Kɔl-gɨ-Ɗari gɨ Ja̰ wal 9 - Gabri Maja

Jesu haŋgɨ cɨn̰ ungo gɨ wooyge ba-bɨbe

¹ Wɔlɛ gɨ pɨna wo̰, Jesu pɨde te gɨyəŋ gɨŋ ɨni na, ban sol ungo gɨ pɨna wo̰ gɨ wooyge na ba-bɨbe.

² Ɨni na, ka-aye-cay-tɨbayi ɨngɨriige hɨn̰: «Ba-gɨlni hɨnga! Kɛ, ungo gɨ nee le, kan wooyge ba-bɨbe na kɨya cay ɨsɨna gɨ da waŋ ga?» Na kɨya cay ɨsɨna koyi wala, na ɨsɨna gɨ da ka wooyi ga?

³ Ɨni na, Jesu jɨga dɨbɨge cay nee yege hɨn̰: «Ban bɨbɨ na kɨya cay ɨsɨna koyi naŋ bɨ, ɨsɨna gɨ da ka-woyi naŋ bɨ. Ama na ɗe gɨ gɨye gɨ da Kumu na gɨl gusi doŋ a cayi.

⁴ Naa wa wa kalɨn̰ ma laanagɨŋ gɨye gɨ da ban gɨ ba gɨyigəŋ le dan̰ te tɨwa. Kɨya wa kɨɗɨn̰ ga ɨndi tɨlga nee gɨ ungo pɨna wo̰ kɨya ɓale sɔlɛ kɨɗɨn̰ ga ni leen̰ gɨye naŋ ɨni.

⁵ Kɨɗɨn̰ ga ɨŋ baa a cay gɨsəŋ gaŋ kɛ ƴee na, ɨŋ na asɨn̰a gɨ da kalaŋ ga cay gɨsəŋ gaŋ kɛ.»

⁶ Kɨɗɨn̰ ga ban ye kɔl hɨn̰ wo̰ ɨni na, ban tɨbɨ kale dugo, leen̰ gun̰u dḛ wo̰, lee a cɨn̰ ba-bɨbe le.

⁷ Bɨ ban yey hɨn̰: «Ɨra pɨle cɨndɨn̰ a kɨɗɨn̰ ga payge gaɗɨge been̰ kaŋ nee gaŋ ga Sɨlɨwe.» Sɨlɨwe dan̰ kɨbɨ koge, duroyi na «gɨyii». Ban or pɨle cɨndi a nee bɨ, kɨɗɨn̰ ga ban jɨga toy nee na cɨndi sol kɨɗɨn̰.

⁸ Kalaŋ ga ka-durdi bɨ, kalaŋ ga tumɔ soliige te ɔldɨldɛ hɨnga gaŋ bɨ le, yege hɨn̰: «Kɛ, ungo gɨ kɛ le, na ba-sɔmɛ ɔlɛ hɨnga le naŋ ga?»

⁹ Kalaŋ ga pɨna, yege hɨn̰: «Na ban gusi.» Kan ga ɗaŋ, yege hɨn̰: «Naŋ, na ban naŋ, na ungo gɨ ɗaŋ gɨ gɨlɨn̰ danayi ƴɔbɨ.» Ama ban gusi ye hɨn̰: «Na ɨŋ-bandi gusɨnɨ.»

¹⁰ Ɨni na, kan yeyige hɨn̰: «Kɛ, na dan̰ gɨyəŋ gɨ mɨna ma cɨndɨn̰ hangaŋ ga?»

¹¹ Ban jɨga dɨbɨge cay nee yege hɨn̰: «Na ungo gɨ kan teeyige naa Jesu le, ba lɔɔ gun̰u dḛ wo̰ yɨde cɨnɨ bɨ, yəŋ hɨn̰: “Ɨra pɨle cɨndɨn̰ a kɨɗɨn̰ ga payge gaɗɨge been̰ kaŋ nee gaŋ ga teege Sɨlɨwe.” Ɨŋ or pɨle cɨnɨ bɨ, cɨnɨ jɨga hangaŋ»

¹² Kan jɨga ɨngɨriige yege hɨn̰: «Kɛ, ungo gɨ nee le ba ani ga?» Ban jɨga dɨbɨge cay nee yege hɨn̰: «Gɨ kɔna, ɨŋ sɨla naŋ.»

Parɨsɨn̰an̰əŋ ɨngɨrɨn̰ge ungo gɨ wooyge ba-bɨbe le kɔl

¹³ Kan orɨn̰ge dan̰ ungo gɨ tumɔ na ba-bɨbe le, gusi Parɨsɨn̰an̰əŋ.

¹⁴ Sɨlagɨŋ, wɔlɛ gɨ Jesu lee gun̰u dḛ wo̰ hangɨn̰ cɨn̰ ba-bɨbe le, na wɔlɛ gɨ ni dorɨn̰ gɨlale gɨ da Jubɨn̰əŋ.

¹⁵ Parɨsɨn̰an̰əŋ jɨgage ɨngɨriige yege hɨn̰: «Kɛ, ji lee na mɨna ma cɨndɨn̰ le jɨga sol-kɨɗɨn̰ ga?» Ɨni na, ban jɨga dɨbɨge cay nee hɨn̰: «Ban lee gun̰u dḛ wo̰ ləŋ cɨnɨ bɨ, ɨŋ pɨl cɨnɨ bɨ, ɨŋ sol kɨɗɨn̰.»

¹⁶ Duroy Parɨsɨn̰an̰əŋ le, ga pɨna say yege hɨn̰: «Ungo gɨ ba lee hɨnga ga nee le ban se na gusi Kumu naŋ. Kɨya wa ban bɨga kɔl a cay wɔlɛ kona gɨ ni dorɨn̰ gɨlale gɨ da Jubɨn̰əŋ gɨŋ naŋ.» Ama ga ɗaŋ yege hɨn̰: «Kɛ na mɨna ma ungo naa ba lɔɔ ɨsɨna na, gɨ orɨn̰ dan̰ dɔnɔ di ni leen̰ hɨnga ga ɗɨn̰ cɨn̰-kɨɗɨn̰ nɔm ga hɨn̰ wo̰ ga?» Na toyi di hɨn̰ wo̰ ma, say bɨle na te cuduroŋdɨge duroyge.

¹⁷ Ɨni na, Parɨsɨn̰an̰əŋ ɨngɨrɨn̰ge ba-bɨbe le ɗaŋ coŋ, yege hɨn̰: «Kɛ, ji-bandi, ji ye kon̰ na wa a cay ban gɨ ba haŋge cɨndɨn̰ le ga?» Ɨni na, ban jɨga dɨbɨge cay nee yege hɨn̰: «Ban na ba-yɔɔ-kɔl-gɨ-Kumu-ba-yɔɔ.»

¹⁸ Ama Jubɨn̰əŋ kan̰ge bɔgɛ kuduroyge cay nee gɨ ungo gɨ nee le ni naa ba-bɨbe, ma na jɨga sol kɨɗɨn̰ naŋ. Kagadi gɨŋ na kan ɨrgan̰ge dan̰ ka-wɔɔdi.

¹⁹ Kan ɨngɨrɨn̰ge ka-wɔɔdi kɔl hɨn̰: «Ungo gɨ kɛ le, na kurondɨgɨŋ gɨ kɨŋ ye gɨ na wooyge naa ba-bɨbe le, leen̰ cɨndi ga? Naa cɨndi na, kɛ na mɨna ma haw kɛ ban jɨga sol kɨɗɨn̰ ga?»

²⁰ Ka-wɔɔdi le, dɨbɨge cay nee yege hɨn̰: «Ni sol leen̰ cɨndi gɨ ban na kurondɨni gɨ ni kuduroyni bɨ, ni wooyi na ba-bɨbe bɨ.

²¹ Ama gɨyəŋ gɨ cɨndi ba solɨn̰ kɨɗɨn̰ haw kɛ le, ni sɨla naŋ, ban na kɨye naŋ ɨni bɨ, ban kɨya yogɨŋ dan̰ kɨbi koyi.»

²² Ka-wɔɔdi yege kɔl gɨ nee le hɨn̰ wo̰, na kɨya gɨ kan hɨndarge na ka-cay Jubɨn̰əŋ. Kan ga nee le beege noyge pɨna, kɨya taan̰ waŋ waŋ gɨ na ya gɨ Jesu naa Kɨris ban gɨ Kumu dorii le, a duroy ƴaa-daye-di-da-Jubɨn̰əŋ dɨŋ coŋ.

²³ Na toy di hɨn̰ wo̰ ma, ka-wɔɔdi yege hɨn̰: «Ɨngɨriigɨŋ ban gusi. Ban na kɨye naŋ ɨni.»

²⁴ Parɨsɨn̰an̰əŋ teege ungo gɨ kan wooyge ba-bɨbe le gɨ ni cay sɔɔdi bɨ, yeyige hɨn̰: «Ya kɔl gɨ cɨndi tumoyi Kumu! Ni-gandi ni sol gɨ ungo gɨ nee le, na ba-lɔɔ ɨsɨna.»

²⁵ Ban jɨga dɨbɨge cay nee yege hɨn̰: «Hɨn̰ gɨ ban naa ba-lɔɔ ɨsɨna na, ɨŋ sɨla naŋ. Ɨŋ sol na hɨnga pɨna ƴɔbɨ: Tumɔ, ɨŋ na ba-bɨbe bɨ, haw kɛ ɨŋ sol kɨɗɨn̰.»

²⁶ Kan yeyige hɨn̰: «Kɛ, ban leen̰ na wa ga? Ban lee na mɨna ma hangɨn̰ cɨndɨn̰ le ga?»

²⁷ Ban dɨbɨge cay nee yege hɨn̰: «Ɨŋ dorgɨŋ koldi ɨni, ama kɨŋ jaŋ naŋ. Na kɨya wa ma, magɨŋ gey jɔɔ ɗaŋ coŋ ga? Kɛ kɨŋ-gandi tabɨlaŋdi bɨle ka-aye-cay-tɨbayi leegɨŋ bɨ ga?»

²⁸ Kan bugoŋ te yagɨdiige yen̰ge ye hɨn̰: «Na ji-bandi, ma na ba-aye-cay-tɨbayi ungo gɨ nee le. Ama ni-gandi ni na ka-aye-cay-tɨbayi Moyis.»

²⁹ Ni sol gɨ Kumu yen̰ Moyis kɔl, ama ungo gɨ kɛ le, ni sɨla kɨɗɨn̰ ga ban saygan̰ nee naŋ.

³⁰ Ban jɨga dɨbɨge cay nee yege hɨn̰: «Sɨlagɨŋ haw kɛ na, hɨnga ga dor turnoyi kɨɗɨn̰ ba kɛ, kɨŋ sɨla kɨɗɨn̰ ga ban saygan̰ nee naŋ, ama na ban ba haŋge cɨnɨ.

³¹ Ni sol gɨ Kumu ja ɔlɛ gɨ da ungo gɨ ba-lɔɔ ɨsɨna naŋ. Ama hɨn̰ gɨ ungo naa ba-jɔɔ kɔl kɨbɨ Kumu bɨ, ba-lɔɔ hɨnga ga kuduroy Kumu gey bɨ le, Kumu je ɔlɛ koyi.

³² Cay-pɨna wo̰ ungo ja gɨ ungo wo̰, na hanga cɨn̰ ungo gɨ wooyge ba-bɨbe naŋ ƴee.

³³ Hɨn̰ gɨ ungo gɨ nee le, na se naa gusi Kumu naŋ na, ban ni kɨya ɓale lɔɔ hɨnga pɨna naŋ bɨrɨŋ.»

³⁴ Kan dege kɔl kɨbi coŋ, yeyige hɨn̰: «Woon̰ge na boy ɨsɨna gɨŋ cɨrɔb, ma man̰ ba gɨ gɨlni hɨnga ga!» Ɨni na, kan tayige doŋ coŋ.

Ka-bɨbe ga cɨndi

³⁵ Jesu je gɨ kan na tayige coŋ. Ɨni na ban ɨrga wayi, yey hɨn̰: «Kɛ ji-bandi le, ji bee kuduron̰ cay Kurɨn̰-ungo le ga?»

³⁶ Bɨ ban jɨga dɨbii cay nee yey hɨn̰: «Ba-gulɔŋ, ban na waŋ ga? Yaŋ ɗe gɨ aŋ bee kuduronɨ cayi.»

³⁷ Jesu yey hɨn̰: «Ji-bandi, ji solii dan̰ cɨndɨn̰ gerɨn̰ gerɨn̰ ɨni, na ban gusi ba yen̰ kɔl haw kɛ.»

³⁸ Ungo le, jɨga yey hɨn̰: «Ba-gulɔŋ, ɨŋ bee kuduronɨ can̰.» Kardi nee ɨni na, ban poy gɨbayi dugo tumoyi.

³⁹ Ɨni na, Jesu yeyi hɨn̰: «Ɨŋ ɨrga a cay gɨsəŋ gaŋ, na kɨya bɔyɛ kɔl ɗe gɨ kan ga sɨlage kɨɗɨn̰ naŋ, na sɨlage kɨɗɨn̰ bɨ, ɗe gɨ kan ga solge kɨɗɨn̰ na bɨləŋge ka-bɨbe bɨ.»

⁴⁰ Parɨsɨn̰an̰əŋ ga ba jege kɔl gɨ nee le, yeyige hɨn̰: «Kɛ, ni-gandi kalɨn̰ ma ji leeni leen̰ ka-bɨbe bɨ ga?»

⁴¹ Jesu jɨga dɨbɨge cay nee hɨn̰: «Hɨn̰ gɨ kɨŋ ni naa ka-bɨbe na, kɨŋ ni kɨya orɨn̰ dan̰ ɨsɨna caygɨŋ naŋ. Ama haw kɛ na, kɨŋ ye gɨ kɨŋ na sol kɨɗɨn̰, na toy di hɨn̰ wo̰ ma, ɨsɨna kogɨŋ woy kɨɗɨn̰di gaŋ.»