Gɨye-lɔɔ 8 - Gabri Maja

¹ Kalaŋ ga ka-dɨɗe Etɛn le, Sol kalɨn̰ ma gey cay nee danage bɨ. A boy wɔlɛdi gɨ nee gɨŋ le ayge te loon̰ Ka-Daye ga Jerusalɛm cɨn̰-gɨle-cɨn̰ tɔgɨ. Kɨɗɨn̰ ga nee le, na ka-gɨre-gɨye ƴɔbɨ ba busdoŋge a cay kɨɗɨn̰ ga ɗaŋ gaŋ naŋ bɨ, ka-aye kudurɔ toyge ga baa le busdoŋge a cay kɨɗɨn̰ gaŋ nɔm. Kan orge a cay karɨn̰ ƴaa ga n̰ən̰əŋ ga woy a cay gɨsəŋ ga Jude gaŋ bɨ, ga Samari gaŋ bɨ.

Sol gɨlɨn̰ ka-aye kudurɔ cɨn̰

² Kalaŋ ga gɨye-lɔɔdɨge bugoŋ pɨna dan̰ Kumu ɨmgege Etɛn bɨ, iliige hal bɨ,

³ Ama Sol na lɨgɨ cɨndi daa mɨjag gɨ ni mondɨn̰ Ka-Daye coŋ. Ban andɨdaŋ duroy ƴaan̰əŋ gaŋ kɨya torɨn̰ ban̰aŋ dan̰ kandɨ dan̰ dɔnɔ bogɨge dangay.

Pilib tee bɛrnɛ a cay gɨsəŋ ga Samari

⁴ Ka-aye kudurɔ ga ba busdoŋge le orge dan̰ kɨɗɨn̰ kɨɗɨn̰ kɨya tɔgɛ bɛrnɛ Kɔl-gɨ-Ɗari.

⁵ Pilib or a cay ƴaa-di-gumu di pɨna wo̰ di woy a cay gɨsəŋ ga Samari gaŋ teen̰ bɛrnɛ di da Kɨris ban gɨ Kumu dorii le a nee.

⁶ Dɨmdɨrdi kalaŋ dorge sɨmayge jen̰ge kɔl gɨ da Pilib, kɨya wa kan jege kol hɨnga ga ɗɨn̰ cɨn̰-kɨɗɨn̰ ga ban lee le bɨ, kan gusɨge solge hɨnga ga nee le dan̰ cɨndɨge bɨ.

⁷ Turnɔ ga ɨsɨndəŋ dan̰ kondiige andɨdaŋge a kuduroy kalaŋ coŋ dan̰ dɔgɛ-sɨle tɔgɨ bɨ, gusi ka-mɨraye dan̰ ka-modoŋ kondɨ jɨga osɨdəŋ kəŋ kəŋ ban̰di nee bɨ.

⁸ Lee gɨ gusi-mɔwa di gumu ƴee cay ƴaa-di-gumu di nee le.

⁹ Ama tumɔ pa dɨm ma ɗe gɨ Pilib na ɨrga ƴee na, ungo gɨ pɨna wo̰ gɨ gusondi na Simo som a cay ƴaa-di-gumu di nee dɨŋ le. Ban na ungo gɨ ba lɔɔ tɨmba gɨ dor turnoyi te wɔɔ gɨ da kalaŋ ga Samari tɔgɨ. Ban sol gusi leen̰ ungo gɨ gumu tɔgɨ,

¹⁰ lee gɨ kalaŋ nɔm, ga n̰ən̰əŋ dan̰ ga əsɨdəŋ soliige na ban. Kalaŋ yege hɨn̰: «Ungo gɨ nee le, na dɔnɔ di da Kumu gɨ kan teege naa “dɔnɔ di gumu le.”»

¹¹ Kalaŋ nɔm si sɨmayge jen̰ge kɔl koyi kɨya wa ban ƴom kɨbɨge na jɨne hayi, dan̰ hɨnga ga ni tɨmba ga ban lee le.

¹² Ama kɨɗɨn̰ ga Pilib tee bɛrnɛ di da Jesu-Kɨris bɨ di da dɔɔ-ƴaa di da Kumu bɨ na, kalaŋ ga Samari beege kuduroyge a cay Kɔl-gɨ-Ɗari gɨŋ. Lee gɨ ban̰aŋ bɨ, kandɨ bɨ, ɨrgage gusi ɗe ban na leege batɛm nɔm.

¹³ Simo gusi kalɨn̰ ma ay kuduroyi bɨ, kan leeyige batɛm bɨ ɨni na, ban luyoŋ te Pilib. Hɨnga nɔm ga ɗɨn̰ cɨn̰-kɨɗɨn̰ tɔgɨ bɨ, hɨnga nɔm ga ni beli bɨ, ga Pilib ba lee le, ban sol dan̰ cɨndi bɨ, kɔl kayi sɛl sɛl bɨ.

¹⁴ Kɨɗɨn̰ ga ka-gɨre-gɨye ga somge a Jerusalɛm jege gɨ kalaŋ ga cay gɨsəŋ ga Samari gaŋ na ƴeege kɔl gɨ da Kumu na, kan gɨyge Pɨyɛr bɨ, Ja̰ bɨ a nee.

¹⁵ Kɨɗɨn̰ ga kan bugoŋge ɨni na, kan olge Kumu kɔl cayge ɗe gɨ kan na wayan̰ Turnɔ ɗe-kuduroy-bɛrɛ.

¹⁶ Kɨya wa Turnɔ ɗe-kuduroy-bɛrɛ gɨsɨn cay ungo pɨna naŋ ƴee. Kan leegege batɛm na dan̰ guson̰ Ba-gulɔŋ Jesu ƴɔbɨ.

¹⁷ Lee gɨ Pɨyɛr dan̰ Ja̰ dɨbɨge kobɨge cayge ɨni na, kan wan̰ge Turnɔ ɗe-kuduroy-bɛrɛ.

¹⁸ Kɨɗɨn̰ ga Simo sol gɨ Kumu bee Turnɔ toyi kɨɗɨn̰ ga ka-gɨre-gɨye dɨbɨge kobɨge cayge ɨni na, ban ɨrgan̰ dan̰ gursu gusi ka-gɨre-gɨye kɨya bɨge bɨ, yege hɨn̰:

¹⁹ «Bəŋgɨŋ dɔnɔ di nee le bɨ, ɗe gɨ waŋ waŋ gɨ ɨŋ na dɨbɨ kɔbɔŋ cayi na, na wayan̰ Turnɔ ɗe-kuduroy-bɛrɛ hɨn̰ wo̰ bɨ.»

²⁰ Ama Pɨyɛr jɨga dɨbi nee yey hɨn̰: «Ji bɨ, gursu ton̰ bɨ, mundoŋgɨŋ nɔm coŋ. Kɨya wa hɨnga ga Kumu bee-kalɨn̰ le, ji ɨrɨm gɨ naa hɨnga ga ni kɨle dan̰ gursu.

²¹ Hɨnga ga ni bee-kalɨn̰ ga kɛ le, ji ɨran̰ dan̰ hɨnga dḛ wo̰ nee naŋ. Kɨya wa kuduron̰ wɨya dan̰ durɔ ɗɨngar tumoy Kumu naŋ.

²² Bɨl kardɨn̰ bɨn̰ kuduroy ɨsɨna kon̰ bɨ, ula Kumu Ba-gulɔŋ bɨ. Gajanaŋ ban kɨya ɗɔɔ kuduroy jalɨwa a cay hɨnga ga ji ba ɨrɨm gɨ ni lɔɔ le.

²³ Kɨya wa ɨŋ sol leen̰ cɨndi gɨ cɨndɨn̰ ɗan̰ tɔgɨ bɨ, gɨye-lɔɔ ga ɨsɨni saɗɨdɨn̰ maj maj bɨ.»

²⁴ Simo jɨga yen̰ Pɨyɛr dan̰ Ja̰ hɨn̰: «Kɨŋ-gandi gusɨgɨŋ ulagɨŋ Ba-gulɔŋ Kumu kol canɨ, ɗe gɨ hɨnga pɨna duroy hɨnga nɔm ga kɨŋ ba yəŋ koldɨge le ləŋ naŋ.»

²⁵ Kɨɗɨn̰ ga Pɨyɛr dan̰ Ja̰ leege tɨmon̰ di da Ba-gulɔŋ bɨ, teen̰ge bɛrnɛ kɔl koyi bɨ ɨni na, kan jogɨge Jerusalɛm. A te gɨyəŋ jɔgɛdɨge gɨŋ na, kan tee bɛrnɛ Kɔl-gɨ-Ɗari boy cay ƴaan̰əŋ dan̰ kondige ga a cay gɨsəŋ ga Samari gaŋ.

Pilib gɨlɨn̰ ungo gɨ Etɨyopi kɔl gɨ da Jesu

²⁶ Ba-ƴɔbɛ gɨ daa nii gɨ da Ba-gulɔŋ yen̰ Pilib hɨn̰: «Saa ɨra jɨn̰ cɨn̰ ga manga dɨŋ, gɨyəŋ gɨ sayga Jerusalɛm or jɨn̰ cay ƴaa-di-gumu di Gaja, na gɨyəŋ gɨ duroy dal dɨŋ.»

²⁷ Pilib de say hɨrɛd or. Bɨ ban way ungo gɨ pɨna wo̰ a te gɨyəŋ gɨŋ. Ungo gɨ nee le, na ungo gɨ Etɨyopi gɨ kan dor toyi. Ban na ungo gɨ gumu gɨ gɨye-lɔɔdi na ame hɨnga wɔɔ ga da Kandas, kɨlma di tama di Etɨyopi. Ban ɨrga Jerusalɛm na kɨya n̰ɨre Kumu,

²⁸ bɨ ban bɨle cayi jogɨ jɨn̰ cay gɨsəŋ kay gaŋ. Ban som a boy pusu koyi gɨ hɨnda sɨr bɨ, ɗoŋsɨ kɔl gɨ ba-yɔɔ-kɔl-gɨ-Kumu-ba-yɔɔ Ijay ba wale.

²⁹ Turnɔ di da Kumu yen̰ Pilib hɨn̰: «Ɨra tumɔ, ɨra mɨnde bongi pusu gɨ kɛ le.»

³⁰ Pilib gɨre daa or gusi ɨni na, je gɨ ungo gɨ gumu le, ɗoŋsɨ na kɔl gɨ da Ijay ba-yɔɔ-kɔl-gɨ-Kumu-ba-yɔɔ. Ɨni na, ban ɨngɨrii hɨn̰: «Kɛ kɔl gɨ ji ba ɗoŋsɨ le, ji sol duroy leen̰ cɨndi han̰ ga?»

³¹ Ɨni na, bara le jɨga dɨbi cay nee hɨn̰: «Hɨn̰ gɨ ungo na gɨləŋ naŋ na, ɨŋ gɨ sɔlɛ duroy na mɨna ga?» Bɨ ban mol Pilib na na sɨma duroy pusu gɨŋ a kɨway.

³² Kɔl gɨ ban ɗoŋsɨ le ba kɛ: «Ban woy na hɨn̰ dɨmangɨ di kan orɨn̰ge danaa, Kɨɗɨn̰ dɨɗedo gaŋ wo̰. Hɨn̰ kurɨn̰-dɨmangɨ gɨ ɨre kɨbi munduŋ, Tumoy ba dɨle teɗii wo̰, Ban hanga kɨbi dḛ wo̰ naŋ.

³³ Dɨbɨge dasi cayi bɨ, bɨyage kɔl koyi dan̰ gɨyəŋdi naŋ bɨ. Na waŋ ba kɨya ɓale yɔɔ kɔl gɨ da kongɨn̰ii ga? Kɨya wa kan dor habedi coŋ a cay gɨsəŋ gaŋ.»

³⁴ Ungo gɨ kan dor toy le yen̰ Pilib hɨn̰: «Kogɨɗɔ yaŋ, ungo gɨ ba-yɔɔ-kɔl-gɨ-Kumu-ba-yɔɔ ba ye koldi kɛ le, na waŋ ga? Ban ye na kɔl gɨ ojɨ cay gusi koyi gaŋ wala, na cay ungo gɨ ɗaŋ ga?»

³⁵ Dan̰ gɨyəŋ gɨ da kɔl gɨ woy duroy Magtubu di nee dɨŋ le, Pilib ay kɔl teen̰ bɛrnɛ Kɔl-gɨ-Ɗari gɨ da Jesu bɨn̰ ungo gɨ Etɨyopi le.

³⁶ Kɨɗɨn̰ ga kan ayge gɨyəŋ orge na, kan bugoŋge a kɨɗɨn̰ ga kaŋ woy nee gaŋ ɨni na, ungo gɨ kan dorge toyi le yey hɨn̰: «Sɨla kaŋ ba kɛ, na wa ba kɨya nare ɗe gɨ ji gɨ looŋ batɛm ga?»

³⁷ [Pilib yey hɨn̰: «Hɨn̰ gɨ ji na bɨga kuduron̰ cay nee leen̰ cɨndi na, ɨŋ kɨya loon̰ batɛm.» Ɨni na, ungo gɨ gumu le, dɨbii cay nee yey hɨn̰: «Ɨŋ ay kuduronɨ bɨn̰ Jesu-Kɨris. Ban na Kurɨn̰-Kumu.»]

³⁸ Kardi nee ɨni na, ban ay noyi gɨ kan na ɨrɨn̰ dan̰ pusu dugo bɨ, kan sɔɗɨmɔm Pilib bɨ, ban gɨ kan dorge toyi bɨ, gɨsɨnge boy kaŋ gaŋ lee gɨ Pilib leeyi batɛm.

³⁹ Kɨɗɨn̰ ga kan andaŋge boy kaŋ gaŋ doŋ ɨni na, Turnoy Ba-gulɔŋ dor Pilib orɨn̰ danayi. Bɨ ban gɨ kan dor toyi le sɨlay naŋ ɨni. Ama ban codɨ gɨyəŋ koyi orɨn̰ dan̰ gusi-mɔwa.

⁴⁰ Pilib na de andaŋ na a cay ƴaa-di-gumu di Ajot dɨŋ. Kardi nee ɨni na, ban gor dan̰ cay ƴaa ƴaa bɨ, teen̰ bɛrnɛ Kɔl-gɨ-Ɗari boy cay ƴaa ga gɨmdəŋ nɔm ga ban pɨde nee bɨrɨŋ andɨn̰ a cay ƴaa-di-gumu di Sejare dɨŋ.