Gɨye-lɔɔ 25 - Gabri Maja

Pol ɨngɨr gɨ ni orɨn̰ dan̰ bɔyɛ kɔl koyi a tumoy Sejar

¹ Kɨɗɨn̰ ga Pɛstus bugoŋ a kɨɗɨn̰ dɔɔ cay ƴaa toy dɨŋ ɨni na, kardi nee ban lee wɔlɛ sɨbɨ bɨ, ban say a Sejare or a cay ƴaa-di-gumu di Jerusalɛm dɨŋ.

² Ka-cay ka-bɔgɛ kɨbar bɨ, kalaŋ ga gɨmdəŋ ga da Jubɨ bɨ, ɨrgage səgɨge Pol gusi. Kan say ɨngɨrge Pɛstus gɨ gaɗ gaɗ,

³ gɨ ban na laa kuduroy-ɗarwa danage bɨ, ɨran̰ dan̰ Pol a Jerusalɛm. Leen̰ cɨndi na, kan ƴom cay gusɨge kɨya won̰ Pol mage te gɨyəŋ gɨŋ age na diɗii.

⁴ Ama Pɛstus dɨbɨge cay nee yege hɨn̰: «Pol woy a dangay di Sejare dɨŋ bɨ, ɨŋ-bandi kalɨn̰ ma, ɨŋ baa mɨnde kɨya jɔgɛ nii bɨ.

⁵ Hɨn̰ wo̰ na, ɗa gɨ kalaŋ kagɨŋ ga gɨmdəŋ ɨrage danaŋ. Hɨn̰ gɨ ungo gɨ nee le, na laa hɨnga ga dan̰ gɨyəŋdɨge naŋ na, ɗa gɨ kan segi a nii.»

⁶ Pɛstus sɨma danage laa wɔlɛ ɗɨn̰ margɨm wala, mɔjɨ naŋ bɨ, say jogɨ a Sejare. Wan̰dodo dɨŋ ɨni na, ban say or sɔmɛ kɨɗɨn̰ bɔyɛ kɔl gaŋ bɨ, ay noyi ɗe kan na ɨren̰ dan̰ Pol.

⁷ Kɨɗɨn̰ ga Pol ɨrga bugoŋ ɨni na, Jubɨn̰əŋ ga saygage Jerusalɛm le, ɨrgage nɨwɨrege cayi bɨ, ɗege kɔl gɨ osɨdəŋ tɔgɨ cayi bɨ, sɨn̰ge kɔl cayi. Ama kan ɓala gɨle gɨ kɔl gɨ nee le na cɨndi naŋ.

⁸ Pol dor kɔl cayi coŋ yen̰ hɨn̰: «Ɨŋ laa hɨnga ga dan̰ gɨyəŋdɨge naŋ pɨna wo̰ hangɨɗan̰ cay Gasɨn̰-kɔl ga da kalaŋ ga ni Jubɨ wo̰ naŋ bɨ, laan̰ hɨnga ga ɨsɨni dan̰ ƴaa-di-da-Kumu naŋ bɨ, dan̰ kɨlma gɨ gumu gɨ ni Sejar naŋ bɨ.»

⁹ Pɛstus mal gɨ kuduroy kalaŋ ga ni Jubɨ na mooge cayi, lee gɨ ban ɨngɨr Pol hɨn̰: «Kɛ, ji gey ɔrɛ Jerusalɛm ɗe gɨ kan na or bɔyɛ kɔl kon̰ a cɨnɨ ga?»

¹⁰ Ama Pol jɨga dɨbii cay nee yey hɨn̰: «Ɨŋ ɨre na kɨɗɨn̰ bɔyɛ kɔl ga da kɨlma gɨ gumu gaŋ kɛ. Na a kɛ ma, ojɨ gɨ kan kɨya bɔyɛ kɔl canɨ a nee. Ɨŋ laa hɨnga ga dan̰ gɨyəŋdɨge naŋ dḛ wo̰ dan̰ kalaŋ ga ni Jubɨ naŋ. Hɨn̰ gɨ ji-bandi kalɨn̰ ma mɨn̰ ba solɨn̰ kuɗa le kɔ.

¹¹ Hɨn̰ gɨ kɔl na ƴɨma canɨ bɨ, ɨŋ na laa hɨnga pɨna ga dan̰ gɨyəŋdɨge naŋ ga ɓal tɨmaynɨ bɨ na, ɨŋ ɓala kan̰e mare naŋ. Ama hɨn̰ gɨ kɔl gɨ cɨndi na unɔ a boy kɔl gɨ kalaŋ ga kɛ, ba sige canɨ na, ungo pɨna ɓala ƴɔmɔŋ dɔbɔŋ kobɨge naŋ. Ɨŋ gey orɨn̰ dan̰ bɔyɛ kɔl le a tumoy kɨlma gɨ gumu Sejar.»

¹² Ɨni na, kɨɗɨn̰ ga Pɛstus dan̰ kalaŋ kay wayge gusɨge gɨsɨn̰-kɔl koge ɨni na, ban jogɨ dɨbii cay nee yey hɨn̰: «Ji ye gɨ ji na gey orɨn̰ dan̰ bɔyɛ kɔl kon̰ tumoy kɨlma gɨ gumu Sejar ɨni na, hɨn̰ wo̰ na, ni kɨya gɨyɨn̰ gusi kɨlma gɨ gumu Sejar.»

Pol ɨre tumoy Agɨripa bɨ Bɛrnis bɨ

¹³ Ɓal wɔlɛ lam wo̰ kardi nee ɨni na, kɨlma Agɨripa dan̰ tɨmdi Bɛrnis ɨrgage bugoŋ a Sejare bɨ, orge kɨya leen̰ Pɛstus lapɨya.

¹⁴ Hɨn̰ gɨ kan ba somge leen̰ wɔlɛ lam a nee na, Pɛstus say dorɨn̰ kɨlma kardi kɔl gɨ da Pol le yey hɨn̰: «Peligɨs ɗe ungo gɨ pɨna wo̰ a dangay dɨŋ kɛ.

¹⁵ Kɨɗɨn̰ ga ɨŋ orɨn̰ Jerusalɛm na, ka-cay ka-bɔgɛ kɨbar bɨ, kan ga muɗoldoŋ ga da Jubɨn̰əŋ bɨ, ɨrgage ɗe kɔl tumonɨ bɨ, ɨngɨrge gɨ ɨŋ na bɨya kɔl cayi bɨ, ɨŋ na ɗa kɔl na ƴɨma cayi bɨ.

¹⁶ Ama ɨŋ dɨbɨge cay nee yege gɨ dan̰ te hada da kalaŋ ga Rɔm na, ba-bɔyɛ kɔl kɨya ɗɔɔ kalaŋ ga orɨn̰ dan̰ kɔl dan̰ gusɨge le yɔɔ kɔl koge dorɨn̰ kɔl cayge pa dɨm ma, kan kɨya dobii kobɨ ka-se kɔl cayi le ƴee.

¹⁷ Kɨɗɨn̰ ga nee gaŋ le, kan ɨrgage danaŋ kɛ. Kardi wɔlɛ gɨ ni ba ɨrgan̰ le, ɨŋ gama dḛ wo̰ naŋ bɨ, ɨŋ or sɔmɛ kɨɗɨn̰ bɔyɛ kɔl gaŋ bɨ, ɨŋ ay nonɨ gɨ kan na ɨren̰ dan̰ ungo gɨ nee le.

¹⁸ Kɨɗɨn̰ ga kan ga ka-se kɔl cayi le ɨrgage na, ɨŋ ɨrɨm hɨn̰ gɨ kan na gɨ andɨn̰ naa dan̰ kɔl ga osɨdəŋ tɔgɨ, ama kan ya kɔl pɨna ujan̰ cay hɨnga ga ɨŋ ɨrɨm le naŋ.

¹⁹ Bɨ kan man̰ge kɔl danayi ojɨn̰ na cay kɔl gɨ da n̰ɨre Kumu koge bɨ, cay ungo gɨ pɨna wo̰ gɨ gusondi na Jesu gɨ ma ɨni, ama Pol ye gɨ ban na baa dan̰ cɨndi ban̰ nee ƴɔbɨ.

²⁰ Ɨŋ sɨla hɨnga ga ni lɔɔ ojɨn̰ cay kɔl gɨ hɨn̰ wo̰ le naŋ. Lee gɨ ɨŋ ɨngɨr Pol yeyi hɨn̰ kɛ ban na gey ɔrɛ Jerusalɛm ɗe gɨ kan na or bɔyɛ kɔl a cay kɔl koyi gɨŋ le ga?

²¹ Ama kɨɗɨn̰ ga Pol say ye gɨ ɗi na gey orɨn̰ dan̰ bɔyɛ kɔl koyi na gusi Sejar na, ɨŋ say ay nonɨ bɨge gɨ kan na gamayi dangay dɨŋ bɨrɨŋ gɨsɨn̰ gɨ ɨŋ kɨya gɨyɨn̰ danayi gusi kɨlma gɨ gumu gɨŋ.»

²² Kɨɗɨn̰ ga nee le, Agɨripa yen̰ Pɛstus hɨn̰: «Ɨŋ-bandi kalɨn̰ ma, ɨŋ gey jɔɔ kɔl gɨ da ungo gɨ nee le bɨ.» Ɨni na, Pɛstus jɨga dɨbii cay nee yey hɨn̰: «Wan̰do ƴɔbɨ, ji kɨya jɔɔ kɔl gɨ a kɨbi.»

²³ Wan̰dodo dɨŋ ɨni na, Agɨripa dan̰ Bɛrnis tobɨge badɨge ga ni tɨrɨmbala, ɨrgan̰ge dan̰ kalaŋ lug lug kardɨge. Kan andɨn̰ge kɨɗɨn̰ bɔyɛ kɔl gaŋ dan̰ ka-cay asɨgarn̰əŋ ga gɨmdəŋ bɨ, dan̰ kalaŋ ga gɨmdəŋ ga boy cay ƴaa-di-gumu dɨŋ bɨ. Pɛstus ay noyi ɗe kan na ɨren̰ge dan̰ Pol ɨni na, kan ɨrgan̰ge danayi.

²⁴ Bɨ Pɛstus ay kɔl ye hɨn̰: «Kɨlma Agɨripa bɨ, kɨŋ nɔm ga ba ɨre danani kɛ bɨ. Sɨlagɨŋ ungo gɨ kalaŋ ga ni Jubɨ nɔm segige gusɨnɨ a Jerusalɛm bɨ a kɛ bɨ le. Den̰ge sɨle yen̰ge gɨ ungo gɨ nee le na uja gɨ ban na gɨ sɔmɛ dan̰ cɨndi naŋ le.

²⁵ Ɨŋ-bandi na, ɨŋ sɨla hɨnga pɨna ga ban lee gɨ ɓal gɨ ban kɨya marɨn̰ naŋ. Ama hɨn̰ gɨ ban gusi ba geye gɨ ni orɨn̰ dan̰ bɔyɛ kɔl koyi gusi Sejar na, ɨŋ gey gɨyɨn̰ danayi gusi bɨ.

²⁶ Ama hɨn̰ gɨ ɨŋ na kɨya orɨn̰ danayi bɨn̰ Sejar na, ɨŋ sɨla hɨnga ga jɛɗ ga ɨŋ kɨya wale duroy magtubu dɨŋ kɔl cayi naŋ. Na toy di hɨn̰ wo̰ ma, maŋ ɨrgan̰ danayi tumoygɨŋ bɨ, tumoy kɨlma Agɨripa bɨ. Gajanaŋ kɨɗɨn̰ ga ni na ja kɔl koyi na, ɨŋ kɨya wɔɔ hɨnga ga ojɨ wale a duroy magtubu dɨŋ.

²⁷ Ɨŋ sol gɨ gɨye ungo ba-dangay dɨle yɔɔ kɔl gɨ ojɨ cay ɗe arɨn̰ le, na hɨnga ga ɨra dan̰ gɨyəŋdɨge naŋ.»