Gɨye-lɔɔ 27 - Gabri Maja

Gɨyɨn̰ge dan̰ Pol a Rɔm

¹ Wɔlɛ gɨ kan ayge noyge gɨ ni ayɨn̰ koburo gɨ gumu taa taa orɨn̰ Itali ɓal ɨni na, kan dobɨge Pol dan̰ kamdi dangayn̰əŋ ga pɨna wo̰, a kobɨ gumu gɨ da asɨgarn̰əŋ gɨ pɨna wo̰, gɨ gusondi na Julɨyus. Ban na gumu gɨ da asɨgarn̰əŋ ga aru ga sayga na duroy te ka-wɔrɨn̰ɛ ga kan teege naa ka-wɔrɨn̰ɛ ga da «Kɨlma gɨ gumu.»

² Kɨɗɨn̰ ga nee le, ni nay a boy koburo gɨ gumu taa taa gɨŋ gɨ pɨna wo̰ gɨ Adɨramit, gɨ or jɨn̰ gɨba gɨ Aji gɨŋ. Koburo gɨ gumu taa taa le duroŋ danani daa. Ungo gɨ danani na Aristarg ban na ungo gɨ a cay ƴaa-di-gumu di Tesalonigɨ di woy a cay gɨsəŋ ga Masedɨwan gaŋ.

³ Wan̰dodo na, ni ƴom koburo gɨ gumu taa taa dugo a Sido̰. Lee gɨ Julɨyus gɨ na ungo gɨ ba-lɔɔ kuduroy-ɗarwa dan̰ Pol le, ɗe gɨyəŋ bii ɗe na or sɔlɛ ka-pogɨn̰ii bɨ, ɗe na wan̰ hɨnga ga ban na or n̰agedɨge bɨ.

⁴ A nee na, ni duroŋ dan̰ koburo gɨ gumu taa taa daa, ayɨn̰ gɨyəŋ gɨ nagɨr kɨway hɔgɨwa gɨ Sɨpɨr. Kɨya wa kal yal cɨndɨni tɔgɨ.

⁵ Kardi nee ɨni na, ni haɗɨ kuray gɨ gumu taa taa andɨn̰ a cay gɨsəŋ ga Sɨlisi gaŋ bɨ, Pampili gaŋ bɨ, ni or gɨsɨne a cay ƴaa-di-gumu di Mira dɨŋ, di woy a cay gɨsəŋ ga Lisi gaŋ.

⁶ A nee le, ba-cay asɨgarn̰əŋ ga aru way koburo gɨ gumu taa taa gɨ sayga a Alegjandɨri kɨya ɔrɛ jɨn̰ Itali bɨ, ban ɗeni ni nay boy nee.

⁷ Ɓal wɔlɛ kondɨ, gɨ koburo gɨ gumu taa taa gɨrɨn̰ danani daa haw naŋ. Na dan̰ gɨlale kɔɗ kɔɗ dɨm ma, koburo gɨ gumu taa taa orɨn̰ bugoŋ tumoy cay ƴaa-di-gumu di Kɨnid ƴee. Kɨɗɨn̰ ga kal ye yalɨn̰ cɨndɨni narni ɔrɛ cɨndɨni tumɔ na, ni bɨle gusɨni or jɨn̰ Salmone kɨwa gɨ Kɨrɛtɨ gɨ kal unɔ nee gɨŋ. Bɨ ni orɨn̰ dan̰ koburo gɨ gumu taa taa le, na gasɨbi gɨba gɨŋ, kɨwa gɨ Kɨrɛtɨ gɨŋ ɗe na ƴee kal cayni.

⁸ Na dan̰ gɨlale kɔɗ kɔɗ ma koburo gɨ gumu taa taa nagɨrɨn̰ gasɨbi gɨba pa dɨm ma, mani andɨn̰ kɨɗɨn̰ ga pɨna wo̰ gaŋ ga kan teege «kɨɗɨn̰ ɨre koburo gɨ gumu taa taa ga kuɗa», ga woy mɨnde dan̰ cay ƴaa-di-gumu di Laji le.

⁹ Wɔlɛ pɨde kondɨ bɨ, haɗe kaŋ le say dɨmbɨre bɨ, kɨya wa wɔlɛ gɨ da asɨyam di da kalaŋ ga ni Jubɨn̰əŋ pɨde cayni coŋ ɨni bɨ. Lee gɨ Pol say yen̰ kalaŋ ga boy koburo gɨ gumu taa taa gɨŋ le, yege hɨn̰:

¹⁰ «Ka-pogɨn̰ɨnɨ! Ɨŋ sol gɨ haɗe kaŋ ga kɛ le, kɨya ɨrgan̰ dan̰ mundoŋ gɨ osu gɨɗaŋ, na cay kɔjɛ ga boy koburo gɨ gumu taa taa gɨŋ bɨ, cay koburo gɨ gumu taa taa gɨŋ bɨ, ƴɔbɨ naŋ. Ama na-gandi kalɨn̰ ma, na kɨya wɔɔgɨŋ tɨma bɨ.»

¹¹ Ama gumu gɨ da asɨgarn̰əŋ ga aru le, bee kuduroyna cay kɔl gɨ da ba-dɔrɛ tumoyi koburo gɨ gumu taa taa gɨŋ tɔgɨ bɨ, a cay ba-gulɔŋ koburo gɨ gumu taa taa gɨŋ bɨ, ɗɨn̰ kɔl gɨ Pol ba ye le.

¹² Ɗaŋ coŋ, kɨɗɨn̰ ɨre ga da koburo gɨ gumu taa taa le kuɗa sɔmɛ nee dan̰ kɨdɨrɛ gɨ da kal naŋ. Na toy di hɨn̰ wo̰ ma, kondɨwadi kalaŋ ga boy koburo gɨ gumu taa taa gɨŋ le geyge gɨ ke na gɨ ɔrɛ sɔmɛ na Penigɨs gamɨn̰ gɨ kɨdɨrɛ gɨ da kal toy na ayaŋ coŋ dɨm. Penigɨs le, na kɨɗɨn̰ ɨre ga da koburo gɨ gumu taa taa ga woy a Kɨrɛtɨ bɨ, orɨn̰ dan̰ kɨbɨ kuray gɨ kuɗa gɨ bɨl cɨndi bɨn̰ kal naŋ bɨ. Gɨ woy jɨn̰ cay kɨwa gɨ manga gɨŋ, dan̰ te maw bɨ, woy jɨn̰ cay kɨwa gɨ te golo gɨŋ, dan̰ te maw bɨ.

Kal gɨ gumu dor a cay kuray gɨ gumu taa taa

¹³ Kal say kɨwa gɨ manga gɨŋ gɨre pɨya pɨya wo̰, lee gɨ ni ɨrɨm kuduroyni ye hɨn̰ hɨnga ga kan ojɨ le, na or kɨɗɨn̰dɨge gaŋ ɨni. Lee gɨ kan sogɨge nare gɨ nin̰i gɨ kan dɨbɨ duroy kaŋ gaŋ kɨya ƴomɨn̰ koburo gɨ gumu taa taa dugo le daa. Kan nagɨrge na bongi gɨba kuray gɨ gumu taa taa gɨŋ a cay kɨwa gɨ Kɨrɛtɨ gɨŋ orɨn̰.

¹⁴ Ama kardi nee dḛ wo̰ ƴɔbɨ ɨni na, kal gɨ gumu gɨ gusondi na Ɨrakilo̰ sayga cay garma gɨ a hogɨwa gɨŋ, gɨ Kɨrɛtɨ gɨŋ ɨrga umboŋ tɔgɨ cayni.

¹⁵ Kal gɨ gumu le ay koburo gɨ gumu taa taa le orɨn̰ danayi kɨya wa ni ɓala ƴomii kɨɗɨn̰ pɨna naŋ, ni ɗe kal ba orɨn̰ danayi.

¹⁶ Kal gɨ nee le, nongɨldɨni orɨn̰ danani mɨnde dan̰ hogɨwa gɨ dḛ wo̰, gɨ gusondi na Koda. Kɨɗɨn̰ ga nee le ƴee kal cayni dḛ. Na toy di hɨn̰ wo̰ ma mani ɓalɨn̰ ƴomɨn̰ kɨbɨ karɨn̰ koburo ga ni poɗɨn̰ kalaŋ le dan̰ gɨlale gɨɗaŋ.

¹⁷ Kɨɗɨn̰ ga kan sogiige si daa ɨni na, kan say nongɨrdege koburo gɨ gumu taa taa le dan̰ gangɨ osɨ, ɗe na da gayaŋ duroy nee naŋ. Hɨn̰ gɨ kan ba hɨndar gɨ kal na gɨ nongɨldɨge bɨrɨŋ ɔrɛ dɔgɛ cay kɨlay gɨ woy mɨnde dan̰ cay ƴaa di Libi na, kan ɗege te gundi sɨya gɨ gumu gɨ ni ƴɔmɨn̰ koburo gɨ gumu taa taa le toyi daa. Bɨ kan ɗe gɨ kal gɨ gumu le ba orɨn̰ danage hɨn̰ gɨ kuduroy gey wo̰.

¹⁸ Wan̰dodo na, hɨn̰ gɨ kal gɨ gumu dan̰ mɛw le ba yɨbagdege koburo gɨ gumu taa taa le jɨn̰ nee nee dan̰ togi na, ni layde kɔjɛ ga a boy koburo gɨ gumu taa taa gɨŋ le, boy kuray gɨ gumu taa taa gɨŋ coŋ.

¹⁹ Bɨ wɔlɛ sɨbɨdi gɨŋ ɨni na, kalaŋ ga ka-lɔɔ gɨye boy koburo gɨ gumu taa taa gɨŋ le, laydege hɨnga kage ga kan leen̰ gɨye coŋ boy kuray gɨŋ dan̰ kobɨge koge.

²⁰ Ni sɨla cɨn̰ tɨwa naŋ bɨ, cɨn̰ dɛsɨɗɛŋ naŋ bɨ, ɓal wɔlɛ kondɨ. Kal gɨ gumu le ye jɨn̰ nee nee dan̰ togi tɔgɨ bɨ, lee gɨ ɗugoyni adɨldɨni bɨ, ni ɨrɨm gɨ ni na gɨ ɓale pɔɗɛ naŋ ɨni.

²¹ Ɓal wɔlɛ kondɨ gɨ ni ɨsɨbɨ hɨnga ga ni dɔɔ kɨbɨni naŋ. Ɨni na, Pol say daa ɨre duroyge bɨ yege hɨn̰: «Ka-pogɨn̰ɨnɨ, kɨŋ sɨla! Tumɔ kɨŋ ni na ja kɔl kɨbɨnɨ bɨ, sɨman̰ Kɨrɛtɨ na, kɨŋ ni kɨya mɔndɛ hɨnga pɨna naŋ bɨ, kaye hɨnga pɨna naŋ bɨ.

²² Ama haw kɛ na, ɨŋ olgɨŋ gɨ kɨŋ ƴɨma kuduroygɨŋ usa, kɨya wa ungo pɨna duroygɨŋ kɨya mare naŋ bɨ, na koburo gɨ gumu taa taa le ba kɨya mundoŋ kan̰di hayi ƴɔbɨ.

²³ A duroy son̰do di kɛ dɨŋ, ba-ƴɔbɛ gɨ daa nii gɨ da Kumu gɨ ɨŋ na ungo koyi bɨ, ɨŋ lee gɨye koyi bɨ le, andaŋ canɨ,

²⁴ bɨ yəŋ hɨn̰: “Hundɔrɔ naŋ Pol, ojɨ gɨ naa wa wa kalɨn̰ ma, ji kɨya ɨre tumoy kɨlma gɨ gumu Sejar. Bɨ Kumu kɨya pɔɗɛ kalaŋ nɔm ga ba haɗɨge danan̰ le na kɔl can̰.”

²⁵ Ƴɨmagɨŋ kuduroygɨŋ usa! Ka-pogɨn̰ɨnɨ, ɨŋ bee kuduronɨ cay Kumu: Kɨya wɔyɛ na hɨn̰ gɨ Kumu ba yəŋ le.

²⁶ Ama naa wa wa kalɨn̰ ma, koburo gɨ gumu taa taa le kɨya ɔrɛ ɗɔbɛ kɨbɨ hogɨwa gɨ pɨna gɨŋ wo̰.»

²⁷ Duroy son̰do di ni wɔlɛ mɔjɨ-cay-poɗɨn̰di gɨŋ gɨ kal gɨ gumu orɨn̰ danani hɨn̰ gɨ kuduroy gey wo̰, a cay kuray gɨ gumu taa taa gɨ Adrɨyatig gɨŋ. Ni bugoŋ mɨnde dan̰ duroy son̰do ɨni na, kalaŋ ga gɨye-lɔɔdɨge na lɔɔ gɨye boy koburo gɨ gumu taa taa gɨŋ, solge gɨ ni woy mɨnde dan̰ cay gɨsəŋ ga pɨna wo̰.

²⁸ Lee gɨ kan dɨbɨge gangɨ di dan̰ hɨnga ga nɨn̰i kɨbɨ nee duroy kaŋ gaŋ, kɨya solɨn̰ ɗɨgɨwadi kaŋ. Ɨni na, kan solge gɨ ɗɨgɨwadi kaŋ le, ɓal mɛdɨr toy-sɨbɨ-cay-jurgum. Kan orge jɨn̰ tumɔ dḛ wo̰ na, kan dɨbɨge gangɨ le duroy kaŋ gaŋ ɗaŋ coŋ ɨni na, kan wayge na mɛdɨr toy-sɔɔ-cay-margɨm.

²⁹ Hɨn̰ gɨ kan ba hɨndar gɨ koburo gɨ gumu taa taa le na gɨ ɔrɛ jibe cayi cay garma gɨ pɨna wo̰ gɨŋ na, kan beege nare ga wodɨldəŋ poɗɨn̰ kardi gɨ ni ƴomii kɨɗɨn̰ pɨnaa bɨ, gamge pɛɗɛɗɛ gɨ kɨɗɨn̰ na wɨla haw bɨ.

³⁰ Ɨni na, kan ga gɨye-lɔɔdɨge na lɔɔ gɨye boy koburo gɨ gumu taa taa gɨŋ le, malge gɨyəŋ gɨ ni gɨre ɗɔɔ koburo gɨ gumu taa taa bɨ, kan gɨsɨnge karɨn̰ koburo ga ni poɗɨn̰ kalaŋ duroy kaŋ gaŋ bɨ. Kan yeni gɨ ke na gey naa bɔgɛ nare ga wodɨldəŋ ga nɨn̰dəŋ tumoy koburo gɨ gumu taa taa gɨŋ.

³¹ Ɨni na, Pol yen̰ ba-cay asɨgarn̰əŋ ga aru bɨ, asɨgarn̰əŋ bɨ le, yege hɨn̰: «Hay, hɨn̰ gɨ kalaŋ ga nee le na sɨmage boy koburo gɨ gumu taa taa gɨŋ naŋ na, kɨŋ kɨya ɓale pɔɗɛ naŋ.»

³² Kɨɗɨn̰di ga nee gaŋ bɨ, asɨgarn̰əŋ le walge gangɨ di ƴom karɨn̰ koburo gɨ ni poɗɨn̰ kalaŋ le boyge baɗ daa bɨ, ɗeyge or a cay kuray gɨ gumu taa taa gɨŋ.

³³ Kɨɗɨn̰ ga kan gamge ɗe kɨɗɨn̰ na wɨla ɨni na, Pol molge nɔm ɗe gɨ kan na daa hɨnga bɨ yege hɨn̰: «Labɨde na wɔlɛ mɔjɨ-cay-poɗɨn̰di gɨ kɨŋ som dɨle doon̰ hɨnga gamɨn̰ hɨnga ga kɨya loogɨŋ bɨ, daan̰ hɨnga naŋ ƴee ƴee.

³⁴ Ɨŋ molgɨŋ gɨ kɨŋ jɨga dɔɔ hɨnga agɨŋ wan̰ tɔgɨ di ni andɨn̰ kɨbɨ tɨma dɨŋ. Cay pɨna ɗaŋ coŋ, bɨgagɨŋ kuduroygɨŋ cay kɔl hɨnge gɨŋ, ungo pɨna duroygɨŋ kalɨn̰ ma teɗi cayi kɨya buyoŋ bɔɔ dugo naŋ.»

³⁵ Kɨɗɨn̰ ga ban ye kɔl gɨ nee le dɨbɨ dugo bɨ na, ban ay mapa bɨ leen̰ Kumu ho’o tumoy kalaŋ nɔm bɨ, boy bɨ, ay te dɔɔ.

³⁶ Kan nɔm ɗugoyge baa dugo bɨ, ayge te dɔɔ hɨnga.

³⁷ Ni nɔm ga a boy koburo gɨ gumu taa taa gɨŋ le, ni na kalaŋ aru sɔɔ dan̰ toyni-jurgum-cayni-jii.

³⁸ Kɨɗɨn̰ ga waŋ waŋ kalɨn̰ ma dii ɓalii ɨni na, kan say lobge gɛmɛ ga boy koburo gɨ gumu taa taa gɨŋ laydege coŋ boy kuray gɨ gumu taa taa gɨŋ, ɗe koburo gɨ gumu taa taa le na hɨmbal.

Koburo gɨ gumu taa taa mundoŋ

³⁹ Kɨɗɨn̰ ga kɨɗɨn̰ wol ɨni na, kan ga gɨye-lɔɔdɨge na lɔɔ gɨye boy koburo gɨ gumu taa taa gɨŋ le, sɨlage cay gɨsəŋ ga nee le naŋ. Ama kan solge kɔngɛ kuray gɨ dan̰ kɨlay kɨbɨ nee ɨni na, kan ɨrɨm kɛ ke na gɨ ɓale orɨn̰ dan̰ koburo gɨ gumu taa taa le ɗɔɔ a kɨɗɨn̰ ga nee gaŋ le kalɨn̰ hage ga?

⁴⁰ Na toy di hɨn̰ wo̰ ma, kan pɨndɨrdege gangɨ di kan saɗɨdege nare ga wodɨldəŋ kɨbɨ nee coŋ bɨ. Kɨɗɨn̰di ga nee gaŋ le bɨ, kan pɨndɨrdege kɨbɨ sɨya ga sɔɔ ga ni polɨn̰ kaŋ dorɨn̰ tumoy koburo gɨ gumu taa taa orɨn̰ daa le daa ban̰di nee bɨ. Kardi nee na, kan sogɨge kɨbɨ badge ga woy tumoy koburo gɨ gumu taa taa gɨŋ le daa. Ɗe gɨ kal na nɨngɨlan̰ koburo gɨ gumu taa taa le ɨran̰ jɨn̰ kɨbɨ kɨlay gɨŋ.

⁴¹ Ama koburo gɨ gumu taa taa le ɨrga jɨbɨ kɨlay gɨ moni gɨ woy a te kaŋ gaŋ. Lee gɨ kɨway gɨ tumɔ ɗobɨ duroy kɨlay gɨŋ bɨ, ɨrɨn̰ kɨɗɨn̰ pɨnaa muɗɔgɨ. Lee gɨ kɨway gɨ karu ɨre dusdoŋ kɨya mɛw ga tee.

⁴² Ɨrɨme gɨ da dɨɗe ka-dangayn̰əŋ coŋ ɨrga a cay asɨgarn̰əŋ. Kɨya wa kan hɨndarge gɨ ga pɨna duroyge, na da duroŋ kobɨge tɔgɛ nale gɨrɨn̰ mɨn̰ge.

⁴³ Ama ba-cay asɨgarn̰əŋ ga aru le gey pɔɗɛ Pol. Lee gɨ ban narge lɔɔ hɨnga ga kan ojɨ lɔɔ le coŋ. Bɨ ban ay noyi bɨn̰ kan ga ba sol tɔgɛ nale le, na hɨŋɗɨdɨge bugoŋ duroy kaŋ gaŋ tɨgage nale ɨrage wase kɨbɨ gɨba gɨŋ.

⁴⁴ Bɨ kan ga na sɨlage tɔgɛ nale naŋ le, na dɨnage sɨyan̰əŋ ga wodɨldəŋ, naŋ le gundi sɨya di koburo gɨ gumu taa taa ga puyoŋ wɨydan̰ge cay nee haɗan̰ge ɨran̰. Na hɨn̰ wo̰ ma, kan nɔm kɨbɨge koge gɨŋ, andɨn̰ge kɨbɨge koge gɨŋ cɨrab a cay gɨsəŋ gaŋ.