Gɨye-lɔɔ 7 - Gabri Maja

Etɛn dor kɔl tumoy ka-bɔyɛ kɔl ga da Jubɨ

¹ Mangɨl gɨ da ka-cay ka-bɔgɛ kɨbar ɨngɨr Etɛn hɨn̰: «Kɔl hɨnge le na cɨndi hayi ga?»

² Ɨni na, Etɛn dɨbɨge cay nee yege hɨn̰: «Karmɨnɨ bɨ, ban̰anɨ bɨ, jagɨŋ. Kɨɗɨn̰ ga mon̰iigɨŋ Abɨraham ba ban̰ a cay gɨsəŋ ga Mesopotami gaŋ ƴee, pa dɨm ma kɨya sɔ orɨn̰ somɨn̰ Haran le, Kumu gɨ ba gusoŋ-tɔgɛ andaŋ cayi yey hɨn̰:

³ “Ɗa cay ƴaa ton̰ bɨ, kandɨn̰ bɨ coŋ, ɨra a cay ƴaa di ɨŋ kɨya gɨlɨn̰.”

⁴ «Kɨɗɨn̰di ga nee gaŋ le bɨ, Abɨraham ɗe cay gɨsəŋ ga da kalaŋ ga Kalde coŋ bɨ, orɨn̰ somɨn̰ a Haran. Kɨɗɨn̰ ga bayi ma ɨni na, Kumu yeyi gɨ ban na ɗa cay ƴaa di Haran bɨ, ban na ɨra sɔmɛ a cay gɨsəŋ gaŋ ga kɨŋ ba somɨn̰ nee haw kɛ.

⁵ A cay gɨsəŋ gaŋ ga nee le, Kumu bii kɨɗɨn̰ kayi ga uja cay naŋ bɨ, kɨɗɨn̰ dḛ wo̰ ga ban kɨya dɨbɨn̰ tɨbayi nee kalɨn̰ ma ban bii naŋ bɨ. Ama Kumu ye gɨ ɗi na kɨya bɨn̰ dan̰ kongɨn̰ii cay gɨsəŋ ga nee le nɔm. Ama boy wɔlɛdi gɨ nee le, Abɨraham ɨran̰ dan̰ kɨye naŋ.

⁶ Kɔl gɨ Kumu ba ye le ba kɛ: “Kongɨn̰iin̰ kɨya sɔmɛge cay gɨsəŋ ga da kalaŋ ga ɗaŋ gaŋ. Kan kɨya lɔɔge guyɔŋdu bɨ, kan kɨya gɨlge cɨn̰ bɨ, ɨlge aru poɗɨn̰.

⁷ Ama na ɨŋ-bandi Kumu ba kɨya bɔyɛ kɔl cay te wɔɔ gɨ da kalaŋ ga ka-looge guyɔŋdu le. Kardi nee ɨni na, kan kɨya sɔ kɨɗɨn̰ ga nee gaŋ le, ɨrgage lɔɔ gɨye bəŋ a kɨɗɨn̰ ga kɛ gaŋ.”

⁸ «Kardi nee ɨni na, Kumu saɗɨ kɨbi dan̰ Abɨraham ɓɨsɨn̰ gusɨge bɨ, hɨnga ga ba gɨl saɗe kɨbɨ pɨna ɓɨse gusu gɨ nee le na wale ban̰a. Lee gɨ kɨɗɨn̰ ga Abɨraham ba woon̰ Isag na, ban lee wɔlɛ margɨm dɨm ma Abɨraham walii ban̰a ƴee. Isag lee hɨn̰ wo̰ dan̰ Jagob bɨ, Jagob lee hɨn̰ wo̰ dan̰ mon̰inagɨŋ ga mɔjɨ-cayge-sɔɔ le bɨ.

⁹ «Mon̰inagɨŋ ga ka-ɗɔ te wɔɔdɨnagɨŋ leege jangɨ dan̰ Jɨsɛb bɨ, ƴomiige kɨliige coŋ ɗe gɨ kan na ɨran̰ danayi Ejɨpt, ama Kumu baa danayi.

¹⁰ Hɨnga ga ni dɔsɛ-ɗɔgɔ nɔm ga Jɨsɛb ba way le duroŋ cayi coŋ. Kumu bɨn̰ Jɨsɛb cɨn̰ muɗɔlɛ bɨ, lee gɨ ban ƴee cɨn̰ Parawo̰ kɨlma gɨ Ejɨpt bɨ. Lee gɨ ban ayi sii ba-dɔɔ cay gɨsəŋ ga Ejɨpt bɨ, ba-cay hɨnga nɔm ga woy a boy duroy saba tɨrɨmbala toyi dɨŋ bɨ.

¹¹ Kɨɗɨn̰ ga nee le, badɨra baa a cay gɨsəŋ ga Ejɨpt gaŋ bɨ, a cay gɨsəŋ ga Kana gaŋ bɨ. Dɔsɛ-ɗugɔ ɗɨn̰ cayge bɨ, mon̰inagɨŋ waage hɨnga ga ni dɔɔ poɗɨn̰ gusɨge naŋ bɨ.

¹² Jagob je gɨ gasa na woy a cay gɨsəŋ ga Ejɨpt gaŋ ɨni na, ban gɨy mon̰inagɨŋ nee cay pɨna.

¹³ Bɨ gɨ cay-sɔɔdi gɨŋ ɨni na, Jɨsɛb lee ɗe gɨ karmii soliige. Na kɨɗɨn̰ ga nee le ma Parawo̰ solɨn̰ te Jɨsɛb bɨ.

¹⁴ Ɨni na, Jɨsɛb gɨy gɨ kan na ɨra male bayi Jagob dan̰ ka-ƴaa kayi. Kan nɔm na kalaŋ toyge-jurgum-cayge-bay.

¹⁵ Lee gɨ Jagob ɨrga Ejɨpt. Ban ma na a nee bɨ, mon̰inagɨŋ mage na a nee bɨ.

¹⁶ Kan donge gundɨge orɨn̰ge danage cay ƴaa-di-gumu di Sisem, or bogɨge boy umboŋ kamɨn̰aŋ ga Abɨraham kɨl na kɨle dan̰ gursu toyi a kobɨ karɨn̰ Hamor ga a Sisem.

¹⁷ «Hɨnga ga Kumu ye gɨ ɗi na kɨya lɔɔ bɨn̰ Abɨraham le, kɨɗɨn̰ ga tɨwadɨge di ni loon̰ bii caa baa mɨnde ɨni na, karɨn̰ Ɨsɨrayɛl kondɨwayge say cay kamdɨge gaŋ, kɨya wa kan wɔɔge gusɨge tɔgɨ a cay gɨsəŋ ga Ejɨpt gaŋ.

¹⁸ Kardi nee kɨlma gɨ sɨla Jɨsɛb naŋ say dii cay gɨsəŋ ga Ejɨpt.

¹⁹ Kɨlma gɨ nee le, nar te wɔɔ gɨ da kalaŋ kana bɨ, leen̰ mon̰inagɨŋ ɨsɨna bɨ, ɗe dɔnɔ cayge ɗe kan been̰ karɨndɨge ga kɨbɨ kobɨn̰ gaŋ coŋ ɗe kan marɨn̰.

²⁰ Na duroy ɨlgedi gɨ nee le ma kan woon̰ge Moyis. Moyis na kɨye gɨ lee marɨna tɔgɨ bɨ, ƴee cɨn̰ Kumu bɨ. Amge Moyis duroy ƴaa di da bayi dɨŋ ɓal kɨdɨrɛ sɨbɨ.

²¹ Bɨ kɨɗɨn̰ ga kan ayi ɗeyi coŋ ɨni na, tɨrɨmɨn̰ Parawo̰ ayi amii hɨn̰ kɨyoo gɨ ni kudurɔ wo̰.

²² Gɨlin̰ge Moyis hɨnga ga ni cɨn̰-muɗɔlɛ nɔm ga kalaŋ ga Ejɨpt solge. Lee gɨ ban bɨləŋ ungo gɨ togi tɔgɨ boy kɔl yɔɔdi gɨŋ bɨ, boy gɨye-lɔɔdi gɨŋ bɨ.

²³ «Moyis lee ɨlge toy-poɗɨn̰ ɨni na, ban ɨrɨm kuduroy gɨ ni ɔrɛ dɨbe cɨndi cay karmii ga na te wɨn̰je gɨ da Ɨsɨrayɛl solɨn̰ kɛ, kan na woyge na mɨna ga?

²⁴ Kɨɗɨn̰ ga ban or ɨni na, ban sol kurɨndi gɨ pɨna wo̰ gɨ ungo gɨ Ejɨpt ɨre gɨlii-cɨn̰. Ban de ungo gɨ nee le dɨɗii gojɨn̰ baa di da kurɨndi gɨ kan leeyige ɨsɨna le.

²⁵ Ban ɨrɨm hɨn̰ gɨ karmii na kɨya sɔlɛge hɨn̰ gɨ Kumu na ba gɨygii gɨ ni poɗɨge dan̰ gɨyəŋ koyi. Ama kan sɨlage toyi hɨn̰ wo̰ naŋ.

²⁶ Ɗaŋdo ɨni na, Moyis way karmii ga ni Ɨsɨrayɛl won̰ge sɔɔ worɨn̰ge dan̰ gusɨge. Ban ɨrga gusɨge kɨya bogɨge-dugo yege hɨn̰: “Ka-pogɨn̰ɨnɨ, kɨŋ na karme ama na kɨya wa ma magɨŋ leen̰ gusɨgɨŋ ɨsɨna wo̰ ga?”

²⁷ «Ama ban gɨ ba leen̰ mɨgay ɨsɨna le, jɨbɨ Moyis sɛdɨ kɨbi coŋ bɨ, yey hɨn̰: “Na waŋ ba ɗon̰ ba-cayni bɨ, ba-bɔyɛ kɔl cayni bɨ ga?

²⁸ Ji mal na kɨya dɨɗəŋ hɨn̰ gɨ ji ba dɨɗɨn̰ ungo gɨ Ejɨpt nagɨni le ga?”

²⁹ Kɨɗɨn̰ ga Moyis je kɔl gɨ nee le ɨni na, ban gɨre bɨ, or sɔmɛ a cay gɨsəŋ ga Madɨya̰ gaŋ. Ban wɔɔn̰ karɨn̰ ban̰aŋ sɔɔ a nee.

³⁰ «Lee ɨlge toy-poɗɨn̰ ɨni na, ban say or a duroy daldɨŋ bongi garma gɨ Sɨnayi gɨŋ bɨ, ba-ƴɔbɛ gɨ daa nii gɨ pɨna wo̰ andaŋ cɨndi duroy kɨlen̰ tɨwa di ƴee duroy karɨn̰-sɨya gaŋ.

³¹ Kɨɗɨn̰ ga ban sol ɨni na, kɔl kayi sɛl sɛl bɨ, sɨygɨ mɨnde bongi sɨya gɨŋ le ay na sol kuɗa. Ɨni na, ban je noy Ba-gulɔŋ ye hɨn̰:

³² “Ɨŋ na Kumu gɨ da mon̰iigɨŋ bɨ, Kumu gɨ da Abɨraham bɨ, Isag bɨ, Jagob bɨ.” Kɨɗɨn̰ ga ban ba je kɔl gɨ nee le hɨn̰ wo̰ na, gusi n̰orii jag jag dan̰ hundɔrɔ bɨ, tabɨlaŋdi sɔlɛ kɨɗɨn̰ ga tɨwa ba ƴee nee le laayi naŋ bɨrɨŋ, kɨya cay hundɔrɔ.

³³ Ɨni na, Ba-gulɔŋ yey hɨn̰: “Tɨra gɨyabe tɨban̰ coŋ, kɨya wa kɨɗɨn̰ ga ji ba ɨrɨn̰ nee le, na gɨsəŋ ga woy dan̰ cɨndɨge.

³⁴ Ɨŋ sol cɨn̰-gɨle-cɨn̰ di ba lee kalaŋ kange ga a cay gɨsəŋ ga Ejɨpt gaŋ le bɨ, ɨŋ je ule koge bɨ. Lee gɨ ɨŋ ɨrga na kɨya dorge kɨbɨ nee coŋ. Ɨni na haw kɛ ɨra, ɨŋ gɨyɨn̰ a cay gɨsəŋ ga Ejɨpt gaŋ.”»

³⁵ Bɨ Etɛn ye ɗaŋ coŋ hɨn̰: «Moyis le, na ban gɨ naa karmii Ɨsɨrayɛln̰əŋ jɨbige sɛdɨ coŋ yeyge hɨn̰: “Na waŋ ba sɨn̰ ba-cayni bɨ, ba-bɔyɛ kɔl cayni bɨ ga le?” Na ban ma Kumu gɨygi hɨn̰ ba-cayge bɨ, ba-dorge kɨbɨ guyɔŋdu dɨŋ bɨ, dan̰ gɨyəŋ gɨ da ba-ƴɔbɛ gɨ daa nii gɨ andaŋ cayi duroy karɨn̰ sɨya gaŋ le.

³⁶ Na ban ba dorge a cay gɨsəŋ ga Ejɨpt gaŋ andɨn̰ danage doŋ, dan̰ gɨyəŋ gɨ da hɨnga ga ɗɨn̰ cɨn̰-kɨɗɨn̰ bɨ, hɨnga ga ni beli bɨ, a cay gɨsəŋ ga Ejɨpt gaŋ bɨ, a duroy kuray gɨ gumu taa taa gɨ teeyige na kuray gɨ yɨle bɨ, a duroy daldɨŋ bɨ, ɨlge toyi-poɗɨn̰ le.

³⁷ Na ban Moyis ɗaŋ coŋ ba yon̰ te wɨn̰je gɨ da Ɨsɨrayɛln̰əŋ kɔl gɨ ba kɛ le. Ban yege hɨn̰: “Kumu kɨya andɨn̰ dan̰ ba-yɔɔ-kɔl-gɨ-Kumu-ba-yɔɔ gɨ hɨn̰ ɨŋ-bandi wo̰ a duroy karmɨgɨŋ gaŋ, kɨya bɨgɨŋ.”

³⁸ Kɨɗɨn̰ ga karɨn̰ Ɨsɨrayɛl dayge cayge a duroy daldɨŋ le, na Moyis ba ɨre duroy mon̰inagɨŋ gaŋ dan̰ ba-ƴɔbɛ gɨ daa nii ɨre arɨn̰ kɔl danayi cay garma gɨ Sɨnayi gɨŋ le. Na ban ba ƴɔɔ kɔl gɨ ni somɨn̰-bɨra gɨ nee le kɨbɨ Kumu bɨna.

³⁹ «Ama mon̰inagɨŋ geyge jɔɔ kɔl kɨbi naŋ, kan kan̰iige bɨ, malge gɨ ni bɨle jɔgɛ a cay gɨsəŋ ga Ejɨpt gaŋ.

⁴⁰ Kan say yen̰ Aro̰ hɨn̰: “Laani kulan̰əŋ ɗe kan dorge tumoyni, kɨya wa Moyis gɨ ba dorni a cay gɨsəŋ ga Ejɨpt gaŋ andɨn̰ danani doŋ le, ni sɨla hɨnga ga ba andaŋ cay naŋ ɨni.”

⁴¹ Kɨɗɨn̰ ga nee le kan uyge hɨnga gɨlɨn̰ dan̰ karɨn̰ si wo̰ ɨni na, kan walge kɨbar bɨn̰ge kula le bɨ, leege gusi-mɔwa a cay hɨnga ga kobɨge lee le bɨ.

⁴² Ama Kumu bɨle kardi bɨge bɨ, ɗege n̰ɨre dɛsɨɗɛŋn̰əŋ ga daa gɨɗɨgɨ-Kumu gɨŋ bɨ. Hɨn̰ gɨ kan ba walge duroy magtubu di da ka-yɔɔ-kɔl-gɨ-Kumu-ba-yɔɔ gɨŋ le. Kan walge yege hɨn̰: “Ay kɨŋ te wɨn̰je gɨ da Ɨsɨrayɛln̰əŋ, Kɨmɛnɛ ga kɨŋ ba dɨɗɨge leen̰ sadɨga bəŋ, Kɨɗɨn̰ ga kɨŋ ba somɨn̰ ɓal ɨlge toyi-poɗɨn̰ a duroy daldɨŋ le, Kɛ kɨŋ bee bəŋ na ɨŋ-bandi leen̰ cɨndi ga? Naŋ.

⁴³ A duroy dal dɨŋ le kɨŋ don na ƴaa-ɓala, Gɨ ni n̰ɨrɨn̰ kula Mɔlɔg bɨ, Hɨnga ga gɨl kula Dɛsɨɗɛŋ togɨŋ di ni Repa̰ bɨ. Na kulan̰əŋ ga nee le ma magɨŋ leege kɨya n̰ɨrge bɨ. Na toy di hɨn̰ wo̰ ma, ɨŋ kɨya dorgɨŋ orɨn̰ danagɨŋ, Bogɨgɨŋ kardi cay gɨsəŋ ga Babilɔn gaŋ.”

⁴⁴ «A duroy dal dɨŋ le, mon̰inagɨŋ orɨn̰ge dan̰ ƴaa-di-da-Kumu di leege dan̰ ɓala, gɨ garma gɨ kan habɨlge walɨn̰ gasɨn̰-kɔl gɨ ni saɗe kɨbɨ pɨna ɓɨse gusu cay nee woy boy nee le. Kan leege na hɨn̰ gɨ Kumu ba ay noyi bɨn̰ Moyis ɗe gɨ ban na gaɗa gɨlɨn̰ dan̰ ban gɨ Kumu ba gɨli le wo̰.

⁴⁵ Mon̰inagɨŋ ƴeege ƴaa-ɓala gɨ nee le, andɨn̰ge dan̰ Josɨwe ba-dɔrɛ tumoyge boy cay gɨsəŋ ga kan ƴeege kobɨ te wɔɔ gɨ da kalaŋ ga Kumu tayige tumoyge coŋ gaŋ le. Ƴaa-ɓala di nee le woy nee bɨrɨŋ andɨn̰ boy wɔlɛ gɨ da Dabid gɨŋ.

⁴⁶ Dabid ƴee cɨn̰ Kumu tɔgɨ bɨ, ban ɨngɨr Kumu gɨ na bii gɨyəŋ ay na gaɗɨn̰ ƴaa bɨn̰ Kumu gɨ Jagob n̰ɨrii.

⁴⁷ Ɨni na, na Salomo ba gaɗe ƴaa le bɨn̰ Kumu.

⁴⁸ Ama Kumu gɨ ɗɨn̰ cay hɨnga nɔm le, kɨya sɔmɛ a duroy ƴaa di kobɨ kalaŋ ga ɨndəŋ ba gaɗe dɨŋ naŋ. Hɨn̰ gɨ ba-yɔɔ-kɔl-gɨ-Kumu-ba-yɔɔ ba ye le.

⁴⁹ Ban ye hɨn̰: “Ba-gulɔŋ ye hɨn̰, gɨɗɨgɨ-Kumu na kali-tɨrɨmbala tɨnge bɨ, Cay gɨsəŋ na hɨnga ga ɨŋ been̰ gondɨnɨ cay nee bɨ. Na ƴaa di mɨna ma magɨŋ kɨya gaɗe bəŋ ga? Na kɨɗɨn̰ ga ani ma magɨŋ kɨya ɓale bəŋ ɗe gɨ aŋ na somɨn̰ nee ga?

⁵⁰ Kɛ na kɔbɔŋ ba ɗɔɔ hɨnga ga nee le nɔm naŋ ga?”»

⁵¹ Bɨ Etɛn ye ɗaŋ coŋ ye hɨn̰: «Kɨŋ ka-cay osɨwa, ɗugoygɨŋ bɨ, sɨmaygɨŋ bɨ, lugdəŋ daa. Kɨŋ na ka-geye kɔl gɨ da Turnɔ ɗe-kuduroy-bɛrɛ naŋ dan̰ wɔlɛ pɨna pɨna. Kɨŋ gɨlɨn̰ hɨn̰ mon̰iigɨŋ wo̰ dɛj dɛj.

⁵² Na ka-yɔɔ-kɔl-gɨ-Kumu-ba-yɔɔ ga ani ma mon̰igɨŋ dɨle gɨlge cɨn̰ ga? Kan dɨɗɨge ka-yɔɔ-kɔl-gɨ-Kumu-ba-yɔɔ ga teege bɛrnɛ caga gɨ da marɨna ba-gɨye koyi Kɨris, gɨ gɨye-lɔɔdi or dan̰ durɔ ɗɨngar bɨge. Bɨ kɨɗɨn̰ ga ban caga ɨni na, kɨŋ ay cayi bɨ, dɨɗii coŋ bɨ.

⁵³ Kɨŋ way gasɨn̰-kɔl gɨ da Kumu dan̰ gɨyəŋ gɨ da ka-ƴɔbɛ ga daa nii, ama hɨnga ga gasɨn̰-kɔl ba-gɨlgɨŋ le, kɨŋ kan̰ lɔɔ coŋ.»

Kan worɨn̰dege Etɛn dan̰ oru dɨɗii

⁵⁴ Kɔl gɨ ban yege le bɨge kuduroy-hɔmɛ tɔgɨ bɨ, gɨdɨdege gasɨndɨge cay Etɛn.

⁵⁵ Ama ban na, Turnɔ ɗe-kuduroy-bɛrɛ ƴee kuduroy pɨl pɨl. Ban ay cɨndi solɨn̰ gɨɗɨgɨ-Kumu ɨni na, sol asɨn̰a gɨ da Kumu bɨ, sol Jesu ɨre dan̰ tɨbay daa a cay kobɨ Kumu gɨ bara gɨŋ bɨ.

⁵⁶ Etɛn ye hɨn̰: «Sɨlagɨŋ, ɨŋ sol gɨɗɨgɨ-Kumu hangaŋ pɨraŋ bɨ, Kurɨn̰-ungo ɨre dan̰ tɨbayi daa a cay kobɨ Kumu gɨ bara gɨŋ bɨ.»

⁵⁷ Kɨɗɨn̰ ga nee le kan dege sɨle tɔgɨ bɨ, lɨgɨdɨn̰ge sɨmayge daa bɨ. Kondɨwadi kalaŋ ga nee le, sayge dan̰ kuduroyge ga pɨna bugoŋge cayi,

⁵⁸ ƴomiige siriige orɨn̰ge danayi kardi cay ƴaa-di-gumu dɨŋ doŋ coŋ bɨ, worɨn̰diige dan̰ oru dɨɗiige. Tɨmon̰ ga da ka-ɨre worɨn̰iige le, torge badɨge kage ga tobɨge cay kamdɨge gaŋ beege tumoy marɨna gɨ pɨna wo̰ gɨ gusondi na Sol.

⁵⁹ Kɨɗɨn̰ ga kan worɨn̰dege Etɛn na, ban ol Kumu ye hɨn̰: «Ba-gulɔŋ Jesu, ƴaa turnonɨ.»

⁶⁰ Kardi nee ɨni na, ban poy gɨbay dugo bɨ, dor noy hal daa ye hɨn̰: «Ba-gulɔŋ ɗɔɔ kol ɨsɨna gɨ kɛ le ƴɔmɛ cayge naŋ.» Kɨɗɨn̰ ga ban ye kɔl gɨ nee le ɨni na, ban hɨmbɨ.