Epɛs 2 - Gabri Maja

Tɨma bɨ sɔmɛ-bɨra bɨ

¹ Jɨne, kɨŋ woy na hɨn̰ kalaŋ ga madɨrdaŋ kɨya cay hɨnga ga dan̰ gɨyəŋdɨge naŋ ga kɨŋ lee bɨ, kɨya cay ɨsɨna gɨ kɨŋ lee le bɨ. Ama haw kɛ na Kumu bɨgɨŋ sɔmɛ-bɨra.

² Jɨne le, kɨŋ kobɨ na gɨyəŋ gɨ da kumu gɨ cay gɨsəŋ gaŋ kɛ bɨ, kardi kɨlma gɨ ba ɨre daa duroy gɨɗɨgɨ-Kumu dan̰ cay gɨsəŋ gɨ na turnɔ di lee gɨye haw kɛ kuduroy kalaŋ ga na ka-baa ga da Kumu.

³ Tumɔ le, na-gandi nɔm na woy na hɨn̰ kalaŋ ga nee le bɨ. Kɨya wa jɨne le na lee gɨye-lɔɔ gɨ ɨsɨn, leen̰ na hɨnga ga kuyoŋdi-gusɨna gey bɨ, hɨnga ga ɨsɨni ga na sol bɨ. Tumɔ na-gandi kalɨn̰ ma, kuduroy-hɔmɛ di da Kumu woy kol cay na hɨn̰ kalaŋ ga kɔl ƴom cayge wo̰ bɨ.

⁴ Ama sɔlɛ cɨn̰-n̰age di da Kumu ɗɨn̰ hɨnga nɔm bɨ, ban geyna dan̰ wandɨ di gumu tɔgɨ bɨ.

⁵ Na toy di hɨn̰ wo̰ na-gandi ga na woy hɨn̰ kalaŋ ga madɨrdaŋ coŋ kɨya cay hɨnga ga dan̰ gɨyəŋdɨge naŋ ga na lee le, ban bɨna sɔmɛ-bɨra gɨ hɨrɨwa te bugoŋ gɨ na bugoŋ pɨna dan̰ Kɨris. Ho’o, na dan̰ gɨyəŋ gɨ da ɗarwa di da Kumu ƴɔbɨ ma magɨŋ poɗɨn̰.

⁶ Kumu boyna lɨbna te bugoŋ pɨna dan̰ Jesu-Kɨris bɨ, or ɗena pɨna danayi a gɨɗɨgɨ-Kumu gɨŋ daa nii.

⁷ Ɗarwa di ban lee danana te bugoŋ pɨna dan̰ Jesu-Kɨris le, ban mal na gɨle kuduroy-ɗarwa toy di ɗɨn̰ cɨn̰-kɨɗɨn̰ a boy ɨlgen̰əŋ ga ba kɨya ɨrga le.

⁸ Ho’o, Kumu poɗɨgɨŋ na kɨya kuduroy-ɗarwa toyi, dan̰ gɨyəŋ gɨ da kuduroygɨŋ ga kɨŋ bee a cay Jesu-Kɨris. Na kɨŋ ba-pɔɗɛ gusɨgɨŋ naŋ. Pɔɗɛ na hɨnga ga ni bee kalɨn̰ ga Kumu bɨgɨŋ.

⁹ Na gɨye-lɔɔdɨgɨŋ ba poɗɨgɨŋ naŋ, lee gɨ ungo gɨ kɨya dɔgɛ jorgi kol caa unɔ.

¹⁰ Na bɨləŋ gɨŋ woy na hɨn̰ hɨnga ga hɨrɨwa ga Kumu lee wo̰. Ban lee na hɨnga ga ni se ga hɨrɨwa dan̰ te bugoŋ pɨna dan̰ Jesu-Kɨris, ɗe ana na leen̰gɨŋ gɨye-lɔɔ gɨ ɗari, gɨ ban ƴom cay tɨbayi tumɔ hayi kol cayna ɗe ana na leegɨŋ le.

Te kalaŋ ga sɔɔ bɨləŋge te kalaŋ ga pɨna

¹¹ Ay karmɨnɨ ga toygɨŋ na Jubɨ naŋ, hɨngɨŋ a cay gɨye-lɔɔdɨgɨŋ gɨ ɨlgi. Tumɔ Jubɨn̰əŋ yege kol caygɨŋ gɨ kɨŋ na wala ban̰a naŋ. Kalaŋ ga ye kɔl gɨ nee le yege gɨ naa ke ƴɔbɨ ma naa ka-ban̰a, ama ban̰a toge na wale kuyoŋ gɨ kan leege dan̰ kobɨ kalaŋ ƴɔbɨ.

¹² Hɨngɨŋ gɨ a boy wɔlɛdi gɨ nee gɨŋ le, kɨŋ sɨla Kɨris ban gɨ Kumu dorii le naŋ bɨ, kɨŋ ɓala ɨre duroy te wɨn̰je gɨ da Ɨsɨrayɛl, kalaŋ ga Kumu torge tumɔ le naŋ bɨ. Hɨnga ga Kumu gɨsɨ kɨya cay saɗe kɨbɨ pɨna ɓɨse gusu le kɨŋ mɨnde durdɨne naŋ bɨ, hɨnga ga kɨŋ kɨya bɔgɛ ɨrɨmedɨgɨŋ cay nee unɔ bɨ, Kumu kalɨn̰ ma kɨŋ sɨlayi tumɔ naŋ bɨ.

¹³ Ama haw kɛ na, kɨŋ bugoŋ pɨna dan̰ Jesu-Kɨris lee gɨ kɨŋ ga tumɔ kɨŋ hən̰ dan̰ Kumu le, kɨŋ ɨrga mɨnde gusi dan̰ gɨyəŋ gɨ da kɨbardi Kɨris.

¹⁴ Kɨya wa na Kɨris gusi gaŋ ba ɨrgan̰ dan̰ gusi-dɔbɛ bɨna. Ni-gandi ga ni Jubɨ bɨ, kɨŋ-gandi ga ni Jubɨ naŋ bɨ, ban dayna daa leen̰ te kalaŋ ga pɨna. Dan̰ gɨyəŋ gɨ da tɨmaydi na, hɨnga ga dɨbna sɨya bɨ poynagɨŋ duroy nee bɨ, lee gɨ na ƴomɨn̰ gusɨna dan̰ kuduroyna bɨ le, dusoŋ dugo.

¹⁵ Dan̰ gɨyəŋ gɨ da tɨmaydi na, Jesu lee gɨ na kɔbɛ gɨ da gasɨn̰-kɔl bɨ, te tumɔ bɨ, naa ba kɨya lɔɔ gɨ Kumu na kɨya ƴomna gusi naŋ. Ban lee hɨnga ga nee le, ɗe Jubɨn̰əŋ bɨ, kalaŋ ga toyge na Jubɨ naŋ bɨ, na bɨləŋge te kalaŋ ga hɨrɨwa ga bugoŋge pɨna dan̰ Kɨris bɨ, ɗe gusi-dɔbɛ na woy duroyge bɨ.

¹⁶ Kɨris gey bogɨna pɨna nɔm dan̰ Kumu, Jubɨ bɨ Jubɨ naŋ bɨ ɗe ana na bɨlɨn̰ te kalaŋ ga pɨna dan̰ gɨyəŋ gɨ da tɨmaydi di a cay sɨya-gɨ-dagɨli gɨŋ. Na a cay sɨya-gɨ-dagɨli gɨŋ ma ban mondɨ ƴɔmɛ gusɨna dan̰ kuduroyna gɨ woy a duroyna bɨ, ban lee gɨ na bɨləŋ na te kalaŋ ga pɨna bɨ.

¹⁷ Kɨris ɨrga tee bɛrnɛ Kɔl-gɨ-Ɗari gɨ da gusi-dɔbɛ bɨgɨŋ kɨŋ-gandi ga toygɨŋ na Jubɨ naŋ ga tumɔ kɨŋ som hən̰ dan̰ Kumu bɨ, tee bɛrnɛ Kɔl-gɨ-Ɗari gɨ da gusi-dɔbɛ bɨna na-gandi ga ni Jubɨ ga na woy mɨnde dan̰ Kumu bɨ.

¹⁸ Kɨya cay hɨnga ga Kɨris lee le, na-gandi ga toyna na Jubɨ bɨ, ga toyna na Jubɨ naŋ bɨ, na orɨn̰gɨŋ dan̰ gɨyəŋ gɨ ni ɨrga mɨnde gusi Bayna Kumu, dan̰ gɨyəŋ gɨ da Turnoyi.

¹⁹ Lee gɨ haw kɛ, kɨŋ ka-aye kudurɔ ga toygɨŋ na Jubɨ naŋ le, kɨŋ na kɨrge naŋ ɨni bɨ, kɨŋ na kalaŋ ga pɨna danani ɨni bɨ. Kɨŋ bɨle na te kalaŋ ga pɨna dan̰ kalaŋ ga woyge dan̰ cɨndɨge bɨ. Kɨŋ na te wandɨ da Kumu bɨ.

²⁰ Dan̰ kɨradi-kɔl gɨ ɗaŋ, Kumu aygɨŋ leen̰ ƴaa di ban somɨn̰ nee. Te ƴaa le, na ka-gɨre-gɨye bɨ, ka-yɔɔ-kɔl-gɨ-Kumu-ba-yɔɔ bɨ, ama Jesu-Kɨris gusi ma na oru gɨ kuɗa ɗɨn̰ kamdi gɨ ɗege tɨbɨn̰ ƴaa gɨ ƴom kalaŋ pɨna.

²¹ Na dan̰ te bugoŋ pɨna dan̰ Kɨris ma oru gɨ da ƴaa gɨ nee le pɨna pɨna ƴom gusɨge pɨna bɨ, ƴaa le say daa bɨlɨn̰ ƴaa-di-da-Kumu gɨ woy dan̰ cɨndi bɨn̰ Ba-gulɔŋ.

²² Kɨya bugoŋ gɨ kɨŋ bugoŋ pɨna dan̰ Kɨris le, Kumu bəgɨŋ pɨna dan̰ ka-aye kudurɔ ga ɗaŋ, ɗe gɨ agɨŋ na bɨlɨn̰ hɨn̰ ƴaa di Kumu som nee dan̰ gɨyəŋ gɨ da Turnɔ.