Kɔlɔs 2 - Gabri Maja

¹ Leen̰ cɨndi na, ɨŋ gey gɨ kɨŋ na sɨla kardi wɔrɨn̰ɛ gɨ osi tɔgɨ gɨ ɨŋ ɨre kɨbɨ nee worɨn̰ kol caygɨŋ bɨ, kol karmɨni ga ban̰aŋ dan̰ ga kandɨ ga a Lawdise bɨ, kol kalaŋ ga ɗaŋ ga sɨlaŋge dan̰ cɨndɨge naŋ bɨ.

² Wɔrɨn̰ɛ gɨ nee le, ɨŋ worɨn̰ na kɨya dobɨn̰ bandɨ kuduroyge bɨ, ɗe gɨ geye na bɨgage pɨna bɨ. Ɨŋ gey gɨ cay bɨra dan̰ hɨnga-sɔlɛ na walɨn̰a kuduroyge. Na hɨn̰ wo̰ ma kan kɨya sɔlɛge hɨnga-sɔlɛ ga da Kumu ga woy kɨɗɨn̰ wɔsɛdɨge gaŋ, gɨ na Kɨris gusi.

³ Kɨris le kandi-wɔɔ ga da cɨn̰-muɗɔlɛ nɔm, dan̰ hɨnga-sɔlɛ ga toyge kan̰dɨge kan̰dɨge bɨ, wosɨ gusɨge a gusi.

⁴ Ɨŋ ye kɔl gɨ nee le hɨn̰ wo̰ na ɗe gɨ agɨŋ na ɗen̰ ungo wo̰ nare cɨndɨgɨŋ dan̰ kɔl ga mɔɔ cangɨn̰ danagɨŋ a gɨyəŋ gɨ ɗaŋ gɨŋ naŋ.

⁵ Hɨn̰ gɨ ɨŋ na unɔ duroygɨŋ dan̰ kuyoŋdi-gusɨnɨ kalɨn̰ ma ɨrɨmenɨ woy caygɨŋ. Lee gɨ kɨɗɨn̰ ga kɨŋ som dan̰ gɨyəŋdi bɨ, kɨŋ som a te Kɨris gɨŋ dan̰ aye kudurɔ ɗe osu bɨ le, gusɨnɨ mɔŋ.

Ɨre a cay bɔgɛ kudurɔ cay Kɨris

⁶ Tumɔ kɨŋ je gɨ Jesu-Kɨris le naa Ba-gulɔŋ bɨ, kɨŋ bee kuduroygɨŋ cayi bɨ. Na toy di hɨn̰ wo̰ ma maŋ yəgɨŋ, ɗe gɨ kɨŋ kɨba gɨyəŋ koyi kuɗa.

⁷ Dɨbagɨŋ sarnaygɨŋ dugo gag gusii bɨ, ɨrgɨŋ usa a cayi bɨ, cay aye kudurɔ gɨŋ hɨn̰ gɨ kan ba gɨlgɨŋ le wo̰ bɨ, laan̰gɨŋ Kumu ho’o jɨn̰ tumɔ tumɔ bɨ.

⁸ Ɗagɨŋ muɗɔlɛ a cay gusɨgɨŋ gɨŋ ɗe ungo gɨybɨgɨŋ dan̰ hɨnga-sɔlɛ ga poy naŋ bɨ, dan̰ kɔl poy ga kalɨn̰ wo̰ dugo dan̰ gɨyəŋ gɨ da hada da kalaŋ ga ɨndəŋ naŋ bɨ. Hɨnga ga ni gɨle ga nee le sa na gusi Kɨris naŋ bɨ, ama sayga na gusi turnɔn̰əŋ ga ɨsɨndəŋ ga di cay gɨsəŋ.

⁹ Jɔɔgɨŋ kɔl koge naŋ kɨya wa hɨnga nɔm ga wandɨn̰ gusi Kumu tɛlɛlɛ tɛlɛlɛ le, wandɨn̰ gusi Kɨris tɛlɛlɛ tɛlɛlɛ bɨ.

¹⁰ Kɨŋ way hɨnga ga nee le ɓadɨldɨn̰ a gusi Kɨris, hɨnga ga wɨygɨŋ unɔ. Kɨris na ba cay ka-dɔɔ-ƴaa nɔm bɨ, na ba cay ka-dɔnɔn̰əŋ nɔm bɨ.

¹¹ Dan̰ bugoŋ gɨ kɨŋ bugoŋ pɨna dan̰ Kɨris le, kɨŋ bɨle kalaŋ ga walgege ban̰a. Ɨni na, na wale ban̰a di ungo ba wale dan̰ kobi naŋ, ama na wale ban̰a di Kɨris gusi ba wale. Kɨya dorɨn̰ dɔnɔ di da kuyoŋdi-gusɨna gɨ ɨre orɨn̰ danana ɨsɨna gɨŋ le coŋ.

¹² Dan̰ gɨyəŋ gɨ da batɛm di kɨŋ ba lee le, ɨmgɨgɨŋge pɨna dan̰ Kɨris bɨ, kɨŋ boy lɨbɨ pɨna danayi bɨ. Kɨya wa kɨŋ bee kuduroygɨŋ cay dɔnɔ di da Kumu di boyii lɨbii duroy kalaŋ ga madɨrdaŋ gaŋ le.

¹³ Kɨŋ ga tumɔ kɨŋ madɨrdaŋ kol gɨye-lɔɔdɨgɨŋ gɨ ɨra dan̰ gɨyəŋdi naŋ bɨ, kol wale gɨ walagɨŋge ban̰a naŋ bɨ le, Kumu lee gɨ kɨŋ jɨga som-bɨra dan̰ Kɨris. Ban ɗe kuduroy jal a cay gɨye-lɔɔdɨgɨŋ gɨ ɨra dan̰ gɨyəŋdi naŋ nɔm.

¹⁴ Kumu mondu magtubu di ɗe dɨbe kɔl cayna le muɗɔgɨ muɗɔgɨ coŋ. Magtubu di nee le, dɨbɨ kɔl cayna ojɨn̰ na cay gasaŋ ga na ɓala lɔɔ hɨngadɨge dɨɗe naŋ. Magtubu di ɗe dɨbe kɔl cayna le Kɨris orɨn̰ danaa gagɨloo a cay sɨya-gɨ-dagɨli gɨŋ mɔndɔɔ muɗɔgɨ muɗɔgɨ coŋ.

¹⁵ Na hɨn̰ wo̰ ma Kumu mondɨn̰ dɔnɔ ga ɨsɨndəŋ ga ka-dɔɔ cay ƴaa bɨ, ga na ka-gulɔŋ hɨnga nɔm bɨ. Ban dɨbɨ dasi cayge cɨn̰ kalaŋ nɔm. Ban ay banga cayge a cay sɨya-gɨ-dagɨli gɨŋ bɨ, leege hɨn̰ ka-dangayn̰əŋ ga da kɨmbɨl gɨ kan gorɨn̰ danage a te gɨyəŋ gɨŋ wo̰.

¹⁶ Kɨya cay kɔl nɔm gɨ nee le na, kɨŋ ɗɔɔ ungo wo̰ dɨbe kɔl caygɨŋ naŋ, ojɨn̰ cay hɨnga ga ni dɔɔ naŋ le, hɨnga ga ni sɔɔ naŋ le, cay lɔɔ kɨdɨrɛ gɨ da kɨdɨrɛn̰əŋ naŋ le, ojɨn̰ cay lɔɔ kɨdɨrɛ gɨ da kɨdɨrɛn̰əŋ ga andaŋ hɨrɨwa naŋ le, ojɨn̰ cay wɔlɛ gɨ ni dorɨn̰ gɨlale gɨ da Jubɨn̰əŋ bɨ.

¹⁷ Hɨnga ga nee le nɔm woy gɨlɨn̰ na hɨn̰ turnoy hɨnga ga gɨl tumɔ gɨ hɨnga ga ɗari na kɨya ɨrga kardi nee, ama Kɨris mana gusɨge ga leen̰ cɨndi.

¹⁸ Kalaŋ ga mooge jɨgan̰ dan̰ gusɨge dugo gɨ cɨndi naŋ bɨ, n̰ɨre ka-ƴɔbɛ ga daa bɨ, ƴɔmɛ kardi hɨnga ga buyoŋ cɨndɨge ga kan gusɨge ba sɔlɛ bɨ le, kɨŋ ɗɔɔ gɨ ɗe kan nare cɨndɨgɨŋ naŋ. Kalaŋ ga hɨn̰ wo̰ le ɨrɨmedɨge gɨ dan̰ gɨyəŋ gɨ da kalaŋ ga ɨndəŋ le, lee gɨ kan gongɨrdɨn̰ge gusɨge kalɨn̰ wo̰ dugo.

¹⁹ Kalaŋ ga nee le sɨlɨn̰ge gusɨge gusi Kɨris naŋ bɨrɨŋ. Ban woy gɨlɨn̰ na hɨn̰ caa wo̰ bɨ, Ka-Daye woy gɨlɨn̰ na hɨn̰ kuyoŋdi-gusi wo̰ bɨ. Kalaŋ ga bugoŋge danayi le, ban bɨge hɨnga nɔm ga kan orɨn̰ n̰agedɨge bɨ, ban lee gɨ kan bugoŋge pɨna duroyge bɨ. Hɨn̰ gɨ kuyoŋdi-gusi ungo ba bugoŋ pɨna dan̰ gɨyəŋ gɨ da gurɨyadi dan̰ sere wo̰ bɨ malgɨn̰ge hɨn̰ gɨ Kumu ba gey wo̰ bɨ.

Tɨma bɨ sɔmɛ-bɨra gɨ dan̰ Kɨris pɨna bɨ

²⁰ Na cɨndi, kɨŋ na mara pɨna dan̰ Kɨris bɨ dan̰ gɨyəŋ gɨ da tɨmaydi na, kɨŋ na te dɔnɔ di da turnɔn̰əŋ ga ɨsɨndəŋ ga dii-ƴaa a cay gɨsəŋ gaŋ kɛ naŋ ɨni. Hɨn̰ gɨ naa hɨn̰ wo̰ na, kɛ na kɨya wa ma kɨŋ gey lɔɔ hɨnga coŋ hɨn̰ gɨ kɨŋ naa kalaŋ ga a cay gɨsəŋ gaŋ wo̰ coŋ ga? Kɛ na kɨya wa ma magɨŋ kobɨde hada ga ye hɨn̰:

²¹ «Ɨsɨbe naŋ, dɔɔ naŋ, aye naŋ ga?»

²² Hada ga nee le nɔm woy ojɨ na cay hɨnga ga kɨya mundoŋ coŋ kɨɗɨn̰ ga ungo na laan̰ gɨye. Gasaŋ dan̰ hɨnga gɨle ga nee le sayga na gusi kalaŋ ƴɔbɨ.

²³ Na cɨndi, hada ga nee le, hɨn̰ gɨ ji na sɨlage na, na hɨnga ga gɨl cɨn̰-muɗɔlɛ kɨya wa kan ɨngɨr gɨ kalaŋ na bɨgage kɔl cay hada bɨ, dɨba cayge dugo bɨ, gɨlɨn̰ kuyoŋdi-gusɨge cɨn̰ bɨ. Ama ɗarwadɨge pɨna wo̰ unɔ kɨya wa kan ɓalage gɨ ni nare kalaŋ ga ɨndəŋ lɔɔ hɨnga ga ɨsɨni ga kuduroyge ojɨ lɔɔ le naŋ.