Gɨye-lɔɔ 24 - Gabri Maja

Jubɨn̰əŋ sige kɔl a cay Pol

¹ Wɔlɛ bay kardi nee na, Ananɨyas mangɨl gɨ da ka-cay ka-bɔgɛ kɨbar ɨrgage dan̰ kan ga muɗoldoŋ ga pɨna wo̰ bɨ, ba-ƴɔɔ cay kɨɗɨn̰ gɨ pɨna wo̰ gɨ na gɨye-lɔɔdi gɨ gusondi na Tɛrtulus. Kan naa orge ɗɔɔ kɔl gɨ da Pol tumoy ba-kɨbɨ kɨlma gɨ gumu.

² Ba-kɨbɨ kɨlma gɨ gumu gɨy te Pol ɨni na, Tɛrtulus ay te sii kɔl cayi yen̰ hɨn̰: «Peligɨs, ba-kɨbɨ kɨlma gɨ gumu gɨ kuɗa tɔgɨ, na kɔl can̰ ji-bandi ma te hɨnga kondɨ bɨle toyge kɨya cay te wɔɔ gɨ da kalaŋ ga ba kɛ le, dan̰ gɨyəŋ gɨ da dɔɔ-ƴaa ton̰ dan̰ cɨn̰-muɗɔlɛ bɨ, na kɔl can̰ coŋ ma mani somɨn̰ duroy gusi-dɔbɛ dɨŋ jundɔm bɨ.

³ Ni way ɗarwa di hɨn̰ wo̰ le dan̰ wɔlɛ pɨna pɨna bɨ, dan̰ kɨɗɨn̰ nɔm bɨ na kol can̰, ni leen̰ ho’o kɔl cayge.

⁴ Ama ni gey jogdɨn̰ tɔgɨ naŋ bɨ, yɔɔ kɔl ɗɛj wo̰ bɨ. Na toy di hɨn̰ wo̰ ma, mani olɨn̰ gɨ ji laa kuduroy-ɗarwa danani bɨ. Dɨra sɨman̰ jan̰ kɔl koni dḛ bɨ.

⁵ Ni sol gɨ ungo gɨ kɛ le, na ungo gɨ ɨsɨn hɨn̰ tɨma di man̰i wo̰. Ban dɨbɨ do̰ a duroy kalaŋ ga ni Jubɨ nɔm, ga a cay gɨsəŋ gaŋ nɔm bɨ. Ban mana ba-dɔrɛ tumoy kamdi ga na te kalaŋ ga kan teege Najarɛtn̰əŋ bɨ.

⁶ Ban mal gɨyəŋ gɨ ɗe ƴaa-di-da-Kumu na laa kɨni, ama ni say bugoŋ cayi ƴomii. [Ni gey gɨ ni bɔyɛ kɔl cayi dan̰ gɨyəŋ gɨ da gasɨn̰-kɔl kani.

⁷ Ama Lɨjɨyas ba-cay asɨgarn̰əŋ ga dubu le, ɨrga boɗi kobɨni coŋ dan̰ dɔnɔ.

⁸ Kardi nee na, ban yen̰ kan ga ka sii kɔl cayi le, na ɨrege gusɨn̰.] Hɨn̰ gɨ ji gusɨn̰, ji na ɨngɨrii dan̰ kɨbɨn̰ kon̰ na, ji kɨya sɔlɛ gɨ kɔl gɨ ni ba sii cayi le, naa cɨndi.»

⁹ Jubɨn̰əŋ bugoŋge kardi kɔl gɨ da Tɛrtulus gɨ sii cay Pol bɨ yege hɨn̰: «Əw, na cɨndi.»

Pol dor kɔl dorɨn̰ kɔl cayi

¹⁰ Kɨɗɨn̰ ga ba-kɨbɨ kɨlma gɨ gumu dobɨ kobi a cay Pol gɨ ban na ya kɔl gaa ma, Pol yey hɨn̰: «Ɨŋ sol gɨ ji na ba-bɔyɛ kɔl a cay te wɔɔ gɨ da kalaŋ ga ba kɛ le, ɨlge kondɨ labɨde. Lee gɨ ɨŋ ɨre tumon̰ na dan̰ kuduronɨ ga pɨna kɨya dorɨn̰ kɔl ɗe gɨ aŋ na dorɨn̰ kɔl canɨ coŋ.

¹¹ Ɨŋ or n̰ɨre Kumu a Jerusalɛm bɨ, kɨɗɨn̰ ga ɨŋ bugoŋ le, ɨŋ laa wɔlɛ ɗɨn̰ wɔlɛ mɔjɨ-cay-sɔɔ naŋ ƴee. Gɨ nee le, ji na ɨngɨr naa waŋ waŋ kalɨn̰ ma kɨya yon̰.

¹² Ungo wayaŋ kɨɗɨn̰ man̰e-kɔl gɨŋ dan̰ kalaŋ naŋ bɨ, kɨɗɨn̰ dɨbe do̰ duroy dɨmdɨrdi kalaŋ naŋ bɨ, a duroy ƴaa-di-da-Kumu dɨŋ wala, a boy ƴaa-daye-di-da-Jubɨn̰əŋ dɨŋ, wala a duroy cay ƴaa-di-gumu dɨŋ naŋ bɨ.

¹³ Kol hɨnga ga kalaŋ ga kɛ ba sɨn̰ge kɔl canɨ haw kɛ le, kan ɓala gɨle gɨ naa cɨndi naŋ.

¹⁴ Ama hɨnga ga ɨŋ ba sol leen̰ cɨndi ba kɛ: Ɨŋ ay na gɨyəŋ gɨ hɨrɨwa, gɨ kan yege gɨ na gɨyəŋ gɨ dan̰ gɨyəŋdi naŋ le leen̰ gɨye bɨn̰ Kumu gɨ da mon̰inagɨŋ le. Bɨ ɨŋ ay kuduronɨ bɨn̰ hɨnga nɔm ga kan walge a duroy magtubu Gasɨn̰-kɔl gaŋ bɨ, duroy magtubu ga da ka-yɔɔ-kɔl-gɨ-Kumu-ba-yɔɔ gaŋ bɨ.

¹⁵ Ɨŋ bee ɨrɨmenɨ a cay Kumu hɨn̰ gɨ kan kalɨn̰ ma ba been̰ge kuduroyge cayi wo̰ bɨ. Gɨ kalaŋ ga dan̰ durɔ ɗɨngar bɨ, ga dan̰ durɔ ɗɨngar naŋ bɨ, ga mage le, Kumu kɨya boyge lɨbge.

¹⁶ Na kɨya cay kɔl gɨ nee le ma, maŋ ƴomɨn̰ togɨnɨ dan̰ wɔlɛ pɨna pɨna ɗe gɨ ɨrɨmenɨ masadi na unɔ tumoy Kumu bɨ, tumoy kalaŋ nee bɨ.»

¹⁷ «Ɨŋ unɔ boy cay ƴaa-di-gumu di Jerusalɛm dɨŋ ɓal ɨlge kondɨ bɨ, ɨŋ jɨga a Jerusalɛm na kɨya ɨrgan̰ dan̰ hɨnga ga ni bee, bɨn̰ te wɔɔ gɨ da kalaŋ kange ga ka-n̰age bɨ, kɨya bɨn̰ Kumu bɨ.

^18-19 Na hɨnga ga nee le ma maŋ lee, kɨɗɨn̰ ga kalaŋ ga ni Jubɨ ga pɨna wo̰ ga saygage jɨn̰ cay gɨsəŋ ga Aji gaŋ, wayaŋge a duroy ƴaa-di-da-Kumu dɨŋ. Kɨɗɨn̰ ga kan wayaŋge na, na nee dɨm ma maŋ dɨɗɨ kɨbɨ dorɨn̰ gusɨnɨ mɨra ƴee. Ɨŋ gusɨra kalaŋ naŋ bɨ, ɨŋ laa kɔl naŋ bɨ. Na kalaŋ ga nee le ma ojɨ gɨ kan ni ba kɨya se kɔl canɨ tumon̰ labɨde, hɨn̰ gɨ kan ni na ɨran̰ dan̰ kɔl danaŋ leen̰ cɨndi.

²⁰ Naŋ na, hɨnga ga ɨsɨni ga ɨŋ ba lee ma koldɨge ba ƴɔmɔŋ wɔlɛdi gɨŋ gɨ ɨŋ ba ɨrɨn̰ tumoyi ka-bɔyɛ kɔl cay kalaŋ ga ni Jubɨ ga gɨmdəŋ le. Kuɗa gɨ kalaŋ ga ba ɨrege kɛ le, yage koldɨge.

²¹ Gajanaŋ na nonɨ di ɨŋ dor daa duroyge yen̰ kɔl le ma: “Kan gey gɨ ni bɔyɛ kɔl canɨ labɨde, na kɨya gɨ ɨŋ bee kuduronɨ cay bɔyɛ lɨbe gɨ da kalaŋ ga madɨrdaŋ gaŋ.”»

²² Peligɨs sol hɨnga ga ojɨ cay gɨyəŋ gɨ da Kɨris kuɗa, lee gɨ ban boyge wɔlɛ gɨ ɗaŋ bɨ, yege hɨn̰: «Hɨn̰ gɨ Lɨjɨyas gumu gɨ da asɨgarn̰əŋ ga dubu na ɨre bugoŋ na, ɨŋ kɨya bɔyɛ kɔl kogɨŋ ƴee.»

²³ Ban ay noy bɨn̰ gumu gɨ da asɨgarn̰əŋ ga aru, gɨ kan na ama Pol dangay dɨŋ bɨ, kan na gɨ dɨle narɨn̰ kalaŋ kayi ɨrga looyi lapɨya naŋ bɨ, awniige naŋ bɨ.

Pol ɨre tumoy Peligɨs dan̰ Dursil

²⁴ Wɔlɛ lam wo̰ kardi nee na, Peligɨs dan̰ tamdi Dursil di na Jubɨ le ɨrgage. Ban gɨy te Pol, kɨya wa ban gey jɔɔ kɔl gɨ ojɨ cay bɔgɛ kudurɔ cay Jesu-Kɨris.

²⁵ Ama kɨɗɨn̰ ga Pol dor kɔl gɨ ojɨ cay gɨye-lɔɔ gɨ dan̰ durɔ ɗɨngar bɨ, ƴɔmɛ-gusɨn̰ cay hɨnga nɔm bɨ, cay bɔyɛ kɔl gɨ ba kɨya ɨrga bɨ na, hundɔrɔ le Peligɨs lee gɨ ban yey hɨn̰: «Haw kɛ na, dɨra gusɨn̰ gusɨnɨ coŋ. Hɨn̰ gɨ ɨŋ na waa gɨyəŋ na, ɨŋ kɨya togɨn̰ ƴee.»

²⁶ Ban ɨrɨm gɨ gajanaŋ Pol na kɨya bii gursu. Na toy di hɨn̰ wo̰ ma, ban gɨydɨde daa daa cayi ɗe ban na ɨrga ar kɔl danayi.

²⁷ Lee ɨlge sɔɔ ɨni na, Porsɨyus Pɛstus ɨrga ƴee ban̰di Peligɨs. Ama Peligɨs gey gɨ kalaŋ ga ni Jubɨ, gusɨge na mooge cayi, lee gɨ ban ɗe Pol dangay dɨŋ mɨjag.