Kɔl-gɨ-Ɗari gɨ Ja̰ wal 3 - Gabri Maja

Jesu dan̰ Nigodɛm

¹ Ungo gɨ pɨna wo̰ duroy Parɨsɨn̰an̰əŋ woy nee, gusondi na Nigodɛm. Ban na ba-cay Jubɨn̰əŋ duroy ka-cay Jubɨn̰əŋ.

² Ban ɨrga dan̰ son̰do wan̰ Jesu bɨ, yey hɨn̰: «Ba-gɨlɨn̰ kalaŋ hɨnga, ni sol gɨ ji na ba-gɨlɨn̰ kalaŋ hɨnga gɨ sayga gusi Kumu. Hɨn̰ gɨ Kumu na baa dan̰ ungo naŋ na, ungo wo̰ kɨya ɓale lɔɔ hɨnga ga ɗɨn̰ cɨn̰-kɨɗɨn̰ ga ji ba lee le naŋ.»

³ Ɨni na, Jesu dɨbii cay nee yeyi hɨn̰: «Ja, aŋ yen̰ daa waŋ na cɨndi, hɨn̰ gɨ kan na jɨgage wɔɔge ungo hɨrɨwa naŋ na, ban kɨya ɓale sɔlɛ dɔɔ-ƴaa di da Kumu naŋ.»

⁴ Ɨni na, Nigodɛm yeyi hɨn̰: «Kɛ ungo gɨ lee gɨ əsi ɨni na, kan kɨya jɨgage wooyi ɗaŋ na mɨna ga? Kɛ ban kɨya ɓale jɔgɛ kuduroy ƴoyi, ɗe kan na jogɨge wooyi ɗaŋ cay sɔɔ coŋ ga?»

⁵ Ɨni na, Jesu dɨbii cay nee yeyi hɨn̰: «Ja, aŋ yen̰ daa waŋ na cɨndi, hɨn̰ gɨ kan na wɔɔge ungo dan̰ kaŋ naŋ bɨ, dan̰ Turnɔ di da Kumu naŋ bɨ na, ban kɨya ɓale andaŋ a boy dɔɔ-ƴaa di da Kumu dɨŋ naŋ.

⁶ Kalaŋ ga ɨndəŋ na wɔɔge na kalaŋ ga ɨndəŋ, ama Turnɔ di da Kumu ba lɔɔ gɨ turnoyna wan̰ sɔmɛ-bɨra gɨ hɨrɨwa.

⁷ Ji ɗɔɔ kɔl kayɨn̰ sɛl sɛl cay kɔl gɨ ɨŋ ba yen̰ le naŋ: “Naa wa wa kalɨn̰ ma ojɨ gɨ kan kɨya jɨga woogɨŋge nɔm ɗaŋ”.

⁸ Kɨya wa kal gɨre na jɨn̰ kɨɗɨn̰ ga kuduroyi gey gaŋ. Ji je na noyi ama ji sɨla kɨɗɨn̰ ga ban saygan̰ nee naŋ bɨ, orɨn̰ jɨn̰ nee naŋ bɨ. Kɨya wɔyɛ na hɨn̰ wo̰, kɨya cay waŋ waŋ gɨ Turnɔ di da Kumu bii dan̰ sɔmɛ-bɨra gɨ hɨrɨwa.»

⁹ Ɨni na, Nigodɛm yeyi hɨn̰: «Hɨnga ga nee le, kɨya lɔɔ gusɨge na mɨna ga?»

¹⁰ Ɨni na, Jesu dɨbii cay nee yeyi hɨn̰: «Ji gɨ ba-gɨlɨn̰ te wɨn̰je gɨ da Ɨsɨrayɛl hɨnga le ma, mɨn̰ sɨla hɨnga ga nee le naŋ ga?»

¹¹ Ja, ɨŋ yen̰ na kɔl gɨ cɨndi, ni dor na kol hɨnga ga ni sol bɨ, ni lee na tɨmon̰ da hɨnga ga ni solge dan̰ tɨdɨni bɨ. Ama kɨŋ gey ƴɔɔ kol hɨnga ga ni ba lee tɨmon̰dɨge le naŋ.

¹² Hɨn̰ gɨ kɨŋ na bɨga kuduroygɨŋ canɨ, kɨɗɨn̰ ga ɨŋ yəgɨŋ kɔl ojɨn̰ cay hɨnga nɔm ga cay gɨsəŋ gaŋ naŋ na, kɛ gɨ lɔɔ na mɨna ma, magɨŋ kɨya bɔgɛ kuduroygɨŋ canɨ, kɨɗɨn̰ ga ɨŋ yəgɨŋ kɔl ojɨn̰ cay hɨnga nɔm ga a daa nii ga?

¹³ Ungo pɨna wo̰ saa a cay gɨsəŋ gaŋ kɛ naa ɨra daa nii naŋ, ama na ɨŋ-bandi Kurɨn̰-ungo ƴɔbɨ ba sayga daa nii gɨsɨngɨ dugo cay gɨsəŋ gaŋ.

¹⁴ Hɨn̰ gɨ Moyis ba si kumbulo gɨ ban uyi dan̰ nare kɨbɨ sɨya gɨŋ daa duroy daldɨŋ le, naa wa wa kalɨn̰ ma ojɨ gɨ kan kɨya see Kurɨn̰-ungo le daa hɨn̰ wo̰ bɨ,

¹⁵ ɗe gɨ waŋ waŋ gɨ na bɨga kuduroy cayi na, na wayan̰ sɔmɛ-bɨra gɨ dan̰ cɨndi.

¹⁶ Na cɨndi, Kumu gey kalaŋ ga cay gɨsəŋ gaŋ tɔgɨ, lee gɨ ban ay kurondi gɨ pɨna hayi kəɗ kəɗ bee, ɗe waŋ waŋ gɨ na bɨga kuduroyi cayi na, na mundoŋ naŋ, ama na wayan̰ sɔmɛ-bɨra gɨ dan̰ cɨndi.

¹⁷ Kumu gɨygɨn̰ dan̰ kurondi a cay gɨsəŋ gaŋ, na kɨya bɔyɛ kɔl cay kalaŋ naŋ, ama na ɗe gɨ kalaŋ na wayan̰ pɔɗɛ kol cayi.

¹⁸ Waŋ waŋ gɨ na bɨga kuduroyi cayi na, bɔyɛ kɔl unɔ cayi. Ama waŋ waŋ gɨ na bɨga kuduroyi cayi naŋ na, boyge kɔl cayi ɨni, kɨya wa ban bɨga kuduroyi a cay Kurɨn̰-Kumu gɨ pɨna hayi kəɗ kəɗ le naŋ.

¹⁹ Sɨlagɨŋ, te kɔl gɨ ban ba kɨya bon̰ kɔl cay kalaŋ le ba kɛ: Kɨɗɨn̰ ga asɨn̰ ɨrga cay gɨsəŋ gaŋ, ama kalaŋ geyge na dɨlɨm ɗɨn̰ kɨɗɨn̰ ga asɨn̰, kɨya wa gɨye-lɔɔdɨge ɨsɨn.

²⁰ Kɨya wa waŋ waŋ gɨ na laa hɨnga ga ɨsɨni na, gey kɨɗɨn̰ ga asɨn̰ naŋ bɨrɨŋ. Lee gɨ ban kɨya ɨrga kɨɗɨn̰ ga asɨn̰ gaŋ naŋ, kɨya wa ban gey gɨ gɨye-lɔɔdi gɨ ɨsɨni na gɨ andaŋ doŋ naŋ.

²¹ Ama ungo gɨ gɨye-lɔɔdi or pɨna dan̰ kɔl gɨ cɨndi le, kɨya ɔrɛ na cɨn̰-kɨɗɨn̰ ga asɨn̰ gaŋ, ɗe gɨ gɨye-lɔɔdi na wɨya doŋ waŋ, kɨya wa hɨnga ga ban lee le na dan̰ gɨyəŋ gɨ da Kumu.

Jesu dan̰ Ja̰

²² Kardi hɨnga nɔm ga nee le na, Jesu or dan̰ ka-aye-cay-tɨbayi, a jɨn̰ cay gɨsəŋ ga Jude gaŋ. Ban somɨn̰ danage nee bɨ, leen̰ kalaŋ batɛm.

²³ Ja̰ kalɨn̰ ma ɨre leen̰ kalaŋ batɛm a Eno̰, di woy mɨnde dan̰ Salim. Kɨya wa a kɨɗɨn̰ ga nee gaŋ le, kaŋ kondɨ nee. Kalaŋ ɨrgage gusi bɨ, ban leege batɛm bɨ.

²⁴ Kɨya wa a boy wɔlɛdi gɨ nee gɨŋ le, kan dɨbɨge Ja̰ dangay dɨŋ naŋ ƴee.

²⁵ Ɨni na, ka-aye-cay-tɨbayi Ja̰ man̰ge kɔl dan̰ Jubɨ gɨ pɨna wo̰, ojɨn̰ cay gɨyəŋ di dorɨn̰ gusu mɨra gɨ da Jubɨn̰əŋ.

²⁶ Lee gɨ kan ɨrgage gusi Ja̰ bɨ, yeyige hɨn̰: «Ba-gɨlɨn̰ kalaŋ hɨnga sɨla! Ungo gɨ ba som danan̰ kɨɗɨn̰ ga ji ba ban̰ a kɨway kuray gɨ Jurdḛ gɨŋ jɨn̰ nii, gɨ ji lee tɨmon̰ kol cayi le, ban kalɨn̰ ma haw kɛ ɨre leen̰ kalaŋ batɛm bɨ. Lee gɨ kalaŋ nɔm orge gusi.»

²⁷ Ɨni na, Ja̰ jɨga dɨbɨge cay nee yege hɨn̰: «Hɨnga ga Kumu ay bɨn̰ ungo dɨm ma ban kɨya wɔɔ ƴee. Ama ungo kɨya ɓale wɔɔ dan̰ cay gusi naŋ.

²⁸ Kɨŋ kalɨn̰ ma kɨŋ ɓal lɔɔ tɨmon̰ gɨ ɨŋ ye hɨn̰: Ɨŋ na Kɨris ban gɨ Kumu dorii le naŋ, ama Kumu gɨyigəŋ gɨ ɨŋ na ɨre tumoyi.

²⁹ A kɨɗɨn̰ gɔrɛ ƴaa gaŋ le, ban gɨ kan bɨgɨgage dan̰ tama bii le, ban ma na kudurɔɔ. Ama ba-pogi ba-ƴɔɔ tama le, ɨre na durdi je dan̰ kɔl koyi bɨ, te tumoyi di ban je le, bii gusi-mɔwa di gumu tɔgɨ. Gusi-mɔwa di nee le na tɨnge bɨ, haw kɛ na gusi-mɔwa tɨnge duroŋ dan̰ durɔ cɨrɛɗ.

³⁰ Ojɨ gɨ ban malga jɨn̰ tumɔ tumɔ bɨ, ɨŋ-bandi ɨŋ jɨge jɨn̰ dugo dugo bɨ.»

Ban gɨ sayga daa nii gɨsɨngɨ dugo

³¹ Ban gɨ sayga gɨɗɨgɨ-Kumu gɨŋ le, ban som cay hɨnga gaŋ nɔm. Ban gɨ na ungo gɨ a cay gɨsəŋ gaŋ le, ban na gɨ da cay gɨsəŋ, lee gɨ ban ye na kɔl gɨ a cay gɨsəŋ gaŋ.

³² Ungo gɨ sayga gɨɗɨgɨ-Kumu gɨŋ gɨsɨngɨ dugo le, lee na tɨmon̰ di da hɨnga ga ban sol bɨ, je bɨ, ama ungo pɨna wo̰ ƴa kɔl-tɨmon̰ toyi di ban lee le naŋ.

³³ Ungo gɨ ani ani gɨ na ƴa kɔl-tɨmon̰ toyi na, ban gey cay nee gɨ kɔl gɨ Kumu ba ye le naa kɔl gɨ cɨndi.

³⁴ Kɨya wa ungo gɨ Kumu gɨygii le, Kumu bii Turnɔ di kagado unɔ, lee gɨ ban ye na kɔl gɨ da Kumu.

³⁵ Kɨye Bayi gey kurondi, lee gɨ ban ɗe hɨnga nɔm a duroy kobi gɨŋ.

³⁶ Ungo gɨ na bɨga kuduroyi cay kurondi na, ungo gɨ nee le, kɨya sɔmɛ-bɨra dan̰ tumoyi. Ungo gɨ na kan̰a bɔgɛ kuduroyi cay Kurɨn̰-Kumu na, ban kɨya sɔmɛ-bɨra dan̰ tumoyi naŋ, ama kuduroy-hɔmɛ di da Kumu kɨya bɔɔ cayi.