Gɨye-lɔɔ 26 - Gabri Maja

Pol dor kɔl dorɨn̰ kɔl cay tumoy Agɨripa

¹ Agɨripa yen̰ Pol hɨn̰: «Gɨyəŋ woy hangɨwa bɨn̰ an̰ ye kɔl dorɨn̰ kɔl can̰ ɨni.» Kɨɗɨn̰ ga nee le bɨ, Pol tar kobi gɨlɨn̰ gɨ ɗi na kɨya yɔɔ kɔl gɨ ni dorɨn̰ kɔl cayi ye hɨn̰:

² «Kɨlma Agɨripa, gusɨnɨ mɔŋ tɔgɨ kɨya yɔɔ kɔl dorɨn̰ kɔl canɨ labɨde tumon̰ ojɨn̰ cay hɨnga nɔm ga kalaŋ ga ni Jubɨ ba səŋge koldɨge canɨ le.

³ Kɨya wa hada ga da kalaŋ ga ni Jubɨ nɔm bɨ, hɨnga ga kan man̰ɨn̰ge kɔl cay nee ɨngɨr bɨ le, ga mɨn̰ɨn̰ unɔ. Lee gɨ ɨŋ olɨn̰ gɨ ji dɨra sɨman̰ kuɗa jan̰ kɔl gɨ ɨŋ ba kɨya dɔrɛ kɛ le.»

⁴ «Hɨnga ga ɨŋ lee duroy te wɔɔ gɨ da kalaŋ kange bɨ, boy cay ƴaa-di-gumu di Jerusalɛm dɨŋ bɨ, dan̰ n̰əŋnɨ bɨrɨŋ gɨ ɨŋ malgɨn̰ le, kalaŋ ga ni Jubɨ nɔm solge kuɗa.

⁵ Kan sɔlɔŋge na jɨne wo̰, hɨn̰ gɨ kan na gey na, kan ɓal gɨ ni lɔɔ tɨmon̰ kol canɨ. Gɨ ɨŋ na gor dan̰ gɨyəŋ gɨ da gɨle hɨnga ga da Parɨsɨn̰an̰əŋ bɨ, kalaŋ ga ni Jubɨ ga lun̰doŋge kardi gɨle hɨnga ga da kalaŋ ga ni Jubɨ tɔgɨ ɗɨn̰ Parɨsɨn̰an̰əŋ le unɔ.

⁶ Bɨ hɨn̰ gɨ kan na ɨren̰ danaŋ kɨɗɨn̰ bɔyɛ kɔl gaŋ kɨya bɔyɛ kɔl canɨ labɨde na, na kɨya cay bɔgɛ gɨ ɨŋ bee ɨrɨmenɨ cay kɔl gɨ Kumu ye gɨ ɗi na kɨya lɔɔ bɨn̰ mon̰inagɨŋ le.

⁷ Te tumoyi di ban ay bɨge le, te wɨn̰je ga mɔjɨ-cayge-sɔɔ ga da te kalaŋ kani beege ɨrɨmedɨge cay nee. Gɨ na kɨya ɨrga bɨrɨŋ dɨɗe kɨbi, lee gɨ kan leege gɨyedi bɨn̰ Kumu son̰do dan̰ tɨwa di ɨni dɨle dɔrɛ gɨlale. Kɨlma Agɨripa, na kɨya cay bɔgɛ ɨrɨmenɨ cay te tumɔn̰əŋ ga nee le ma, Jubɨn̰əŋ səŋge kɔl canɨ le.

⁸ Kɨya wa ma, kalaŋ duroygɨŋ solge gɨ bɔyɛ gɨ Kumu boy kalaŋ ga madɨrdaŋ lɨbge le, na hɨnga ga ni bɔgɛ kudurɔ cay nee naŋ ga?»

⁹ Hɨnge ɨŋ-bandi na, tumɔ ɨŋ ɨrɨm kuduronɨ ye hɨn̰, kuɗa gɨ ɨŋ na laa hɨnga nɔm ga togɨnɨ ɓal gɨ ni lɔɔ le, ɗe aŋ na mondɨn̰ dan̰ guson̰ Jesu gɨ Najarɛt le coŋ.

¹⁰ Lee gɨ ɨŋ lee hɨnga ga nee le, a boy cay ƴaa-di-gumu di Jerusalɛm dɨŋ. Ka-cay ka-bɔgɛ kɨbar bəŋge gɨyəŋ, lee gɨ ɨŋ or ƴɔmɛ te kalaŋ ga woyge dan̰ cɨndɨge kondɨ beege dangay dɨŋ. Bɨ kɨɗɨn̰ ga kan dɨɗɨge le, ɨŋ gey a cay kɔl gɨ da kan ga ka-dɨɗedɨge le bɨ.

¹¹ Ɨŋ kobɨ kardi ƴaa-daye-di-da-Jubɨn̰əŋ pɨna pɨna, gɨlɨn̰ ka-bɔgɛ kuduroyge cay Kɨris cɨn̰-gɨle-cɨn̰ bɨ, ɨŋ si tɔgɨ cayge ɗe kan na yagɨdan̰ ban gɨ kan bee kuduroyge cayi le bɨ. Kuduroy-ɨlwa tɨnge di ba ləŋ cayge le, lee gɨ ɨŋ mal cay tɨbayge bɨrɨŋ andɨn̰ a cay ƴaa ga gɨmdəŋ ga ɗaŋ gaŋ.

Pol dor te aye kudurɔ koyi

¹² «Na toy di hɨn̰ wo̰ ma, ɨŋ say wɔlɛ gɨ pɨna gɨŋ, or a cay ƴaa-di-gumu di Damas dɨŋ. Dan̰ dɔnɔ nɔm di ni loon̰ gɨye bɨ, dan̰ te tumɔ di da ka-cay ka-bɔgɛ kɨbar di ayɨn̰ge te tumɔ toge duroy magtubu dɨŋ bəŋ.

¹³ Kɨlma Agɨripa, kɨɗɨn̰ ga ɨŋ baa te gɨyəŋ gɨŋ ƴee dan̰ tɨwa di ɨni ɗɨrɨj bɨ na, ɨŋ sol kɨɗɨn̰ asɨn̰ pɨraŋ ɗɨn̰ tɨwa di ɨni coŋ, andɨgaŋ gɨɗɨgɨ-Kumu gɨŋ asɨn̰ nɨwɨre canɨ cɨɗɨgɨ bɨ, cay kan ga ka-ɔrɛ tɨrga danaŋ bɨ.

¹⁴ Ni-gandi nɔm, ni turoŋ laydaŋ dugo. Ɨni na, ɨŋ je noy ungo gɨ pɨna wo̰ yəŋ kɔl dan̰ kɨbɨ əbɨro ye hɨn̰: “Sol, Sol, na kɨya wa ma man̰ gɨləŋ cɨn̰ wo̰ ga? Ɨre gɨ ji ba ɨrəŋ ɨŋ-bandi Kumu osu kɛ le, gusɨn̰ kon̰ ba kɨya leen̰ kalɨn̰ wo̰ dugo.”

¹⁵ Ɨŋ jɨga ɨngɨri yeyi hɨn̰: “Ji na waŋ ga Ba-gulɔŋ?” Ɨni na, Ba-gulɔŋ jɨga dɨbəŋ cay nee yəŋ hɨn̰: “Ɨŋ na Jesu gɨ ji gɨləŋ-cɨn̰ le.

¹⁶ Haw kɛ na, sa ɨr dan̰ tɨban̰ daa bɨ ɨŋ kɨya yon̰ na kɨya wa ma maŋ gɨl gusɨnɨ bɨn̰ le. Ɨŋ dorɨn̰ ɗe gɨ ji na bɨl ba-gɨye hɨnge bɨ, tɨmon̰ hɨnge bɨ. Ji kɨya yon̰ kalaŋ kol hɨnga ga ɨŋ ba haŋgɨ cayge bɨn̰ haw kɛ bɨ, kol hɨnga nɔm ga ɨŋ kɨya haŋge cayge bɨn̰ kardi nee bɨ.

¹⁷ Ɨŋ dorɨn̰ kobɨ te wɔɔ gɨ da kalaŋ kan̰ ga ni Jubɨ bɨ, kobɨ kalaŋ ga ɨŋ kɨya gɨyɨn̰ gusɨge ga na kalaŋ ga toyge na Jubɨ naŋ bɨ.

¹⁸ An̰ hangɨn̰ cɨndɨge ɗe gɨ kan na andan̰ duroy dɨlɨm dɨŋ coŋ bɨ, andɨn̰ boy kɨɗɨn̰ ga woli gaŋ bɨ, andan̰ kobɨ tɔgɨ di da Sidan dɨŋ coŋ bɨ, andɨn̰ boy dɔnɔ di da Kumu dɨŋ. Bɨ Kumu kɨya ɗɔɔ kuduroyi jalɨwa cay ɨsɨna koge bɨ, kan kɨya wan̰ hɨnga ga ni ban̰di-gulɔŋ duroy kalaŋ ga woyge dan̰ cɨndɨge kɨya kuduroyge ga kan ayge bəŋ.”»

Pol dor te gɨye gɨ ban lee ayɨn̰ a toy dɨŋ

¹⁹ «Ayɨn̰ toy a wɔlɛdi gɨ nee gɨŋ le, Kɨlma Agɨripa, ɨŋ kan̰a kol hɨnga ga buyoŋ cɨnɨ hɨn̰ dḛḛ wo̰, ga sayga gusi Kumu le naŋ.

²⁰ Ama cay wase na, ɨŋ say tee bɛrnɛ bɨn̰ na kalaŋ ga a cay ƴaa-di-gumu di Damas bɨ, kardi nee bɨn̰ kalaŋ ga a cay ƴaa-di-gumu di Jerusalɛm bɨ, a cay gɨsəŋ ga Jude gaŋ nɔm bɨ. Kardi nee ɨŋ say tee bɛrnɛ bɨn̰ te kalaŋ ga toyge na Jubɨ naŋ. Ɨŋ yege gɨ ojɨ gɨ kan na bɨl gɨye-lɔɔdɨge bɨ, bɨl gusɨge gusi Kumu bɨ, laan̰ gɨye gɨ ojɨ cay kalaŋ ga bɨle gɨye-lɔɔdɨge leen̰ cɨndi bɨ.

²¹ Na kɨya cay kɔl gɨ nee le ma, Jubɨn̰əŋ ƴɔmɔŋge duroy ƴaa-di-da-Kumu dɨŋ bɨ, geyge dɨɗəŋ bɨ.

²² Ama na kɨya dɨbe gɨ Kumu dɨbɨ kobi canɨ amaŋ bɨrɨŋ gɨsɨn̰ labɨde le ma maŋ ɨrɨn̰ kɛ, ɨrɨn̰ leen̰ tɨmon̰ tɨnge tumoy kalaŋ nɔm ga gɨmdəŋ bɨ, ga n̰ən̰əŋ bɨ. Na kol hɨnga ga ka-yɔɔ-kɔl-gɨ-Kumu-ba-yɔɔ bɨ, Moyis ba yege gɨ naa wa wa kalɨn̰ ma, na kɨya lɔɔ gusɨge le, ma maŋ ye ɗɔɔ ƴɔbɨ.

²³ Kan yege gɨ Kɨris ban gɨ Kumu dorii le, na kɨya wɔɔ cɨn̰-gɨle-cɨn̰ bɨ, na kɨya mare bɨ, bɔyɛ lɨbe cay wase duroy kalaŋ ga madɨrdaŋ gaŋ bɨ, na kɨya gɨlɨn̰ te kalaŋ kani bɨ, te kalaŋ ga toyge na Jubɨ naŋ kɔl gɨ da asɨn̰a gɨ da pɔɗɛ le bɨ.»

Pol yen̰ Agɨripa gɨ ban na aya kuduroy

²⁴ Pol dor kɔl dorɨn̰ kɔl cay kɨɗɨn̰ ga nee gaŋ le, ɨni na Pɛstus yey dan̰ tumoyi di daa ye hɨn̰: «Pol, ji sɨwagɨ! Tɨrabe kon̰ gɨ kondi le dɨbɨ sɨwagɨ can̰!»

²⁵ Ama Pol jɨga dɨbi cay nee yey hɨn̰: «Ba-dɔɔ cay ƴaa gɨ kuɗa Pɛstus, ɨŋ sɨwaga naŋ. Kɔl gɨ ɨŋ ba dor kɛ le, na kɔl gɨ cɨndi bɨ, na dɔrɛ kɔl gɨ da ungo gɨ gɨrɨn̰ cayi woy dan̰ durɔ bɨ.

²⁶ Kɨlma Agɨripa sol hɨnga ga nee le, lee gɨ ɨŋ ɓal dɔrɛ koldi tumon̰ dɨle hundɔrɔ. Bɨ ɨŋ sol leen̰ cɨndi gɨ hɨnga ga nee le nɔm ban sol. Kɨya wa na hɨnga ga laa gusɨge a kɨɗɨn̰ ga wosi gaŋ naŋ.

²⁷ Kɨlma Agɨripa, ji bee kuduron̰ cay kɔl gɨ ka-yɔɔ-kɔl-gɨ-Kumu-ba-yɔɔ ba yege le ga? Ɨŋ sol kuɗa gɨ ji bee kuduron̰ cay nee.»

²⁸ Ɨni na, Agɨripa jɨga yen̰ Pol ye hɨn̰: «Baa mɨnde gɨ ji kɨya bɔgɛ kɔl kuduronɨ ɗe gɨ ɨŋ na bɨlɨn̰ ba kɔbɛ Kɨris ɨni!»

²⁹ Ɨni na, Pol jɨga dɨbii cay nee yeyi hɨn̰: «Gɨ na baa naa mɨnde wala, kunda wala, ɗe gɨ Kumu laa gɨ na ji ƴɔbɨ naŋ, ama ɗe gɨ kalaŋ nɔm ga ba jege kɔl gɨ kɨbɨnɨ labɨde le, bɨləŋge woy hɨn̰ ɨŋ-bandi wo̰, ama ɗa gɨ na dan̰ mɔrɨyɔŋ ga saɗɨ kɔbɔŋ kɛ naŋ.»

³⁰ Kɨɗɨn̰ ga nee le, kɨlma bɨ, ba-kɨbɨ kɨlma gɨ gumu bɨ, Bɛrnis bɨ, kan nɔm ga som danage kɨɗɨn̰ bɔyɛ kɔl gaŋ le, dege sayge daa danayi.

³¹ Kɨɗɨn̰ ga kan andaŋge doŋ ɨni na, kan yen̰ge gusɨge kɔl yege hɨn̰: «Ungo gɨ kɛ le, laa hɨnga pɨna ga uja tɨmaydi naŋ bɨ, ga uja gɨ ungo gɨ saɗɨdi dan̰ mɔrɨyɔŋ naŋ bɨ.»

³² Ɨni na, Agɨripa yen̰ Pɛstus ye hɨn̰: «Ungo gɨ kɛ le, ban ni na ya tumɔ gɨ ɗi na gey orɨn̰ dan̰ bɔyɛ kɔl koyi le a tumoy kɨlma gɨ gumu Sejar naŋ na, ni ni kɨya ɗoyi daa kalɨn̰.»