Galad 5 - Gabri Maja

Sɨmagɨŋ dan̰ caygɨŋ

¹ Kɨris bɨlnagɨŋ leen̰ kalaŋ ga somge cayge kalɨn̰, ɗe gɨ ana na orɨn̰gɨŋ cay nagɨŋ kalɨn̰. Ɨrgɨŋ usa cay nee bɨ, kan̰agɨŋ bɨle gɔyɔŋ coŋ ɗaŋ coŋ.

² Jagɨŋ, ɨŋ-bandi Pol ɨŋ yəgɨŋ daa waŋ, hɨn̰ gɨ kɨŋ na ɗage gɨ kan na walagɨŋge ban̰a na, hɨnga ga Kɨris ba lee le, kɨya bɨle hɨnga bɨgɨŋ naŋ bɨrɨŋ ɨni.

³ Ɨŋ jɨga ye kɔl gɨ kɛ le ɗaŋ coŋ, gɨ waŋ waŋ gɨ na ɗa gusi gɨ kan na walayi ban̰a, dan̰ wale ban̰a dan̰ te gɨyəŋ gɨ da gasɨn̰-kɔl gɨ da Moyis na, ojɨ gɨ ban gɨ lɔɔ kɨbɨ gasɨn̰-kɔl nɔm dɨɗe.

⁴ Kɨŋ ga ka-male gɨ kalaŋ na sɨlagɨŋge laan̰ kalaŋ ga dan̰ durɔ ɗɨngar dan̰ gɨyəŋ gɨ da gasɨn̰-kɔl le, kɨŋ curoŋ yɔd dan̰ Kɨris, bɨlɨn̰ kardɨgɨŋ bɨn̰ ɗarwa di da Kumu toyi bɨ.

⁵ Kona na-gandi ga na ba bee ɨrɨmedɨna a cay Kumu le, na sol gɨ ban bɨlna leen̰ kalaŋ ga dan̰ durɔ ɗɨngar. Bɨ na kɨya cay Turnɔ di da Kumu di lee gɨye dan̰ gɨyəŋ gɨ da aye kudurɔ konagɨŋ le ma, mana somɨn̰gɨŋ amɨn̰gɨŋ wɔlɛ gɨ nee le.

⁶ Kɨɗɨn̰ ga ungo na bugoŋ pɨna dan̰ Jesu-Kɨris na, hɨn̰ gɨ ban na wala ban̰a wala, wala ban̰a naŋ kalɨn̰ ma, laa hɨnga naŋ. Hɨnga ga gumu na, na aye kudurɔ gɨ lee hɨnga dan̰ gɨyəŋ gɨ da wandɨ.

⁷ Kɨŋ gɨre kuɗa a te gɨyəŋ gɨ da Kɨris gɨŋ, hagɨŋ bɨ kɛ na waŋ ba jɨga nargɨŋ bɔgɛ kɔl a cay kɔl gɨ cɨndi gɨŋ le ga?

⁸ Ɨrɨme gɨ ni mondɨn̰ kɨɗɨn̰ ga hɨn̰ wo̰ le, se na gusi Kumu gɨ ba togɨgɨŋ naŋ.

⁹ Ɗagɨŋ muɗɔlɛ cay gusɨgɨŋ gɨŋ, subugu di dḛ wo̰ le, lee gɨ ɗe kurbɔŋ gɨ wongɨsi sodɨ nɔm.

¹⁰ Ba-gulɔŋ lee gɨ ɨŋ si kuduronɨ pɨna caygɨŋ, hɨn̰ gɨ ɨrɨmedɨgɨŋ na kɨya wɔyɛ kan̰di dan̰ hɨnge naŋ. Ama ungo gɨ ba dɨbe do̰ duroygɨŋ le, ban naa ungo gɨ mɨna mɨna kalɨn̰ ma, Kumu kɨya lɔɔ gɨ hɨnga lɔɔdi kɨya ɓalɨn̰a dan̰ kɨbi.

¹¹ Ay, karmɨnɨ ga ban̰aŋ dan̰ ga kandɨ, hɨn̰ gɨ ɨŋ-bandi kalɨn̰ ma, ɨŋ na ɨr tɨga bɛrnɛ bɨn̰ kalaŋ coŋ gɨ wale ban̰a na ojɨ gɨ ni lɔɔ na, kɛ na kɨya wa ma Jubɨn̰əŋ ɨrege gɨləŋge cɨn̰-gɨle-cɨn̰ coŋ ga? Hɨn̰ gɨ leen̰ cɨndi, ɨŋ na ɨr ya kɔl gɨ hɨn̰ wo̰ na, tɔgɛ bɛrnɛ di da sɨya-gɨ-dagɨli kɨya homge naŋ ɨni.

¹² Kalaŋ ga ka-dɨbe do̰ duroygɨŋ hɨn̰ wo̰ le, kuɗa gɨ kan tɨra toyge coŋ si cay wale ban̰a dɨŋ na, kɨya kuɗa danage.

¹³ Ay, karmɨnɨ ga ban̰aŋ dan̰ ga kandɨ, Kumu təgɨŋ kɨya gɨ ban gey gɨ kɨŋ na gura caygɨŋ kalɨn̰. Ama kɨŋ aye gɔrɛ cay kalɨn̰ le, loon̰ jɨba di ni loon̰ hɨnga ga kuyoŋdi-gusɨgɨŋ gey kalɨn̰ wo̰ naŋ. Ama kɨŋ laa gɨye bɨn̰ gusɨgɨŋ hɨn̰ gɨ kɨŋ naa gɔyɔŋ dan̰ gusɨgɨŋ wo̰.

¹⁴ Kɨya wa gasɨn̰-kɔl gɨ da Kumu nɔm duroyi na pɨna hayi ƴɔbɨ, ban ba kɛ: «Ji kɨya ɗɔɔ mɨgan̰ jam tɨdɨn̰ dɨŋ, Hɨn̰ kuyoŋdi-gusɨn̰ wo̰.»

¹⁵ Hɨn̰ gɨ sɔmɛ cay kalɨn̰ togɨŋ na ɨran̰ danagɨŋ bɨrɨŋ gɨ kɨŋ na gɨdɨdɨn̰ gusɨgɨŋ bɨ, sagɨdan̰ gusɨgɨŋ bɨ na, ɗagɨŋ muɗɔlɛ cay gusɨgɨŋ gɨŋ naŋ na, kɨŋ kɨya mɔndɛ gusɨgɨŋ coŋ.

Gɨyəŋ gɨ da Turnɔ ɗe-kuduroy-bɛrɛ

¹⁶ Jagɨŋ, kɨbagɨŋ Kumu dan̰ gɨyəŋ gɨ da Turnɔ ɗe-kuduroy-bɛrɛ hɨn̰ wo̰ na, kɨŋ kɨya kɔbɛ tabɨlaŋdi lɔɔ hɨnga ga da kuyoŋdi-gusɨgɨŋ naŋ.

¹⁷ Kɨya wa hɨnga ga kuyoŋdi-gusɨna gey le, na hɨnga ga Turnɔ di da Kumu gey naŋ. Bɨ hɨnga ga Turnɔ di da Kumu gey le, na hɨnga ga kuyoŋdi-gusɨna gey naŋ coŋ. Lee gɨ kan kan̰ge gusɨge, na ɗe gɨ agɨŋ na wan̰ gɨyəŋ gɨ ni loon̰ hɨnga ga kuduroygɨŋ gey naŋ.

¹⁸ Ama hɨn̰ gɨ Turnɔ di da Kumu na ba dɨra tumoygɨŋ na, gasɨn̰-kɔl na ba dɔɔ caynagɨŋ naŋ ɨni.

¹⁹ Kalaŋ nɔm solge tabɨlaŋdi hɨnga ga ɨsɨni ga da kuyoŋdi-gusu le. Kan ba wɔyɛ kɛ: Yɔyɛ dan̰ gangɨ caygɨŋ bɨ, lɔɔ hɨnga ga ni dasi bɨ, yɔyɛ gorɨn̰ daa bɨ,

²⁰ n̰ɨre kula bɨ, lɔɔ tɨmba bɨ, ƴɔmɛ-ungo-kuduron̰ bɨ, bɔjɨn̰ɛ bɨ, cɨn̰-pɨɗɨma bɨ, lɔɔ kuduroy-hɔmɛ bɨ, jangɨ bɨ, gasɨn̰-ɓalɨn̰a naŋ bɨ, pɔyɛ kalaŋ duroy nee bɨ,

²¹ orɨn̰ dan̰ tabɨlaŋdi hɨnga ga da mɨgan̰ bɨ, kɔydɛ cɛrɛ tɔgɨ bɨ, lɔɔ harne bɨ, hɨnga ga ɗaŋ ga gɨlɨn̰ hɨn̰ wo̰ bɨ. Aŋ yəgɨŋ tumɔ jugu hɨn̰ gɨ ɨŋ ba yəgɨŋ le, kalaŋ ga ka-lɔɔ hɨnga ga hɨn̰ wo̰ le, kɨya andaŋge a boy dɔɔ-ƴaa di da Kumu dɨŋ naŋ.

²² Sɨlagɨŋ hɨnga ga Turnɔ di da Kumu lee a kuduroy ungo, hɨn̰ wɔɔdi hɨya gɨ wɔɔ le ba kɛ: Na geye bɨ, gusi-mɔwa bɨ, gusi-dɔbɛ bɨ, dɨbe-ɗugɔ bɨ, kuduroy-bɛrɛ bɨ, kuduroy-ɗarwa bɨ, aye kudurɔ bɨ,

²³ kaledi ungo gɨ jal bɨ, dɔnɔ di ni ƴomɨn̰-gusɨn̰ cay hɨnga bɨ. Hɨnga ga nee le nɔm, gasɨn̰-kɔl kan̰age naŋ.

²⁴ Kalaŋ ga da Kɨris le gagɨlge kuyoŋdi-gusɨge dan̰ tabɨlaŋdi hɨnga ga ul kuyoŋdi-gusɨge bɨ, dan̰ tabɨlaŋdi hɨnga ga da kuyoŋdi-gusɨge a cay sɨya-gɨ-dagɨli gɨŋ.

²⁵ Hɨn̰ gɨ na na sɨmagɨŋ-bɨra naa dan̰ gɨyəŋ gɨ da Turnɔ di da Kumu na, kuɗa gɨ na ɗɔɔgɨŋ ɗe dor tumoynagɨŋ bɨ.

²⁶ Ɗɔɔnagɨŋ ba dɔgɛ jorgɨynagɨŋ naŋ bɨ! Bɔjɨn̰dɛnagɨŋ dan̰ gusɨnagɨŋ naŋ bɨ, lɔɔnagɨŋ cɨn̰-pɨɗɨma dan̰ gusɨnagɨŋ naŋ bɨ.