma laa hɨn̰ wo̰ bɨ.»

Mart dan̰ Mari ƴomge Jesu gusɨge

³⁸ Kɨɗɨn̰ ga Jesu dan̰ ka-aye-cay-tɨbayi orge te gɨyəŋ gɨŋ na, ban bugoŋ a cay karɨn̰ ƴaa ga pɨna wo̰. Tama di pɨna wo̰ kan tooge na Mart ƴomii guso leeyi tɨrga.

³⁹ Mart orɨn̰ dan̰ tumdo di pɨna wo̰ di dḛ, kan tooge na Mari. Hɨndi som dugo a tɨbay Ba-gulɔŋ kɨya tɔgɨyɛ hɨnga gɨle koyi.

⁴⁰ Ama Mart gɨre da gɨlal guso kɨya gɨye kondɨ caa. Ɨni na, hɨndi ɨrga wan̰ Jesu bɨ, yeyi hɨn̰: «Ba-gulɔŋ ji ɨrɨm cay Mari di ba ɗəŋ kan̰nɨ kɨbɨ gɨye gɨŋ kɛ naŋ ga? Ya ɗe ɨrga jɔgɔŋ lɔɔ gɨye.»

⁴¹ Ba-gulɔŋ jɨga dɨboo cay nee yo hɨn̰: «Mart, Mart, me ɗa ɗugɛ ba dugo naŋ bɨ, me gɨlal guse cay hɨnga kondɨ bɨ.

⁴² Me orɨn̰ dan̰ n̰age di hɨnga pɨna ƴɔbɨ. Na hɨnga ga ɗari ga nee le ma Mari bɨnde ay, ungo pɨna kɨya dɔrɛ kɔbɔ naŋ.»