Kɔlɔs 3 - Gabri Maja

¹ Hɨn̰ gɨ kan na bɨyagɨŋ lɨbgɨŋ pɨna dan̰ Kɨris ɨni na, kuɗa gɨ kɨŋ mala na hɨnga ga a gɨɗɨgɨ-Kumu gaŋ, ga na kɨɗɨn̰ ga Kɨris somɨn̰ nee a cay kobɨ Kumu gɨ bara gɨŋ.

² Ɨrɨmgɨŋ a cay hɨnga ga a gɨɗɨgɨ-Kumu gaŋ, ɨrɨmegɨŋ a cay hɨnga ga a cay gɨsəŋ gaŋ kɛ naŋ.

³ Na cɨndi, kɨŋ na kalaŋ ga kɨŋ ma dan̰ Kɨris ɨni, sɔmɛ-bɨra togɨŋ wosɨ guso pɨna na dan̰ Kɨris a gusi Kumu.

⁴ Kɨɗɨn̰ ga Kɨris gɨ na sɔmɛ-bɨra kona na andaŋ na, kɨŋ-gandi kalɨn̰ ma kɨŋ kɨya andaŋ danayi pɨna duroy gusoŋ-tɔgɛ koyi gɨŋ bɨ.

Hal gɨ ɨlgi bɨ gɨ hɨrɨwa bɨ

⁵ Kuɗa gɨ kɨŋ ɗa hɨnga nɔm ga a cay gɨsəŋ gaŋ kɛ, ga woy a gusɨgɨŋ le ɗe mara coŋ: Na yɔyɛ dan̰ gangɨ caa bɨ, hɨnga ga ni dasi bɨ, kurɔŋdi hɨnga ga lee hundɔrɔ bɨ, kurɔŋdi hɨnga ga ɨsɨni dan̰ lɔɔ te gursu gɨ na n̰ɨre kula bɨ.

⁶ Na hɨnga ga nee le ba sɔgɛ kuduroy-hɔmɛ da Kumu ɨrgan̰ le.

⁷ Na hɨnga ga nee le, ma na haldɨgɨŋ gɨ tumɔ kɨɗɨn̰ ga kɨŋ ban̰ a duroy ɨsɨna gɨŋ ƴee le.

⁸ Ama haw kɛ na, kuɗa gɨ kɨŋ ɗa hɨnga ga nee le nɔm coŋ: Na kuduroy-hɔmɛ bɨ, bɔyɛ-asɨn̰e bɨ, kuduroy-ɨndɨwa bɨ, yagɨde kɨɗɨn̰ nɔm bɨ, kɔl gɨ homi gɨ andaŋ kɨbɨgɨŋ bɨ.

⁹ Kɨŋ ɗɔɔ ba yon̰ gusɨgɨŋ poy naŋ. Kɨya wa kɨŋ dor hal gɨ da ungo gɨ ɨlgi dan̰ gɨye-lɔɔdi gɨ naa kɨŋ orɨn̰ gusɨgɨŋ coŋ ɨni.

¹⁰ Ama kɨŋ dobɨ hal gɨ da ungo gɨ hɨrɨwa gusɨgɨŋ hɨn̰ badɨge wo̰ bɨ, Kumu ɨre bɨlgɨŋ ga hɨrɨwa jɨn̰ tumɔ tumɔ bɨ, bɨgɨŋ hɨnga sɔlɛ cay mɨgayge gaŋ ɗe agɨŋ na gɨlɨn̰ dan̰ Kumu gɨ ba sɨgɨŋ ca ca bɨ, solii leen̰ cɨndi bɨ.

¹¹ A boy sɔmɛ-bɨra gɨ hɨrɨwa gɨ nee le, dɔrɛ cɨn̰ kɨɗɨn̰ unɔ, duroy kalaŋ ga na Jubɨn̰əŋ dan̰ kalaŋ ga na Jubɨn̰əŋ naŋ, duroy ka-wale ban̰a dan̰ ka-wale ban̰a naŋ, duroy kɨrga dan̰ ba sɔ caa gɨŋ, duroy guyɔŋ dan̰ ba-sɔmɛ cayi kalɨn̰. Ama na Kɨris pɨna hayi ƴɔbɨ mana hɨnga nɔm, duroy hɨnga nɔm.

¹² Ay, kalaŋ ga Kumu torgɨŋ, kɨŋ bɨle na kalaŋ kayi ga woyge dan̰ cɨndɨge bɨ, ga ban geyge bɨ. Na toy di hɨn̰ wo̰ ma, kuɗa gɨ kɨŋ dɨba sɔlɛ cɨn̰-n̰age da gusɨgɨŋ a gusɨgɨŋ hɨn̰ badɨge wo̰ ɗe agɨŋ bɨlɨn̰ ka-lɔɔ ɗarwa bɨ, ka-dɔgɛ jɔrgɔ naŋ bɨ, kalaŋ ga kaledɨge jal bɨ, ka-dɨbe ɗugɔ bɨ.

¹³ Dɨbgɨŋ ɗugoygɨŋ dan̰ wandɨ duroygɨŋ. Hɨn̰ gɨ ungo na ɨran̰ dan̰ kɔl gɨ na hɨmayi a cay kurɨndi kalɨn̰ ma ɗa kuduroyi jala a cay kurɨndi le. Hɨn̰ gɨ Ba-gulɔŋ ba ɗen̰ kuduroy jal a caygɨŋ le, laagɨŋ hɨn̰ wo̰ a duroygɨŋ bɨ.

¹⁴ Dɨbagɨŋ geye hɨn̰ badɨge wo̰ a cay hɨnga ga nee le nɔm, kɨya wa geye woy gɨlɨn̰ na hɨn̰ gangɨ di saɗɨ kalaŋ pɨna kuɗa duroŋ cɨrɛɗ wo̰.

¹⁵ Ɗe gɨ gusi-dɔbɛ da Kɨris da-ƴaa a kuduroygɨŋ. Kɨya wa Kumu təgɨŋ na gɨ agɨŋ na som naa dan̰ gusi-dɔbɛ, ɗe agɨŋ na bɨle kuyoŋ-gusu gɨ pɨna bɨ. Wɨyagɨŋ na ka-loon̰ Kumu ho’o bɨ.

¹⁶ Ɗagɨŋ kɔl gɨ da Kɨris ɗe som duroygɨŋ dan̰ kandi-wɔɔ ga a nee nɔm. Dan̰ gɨyəŋdi na, gɨlɨn̰gɨŋ ungo gɨ ani ani hɨnga bɨ, halan̰gɨŋ gusɨgɨŋ a duroygɨŋ dan̰ cɨn̰-muɗɔlɛ tɔgɨ bɨ. Kɨbɨgɨŋ kɨra gɨ ni hɨramɨn̰ Kumu bɨ, kɨra gɨ ni dɨbɨn̰ gusoŋ-tɔgɛ bɨ, kɨra gɨ Turnɔ ɗe-kuduroy-bɛrɛ ba ɗɔɔ kɨbɨgɨŋ bɨ. Dan̰ kuduroygɨŋ nɔm leen̰ ho’o bɨn̰ Kumu.

¹⁷ Hɨnga ga ani ani ga kɨŋ kɨya lɔɔ, naa kɔl yɔdɨgɨŋ naŋ le gɨye-lɔɔdɨgɨŋ kalɨn̰ ma, laagɨŋ na dan̰ guson̰ Ba-gulɔŋ Jesu. Dan̰ gɨyəŋ gɨ da gusondi na laan̰gɨŋ Bayna Kumu ho’o.

Hal gɨ hɨrɨwa dan̰ sɔmɛ dan̰ gusɨna

¹⁸ Ay kɨŋ kandɨ, dɨbagɨŋ caygɨŋ dugo bɨn̰ kodɨn̰igɨŋ hɨn̰ gɨ ba ojɨ gɨ ni lɔɔ a cɨn̰ Ba-gulɔŋ wo̰.

¹⁹ Ay kɨŋ kɔdɨn̰ii kandɨ, geygɨŋ kandiigɨŋ bɨ sɔdɨrɛgɨŋ cɨndɨgɨŋ cayge naŋ.

²⁰ Ay kɨŋ karɨn̰aŋ, jagɨŋ kɔl kɨbɨ kandɨgɨŋ ka-woogɨŋ mɨjag mɨjag. Kɨya wa na hɨnga ga nee le ba ƴɔɔ cɨn̰ Ba-gulɔŋ.

²¹ Ay kɨŋ karɨn̰aŋ ban̰an̰ge, kɨŋ ɗa ba mɔndɛ kuduroy karɨndɨgɨŋ. Hɨn̰ gɨ kɨŋ na mɨnda kuduroyge tɔgɨ na, gajanaŋ kan da gabaŋ.

²² Ay kɨŋ gɔyɔŋ, jagɨŋ kɔl kɨbɨ ka-gulondɨgɨŋ ga a cay gɨsəŋ gaŋ kɛ mɨjag mɨjag. Laagɨŋ gɨye mɨjag mɨjag, na kɨya cay cɨndɨge ga woy kardɨgɨŋ hɨn̰ gɨ kɨŋ na mal naa gɨ ni ƴɔɔ cɨn̰ kalaŋ wo̰ naŋ. Ama laagɨŋ na dan̰ kuduroygɨŋ ga pɨna kɨya wa kɨŋ hɨndar na Kumu.

²³ Gɨye gɨ ani ani gɨ kan na bɨgɨŋ na, laagɨŋ dan̰ kuyoŋdi-gusɨgɨŋ nɔm. Ɗɔɔgɨŋ a ɨrɨmedɨgɨŋ gɨŋ hɨn̰ gɨ kɨŋ na lee bɨn̰ naa kalaŋ ƴɔbɨ naŋ, ama kɨŋ na lee bɨn̰ na Ba-gulɔŋ.

²⁴ Sɨlagɨŋ gɨ kɨŋ kɨya wɔɔ hɨnga ga ni ban̰di-gulɔŋ ga Ba-gulɔŋ ba kɨya bɨgɨŋ, gɨ nee le mana cay-kɔbɔ kogɨŋ. Ba-gulondɨgɨŋ na Kɨris, na ban ma magɨŋ lee gɨye bii.

²⁵ Na cɨndi ungo gɨ na laa hɨnga ga dan̰ gɨyəŋdɨge naŋ na, kɨya wale na cay hɨnga ga da hɨnga ga dan̰ gɨyəŋdɨge naŋ ga ban lee le. Kumu dɨra cɨn̰ ungo naŋ.