Galad 3 - Gabri Maja

Gasɨn̰-kɔl bɨ aye kudurɔ bɨ

¹ Hay! Karmɨnɨ ga a cay gɨsəŋ ga Galasi gaŋ, kɨŋ na kalaŋ ga gɨrɨn̰ caygɨŋ laa gɨye naŋ. Kɨŋ ga kan gɨlgɨŋge Jesu-Kɨris gɨ gagɨliige a cay sɨya-gɨ-dagɨli gɨŋ ɗe arɨn̰ cɨndɨgɨŋ cərərə le, kɛ na waŋ ba bɨle cɨndɨgɨŋ coŋ ga?

² Na kɔl gɨ ba kɛ pɨna hayi ma maŋ gey gɨ kɨŋ dɨbəŋ cay nee. Kɔl le ba kɛ: Kɨŋ way Turnɔ di da Kumu, na kɨya lɔɔ gɨ kɨŋ lee hɨnga ga gasɨn̰-kɔl ye gɨ kɨŋ na laa wala, na kɨya jɔɔ gɨ kɨŋ je Kɔl-gɨ-Ɗari ma magɨŋ been̰ kuduroygɨŋ cay nee ga?

³ Kɛ na mɨna ma gɨrɨn̰ caygɨŋ laa gɨye naŋ wo̰ ga? Tumɔ na kɨŋ lee gɨye na dan̰ Turnɔ di da Kumu, ama haw kɛ na kɨŋ dar na gɨ ni dɨɗe kɨbi cɨrɛɗ na dan̰ togɨygɨŋ ɨni ga?

⁴ Kɛ hɨnga ga ba andaŋ caygɨŋ nɔm kɛ le, andaŋ caygɨŋ na kalɨn̰ wo̰ dugo ga? Naŋ! Kɨya ɓale andaŋ kalɨn̰ wo̰ naŋ.

⁵ Ban gɨ ba bɨgɨŋ Turnɔ bɨ, lee hɨnga ga ni beli duroygɨŋ bɨ le, ban lee na kɨya gɨ kɨŋ lee hɨnga ga gasɨn̰-kɔl ye gɨ kɨŋ na laa wala, na kɨya jɔɔ gɨ kɨŋ je Kɔl-gɨ-Ɗari bɨ, kɨŋ bee kuduroygɨŋ cay nee le ga?

⁶ Na hɨn̰ wo̰ ma kan yege ojɨn̰ cay Abɨraham hɨn̰: «Ban bee kuduroy a cay Kumu bɨ, Kumu solii leen̰ ungo gɨ dan̰ durɔ ɗɨngar kɨya cay aye kudurɔ koyi.»

⁷ Sɨlagɨŋ kuɗa: Na kan ga somge bɨra dan̰ aye kudurɔ, ma na karɨn̰ Abɨraham ga hɨnde.

⁸ Magtubu di da Kumu ye koldi tumɔ ye gɨ Kumu na kɨya lɔɔ ɗe gɨ kalaŋ ga toyge na Jubɨ naŋ, naa kɨya bɨləŋge kalaŋ ga dan̰ durɔ ɗɨngar, kɨya cay aye gɨ kan ayge kuduroyge. Na toy di hɨn̰ wo̰ ma, Magtubu di da Kumu di nee le, tee bɛrnɛ di da kɔl-gɨ-ɗari gɨ nee le tumɔ bɨn̰ Abɨraham yey hɨn̰: «Kɨya can̰ na, te wɔɔ gɨ da kalaŋ nɔm ga a cay gɨsəŋ gaŋ, kɨya wɔɔge tɔrɛ-kɨbɨ.»

⁹ Abɨraham bee kuduroy cay Kumu ɨni na, Kumu tor-kɨbi cayi. Lee gɨ kan ga beege kuduroyge cay Kumu nɔm le, Kumu tor-kɨbi cayge hɨn̰ koyi wo̰ bɨ.

¹⁰ Bɨ kan ga de ɗugoyge cay gasɨn̰-kɔl gɨ ke ay leen̰ gɨye le, ɓɨse woy cayge. Kɨya wa kan walge yege hɨn̰: «Waŋ waŋ gɨ na laa hɨnga nɔm ga kan walge duroy magtubu gasɨn̰-kɔl dɨŋ cɨndi tumɔ tumɔ nɔm naŋ na, ban na ungo gɨ ɓɨse woy cayi.»

¹¹ Leen̰ cɨndi, ɗe ungo na bɨləŋ ungo gɨ dan̰ durɔ ɗɨngar tumoy Kumu dan̰ gɨyəŋ gɨ da gasɨn̰-kɔl gɨ ban kobɨ nɔm leen̰ gɨye le unɔ. Na toy di hɨn̰ wo̰ ma, Magtubu di da Kumu ye hɨn̰: «Ungo gɨ na ungo gɨ dan̰ durɔ ɗɨngar dan̰ gɨyəŋ gɨ da aye kudurɔ le, ban kɨya sɔmɛ-bɨra.»

¹² Lɔɔ hɨnga ga gasɨn̰-kɔl ye koldɨge le, na hɨnga ga ɨra pɨna dan̰ bɔgɛ kudurɔ a cay Kumu naŋ. Ama kan walge duroy magtubu gasɨn̰-kɔl gɨ da Moyis dɨŋ yege hɨn̰: «Ban gɨ na kɨba kardi gasɨn̰-kɔl nɔm laan̰ gɨye na, kɨya wɔɔ sɔmɛ-bɨra na kol caa.»

¹³ Kɨris bɨləŋ ungo gɨ ɓɨse woy cayi na kol cayna na, ban dorna coŋ a te ɓɨse gɨ da gasɨn̰-kɔl gɨŋ. Kɨya wa kan walge yege hɨn̰: «Waŋ waŋ gɨ gagɨliige a cay sɨya gɨŋ na, ɓɨse woy cayi.»

¹⁴ Ban lee na hɨn̰ wo̰ ɗe gɨ tɔrɛ-kɨbɨ gɨ da Abɨraham na ɨre bugoŋ gusi kalaŋ ga toyge na Jubɨ naŋ, dan̰ te bugoŋ pɨna dan̰ Jesu-Kɨris. Ɗe gɨ ni na wan̰ Turnɔ di Kumu ye gɨ ɗi na kɨya bɨna dan̰ gɨyəŋ gɨ da aye kudurɔ le.

Kumu te tumoyi di ay bɨ gasɨn̰-kɔl bɨ

¹⁵ Ay, karmɨnɨ ga ban̰aŋ dan̰ ga kandɨ, ɨŋ ay gɨye-lɔɔ gɨ da kalaŋ ga ɨndəŋ, kɨya gɨlgɨŋ hɨnga pɨna. Hɨn̰ gɨ ungo na gɨsɨ gɔsɨnɛ hɨnga kayi ga kɨya bɔɔ ban̰di dan̰ gɨyəŋdɨge na, ungo gɨ ɗaŋ kɨya ɓale mɔndɛ coŋ naŋ bɨ, dɔrɛ kɔl boy nee coŋ naŋ bɨ, dɨbe koyi cay nee naŋ bɨ.

¹⁶ Woy na hɨn̰ wo̰ bɨ, kɨya Abɨraham bɨ, kungayi bɨ, gɨ Kumu ye gɨ ɗi na kɨya bɨge hɨnga. Na gɨ ni yɔɔ gɨ na kongɨn̰ii hɨn̰ gɨ kan na kondɨ wo̰ naŋ. Ama kungay le, na ungo gɨ pɨna hayi kəɗ kəɗ, ungo gɨ nee le na Kɨris.

¹⁷ Kɔl gɨ ɨŋ ba ye le toy ba kɛ: Kumu gɨsɨ hɨnga kayi ga ni lɔɔ ban̰di dan̰ gɨyəŋdɨge bɨ, ye gɨ hɨnga ga ban ye gɨ ɗi na kɨya lɔɔ le na kɨya wɔyɛ jaŋ ban̰di nee bɨ. Gasɨn̰-kɔl gɨ ba ɨrga ɨlge aru poɗɨn̰ dan̰ toy-sɨbɨ kardi nee le, kɨya ɓale mɔndɛ naŋ bɨ, kɨya ɓale dɔrɛ coŋ naŋ bɨ.

¹⁸ Ama hɨn̰ gɨ hɨnga ga ni ban̰di-gulɔŋ ga Kumu bee le, ungo na waa naa dan̰ gɨyəŋ gɨ da gasɨn̰-kɔl na, na dan̰ gɨyəŋ gɨ da kɔl gɨ ban ye gɨ ɗi na kɨya lɔɔ naŋ ɨni. Kɨya wa Kumu lee ɗarwa dan̰ Abɨraham na dan̰ gɨyəŋ gɨ da hɨnga ga ban ye gɨ ɗi na kɨya bii.

¹⁹ Naa hɨn̰ wo̰ na, na kɨya wa ma Kumu gɨygɨn̰ dan̰ gasɨn̰-kɔl ga? Kumu ay dan̰ gasɨn̰-kɔl gɨygɨn̰ nee coŋ, na kɨya gɨlɨn̰ kalaŋ ɗe na solɨn̰ge hɨnga ga bugoŋ pɨna dan̰ kuduroy geye koyi naŋ. Gasɨn̰-kɔl gɨ nee le, woy hɨn̰ wo̰ bɨrɨŋ gɨsɨn̰ gɨ Abɨraham kungayi gɨ Kumu ye gɨ ɗi na kɨya lɔɔ hɨnga ga ban ye kol cayi le bugoŋ. Gasɨn̰-kɔl gɨ nee le, Kumu bɨn̰ na ka-ƴɔbɛ ga daa nii ba yɔɔge koldi dan̰ gɨyəŋ gɨ da ungo gɨ ba ɨre duroy kalaŋ dan̰ Kumu. Ungo gɨ nee le na Moyis.

²⁰ Ɓɨragɨ na, ba-ɨre durɔ le, ɨre na duroy kalaŋ sɔɔ. Ama a kɛ na, na Kumu pɨna hayi kəɗ kəɗ.

Gɨye-lɔɔ gɨ da gasɨn̰-kɔl

²¹ Kɛ gasɨn̰-kɔl kɨya mɔndɛ hɨnga ga Kumu ye gɨ ɗi na kɨya lɔɔ le ga? Cə, na hɨn̰ wo̰ naŋ bɨrɨŋ! Tumɔ hɨn̰ gɨ kalaŋ na ɓalage wɔɔ sɔmɛ-bɨra gɨ dan̰ cɨndi dan̰ gɨyəŋ gɨ da kɔbɛ gɨ kan kobɨ gasɨn̰-kɔl nɔm gɨ Kumu bɨge na, kan ni kɨya bɨlege kalaŋ ga dan̰ durɔ ɗɨngar dan̰ gɨyəŋ gɨ da gɨye-lɔɔ gɨ nee le ɨni.

²² Ama Magtubu di da Kumu ye gɨ tabɨlaŋ di lɔɔ hɨnga ga ɨsɨni, na gam kalaŋ nɔm te dɔnɔ toge dɨŋ. Ɗe Kumu bɨn̰ kalaŋ ga beege kuduroyge cay Jesu-Kɨris hɨnga ga ban ye gɨ ɗi na kɨya lɔɔ bɨge le. Bɨ ban bɨge na kɨya gɨ kan na ka-aye kuduroyge bɨn̰ Jesu-Kɨris.

²³ Tumɔ pa dɨm ma kɔl gɨ da aye kudurɔ ye ƴee na, ni-gandi ni woy na hɨn̰ ka-dangay wo̰ bɨ, kɔl gɨ da gasɨn̰-kɔl na ba gam ni gɨ dii cayni bɨrɨŋ gɨsɨn̰ gɨ Kumu gɨlni gɨyəŋ gɨ da aye kudurɔ.

²⁴ Na hɨn̰ wo̰ ma gasɨn̰-kɔl sobɨrni bɨrɨŋ gɨsɨn̰ kɨɗɨn̰ ga Kɨris ɨrga bugoŋ, ɗe gɨ ani na ayɨn̰ kuduroyni kɨya bɨlɨn̰ kalaŋ ga dan̰ durɔ ɗɨngar.

²⁵ Ama kɨɗɨn̰ ga gɨyəŋ gɨ da aye kudurɔ ɨrga bugoŋ ɨni na, ni na a te ba-sobɨrni gɨŋ naŋ ɨni.

²⁶ Leen̰ cɨndi na, kɨŋ-gandi nɔm kɨŋ na karɨn̰ Kumu dan̰ gɨyəŋ gɨ da aye kudurɔ gɨ beegɨŋ pɨna dan̰ Jesu-Kɨris.

²⁷ Kɨya wa kɨŋ-gandi nɔm ga kan leegɨŋge batɛm le, kɨŋ bugoŋ pɨna dan̰ Kɨris, kɨŋ tobɨ Kɨris gusɨgɨŋ hɨn̰ badɨge wo̰.

²⁸ Haw kɛ na, Jubɨ unɔ bɨ Gɨrɛg unɔ bɨ. Guyɔŋ unɔ bɨ ungo gɨ cayi kalɨn̰ unɔ bɨ. Bara unɔ bɨ tama unɔ bɨ. Kɨya wa kɨŋ nɔm kɨŋ woy na hɨn̰ ungo gɨ pɨna wo̰, kɨya wa kɨŋ bugoŋ pɨna dan̰ Jesu-Kɨris.

²⁹ Ma hɨn̰ gɨ kɨŋ naa kalaŋ ga da Kɨris ɨni na, kɨŋ na kongɨn̰ii Abɨraham bɨ, kɨŋ na ka-wɔɔ hɨnga ga ni ban̰di-gulɔŋ ga Kumu ye gɨ ɗi na kɨya lɔɔ bɨn̰ Abɨraham le bɨ.