Galad 4 - Gabri Maja

¹ Sɨlagɨŋ ɨrɨme hɨnge ba kɛ, kɨye gɨ ba-ƴɔɔ hɨnga ga ni ban̰di-gulɔŋ ga da bayi le, kɨɗɨn̰ ga cɨndi ba karma ƴee na, ban na ba-gulɔŋ hɨnga nɔm hayi, ama ban woy na hɨn̰ guyɔŋ wo̰, kɨya wa ban som na tumoy bay.

² Hɨn̰ wo̰ na ban som na te dɔnɔ di da kalaŋ ga ka-gamii bɨ, ka-sɔlɛ kardi hɨnga kayi bɨ, bɨrɨŋ gɨsɨn̰ wɔlɛ gɨ bay ojɨ le ɓal.

³ Woy na hɨn̰ wo̰ kɨya cayna bɨ. Kɨya wa kɨɗɨn̰ ga na ban̰ karma ƴee le, tɔgɨn̰əŋ ga ɨsɨndəŋ ga a cay gɨsəŋ gaŋ ba ƴomnagɨŋge gɔyɔŋ.

⁴ Ama kɨɗɨn̰ ga wɔlɛdi ɓal ɨni na, Kumu gɨygɨ kurondi. Tama ba wooyi. Kan wooyge na kɨɗɨn̰ ga gasɨn̰-kɔl na Ba-gulondi hɨnga ga da kalaŋ ga na Jubɨ le,

⁵ ɗe gɨ ban na dɨran̰ kɔl cay kalaŋ ga somge a te dɔnɔ di da ɓɨse gɨ da gasɨn̰-kɔl gɨŋ le bɨ, kan na bɨlɨn̰ge karɨn̰ Kumu bɨ.

⁶ Na sol gɨ na na karɨn̰ Kumu, kɨya wa Kumu ɗe Turnoy Kurondi kuduroyna bɨ, Turnɔ le lee gɨ na yen̰gɨŋ Kumu hɨn̰: «Ay, Aba Banɨ.»

⁷ Lee gɨ haw kɛ na ji na guyɔŋ naŋ ɨni, ama ji na kurɨn̰ Kumu. Hɨn̰ gɨ ji na kurondi ɨni na, ji na ba-wɔɔ hɨnga ga ni ban̰di gulɔŋ ga Kumu gam ojɨ cay karɨndi.

Kuduroy Pol ba dugo naŋ kɨya cay kalaŋ ga Galad

⁸ Jɨne, kɨɗɨn̰ ga kɨŋ sɨlan̰ Kumu naŋ ƴee na, kɨŋ lee gɨye guyɔŋdu ga da kulan̰əŋ ga na kumu gɨ hɨnde naŋ le.

⁹ Ama haw kɛ na, kɨŋ sol Kumu bɨ, leen̰ cɨndi na, Kumu ba solgɨŋ. Ama na mɨna ma magɨŋ bɨle kɨya lɔɔ gɨye lɔɔ gɨ da tɔgɨn̰əŋ ga a cay gɨsəŋ gaŋ, ga na kula ga ɓalage lɔɔ hɨnga naŋ le ga? Kɛ kɨŋ gey jɔgɛ bɨləŋ gɔyɔŋ kage ɗaŋ coŋ ga?

¹⁰ Kɨŋ si cɨndɨgɨŋ kuɗa kardi wɔlɛn̰əŋ bɨ, kɨdɨrɛn̰eŋ bɨ, turbon̰əŋ dan̰ ɨlgen̰əŋ bɨ.

¹¹ Ay, ɗugonɨ ba dugo naŋ kol caygɨŋ, ojɨ gɨ gɨye gɨ ɨŋ lee duroygɨŋ gɨlalɨn̰ le, gɨ ban̰ gusɨnɨ ga?

¹² Ay, karmɨnɨ ga ban̰aŋ dan̰ ga kandɨ, ɨŋ lee n̰age toygɨŋ, ɗa gɨ kɨŋ wɨya hɨn̰ ɨŋ-bandi wo̰ bɨ, hɨn̰ gɨ ɨŋ-bandi kalɨn̰ ma ɨŋ ba lee gusɨnɨ gɨlɨn̰ hɨn̰ kɨŋ-gandi wo̰ bɨ. Kɨŋ laaŋ hɨnga ga ɨsɨni pɨna nɛŋ tumɔ naŋ.

¹³ Kɨŋ sol kuɗa, na kɨya cay hɔmɨn̰ɛ gɨ ba ləŋ, ma maŋ wan̰ gɨyəŋ teen̰ bɛrnɛ Kɔl-gɨ-Ɗari cay wase bɨgɨŋ.

¹⁴ Hɔmɨn̰ɛ gɨ ba ləŋ le na kandi gɨwase ga kɨŋ-gandi nɔm, kɨŋ ni kɨya dɔrɔŋ n̰ərə bɨ, kan̰aŋ bɨ, koldi. Ama kɨŋ laa hɨn̰ wo̰ naŋ, kɨŋ ƴɔmɔŋ gusɨgɨŋ hɨn̰ ba-ƴɔbɛ gɨ daa nii gɨ da Kumu wo̰ bɨ, hɨn̰ Jesu-Kɨris gusi wo̰ bɨ.

¹⁵ Boy wɔlɛ gɨ nee le, gusɨgɨŋ moogɨŋ tɔgɨ. Ama haw kɛ na, kol gusi-mɔwa togɨŋ le andaŋ na ani ga? Ɨŋ yəgɨŋ na kɔl gɨ cɨndi, boy wɔlɛdi gɨ nee le, hɨn̰ gɨ kɨŋ na ɓala dɔrɛ tɨdɨgɨŋ bəŋ na, kɨŋ ni kɨya dɔrɛ.

¹⁶ Ɨni na, haw kɛ ɨŋ bɨle ba-baadɨgɨŋ na kɨya cay kɔl gɨ cɨndi gɨ ɨŋ ba yəgɨŋ le ga?

¹⁷ Kalaŋ ga ba yege kɔl ɨl a cay gasɨn̰-kɔl gaŋ le, geyge bogɨgɨŋge na toyge, ama ɨrɨmedɨge kuɗa naŋ. Kan geyge corgɨŋge na gusɨnɨ coŋ, ɗe agɨŋ na bugoŋ toyge.

¹⁸ Hɨnga ga kuɗa na, pɨbɨldɨgɨŋ na kɨya cay gɨye-lɔɔ gɨ ɗari dan̰ wɔlɛ pɨna pɨna. Kɨŋ ɗɔɔ ba game gɨ, ɨŋ na wɨya danagɨŋ pa dɨm ma magɨŋ lee naŋ.

¹⁹ Karɨnɨ ga ɨŋ geygɨŋ tɔgɨ, ɨŋ jɨga way gɨle-cɨn̰ ɗaŋ coŋ hɨn̰ da tama di wɔɔ loo wo̰ kɨya gɨ kɨŋ jɨga karu. Ɨŋ kɨya gɨle-cɨn̰ bɨrɨŋ gɨsin̰ gɨ kɨŋ kɨya bɨləŋ gɨlɨn̰a na hɨn̰ Kɨris wo̰ hɔlɔlɔ.

²⁰ Ɨŋ gey gɨ ɨŋ ni na wɨya naa duroygɨŋ na, ɨŋ ni kɨya sɔlɛ gɨyəŋ gɨ ni yogɨŋ kɔl, kɨya wa ɨŋ wa cay tɨbanɨ naŋ kol caygɨŋ.

Agar bɨ Sara bɨ

²¹ Yaŋgɨŋ ƴee bɨ, kɨŋ ga ka-geye tɔbɛ caygɨŋ te gasɨn̰-kɔl gɨ da Moyis gɨŋ le, kɛ kɨŋ sol duroy kɔl gɨ gasɨn̰-kɔl gɨ nee le ye hagɨŋ ga? Ɨŋ sɨla naŋ.

²² Kɨya wa kan walge duroy magtubu dɨŋ gɨ Abɨraham na wɔɔ karɨn̰ ban̰aŋ sɔɔ, gɨ pɨna ƴoyi na guyɔŋdi di kan tooge na Agar bɨ, gɨ ɗaŋ ƴoyi na ɗe-ƴaa di kan tooge na Sara bɨ.

²³ Ama kurɨn̰ tama di na guyɔŋdi le, wooyge na dan̰ gɨyəŋ gɨ woodɨn̰ge karɨn̰aŋ gaŋ gaŋ bɨ, kɨye gɨ da tama di ɗe-ƴaa le, wooyge na dan̰ gɨyəŋ gɨ da hɨnga ga Kumu ye gɨ ɗi na kɨya lɔɔ bii bɨ.

²⁴ Kɔl gɨ kɛ le, na kɨradi-kɔl. Kandɨ ga sɔɔ kɛ le gɨlnagɨŋ na saɗe kɨbɨ pɨna ɓɨse gusu ga sɔɔ, gɨ woy duroy Kumu dan̰ kalaŋ. Di pɨna le, na di Kumu lee bongi garma gɨ Sɨnayi gɨŋ. Na hɨndi ba wɔɔ kalaŋ ga te guyɔŋdu dɨŋ. Hɨndi na Agar.

²⁵ Leen̰ cɨndi Agar le, woy na hɨn̰ garma gɨ gusondi na Sɨnayi gɨ a cay gɨsəŋ ga Arabi gaŋ gɨ Kumu bɨn̰ Moyis gasɨn̰-kɔl nee le. Hɨndi gɨlɨn̰ na hɨn̰ cay ƴaa-di-gumu di Jerusalɛm di haw kɛ, kɨya wa kalaŋ nɔm ga somge boy nee na gɔyɔŋ ga da gasɨn̰-kɔl.

²⁶ Ama Jerusalɛm di woy daa nii gusi Kumu le, na ɗe ƴaa, hɨndi ma na ƴoynagɨŋ.

²⁷ Kɨya wa kan walge kɔl duroy Magtubu di da Kumu dɨŋ yege hɨn̰: «Laa gusi-mɔwa, tama ɗe-madɨri, Me-hɨndi ɗe wɔɔ kɨye naŋ le, Me-hɨndi di me sɨla gɨle-cɨn̰ da wɔɔ kɨye naŋ le, Ɨn̰jala dan̰ gusi-mɔwa! Kɨya wa karɨn̰ tama di ɗooge coŋ le kondɨge, Ɗɨn̰ karɨn̰ tama di kudurɔ geyoo.»

²⁸ Kɨŋ ga ni karmɨnɨ ga ban̰aŋ dan̰ ga kandɨ le, kɨŋ na karɨn̰aŋ ga woogɨŋge dan̰ gɨyəŋ gɨ da kɔl gɨ Kumu ye gɨ ɗi na kɨya lɔɔ, gɨlɨn̰ hɨn̰ gɨ da Isag wo̰.

²⁹ Hɨn̰ gɨ tumɔ a boy wɔlɛ gɨ da Abɨraham gɨŋ, ban gɨ kan ba wooyge dan̰ gɨyəŋ gɨ gaŋ gaŋ, ba leen̰ ban gɨ kan ba wooyge dan̰ gɨyəŋ gɨ da Turnɔ cɨn̰-gɨle-cɨn̰ le, gɨle-cɨn̰ le woy na hɨn̰ wo̰ haw kɛ kol cayna bɨ.

³⁰ Ama Magtubu di da Kumu ye na mɨna ga? Hɨndi ye gɨ: «Ji taya tama di ni guyɔŋdi coŋ dan̰ kurɔndɔɔ, Kɨya wa uja gɨ kurɨn̰ tama di ni guyɔŋdi Kɨya wɔɔ hɨnga ga ni ban̰di-gulɔŋ pɨna Dan̰ kurɨn̰ tama di ɗe ƴaa le naŋ.»

³¹ Hɨn̰ wo̰ na, Karmɨnɨ ga ban̰aŋ dan̰ ga kandɨ, na na karɨn̰ tama di ni guyɔŋdi naŋ, ama na na karɨn̰ tama di ɗe ƴaa.