Kɔlɔs 4 - Gabri Maja

¹ Ay kɨŋ ka-gulɔŋ gɔyɔŋ, laan̰gɨŋ gɔyɔŋ kagɨŋ dan̰ tɨwa nɔm, hɨnga ga dan̰ durɔ ɗɨngar bɨ, hɨnga ga ɓadɨldɨn̰ dɛj dɛj bɨ. Halegɨŋ gɨybəŋ gɨ kɨŋ-gandi kalɨn̰ ma kɨŋ naa gɔyɔŋ ga da Ba-gulondɨgɨŋ gɨ woy a gɨɗɨgɨ-Kumu gɨŋ naŋ bɨ.

Ɔlɛ bɨ ɗɔɔ cɨn̰-muɗɔlɛ bɨ

² Ay karmɨnɨ, ƴɨmagɨŋ te ɔlɛ bɨ, sɨmagɨŋ-bɨra toy nee bɨ, laan̰gɨŋ Kumu ho’o jɨn̰ tumɔ tumɔ bɨ.

³ Ulayigɨŋ kol cayni bɨ. Ulagɨŋ Kumu ɗe haŋgɨ gɨyəŋ gɨ da tɔgɛ bɛrnɛ a tumoyni ɗe ani teen̰ bɛrnɛ gɨ da hɨnga ga woy a kɨɗɨn̰ wɔsɛdɨge gaŋ ojɨn̰ cay Kɨris, gɨ ɨŋ won̰ dangay dɨŋ koldi le bɨn̰ kalaŋ.

⁴ Ulagɨŋ Kumu kol canɨ ɗe aŋ tee bɛrnɛdi bɨn̰ kalaŋ dan̰ kɔl gɨ arɨn̰ cərərə hɨn̰ gɨ ojɨ gɨ ɨŋ na ya.

⁵ Sɨmagɨŋ dan̰ cɨn̰-muɗɔlɛ a duroy kalaŋ ga na ka-aye kudurɔ naŋ. Kɨɗɨn̰ ga kɨŋ na waa gɨyəŋ gɨ ni loon̰ hɨnga ga ɗari na laagɨŋ daa bɨrɨŋ bɨrɨŋ.

⁶ Ɗe gɨ kɔl yɔdɨgɨŋ wɨya na gɨ ɗari dan̰ wɔlɛ pɨna pɨna bɨ, andan̰ na dan̰ kɔl gɨ ƴogi daa daa bɨ. Ɗe agɨŋ solɨn̰ gɨyəŋ gɨ ni dɨbɨn̰ waŋ waŋ kalɨn̰ ma kɔl cay nee ojɨn̰ cay Kɔl-gɨ-Ɗari.

Lapɨya di ni dɨɗɨn̰ kɨbɨ kɔl

⁷ Tisig kɨya yogɨŋ kɔl nɔm gɨ ojɨ canɨ. Ban na kurɨnɨ gɨ ɨŋ lee-toyi. Ban na ba tɔgɛ bɛrnɛ gɨ ɨre a cay tɨbay dɨŋ bɨ, na mɨganɨ ba lɔɔ gɨye a boy gɨye gɨ da Ba-gulɔŋ gɨŋ bɨ.

⁸ Ɨŋ kɨya gɨyii gusɨgɨŋ ojɨn̰ na cay kɔl gɨ nee le ƴɔbɨ ɗe agɨŋ jen̰ kɔl gɨ ojɨ cayni bɨ, ɗe ban dobɨn̰ bandɨ kuduroygɨŋ bɨ.

⁹ Ɨŋ gɨy Onesim danayi, ban na kurɨndɨna gɨ ɨre a cay tɨbayi dɨŋ gɨ ɨŋ lee-toyi, ban na ungo gɨ a tagɨŋ bɨ. Kan kɨya yogɨŋ kol hɨnga nɔm ga andaŋ cayni a kɛ.

¹⁰ Kurɨndɨna Aristarg dan̰ Marg ga woyge dangay dɨŋ danaŋ le ləgɨŋge lapɨya. Barnabas, gɨlmii, ban gɨ ɨŋ ba yəgɨŋ kɔl gɨ ojɨ cayi tumɔ le. Hɨn̰ gɨ ban na bugoŋ na ƴɨmayigɨŋ gusɨgɨŋ kuɗa.

¹¹ Josɨwe gɨ kan teeyige Justus le kalɨn̰ ma ləgɨŋ lapɨya bɨ. Duroy Jubɨn̰əŋ ga ayge kuduroyge bɨn̰ Jesu le, na kan ƴɔbɨ ba lɔɔge gɨye danaŋ ojɨn̰ cay dɔɔ-ƴaa di da Kumu. Na kan ba dɔbɛge bandɨ kuduronɨ gɨɗaŋ.

¹² Epapəras gɨ na ungo gɨ a tagɨŋ le, ləgɨŋ lapɨya. Ban na marɨna ba-gɨye gɨ da Jesu-Kɨris, gɨ lee kɨmbɨl kol caygɨŋ a duroy ɔlɛ Kumu gɨŋ, ɗe agɨŋ na ɨrɨn̰ a cay tɨbayigɨŋ dɨŋ jaŋ bɨ, won̰ kalaŋ ga duroŋ cɨrɛɗ bɨ, leen̰ hɨnga ga kuduroy Kumu gey bɨ.

¹³ Ɨŋ ye kɔl gɨ ɗari kol cay Epapəras gɨ ban gɨlal tɔgɨ kol caygɨŋ bɨ, kol kan ga woyge a cay ƴaa-di-gumu di Lawdise dɨŋ dan̰ Hɨyerapolis dɨŋ bɨ.

¹⁴ Lug ba-gasɨɗe gɨ ni lee-toyi dan̰ Demas ləgɨŋge lapɨya bɨ.

¹⁵ Laan̰gɨŋ karmɨni ga ban̰aŋ dan̰ ga kandɨ ga somge a cay ƴaa-di-gumu di Lawdise lapɨya. Laan̰gɨŋ tɨmdɨna Nimpas dan̰ Ka-Daye ga daydaŋge a taa lapɨya bɨ.

¹⁶ Kɨɗɨn̰ ga kɨŋ na ɗɨngɨsa magtubu di kɛ le ɨni na, gɨyin̰gɨŋ bɨn̰ Ka-Daye ga a Lawdise ɗe ɗongɨsɨge bɨ. Magtubu di kan ga a Lawdise ba gɨyɨn̰ge bɨgɨŋ le, ɗɨngɨsagɨŋ bɨ.

¹⁷ Ɨni na, yan̰gɨŋ Argip ya hɨn̰: «Sɨma-bɨra a kɨbɨ gɨye gɨ Ba-gulɔŋ ba been̰ kobɨn̰ le, ɗe an̰ lee duroŋ cɨrɛɗ.»

¹⁸ Sɨlagɨŋ! Lapɨya di ɨŋ-bandi Pol ɨŋ ba wal dan̰ kɔbɔŋ hɨnge ba kɛ: Kuɗa gɨ kuduroygɨŋ hɨn a cay mɔrɨyɔŋ ga saɗɨdaŋ. Kuɗa gɨ ɗarwa di da Kumu baa danagɨŋ nɔm bɨ.