Epɛs 4 - Gabri Maja

Kuyoŋdi Kɨris na pɨna ƴɔbɨ

¹ Kɨya cay kɔl gɨ cɨndi gɨ nee le nɔm, ɨŋ-bandi Pol gɨ na ba-dangay kɨya cay bugoŋ gɨ ɨŋ bugoŋ pɨna dan̰ Ba-gulɔŋ le, ɨŋ lee n̰age toygɨŋ ɗe gɨye-lɔɔdɨgɨŋ bugoŋ pɨna dan̰ tɔgɛ gɨ Kumu teegɨŋ le.

² Wɔyɛgɨŋ hɨn̰ kalaŋ ga ka-dɔgɛ jorgiige wo̰ naŋ bɨ, laagɨŋ hɨnga dan̰ kaledɨgɨŋ ga jali bɨ, a boy hɨnga gaŋ nɔm. Wɨyagɨŋ ka-dɨbe ɗugɔ jɨn̰ tumɔ tumɔ bɨ. Ƴɨmagɨŋ kuduroygɨŋ duroygɨŋ, dan̰ gɨyəŋ gɨ da wandɨ.

³ Turnɔ di da Kumu leegɨŋ leen̰ te wɔɔ gɨ pɨna. Dɨbgɨŋ gusɨgɨŋ coŋ agɨŋ gamɨn̰ bugoŋ pɨna gɨ nee le, sɨman̰gɨŋ dan̰ gusi-dɔbɛ gɨ saɗɨgɨŋ pɨna le.

⁴ Kuyoŋdi Kɨris na pɨna ƴɔbɨ bɨ, Turnɔ di da Kumu kalɨn̰ ma na pɨna ƴɔbɨ bɨ. Hɨn̰ wo̰ na hɨnga ga Kumu ye gɨ kɨŋ na bɨga ɨrɨmedɨgɨŋ cay nee kɨɗɨn̰ ga ban təgɨŋ le kalɨn̰ ma na pɨna hage ƴɔbɨ bɨ.

⁵ Ba-gulɔŋ na pɨna hayi ƴɔbɨ bɨ, aye kudurɔ na pɨna hayi ƴɔbɨ bɨ, batɛm na pɨnaa ƴɔbɨ bɨ.

⁶ Kumu na pɨna hayi ƴɔbɨ, ban na kalaŋ nɔm bayge. Ban di cay kalaŋ nɔm bɨ, lee gɨye kol cayge nɔm bɨ, som kuduroyge nɔm bɨ.

⁷ Ama Kɨris gosɨnɨn̰ waŋ waŋ kalɨn̰ ma duroyna hɨnga ga ni bee kalɨn̰ ga toyge kan̰dɨge kan̰dɨge, kɨya loon̰ gɨye koyi hɨn̰ gɨ ban ba ojɨ gɨ ni lɔɔ.

⁸ Na toy di hɨn̰ wo̰ ma, kan walge koldi duroy magtubu Kɨbe-Kɨra dɨŋ yege hɨn̰: «Kɨɗɨn̰ ga ban nay a kɨɗɨn̰ ga daa gaŋ le, Ban orɨn̰ dan̰ ka-dangay kondɨ danayi bɨ, Bɨn̰ kalaŋ ga ɨndəŋ hɨnga nɔm ga ni bee ga kalɨn̰ bɨ.»

⁹ «Ban nay a kɨɗɨn̰ ga daa gaŋ» duroy na wa ga? Duroy na Kɨris, tumɔ gɨsɨn dugo bɨ andaŋ te gɨsəŋ gaŋ mɨrɨg bɨ.

¹⁰ Ban gɨ gɨsɨn or te gɨsəŋ gaŋ mɨrɨg le, na ban ba nɔɔ daa gɨɗɨgɨ-Kumu gɨŋ bɨ, ɗe ban na ƴee kɨɗɨn̰ nɔm dan̰ gɨyəŋ gɨ da Turnoyi.

¹¹ Hɨnga ga ban bɨn̰ kalaŋ kalɨn̰ le, na ka-gɨre-gɨye bɨ, ka-yɔɔ-kɔl-gɨ-Kumu-ba-yɔɔ bɨ, ka-tɔgɛ bɛrnɛ Kɔl-gɨ-Ɗari bɨ, ka-sɔlɛ kardi kalaŋ ga da Kumu dan̰ ka-gɨlɨn̰ kalaŋ hɨnga bɨ.

¹² Ban bɨge hɨnga ga kalɨn̰ ga nee le, ɗe kalaŋ ga woyge dan̰ cɨndɨge na ɓalɨn̰ge leen̰ge gɨye koyi le, ɗe kuyoŋdi Kɨris na orɨn̰ jɨn̰ tumɔ tumɔ.

¹³ Na hɨn̰ wo̰ ma, ma na kɨya loon̰ gɨye bɨrɨŋ gɨsɨn̰ gɨ na-gandi nɔm, na na bugoŋgɨŋ pɨna te aye kudurɔ gɨŋ bɨ, na na sɨlan̰gɨŋ Kurɨn̰-Kumu nara bɨ. Ɨni na, na-gandi nɔm na kɨya bɨləŋgɨŋ kalaŋ ga cɨndɨge nadɨrdaŋ ga malgɨge bɨrɨŋ ɓalɨn̰ge dan̰ Kɨris ca ca.

¹⁴ Hɨn̰ wo̰ na, na kɨya bɨləŋ wɔyɛ hɨn̰ karɨn̰aŋ ga ɨran̰ge dan̰ ƴɔmɛ kudurɔ osɨwa naŋ ɨni. Kan gɨlɨn̰ge na hɨn̰ togɨ ga n̰ən̰əŋ ga a cay kaŋ gaŋ. Kan ɨran̰ge dan̰ tɔgɨ a cay mɛw di orɨn̰ danage bɨ, nongɨldɨge jɨn̰ kɛ kɛ bɨ naŋ. Kɨradi-kɔl gɨ kɛ le, kal bɨ, mɛw bɨ le, kan na hɨnga ga ni gɨle ga dan̰ gɨyəŋdɨge naŋ, ga kalaŋ ga pɨna gɨlɨn̰ge kamdɨge bɨ, na cɨn̰-muɗɔlɛ di kan narɨn̰ge cɨn̰ kalaŋ bɨ kayɨn̰ge kalaŋ bɨ.

¹⁵ Ama na kɨya yɔ kɔl gɨ cɨndi dan̰ wandɨ, hɨn̰ wo̰ na na kɨya malge bɨlɨn̰ kalaŋ ga cɨndɨge nadɨrdaŋ cay hɨnga nɔm dan̰ te bugoŋ pɨna dan̰ Kɨris. Ban ma na ba-cayna.

¹⁶ Na ban ba bɔgɛ te kalaŋ kayi pɨna ɗe kan na bugoŋge pɨna hɨn̰ gurɨyadɨna gɨ saɗɨdaŋ dan̰ gusɨge wo̰. Kɨɗɨn̰ ga kɨway gusɨna pɨna pɨna na laage gɨye koge kuɗa na, kuyoŋdi-gusɨna nɔm kɨya malge bɨ, bɨləŋ osɨwa dan̰ gɨyəŋ gɨ da geye bɨ.

Sɔmɛ-bɨra gɨ hɨrɨwa gɨ da kalaŋ ga da Kɨris

¹⁷ Ɨŋ kɨya halgɨŋ dan̰ guson̰ Ba-gulɔŋ, jagɨŋ kɔl hɨnge kuɗa. Orɛgɨŋ hɨn̰ kalaŋ ga sɨlage Kumu gɨ cɨndi naŋ wo̰ naŋ ɨni. Kan kobɨge na ɨrɨme gɨ na hɨnga naŋ.

¹⁸ Ɨrɨmedɨge na ɨrɨme gɨ woy duroy dɨlɨm dɨŋ. Sɔmɛ-bɨra gɨ Kumu bee le, kan wɨyage boy nee naŋ kɨya wa sɔlɛ-hɨnga naŋ woy cayge bɨ, kuduroyge say osu bɨ.

¹⁹ Dasi dage naŋ, lee gɨ kan ayge gusɨge yoyɨn̰ge gorɨn̰ daa bɨ. Kobɨn̰ge hɨnga lɔɔ ga ni dasi dɨle ƴomɨn̰ gusɨge cay nee bɨ.

²⁰ Ama kɨŋ-gandi na, kɨŋ tɨraba kɔl gɨ da Kɨris na gɨ ni leen̰ hɨnga ga hɨn̰ wo̰ naŋ.

²¹ Na cɨndi, kɔl gɨ da Kɨris lee kɨŋ je bɨ, dan̰ te bugoŋ pɨna kogɨŋ danayi le, kɨŋ tɨrabɨ kɔl gɨ cɨndi, kɨya gɨ kɔl gɨ cɨndi woy na gusi Jesu.

²² Ɗagɨŋ gɨye-lɔɔdɨgɨŋ ga tumɔ coŋ. Gɨye-lɔɔdɨgɨŋ ga tumɔ le ƴɨmagɨŋ dɨragɨŋ gusɨgɨŋ coŋ, hɨn̰ badɨge ga ɨlgi wo̰. Kɨŋ-gandi le tumɔ tabɨlaŋdi nare cɨn̰ kalaŋ gɨ wanɨn̰ kuduroygɨŋ daa jɨŋ jɨŋ le mondɨgɨŋ.

²³ Ɗagɨŋ Turnɔ di kan bɨgɨŋ le, lee gɨ hɨnga-sɔlɛ kagɨŋ bɨl ga hɨrɨwa.

²⁴ Laagɨŋ gɨye-lɔɔ gɨ da ungo gɨ hɨrɨwa gɨ Kumu ɗey ɗe na andaŋ le hɨn̰ badɨge ga hɨrɨwa ga kɨŋ dobɨ gusɨgɨŋ wo̰: Na ungo gɨ dan̰ durɔ bɨ, gɨ woy dan̰ cɨndi bɨ, dan̰ gɨyəŋ gɨ da kɔl gɨ cɨndi bɨ.

²⁵ Na toy di hɨn̰ wo̰ ma, jɨbgɨŋ poy sɛdɨ coŋ, kuɗa gɨ waŋ waŋ kalɨn̰ ma yan̰ mɨgay kɔl gɨ cɨndi. Kɨya wa na-gandi nɔm le, na na kuyoŋ-gusu gɨ pɨna.

²⁶ Hɨn̰ gɨ kuduroy-hɔmɛ na laagɨŋ na, kɨŋ ɗɔɔ ba lɔɔ ɨsɨna naŋ, ɗɔɔgɨŋ tɨwa ɗɔbɛ a cay kuduroy-hɔmɛ togɨŋ dɨŋ naŋ,

²⁷ ɗɔɔgɨŋ gɨyəŋ bɨn̰ haban̰ dɔɔ-ƴaa caygɨŋ naŋ.

²⁸ Kuɗa gɨ ungo gɨ tumɔ na ba hase le, hase naŋ ɨni, ama laa gɨye gɨ kuɗa dan̰ kobi, ɗe ban wan̰ hɨnga ga ni bɨn̰ kalaŋ ga orɨn̰ dan̰ n̰agedi hɨnga.

²⁹ Ɗɔɔgɨŋ kɔl gɨ ɨsɨni andaŋ kɨbɨgɨŋ naŋ, ama na kɔl gɨ ɗari ƴɔbɨ, ɗe leen̰ kalaŋ ga jege le ɗarwa bɨ, orɨn̰ge cɨndɨge tumɔ bɨ.

³⁰ Yɔɔgɨŋ kɔl gɨ ɨsɨni naŋ, kɨya wa kɔl gɨ ɨsɨni le leen̰ dan̰ Turnɔ ɗe-kuduroy-bɛrɛ di Kumu ɗo gusɨnagɨŋ le, cɨn̰-n̰age. Hɨndi na hɨnga ga Kumu jɨbɨ gusɨgɨŋ gɨlɨn̰ gɨ kɨŋ naa kayi bɨ, gɨlɨn̰ gɨ wɔlɛ gɨ ɗaŋ gɨŋ na, Kumu na kɨya ɨrga pɔɗɨnagɨŋ yɔd bɨ.

³¹ Kuɗa gɨ kuduroy-ɗan̰ɨwa bɨ, bɔyɛ-asɨn̰e bɨ, kuduroy-hɔmɛ bɨ, adɨlde toygɨŋ bɨ, yagɨde kɨɗɨn̰ bɨ, kuduroy-ɨndɨwa di tɔɔ kan̰do kan̰do bɨ, unɔ duroygɨŋ.

³² Laagɨŋ ɗarwa dan̰ gusɨgɨŋ bɨ, sɨlagɨŋ cɨn̰-n̰age da gusɨgɨŋ bɨ. Ɗagɨŋ kuduroygɨŋ jala cay gusɨgɨŋ hɨn̰ gɨ Kumu ba ɗen̰ kuduroy jal caygɨŋ a te bugoŋ pɨna dan̰ Kɨris le bɨ.