Gɨye-lɔɔ 28 - Gabri Maja

Pol som a hɔgɨwa gɨ Maltɨ

¹ Kɨɗɨn̰ ga ni andaŋ kɨbɨ tɨma dɨŋ ɨni na, kan jege gɨ gusɔn̰ hɔgɨwa gɨ nee le, naa Maltɨ.

² Kalaŋ ga somge nee le, leege ɗarwa di ɗɨn̰ cɨn̰-kɨɗɨn̰ danani. Kan noŋgɨge tɨwa di gumu bɨ ƴomnige gusɨge ani na ƴobɨ, kɨya wa Kumu ongɨ bɨ, kal dii kɨɗɨn̰ tɔgɨ bɨ.

³ Pol don sɨya ga hayi kɨya bɔgɛ duroy tɨwa dɨŋ ɨni na, kari di pɨna wo̰ andaŋ duroy nee gɨrɨn̰ ɨlwadi tɨwa bɨ, gɨdɨ kobɨ Pol luyoŋ nee.

⁴ Kɨɗɨn̰ ga kalaŋ ga a cay ƴaadi nee le, solge kari di ba luyoŋ kobɨ Pol ɨni na, kan yen̰ge gusɨge kɔl yege hɨn̰: «Ungo gɨ kɛ le, na ba dɨɗe kalaŋ leen̰ cɨndi jɛɗ jɛɗ, kɨya wa ban andaŋ kɨbɨ tɨmadi kaŋ gaŋ, ama bɔyɛ kɔl gɨ da Kumu ƴom cayi bɨ, gey gɨ ban na gɨ pɔɗɛ naŋ bɨ.»

⁵ Pol wɨje kari le dɨboo bib duroy tɨwa dɨŋ bɨ, ama gusi laayi dḛ wo̰ naŋ bɨrɨŋ.

⁶ Kalaŋ ga nee le gamge gɨ ni sɔlɛ Pol sɔdɛ, naŋ le buyoŋ bɔɔ mare. Ama kɨɗɨn̰ ga kan gamge kardɨge sɨngɨɗɨ bɨ, solge gɨ hɨnga ga ɨsɨni pɨna andaŋ cayi naŋ bɨ na, kan bɨle yege hɨn̰: «Pol na kumu gɨ pɨna wo̰.»

⁷ Kɨɗɨn̰ ga ni ba somɨn̰ nee le woy mɨnde dan̰ ƴaa bɨ, cay gɨsəŋ ga da ungo gɨ pɨna wo̰ gɨ kan teeyige Pubəlɨyus bɨ. Ban na ba-dɔɔ cay ƴaa di woy a hɔgɨwa gɨ nee gɨŋ le. Ban ƴomni gusi kuɗa bɨ, bɨni kɨɗɨn̰, ni won̰ nee wɔlɛ sɨbɨ bɨ.

⁸ Pubəlɨyus bay woy a cay gasɨlaŋ hɔmɨn̰ɛ gaŋ, gusi ɨl cəŋ bɨ, bee gasɨn̰ kɨbar bɨ. Ɨni na, Pol or solii. Bɨ dan̰ gɨyəŋ gɨ da dɨbe kɔbɔ bɨ, ɔlɛ Kumu bɨ na, ban poɗɨn̰ bara gɨ nee le.

⁹ Kardi hɨnga ga nee le na, kalaŋ ka-hɔmɨn̰ɛ nɔm ga ɗaŋ ga a cay hɔgɨwa gɨŋ le, ɨrgage wayi. Bɨ kan kalɨn̰ ma wayge pɔɗɛ bɨ.

¹⁰ Kan beenige hurɔmɔ di tɔɔ kan̰do kan̰do cayni bɨ, kɨɗɨn̰ ga tɨwa di ni nɔɔ boy koburo gɨ gumu taa taa gɨŋ ɓal ɨni na, kan bɨnige hɨnga nɔm ga ni orɨn̰ tɨrga toni bɨ.

Pol bugoŋ a Rɔm

¹¹ Ni lee kɨdɨrɛ sɨbɨ a Maltɨ dɨm ma, mani duroŋ daa dan̰ koburo gɨ gumu taa taa gɨ kɨdɨrɛ gɨ ni kal boy-toy a cay hɔgɨwa gɨ nee gɨŋ le ƴee. Koburo gɨ gumu taa taa gɨ nee le, sayga na cay ƴaa-di-gumu di Alegjandɨri bɨ, orɨn̰ dan̰ kandi gɨle ga habili ga kan teege na kulan̰əŋ ga ni «mɔgɨnɛ» gɨ kan sige jɨndɨne

¹² Ni or gɨsɨne a cay ƴaa-di-gumu di Siragujɨ dɨŋ bɨ, ni somɨn̰ nee leen̰ wɔlɛ sɨbɨ a nee.

¹³ Kɨɗɨn̰ ga ni say a nee na, ni kobɨ gɨba kuray gɨ gumu bɨrɨŋ andɨn̰ a cay ƴaa-di-gumu di Rɛgɨyo. Wan̰dodo ɨni na, kal gɨ sayga kardini jɨn̰ cɨn̰ ga manga gɨŋ nongɨl toyni bɨ, ni lee wɔlɛ sɔɔ ƴɔbɨ bɨ, ni bugoŋ a cay gɨsəŋ ga Pujolɛs gaŋ.

¹⁴ A boy cay gɨsəŋ ga nee gaŋ le, ni wayi dan̰ karmɨni ga molnige gɨ ni na sɨma danage dɨmasɨ pɨna. Na dan̰ gɨyəŋ gɨ hɨn̰ wo̰ ma, mani andɨn̰ a Rɔm.

¹⁵ Karmɨni ga somge a Rɔm jege koldi ni ɨni na, ga pɨna yalgage cɨndɨni bɨrɨŋ andɨn̰ge kɨɗɨn̰ sugu ga kan teege «Apayus» bɨ, ga ɗaŋ waynige a kɨɗɨn̰ ga teege naa «karɨn̰ ƴaa ga sɨbɨ ga ni ƴomɨn̰ kɨrge» bɨ. Kɨɗɨn̰ ga Pol solge ɨni na, ban leen̰ Kumu ho’o bɨ, ɗugoy ba dugo po̰ bɨ.

¹⁶ Kɨɗɨn̰ ga ni bugoŋ a Rɔm ɨni na, ɗege gɨyəŋ bɨn̰ Pol gɨ ban na ɨra sɔmɛ kan̰di a duroy ƴaa dɨŋ, ama kan ɗege asɨgar pɨna danayi gɨ ba-ame kɨbi.

Pol tee bɛrnɛ a cay ƴaa-di-gumu di Rɔm

¹⁷ Lee wɔlɛ sɨbɨ ɨni na, Pol tee kalaŋ ga ni Jubɨ ga gɨmdəŋ gɨmdəŋ ga a cay ƴaa-di-gumu di Rɔm dɨŋ a tayi. Kɨɗɨn̰ ga kan dayge cayge ɨni na, ban yege hɨn̰: «Karmɨnɨ, ɨŋ laa hɨnga ga ɨsɨni pɨna jɨbɨn̰ te wɔɔ gɨ da kalaŋ kana coŋ naŋ bɨ, jɨbɨn̰ hɨnga ga ni hada ga da mon̰inagɨŋ coŋ naŋ bɨ. Ama kan ƴɔmɔŋge a Jerusalɛm dɔbɔŋge a kobi kalaŋ ga ni Rɔmɛn̰əŋ.

¹⁸ Kɨɗɨn̰ ga kan ɨngɨrənge kɔl nɔm coŋ ɨni na, kan geyge ɗɔŋ daa. Kɨya wa kan waage kɔl pɨna a canɨ gɨ ɓal gɨ kan kɨya, boyɨn̰ kɔl tɨma canɨ naŋ.

¹⁹ Ama na kɨya cay jɨbe gɨ kalaŋ ga ni Jubɨ jɨbəŋge sɛdɨ coŋ, ma ɗɨn̰ canɨ ma maŋ ɨngɨr gɨ ni ɨrgan̰ tumoy kɨlma gɨ gumu Sejar gɨ som a Rɔm. Dɨle orɨn̰ dan̰ ɨrɨme gɨ ni dɨbe kɔl a cay te wɔɔ gɨ da kalaŋ kange.

²⁰ Na toy di hɨn̰ wo̰ ma, maŋ ɨngɨr gɨ ni solgɨŋ bɨ, are-kɔl danagɨŋ bɨ. Leen̰ cɨndi na, na kɨya cay ungo gɨ a te wɨn̰je gɨ da Ɨsɨrayɛl gɨ kan ba beege ɨrɨmedɨge cayi gɨ na kɨya ɨrga le, ma maŋ tobɨn̰ mɔrɨyɔŋ ga kɛ le a kɔbɔŋ.»

²¹ Kan jɨga dɨbiige cay nee yeyige hɨn̰: «Ni-gandi a kɛ le, ni wa kɔl gɨ kan wala magtubu dɨŋ kol can̰ gɨ sayga a Jude naŋ bɨ, karmɨni ga saygage a nii le, ungo pɨna wo̰ duroyge ɨre yani koldɨn̰, wala yani hɨnga ga ɨsɨni ga uja can̰ naŋ bɨ.

²² Ama ni-gandi na, ni gey gɨ ji naa ba yani dan̰ kɨbɨn̰ kon̰ kol cay hɨnga ga ji ɨrɨm. Kɨya wa ni sol gɨ ojɨ cay te kalaŋ kan̰ ga nee le, kalaŋ cɨbɨdɨge sɛdɨ sɛdɨ coŋ gon̰ kɨɗɨn̰ nɔm.»

²³ Kan boyge wɔlɛ gɨ ɗaŋ gɨ kan kɨya wan̰ gusɨge. Bɨ kɨɗɨn̰ ga wɔlɛ gɨ kan boyge le ɓal na, kan jɨgage way gusɨge a tayi. Kondɨwayge ɗɨn̰ ga cay wase coŋ. Are-kɔl koge ay toy dan̰ jogɨɗu bɨrɨŋ tɨwa ɗobɨ cayge. Pol dor te gɨle hɨnga kayi bɨge: Ban tee bɛrnɛ di da dɔɔ-ƴaa di da Kumu bɨge bɨ, mal gɨ ni ƴɔmɛ kɨbɨge ɗe kan na ayan̰ kuduroyge bɨn̰ Jesu bɨ. Ban ay toy danage na a cay gasɨn̰-kɔl gɨ da Moyis gaŋ bɨrɨŋ andɨn̰ a duroy magtubu di da ka-yɔɔ-kɔl-gɨ-Kumu-ba-yɔɔ dɨŋ.

²⁴ Kan ga pɨna ga kɔl gɨ nee le ƴee kuduroyge na, ayge kuduroyge bɨn̰ Jesu bɨ, kan ga ɗaŋ kan̰ge aye kuduroyge coŋ bɨ.

²⁵ Kɨɗɨn̰ ga kan ba kɨya busoŋ dɨle bɔgɛ noyge pɨna na, Pol yege na kɔl gɨ ba kɛ ƴɔbɨ yege hɨn̰: «Kɔl gɨ Turnɔ ɗe-kuduroy-bɛrɛ ba ɗe a kɨbɨ Ijay ba-yɔɔ-kɔl-gɨ-Kumu-ba-yɔɔ gɨ yen̰ mon̰inagɨŋ le na kɔl cɨndi hayi!

²⁶ Ban ye hɨn̰: “Ɨra wan̰ te wɔɔ gɨ da kalaŋ ga nee le bɨ, yage hɨn̰: Kɨŋ kɨya jɔɔ kuɗa dan̰ sɨmaygɨŋ, Ama kɨŋ kɨya sɔlɛ toyi naŋ. Kɨŋ kɨya sɔlɛ kɨɗɨn̰ kuɗa dan̰ tɨdɨgɨŋ, Ama kɨŋ kɨya sɔlɛ-hɨnga pɨna naŋ.

²⁷ Kɨya wa te wɔɔ gɨ da kalaŋ ga nee le, Kuduroyge osɨ tɔgɨ. Kan lɨgɨdege sɨmayge coŋ bɨ, Lɨgɨdege cɨndɨge daa bɨ. Ɗe gɨ cɨndɨge sɨla kɨɗɨn̰ naŋ bɨ, Sɨmayge ja kɔl naŋ bɨ, Ɗe kuduroyge ɨrɨm kɔl pɨna naŋ bɨ, Ɗe gɨ kan na da bɨlɨn̰ jɨgan̰ gusɨnɨ naŋ bɨ, Ɨŋ na da poɗɨge.”»

²⁸ Bɨ Pol dɨbɨge cay nee yege hɨn̰: «Sɨlagɨŋ kuɗa caygɨŋ: Ay toy haw kɛ na, kɔl gɨ ni pɔɗɛ gɨ sayga gusi Kumu le, orɨn̰ge bɨn̰ na kalaŋ ga toyge na Jubɨ naŋ. Kan na, kan kɨya jɔɔge bɛrnɛ di nee le.»

²⁹ [A cay kɔl gɨ da Pol gɨ nee le na, kalaŋ ga ni Jubɨ orge bɨ, man̰ɨn̰ge kɔl ɨl pɨvb duroyge.]

³⁰ Pol som ɨlge sɔɔ duroy ƴaa di ban agɨr gɨŋ le. Kalaŋ nɔm ga ba ɨrgage wayi le, ban ƴomge gusi.

³¹ Ban tee bɛrnɛ di da dɔɔ-ƴaa di da Kumu bɨ, gɨlɨn̰ kalaŋ kɔl gɨ ojɨ cay Ba-gulɔŋ Jesu-Kɨris dan̰ kuduroy ga pɨna bɨ, ungo pɨna naray cay nee naŋ bɨ.