Epɛs 5 - Gabri Maja

Gɨye-lɔɔ gɨ da kalaŋ ga somge kɨɗɨn̰ ga asɨn̰ gaŋ

¹ Ayagɨŋ cay tɨbay Kumu, kɨya gɨ kɨŋ na karɨndi bɨ ban geygɨŋ bɨ.

² Sɨmagɨŋ duroy geye gɨŋ, hɨn̰ gɨ Kɨris ba geynagɨŋ bɨ ayɨn̰ gusi bɨn̰ Kumu kol cay nagɨŋ hɨn̰ hɨnga ga ni bee bɨ, hɨnga ga ni bogɨn̰ kɨbar bɨ, ga gasɨmdɨge mon̰ Kumu le.

³ Haw kɛ na, kɨŋ na kalaŋ ga kɨŋ woy dan̰ cɨndɨgɨŋ ɨni, ɗɔɔ gɨ yɔyɛ dan̰ gangɨ caygɨŋ, naŋ le lɔɔ hɨnga ga ni dasi, naŋ le lɔɔ te gursu le, ungo tɔgɛ gusondɨge duroygɨŋ naŋ ɨni.

⁴ Yɔɔgɨŋ kɔl ga ni karma naŋ bɨ, ga ni matɨr naŋ bɨ, ga ni dasi naŋ bɨ. Kɔl ga nee le, na kɔl ga wɨyan̰ ga ni yɔɔ naŋ. Ban̰di kɔl ga nee le laagɨŋ na ɔlɛ gɨ ni ho’o bɨn̰ Kumu.

⁵ Jagɨŋ kuɗa. Ungo gɨ ba lɔɔ gɨye yɔyɛ gɨ toy kan̰di kan̰di bɨ, lɔɔ hɨnga ga ni dasi wala orɨn̰ dan̰ tabɨlaŋdi wɔɔ hɨnga bɨ le, ban kɨya wɔɔ hɨnga a boy dɔɔ-ƴaa gɨ da Kɨris dan̰ Kumu naŋ. Orɨn̰ dan̰ tabɨlaŋ di ni woon̰ hɨnga le gɨlɨn̰ na hɨn̰ n̰ɨre kula wo̰.

⁶ Ɗɔɔgɨŋ ungo nargɨŋ dan̰ kɔl gɨ ni poy naŋ: Kɨya wa na hɨnga ga hɨn̰ wo̰ le ba jɨbe te kuduroy-hɔmɛ di da Kumu bɔgɛ cay kalaŋ ga na ka-baadi le.

⁷ Naa hɨn̰ wo̰ na, kɨŋ bugoŋ danage pɨna a cay gɨye-lɔɔdɨge gaŋ naŋ.

⁸ Tumɔ kɨŋ na ga da dɨlɨm, ama haw kɛ kɨŋ na ga da kɨɗɨn̰ ga asɨn̰ dan̰ te bugoŋ gɨ kɨŋ bugoŋ pɨna dan̰ Ba-gulɔŋ. Hɨn̰ wo̰ na, laagɨŋ hɨnga hɨn̰ karɨn̰aŋ ga somge kɨɗɨn̰ ga asɨn̰ gaŋ wo̰.

⁹ Kɨya wa kɨɗɨn̰ ga asɨn̰ ɨrgan̰ na dan̰ ɨrɨmedi hɨnga nɔm ga ni lɔɔ dan̰ kuduroy-ɗarwa bɨ, hɨnga ga dan̰ durɔ bɨ, hɨnga ga cɨndi bɨ.

¹⁰ Hɨnga ga mon̰ Ba-gulɔŋ le, kuɗa dɔrɛ cɨndɨge.

¹¹ Gɨye-lɔɔ gɨ ni lɔɔ dɨlɨm dɨŋ gɨ na gɨye gɨ andaŋ hɨnga naŋ le, kɨŋ ɗɔɔ ba lɔɔ danage. Ama kɨŋ sɨɗɨgɨ toyge daa.

¹² Hɨnga ga kalaŋ ga nee leege kɨɗɨn̰ ga wosi gaŋ le, lee dasi gɨ ni yɔɔ daa.

¹³ Hɨnga nɔm ga ungo sɨɗɨgɨ toyge daa le, woy na kɨɗɨn̰ ga asɨn̰ gaŋ ɨni.

¹⁴ Kɨya wa hɨnga nɔm ga ungo sɨɗɨgɨ toyge daa le, kɨya bɨləŋ na kɨɗɨn̰ ga asɨn̰. Na toy di hɨn̰ wo̰ ma kan yege hɨn̰: «Sa cay kuŋ gaŋ, ji ba wɔyɛ kuŋ le, Sa daa duroy kalaŋ ga madɨrdaŋ gaŋ, Ɨni na, Kɨris kɨya asɨn̰e can̰.»

¹⁵ Ɨrɨmgɨŋ kuɗa a cay gɨye-lɔɔdɨgɨŋ gɨŋ. Kɨŋ ɗɔɔ ba lɔɔ hɨnga hɨn̰ kalaŋ ga ɨran̰ge dan̰ cɨn̰-muɗɔlɛ naŋ wo̰ naŋ, ama kɨŋ laa hɨnga hɨn̰ kalaŋ ga muɗoldoŋ wo̰.

¹⁶ Kɨŋ na waa gɨyəŋ gɨ ni lɔɔ hɨnga ga ɗari na, laagɨŋ daa bɨrɨŋ bɨrɨŋ. Kɨya wa wɔlɛ gɨ na ba somɨn̰gɨŋ nee haw kɛ le, na wɔlɛ gɨ ɨsɨn.

¹⁷ Na toy di hɨn̰ wo̰ ma, kɨŋ ɗɔɔ ba lɔɔ hɨnga hɨn̰ ga da kalaŋ ga ka-dɨngale wo̰ naŋ, ama kɨŋ laa agɨŋ solɨn̰ duroy hɨnga ga kuduroy Ba-gulɔŋ gey le kuɗa.

¹⁸ Kɨŋ ɗɔɔ kɔyɛ cɛrɛ di suru lɔɔgɨŋ naŋ, kɨya wa kɔyɛ na hɨnga ga kɨya mɔndɛ ungo. Ama ɗagɨŋ Turnɔ ɗe-kuduroy-bɛrɛ ƴaa kuduroygɨŋ.

¹⁹ Dɨban̰gɨŋ gusɨgɨŋ bandɨ dan̰ kɨra gɨ ni hɨramɨn̰ Kumu bɨ, gɨ ni dɨbɨn̰ gusoŋ-tɔgɛ bɨ, dan̰ kɨra gɨ Turnɔ ɗe-kuduroy-bɛrɛ ba bɨgɨŋ bɨ. Ayagɨŋ kɨra hɨraman̰gɨŋ Ba-gulɔŋ dan̰ ɗugoygɨŋ di pɨna.

²⁰ Laan̰gɨŋ Kumu Kɨye Bay ho’o dan̰ tɨwa nɔm, kɨya cay hɨnga nɔm, dan̰ guson̰ Ba-gulondɨna Jesu-Kɨris.

Kɔl gɨ ojɨ cay kandɨ bɨ ban̰aŋ bɨ

²¹ Kɨŋ ka-dɨbe hurɔmɔ cay Kɨris le, dɨbagɨŋ caygɨŋ dugo bɨn̰ gusɨgɨŋ duroygɨŋ.

²² Kandɨ jagɨŋ, kuɗa gɨ tama di ani ani kalɨn̰ ma dɨba caa dugo bɨn̰ kudurɔɔ hɨn̰ gɨ hɨndi ba dobɨn̰ caa dugo bɨn̰ Ba-gulɔŋ wo̰ bɨ.

²³ Kɨya wa kuduroy tama na ba caa, hɨn̰ gɨ Kɨris na ba cay Ka-Daye wo̰ bɨ. Ka-Daye na Kɨris kuyoŋdi-gusi bɨ, ban gusi gaŋ ba-pɔɗɛ kuyoŋdi-gusi bɨ.

²⁴ Hɨn̰ gɨ Ka-Daye ba dobɨn̰ge cayge dugo te Kɨris le, kuɗa gɨ kandɨ nɔm dɨbage cayge dugo te kodɨn̰ige a cay hɨnga nɔm bɨ.

²⁵ Ban̰aŋ jagɨŋ, geygɨŋ kandiigɨŋ hɨn̰ gɨ Kɨris ba geyɨn̰ Ka-Daye bɨ, ayɨn̰ gusi bɨn̰ tɨma kol cay Ka-Daye wo̰ bɨ.

²⁶ Ban lee hɨn̰ wo̰ ay na ɗege dan̰ cɨndɨge bɨn̰ Kumu. Ban dorge mɨra ɗege arɨn̰ dan̰ kaŋ bɨ dan̰ kɔl koyi bɨ.

²⁷ Kɨya wa ban gey ɨrgan̰ dan̰ Ka-Daye tumoy gusi koyi gaŋ, hɨn̰ tama di jɨran̰de jə̰ jə̰ bɨ, di mɨdage ɨsɨboo naŋ bɨ, di guso bɨga gangɨ naŋ bɨ, di kɨway guso gɨ mundoŋ unɔ bɨ. Ban gey gɨ Ka-Daye na wɨyage dan̰ cɨndɨge bɨ, masadɨge na unɔ bɨ.

²⁸ Na toy di hɨn̰ wo̰ ma ojɨ gɨ kuduroy tama gey tamdi, hɨn̰ gɨ ban ba geyɨn̰ kuyoŋdi-gusi koyi wo̰ bɨ. Ungo gɨ na gey tamdi na, gey na kuyoŋdi-gusi koyi bɨ.

²⁹ Ungo gɨ ba ƴɔmɛ kuyoŋdi-gusi koyi gaŋ dan̰ kuduroyi unɔ, ama ungo kɨya sɔlɛ kardi gusi koyi dan̰ hɨnga ga ni dɔɔ bɨ, kɨya ame na gusi bɨ. Na hɨnga ga nee le ma Kɨris lee dan̰ Ka-Daye le.

³⁰ Waŋ waŋ kalɨn̰ ma a duroyna na kɨway kuyoŋdi-gusi.

³¹ «Na toy di hɨn̰ wo̰ ma, bara kɨya ɗɔɔ bayi bɨ ƴoyi bɨ coŋ, kɨya bugoŋge pɨna dan̰ tamdi ɗe kan sɔɗɨmɔŋ bɨlɨn̰ge kuyoŋ gɨ pɨna.»

³² Kɔl gɨ kɛ le na kɔl gɨ gumu gɨ woy kɨɗɨn̰ wɔsɛdi gaŋ. Bɨ ɨŋ sol gɨ kɔl gɨ nee le yege ojɨ na cay Kɨris dan̰ Ka-Daye.

³³ Ama gɨ ni orɨn̰ dan̰ kɔl le tumɔ tɔgɨ naŋ na, kuɗa gɨ waŋ waŋ kalɨn̰ ma gey tamdi hɨn̰ kuyoŋdi-gusi wo̰ bɨ, kɨŋ-gandi kandɨ kalɨn̰ ma kɨŋ bɨgan̰ kodɨn̰igɨŋ kɔl bɨ.