Gɨye-lɔɔ 9 - Gabri Maja

Jesu andaŋ a cay Sol

¹ Boy wɔlɛdi gɨ nee le, ɨrɨme kol gɨ da dɔrɛ turnoy ka-aye-cay-tɨbay Ba-gulɔŋ bɨ, dɨɗedɨge bɨ, duroŋ kuduroy Sol naŋ.

² Ban or wan̰ mangɨl gɨ da ka-cay ka-bɔgɛ kɨbar bɨ, ɨngɨri magtubu di ɗe bii te tumɔ dan̰ guson̰ ƴaa-daye-di-da-Jubɨn̰əŋ ga Damas, ɗe hɨn̰ gɨ ɗi na waa ban̰aŋ dan̰ kandɨ, ga ayge gɨyəŋ kardi Ba-gulɔŋ na, ay na saɗɨdɨgage ɨrgan̰ danage a Jerusalɛm.

³ Kɨɗɨn̰ ga ban baa gɨyəŋ, bay mɨnde gɨ ban kɨya andaŋ a Damas ɨni na, kɨɗɨn̰ ga nee le bɨ, asɨn̰a andɨgaŋ daa nii ɨrga nɨwɨre cayi.

⁴ Ban duroŋ baa cay gɨsəŋ gaŋ bɨ, ban je noy ungo ye hɨn̰: «Sol, Sol, na kɨya wa ma mɨn̰ ɨre gɨləŋ-cɨn̰ wo̰ ga?»

⁵ Sol ɨngɨri hɨn̰: «Ji na waŋ ga Ba-gulɔŋ?» Bɨ noy ungo le jɨga dɨbii cay nee yey hɨn̰: «Ɨŋ na Jesu gɨ ji ba gɨləŋ-cɨn̰ le.

⁶ Ama sa daa andaŋ a Damas bɨ, ungo gɨ pɨna wo̰ kɨya gɨlɨn̰ hɨnga ga ojɨ gɨ ji kɨya lɔɔ.»

⁷ Kalaŋ ga ka-ɔrɛ tɨrga dan̰ Sol le, jɨbge ɨrege dugo kɨbɨge munduŋ. Kɨya wa kan jege noy ungo le kuɗa, ama kan sɨla ungo gusi naŋ.

⁸ Sol de say daa, haŋgɨ cɨndi, ama ban sɨla kɨɗɨn̰ naŋ ɨni. Kan ƴomge kobi orɨn̰ge danayi a cay ƴaa-di-gumu di Damas dɨŋ.

⁹ Ban lee wɔlɛ sɨbɨ dɨle sɔlɛ kɨɗɨn̰ bɨ, daa hɨnga naŋ bɨ, sa hɨnga naŋ bɨ.

¹⁰ Ungo gɨ pɨna wo̰ som a Damas gusondi na Ananɨyas bɨ, ban na ba-aye-cay-tɨbay Jesu bɨ. Ba-gulɔŋ Jesu buyoŋ cɨndi hɨn̰ dḛ wo̰ yey hɨn̰: «Ananɨyas!» Ban dɨbii cay nee hɨn̰: «Ɨŋ ba kɛ, Ba-gulɔŋ.»

¹¹ Ba-gulɔŋ jɨga yey hɨn̰: «Sa ɨra a te gɨyəŋ gɨ kan teege naa gɨyəŋ gɨ dan̰ durɔ ɗɨngar bɨ, andaŋ a boy duroy gulɔŋ gɨ da Judasɨ gɨŋ bɨ, ɨngɨr kol ungo gɨ pɨna wo̰ gɨ kan teeyige na Sol gɨ Tars. Kɨya wa haw kɛ ban som ol Kumu a kɨɗɨn̰ ga nee gaŋ.

¹² Ungo le hɨnga buyoŋ cɨndi hɨn̰ dḛ wo̰ ɗey sol ungo gɨ pɨna wo̰ gɨ teeyige na Ananɨyas andaŋ kardi ƴen̰ bɨ, dɨbɨ kobi cayi, ɗe gɨ cɨndi na jɨga sɨla kɨɗɨn̰ ban̰di nee.»

¹³ Ananɨyas jɨga dɨbii cay nee ye hɨn̰: «Ba-gulɔŋ, kalaŋ kondɨ yəŋge kol hɨnga nɔm ga ungo gɨ nee le lee bɨ, yege gɨ ban na leen̰ kalaŋ kan̰ ga woyge dan̰ cɨndɨge ɨsɨna tɔgɨ a cay ƴaa-di-gumu di Jerusalɛm dɨŋ bɨ.

¹⁴ Haw kɛ na, na ka-cay ka-bɔgɛ kɨbar nɔm ba biige te tumɔ ɗe gɨ ban na ƴɨman̰ kalaŋ nɔm ga ba teege gusondɨn̰.»

¹⁵ Ama Ba-gulɔŋ yeyi hɨn̰: «Ɨra, ungo gɨ kɛ le na hɨnga kange ga ni leen̰ gɨye ga ɨŋ dorge, ɗe gɨ ban na ɨran̰ dan̰ gusonɨ a tumoy te wɔɔ gɨ da kalaŋ ga toyge na Jubɨ naŋ bɨ, tumoy kɛrɨmbɛlɛŋ bɨ, tumoy te wɨn̰je gɨ da Ɨsɨrayɛl bɨ.

¹⁶ Ɨŋ-bandi dan̰ gusɨnɨ ba kɨya gɨlii hɨnga ga ni cɨn̰-gɨle-cɨn̰ nɔm, ga naa wa wa kalɨn̰ ma kɨya looyi kɨya cay gusonɨ le.»

¹⁷ Ananɨyas andaŋ or ƴen̰ or dɨbe kobi cayi bɨ yey hɨn̰: «Kurnɨ Sol, Ba-gulɔŋ Jesu gɨ andaŋ can̰ a te gɨyəŋ gɨŋ gɨ ji ba ɨrgan̰ le, ban ba gɨyigəŋ ɗe gɨ cɨndɨn̰ na jɨga sɨla kɨɗɨn̰ bɨ, ɗe Turnɔ ɗe-kuduroy-bɛrɛ na ƴa kuduron̰ pɨl pɨl bɨ.»

¹⁸ Ɨni na, kɔl gɨ kɨbɨna kɛ bɨ, hɨnga ga hɨn̰ urbudi hɨnga wo̰, andɨdaŋ cɨn̰ Sol bugoŋ dugo, lee gɨ ban jɨga sol kɨɗɨn̰. Ban say daa bɨ, leeyige batɛm bɨ.

¹⁹ Kardi nee kɨɗɨn̰ ga ban dii hɨnga ɨni na, ban jɨga wayi togi. Ban som ɓal wɔlɛ lam dan̰ ka-aye-cay-tɨbay Jesu ga a Damas.

Sol tee bɛrnɛ a cay ƴaa-di-gumu di Damas dɨŋ

²⁰ Sol gama naŋ bɨ, ban ay te tɔgɛ bɛrnɛ a duroy ƴaa-daye-di-da-Jubɨn̰əŋ gaŋ yen̰ kalaŋ gɨ Jesu naa Kurɨn̰-Kumu.

²¹ Kalaŋ nɔm ga ba jege bɛrnɛ toyi le, kɔl kayge sɛl sɛl, lee gɨ kan yege hɨn̰: «Kɛ na ungo gɨ kɛ le, ma na ba loon̰ ka-tɔgɛ guson̰ Jesu cɨn̰-gɨle-cɨn̰ tɔgɨ a cay ƴaa-di-gumu di Jerusalɛm dɨŋ le naŋ ga? Kɛ ban ɨrga na yɔd kɨya ƴomge orɨn̰ danage bɨn̰ ka-cay ka-bɔgɛ kɨbar nɔm naŋ ga?»

²² Ama tɔgɨ da Sol a kɨɗɨn̰ tɔgɛ bɛrnɛ dɨŋ or cɨndo tumɔ tumɔ. Kɨɗɨn̰ ga ban gɨlɨn̰ Jubɨn̰əŋ ga Damas arɨn̰ cərərə gɨ Jesu naa Kɨris ban gɨ Kumu dorii le na, kan waage kɔl gɨ ni yɔɔ naŋ.

²³ Lee wɔlɛ lam wo̰ kardi nee na, Jubɨn̰əŋ saɗɨge kɨbɨge pɨna gɨ ni dɨɗe Sol.

²⁴ Ama Sol je kol hɨnga ga kan ba saɗɨn̰ kɨbɨge pɨna le. Kan somge gami kɨbɨ gɨyəŋ di cay ƴaa-di-gumu gɨ ni andɨn̰ doŋ dan̰ tɨwa di ɨni bɨ, son̰do bɨ, age na dɨɗii.

²⁵ Ama ka-aye-cay-tɨbayi ayige dan̰ son̰do sige duroy gɔy gɨ gumu gɨŋ bɨ, gɨsɨnige dan̰ gangɨ kardi bɨrɨm gɨ kan gaɗɨge na dan̰ garma nɨwrɨn̰ge cay ƴaa-di-gumu le.

Sol ɨrga a cay ƴaa-di-gumu di Jerusalɛm

²⁶ Kɨɗɨn̰ ga Sol bugoŋ a cay ƴaa-di-gumu di Jerusalɛm dɨŋ ɨni na, ban mal gɨyəŋ gɨ ni dɔbɛ gusi dan̰ ka-aye-cay-tɨbay Jesu, ama kan nɔm hɨndariige, kɨya wa kan bɨgage kuduroyge cayi gɨ ban naa ba-aye-cay-tɨbay Jesu naŋ.

²⁷ Ɨni na, Barnabas golii orɨn̰ danayi gusi ka-gɨre-gɨye bɨ, dorge kɔl gɨ ojɨ cay sɔlɛ gɨ ban sol Ba-gulɔŋ dan̰ cɨndi a te gɨyəŋ gɨŋ bɨ, ojɨ cay kɔl gɨ Ba-gulɔŋ ba yey bɨ, ojɨ cay tɔgɛ bɛrnɛ di ban te dan̰ guson̰ Jesu a boy cay ƴaa-di-gumu di Damas dɨŋ dan̰ cɨn̰-bandɨ bɨ.

²⁸ Ayɨn̰ toy a wɔlɛdi gɨ nee gɨŋ le, Sol som danage bɨ, gor danage boy cay ƴaa-di-gumu di Jerusalɛm dɨŋ orɨn̰ bɨ, jɨgan̰ bɨ, teen̰ bɛrnɛ dan̰ guson̰ Ba-gulɔŋ dan̰ cɨn̰-bandɨ.

²⁹ Ban ar kɔl dan̰ Jubɨ ga ka-yɔɔ kɨbɨ Gɨrɛg bɨ, man̰ kɔl danage bɨ. Ɨni na, kan ga nee le malge gɨyəŋ gɨ ni dɨɗii.

³⁰ Kɨɗɨn̰ ga karmii jege koldi ɨni na, kan orɨn̰ge danayi a Sejare bɨ, gɨyɨn̰ge danayi a Tars bɨ.

³¹ Lee gɨ Ka-Daye somge dan̰ gusi-dɔbɛ a cay gɨsəŋ ga Jude bɨ, ga Galile bɨ, ga Samari bɨ. Kan wayge togɨyge bɨ, hɨndarge Turnoyi Ba-gulɔŋ bɨ, kondɨwadɨge say cay kamdɨge gaŋ dan̰ gɨyəŋ gɨ da Turnɔ ɗe-kuduroy-bɛrɛ di gɨrge nee bɨ.

Pɨyɛr poɗɨ Ene

³² Pɨyɛr gor gon̰ cay ƴaan̰əŋ nɔm, or solɨn̰ te kalaŋ ga woyge dan̰ cɨndɨge. Wɔlɛ gɨ pɨna wo̰, ban or gusi kan ga somge a cay gɨsəŋ ga Lida gaŋ le.

³³ Ɨni na, ban wayi ungo gɨ pɨna wo̰ gɨ gusondi na Ene boy nee. Ungo le woy cay gasɨlaŋ hɔmɨn̰ɛ gaŋ ɓal na ɨlge margɨm, kɨya gɨ ban na ba-mɨraye.

³⁴ Pɨyɛr yeyi hɨn̰: «Ene, Jesu-Kɨris poɗɨn̰! Sa daa bɨ, nungura kuyo kon̰ gɨ ji ba won̰ nee le.» Ɨni na, kɔl gɨ kɨbɨna kɛ bɨ, Ene jɨbɨ say daa.

³⁵ Kɨɗɨn̰ ga kalaŋ nɔm ga boy cay ƴaa di Lida bɨ, ga a wɔlwa gɨ Saro̰ gɨŋ bɨ, solge ɨni na, bɨlege gusɨge gusi Ba-gulɔŋ.

Dorkas boy lɨbɨ

³⁶ Ɗe-aye-cay-tɨbay Jesu di pɨna wo̰ som a cay ƴaa di Jope dɨŋ, gusɔndɔ na Tabita. Gusɔndɔ le dan̰ kɨbɨ Gɨrɛg na Dorkas duroy na paya. Tama di nee le lee gɨye gɨ ɗari tɔgɨ bɨ, bɨn̰ ka-n̰age hɨnga tɔgɨ bɨ.

³⁷ Boy wɔlɛdi gɨ nee gɨŋ le, hɨndi baa dan̰ hɔmɨn̰ɛ bɨ ma. Kan pulooge bɨ, or dubooge duroy ƴaa di woy a cay mɨgaa dɨŋ daa.

³⁸ Ka-aye-cay-tɨbay Jesu ga somge a cay ƴaa-di-gumu di Jope le, jege gɨ Pɨyɛr na woy a cay gɨsəŋ ga Lida gaŋ. Sɔ Lida ɔrɛ Jope na mɨnde. Kan gɨyge kalaŋ sɔɔ ɗe gɨ kan na ɨra yay hɨn̰: «Kɔgɨɗɔ, ɨre haw wayani.»

³⁹ Kɔl gɨ kɨbɨna kɛ bɨ, Pɨyɛr say or danage. Kɨɗɨn̰ ga kan bugoŋge ɨni na, kan orɨn̰ge danayi duroy ƴaa di woy a cay mɨgaa dɨŋ le. Kandɨ ga kodɨn̰ige ma ɨrgage nɔm gusi dan̰ ɨle. Kan gɨliige gumɔjɨn̰əŋ dan̰ gɔdɔŋn̰əŋ ga Dorkas cogɨn, kɨɗɨn̰ ga hɨndi ban̰ dan̰ cɨndo duroyge le.

⁴⁰ Pɨyɛr yen̰ kalaŋ nɔm na andaŋge doŋ bɨ, ban poy gɨbay dugo olɨn̰ Kumu. Kardi nee ɨni na, ban bɨle gusi gusi gun gɨŋ bɨ ye hɨn̰: «Tabita sa daa!» Ɨni na, hɨndi haŋgɨ cɨndo bɨ, kɨɗɨn̰ ga hɨndi sol Pɨyɛr ɨni na, hɨndi n̰an guso say som daa dan̰ tɔɔ.

⁴¹ Bɨ Pɨyɛr dobɨ kobi boo bɨ ƴɔmɔɔ daa. Ban tee te kalaŋ ga woyge dan̰ cɨndɨge bɨ, kandɨ ga kodɨn̰ige ma bɨ, gɨlge Tabita di som dan̰ cɨndo le.

⁴² Kalaŋ ga Jope nɔm jege kol hɨnga ga ba lee gusɨge le, lee gɨ duroyge kondɨ beege kuduroyge cay Ba-gulɔŋ.

⁴³ Pɨyɛr som a cay gɨsəŋ ga Jope gaŋ kardi sɨngɨɗɨ, a da ungo gɨ pɨna wo̰ gɨ gɨye-lɔɔdi na wɔngɨsɛ ɓala gɨ teeyige Simo.