Galad 2 - Gabri Maja

Pol bɨ ka-gɨre-gɨye ga ɗaŋ bɨ

¹ Ɨlge mɔjɨ-cay-poɗɨn̰ kardi nee na, ɨŋ bɨle canɨ jogɨ a Jerusalɛm ɗaŋ coŋ, dan̰ Barnabas bɨ, ɨŋ orɨn̰ dan̰ Titɨ kɔbɔŋ nee bɨ.

² Na kɨya cay andaŋ gɨ Kumu andaŋ canɨ, ma maŋ orɨn̰ Jerusalɛm le. Kɨɗɨn̰ ga ɨŋ bugoŋ na, ɨŋ dor te Kɔl-gɨ-Ɗari gɨ ɨŋ ba tee bɛrnɛdi bɨn̰ kalaŋ ga toyge na Jubɨ naŋ le, ɗe tumoy ka-dɔrɛ tumoy kalaŋ ga gɨmdəŋ kan̰dɨge. Ɨŋ lee hɨn̰ wo̰ na ɗe gɨ gɨye gɨ ɨŋ lee tumɔ bɨ, gɨ ɨŋ ɨre gɨre koldi haw kɛ bɨ le, ɗe na da ban̰ gusɨnɨ naŋ.

³ Sɨlagɨŋ, Titɨ ban gɨ ni Gɨrɛg gɨ toyi na Jubɨ naŋ gɨ bəŋ le kalɨn̰ ma, kan sige tɔgɨ cay gɨ ni walii ban̰a naŋ.

⁴ Ni ye kɔl gɨ ojɨn̰ cay wale ban̰a na kɨya gɨ karmɨni ga pɨna wo̰, ga na ka-aye kudurɔ gɨ cɨndi naŋ ga andɨgaŋge duroyni. Kan ɨrgage na wɔsɛ gɨŋ, kɨya n̰ɨlange ɔrɛ gɨ ni orɨn̰ cayni kalɨn̰ a te gɨyəŋ gɨ da bugoŋ pɨna koni gɨŋ dan̰ Jesu-Kɨris le sɔlɛ. Kɨya wa kan geyge ɗɔɔ hada di da kalaŋ ga na Jubɨ cayni, bɨrɨŋ gɨ ni na bɨləŋ gɔyɔŋ.

⁵ Ama ni ɗa-kɨɗɨn̰ dḛ wo̰ bɨge naŋ bɨrɨŋ. Ɗe gɨ Kɔl-gɨ-Ɗari gɨ cɨndi le, na wɨya jaŋ ban̰di nee hɨn̰ wo̰ kol caygɨŋ.

⁶ Ama gɨ ojɨ cay ka-dɔrɛ tumoy kalaŋ ga kalaŋ je kɔl kɨbɨge le, kan naa kalaŋ ka-dɔrɛ tumoy kalaŋ wala, naa ka-dɔrɛ tumoy kalaŋ naŋ kalɨn̰ ma dɨlaŋ nee naŋ. Tumoy Kumu na, kalaŋ nɔm ɓadɨldɨn̰ge dɛj dɛj. Kalaŋ ga nee le gɨsɨge hɨnga ga ɗaŋ dan̰ dɔnɔ a cay kɔl hɨnge gɨŋ naŋ.

⁷ Ama kan solge gɨ tumɔ Kumu naa ba bɔgɔŋ gɨye tɔgɛ bɛrnɛ kɔl-gɨ-Ɗari bɨn̰ kalaŋ ga toyge na Jubɨ naŋ le kɔbɔŋ ɨŋ-bandi, hɨn̰ gɨ ban ba been̰ gɨye gɨ ni tɔgɛ bɛrnɛ kɔl-gɨ-Ɗari bɨn̰ kalaŋ ga toyge na Jubɨ kobɨ Pɨyɛr wo̰ bɨ le.

⁸ Kɨya wa ban gɨ ba lee gɨye kuduroy Pɨyɛr, ɗe gɨ ban bɨlɨn̰ ba-gɨre-gɨye gɨ da kalaŋ ga toyge na Jubɨ le, lee gɨye kuduronɨ ɨŋ-bandi ɗe gɨ ɨŋ bɨlɨn̰ ba-gɨre-gɨye gɨ da kalaŋ ga toyge na Jubɨ naŋ bɨ.

⁹ Jag bɨ, Kepas bɨ, Ja̰ bɨ, na kalaŋ ga kan solgege leen̰ ka-cay Ka-Daye, ga woyge hɨn̰ sɨya ba duroy ƴaa wo̰. Naa hɨn̰ wo̰ kalɨn̰ ma, kan solge ɗarwa di Kumu ba lee danani. Ɨni na, kan cogɨdege kɔbɔŋ ɨŋ-bandi bɨ, kobɨ Barnabas bɨ, gɨlɨn̰ hɨn̰ gɨ kan na bugoŋ pɨna danani a cay gɨye gɨ nee gɨŋ le. Ni bee noyni pɨna, gɨ ni na kɨya lɔɔ gɨye duroy kalaŋ ga toyge na Jubɨ naŋ bɨ, ke na kɨya lɔɔ gɨye duroy kalaŋ ga toyge na Jubɨ bɨ.

¹⁰ Hɨnga ga kan ɨngɨrnige na pɨna hage ƴɔbɨ, naa gɨ ni na gɨ hale gɨyibəŋ cay ka-n̰age naŋ. Na hɨnga ga ɨŋ si cɨnɨ kardi nee lee kuɗa ɨni bɨ.

Pol ɗal Pɨyɛr a cay ƴaa-di-gumu di Antɨyɔs

¹¹ Ama kɨɗɨn̰ ga Kepas ɨrga bugoŋ a cay ƴaa-di-gumu di Antɨyɔs dɨŋ na, ɨŋ ƴeyi daa ɗalii, kɨya cay gɨye-lɔɔdi gɨ ɨra dan̰ gɨyəŋdi naŋ.

¹² Kɨya wa tumɔ pa dɨm ma, ɗe kalaŋ ga saygage gusi Jag na bugoŋge ƴee na, ban diide dɔɔ dan̰ karmii ga toyge na Jubɨ naŋ. Ama kɨɗɨn̰ ga kan ɨrgage bugoŋge ɨni na, ban ƴom gusi bɨ, dor gusi cɛd gusɨge coŋ, kɨya wa ban hɨndar ka-ƴɔɔ cay hada gɨ da kalaŋ ga toyge na Jubɨ naŋ.

¹³ Karmɨnɨ ga toyge na Jubɨ ga ɗaŋ bage boy sɔɔ gɨ tɨba sɔɔ gɨ nee gɨŋ le bɨ, lee gɨ Barnabas kalɨn̰ ma, ƴol sɔɔ gɨ tɨba sɔɔ gɨ nee le bɨ.

¹⁴ Ama kɨɗɨn̰ ga ɨŋ sol gɨye-lɔɔdɨge ɨra dan̰ durɔ naŋ bɨ, ɨra pɨna dan̰ kɔl gɨ cɨndi gɨ da Kɔl-gɨ-Ɗari naŋ bɨ ɨni na, ɨŋ yen̰ Kepas cɨn̰ kalaŋ nɔm hɨn̰: «Hɨn̰ gɨ ji gɨ ni Jubɨ, ji na ɨra hɨn̰ ungo gɨ toyi na Jubɨ naŋ na, ji ɗe na hada di da Jubɨ coŋ. Naa hɨn̰ wo̰ na, na kɨya wa ma man̰ gey ɗɔɔ dɔnɔ a cay kalaŋ ga toyge na Jubɨ naŋ, ɗe na bɨləŋge hɨn̰ kalaŋ ga toyge na Jubɨ wo̰ ga?»

¹⁵ Ni-gandi gusɨni kalɨn̰ ma, ni na te wɔɔ gɨ da Jubɨ cən̰ wala ni na a te wɔɔ gɨ da kalaŋ ga sɨlage gasɨn̰-kɔl gɨ da Kumu naŋ, ga na kalaŋ ga toyge na Jubɨ naŋ, le naŋ.

¹⁶ Naa hɨn̰ wo̰ kalɨn̰ ma, ni sol gɨ Kumu sɨla ungo laan̰ ungo gɨ dan̰ durɔ ɗɨngar, kɨya kɔbɛ gɨ ban kobɨ gɨye-lɔɔ gɨ da gasɨn̰-kɔl naŋ. Ama Kumu sol ungo leen̰ ungo gɨ dan̰ durɔ ɗɨngar, na kɨɗɨn̰ ga ban na bɨga kuduroy a cay Jesu. Na hɨn̰ wo̰ ma, ni-gandi, ni ay kuduroyni bɨn̰ Jesu-Kɨris, ɗe gɨ Kumu na solni leen̰ kalaŋ ga dan̰ durɔ ɗɨngar, dan̰ gɨyəŋ gɨ da kuduroyni gɨ ni ay bɨn̰ Jesu, wala na kɨya kɔbɛ gɨ ni kobɨ gɨye-lɔɔ gɨ da gasɨn̰-kɔl naŋ. Kɨya wa ungo pɨna wo̰ gɨ kɨya bɨle ungo gɨ dan̰ durɔ ɗɨngar tumoy Kumu dan̰ kɔbɛ gɨ ban kobɨ gasɨn̰-kɔl le, unɔ bɨrɨŋ.

¹⁷ Ama hɨn̰ gɨ ni na bugoŋ pɨna dan̰ Kɨris kɨya bɨlɨn̰ kalaŋ ga gɨye-lɔɔdɨge woy dan̰ durɔ ɗɨngar, ma naa hɨn̰ wo̰ kalɨn̰ ma, kalaŋ ga ni Jubɨ na yage kol cayni gɨ ni naa ka-lɔɔ ɨsɨna na, kɛ ojɨ gɨ ni na ya gɨ Kɨris le naa te ɨsɨna ga? Cə, na hɨn̰ wo̰ naŋ bɨrɨŋ.

¹⁸ Kɨya wa hɨnga ga ɨŋ mondɨ muɗɔgɨ coŋ le, hɨn̰ gɨ ɨŋ na jɨga n̰anage daa ɗaŋ na, ɨŋ ay gusɨnɨ leen̰ na ba-hangɨɗe cay gasɨn̰-kɔl.

¹⁹ Kɨya wa ɨŋ na ungo gɨ ɨŋ ma kol cay gasɨn̰-kɔl. Bɨ tɨma di ɨŋ ma le, na kɨya cay gasɨn̰-kɔl gɨ nee le ma kan dɨɗəŋge, ɗe gɨ ɨŋ na sɨma dan̰ cɨnɨ na kɨya leen̰ gɨye bɨn̰ Kumu. Ɨŋ na ungo gɨ kan gagɨlaŋge a cay sɨya-gɨ-dagɨligɨŋ pɨna dan̰ Kɨris coŋ.

²⁰ Ɨŋ som dan̰ cɨnɨ haŋge ama na ɨŋ-bandi naŋ, na Kɨris ba-sɔmɛ dan̰ cɨndi a kuduronɨ. Kɨya wa sɔmɛ hɨnge hɨn̰ ungo gɨ ɨndi haw kɛ na, ɨŋ som na kɨya aye gɨ ɨŋ ay kuduronɨ bɨn̰ Kurɨn̰-Kumu. Ban geyəŋ kɨya wa ban ɗe gusi bɨn̰ tɨma ban̰nɨ.

²¹ Ɗarwa di Kumu lee danaŋ le, ɨŋ aya laan̰ hɨnga ga kalɨn̰ wo̰ dugo naŋ. Hɨn̰ gɨ naa dan̰ gɨyəŋ gɨ da gasɨn̰-kɔl, ma ungo na kɨya bɨlɨn̰ ungo gɨ da durɔ ɗɨngar tumoy Kumu na, Kɨris ma na tɨma di kalɨn̰ wo̰.