Gɨye-lɔɔ 23 - Gabri Maja

Pol tumoyi ka-bɔyɛ kɔl ga gɨmdəŋ ga da Jubɨ

¹ Pol si cɨndi a cay ka-bɔyɛ kɔl cay kalaŋ ga ni Jubɨ solge gəɗəɗə bɨ, yege hɨn̰: «Karmɨnɨ, ɔrɛnɨ gɨ ɨŋ ba or tumoy Kumu bɨrɨŋ labɨde le, kuduronɨ gɨləŋ hɨnga ga ɨsɨni dḛ wo̰ cay nee naŋ.»

² Mangɨl gɨ da ka-cay ka-bɔgɛ kɨbar gɨ gusondi na Ananɨyas le, ay noyi bɨn̰ kalaŋ ga ɨrege durdi Pol, gɨ ungo pɨna duroyge na dɨga kɨbi.

³ Ɨni na, Pol yey hɨn̰: «Bɨrɨm gɨ bɛrɛ, na ji ma Kumu kɨya dogɨn̰! Ji som kɛ, na kɨya bɔyɛ kɔl canɨ dan̰ gɨyəŋ gɨ da Gasɨn̰-kɔl bɨ, lee na mɨna ma mɨn̰ ɗɨsɨge cay Gasɨn̰-kɔl dugo, ayɨn̰ noy gɨ kan na dɨgaŋ ga?»

⁴ Kan ga ɨrege kɨɗɨn̰ ga nee gaŋ le, yen̰ge Pol hɨn̰: «Ji yagɨde na mangɨl gɨ da ka-cay ka-bɔgɛ kɨbar gɨ da Kumu!»

⁵ Pol dɨbɨge cay nee hɨn̰: «Karmɨnɨ, ɨŋ sɨla gɨ ban na mangɨl gɨ da ka-cay ka-bɔgɛ kɨbar naŋ. Kɨya wa kan walge duroy magtubu gasɨn̰-kɔl gɨ da Moyis dɨŋ yege hɨn̰: “Ji na gɨ yagɨde ba-dɔɔ cay kalaŋ kan̰ naŋ.”»

⁶ Pol sol gɨ duroy kalaŋ ga ba dayaŋge le, kɨwayge ga pɨna na Sadusɨn̰ɛn̰əŋ bɨ, kɨwayge ga ɗaŋ na Parɨsɨn̰an̰əŋ bɨ, lee gɨ ban dor noy daa yen̰ ka-bɔyɛ kɔl hɨn̰: «Karmɨnɨ, ɨŋ na Parɨsɨn̰a bɨ, kurɨn̰ Parɨsɨn̰a bɨ! Na kɨya cay bɔyɛ lɨbe gɨ da kalaŋ ga madɨrdaŋ ga ɨŋ bee ɨrɨmenɨ cay nee le ma, kan ɨrgan̰ danaŋ kɛ kɨya bɔyɛ kɔl canɨ.»

⁷ Kɨɗɨn̰ ga kɔl gɨ ban ye le baa dugo wo̰ bɨ ga ma, man̰e-kɔl say duroy Parɨsɨn̰an̰əŋ dan̰ Sadusɨn̰ɛn̰əŋ bɨ. Kan ga ba dayaŋge le cudroŋge dugo bɨ.

⁸ Kɨya wa Sadusɨn̰ɛn̰əŋ na, ƴomge osɨ yege gɨ ungo na mara na, na kɨya bɔyɛ lɨbe naŋ bɨ, ka-ƴɔbɛ ga daa nii na unɔge bɨ, turnɔn̰əŋ na unɔge bɨ. Ama Parɨsɨn̰an̰əŋ na, yege gɨ hɨnga ga nee le na woy nee nɔm.

⁹ Kalaŋ dege sɨle jɨn̰ nee nee bɨ, ka-gɨlɨn̰ kalaŋ gasɨn̰-kɔl gɨ da Moyis ga pɨna duroy Parɨsɨn̰an̰əŋ, say jɨbgege sɛdɨ coŋ dan̰ togɨyge kɨya ƴon̰ cay Pol yen̰ge hɨn̰: «Ni waa hɨnga pɨna ga ɨsɨni ga ungo le lee naŋ. Gajanaŋ gɨ lɔɔ na turnɔ di pɨna wo̰ wala, na ba-ƴɔbɛ gɨ daa nii gɨ pɨna wo̰ ba are-kɔl danayi kalɨn̰ ma mani sɨla naŋ.»

¹⁰ Kɨɗɨn̰ ga man̰e-kɔl le say ɨl tɔgɨ na, ba-cay asɨgarn̰əŋ le hɨndar gɨ kan na da dɨɗe Pol. Na toy di hɨn̰ wo̰ ma, ban ay noyi bɨn̰ asɨgarn̰əŋ gɨ kan na gɨsɨn ɨra dɨrayi duroyge coŋ bɨ, kan na jɨgan̰ danayi duroy ƴaa di da asɨgarn̰əŋ dɨŋ le.

¹¹ Wan̰dodo dɨŋ ɨni na, Ba-gulɔŋ andaŋ cay Pol bɨ yey hɨn̰: «Ƴɨma kuduron̰ usa! Hɨn̰ gɨ ji ba leen̰ tɨmon̰ tɨnge a cay ƴaa-di-gumu di Jerusalɛm dɨŋ le, ojɨ gɨ a cay ƴaa-di-gumu di Rɔm dɨŋ kalɨn̰ ma, ji laa tɨmon̰ tɨnge nee bɨ.»

Jubɨ saɗɨge kɨbɨge pɨna kɨya dɨɗɨn̰ Pol

¹² Kɨɗɨn̰ ga kɨɗɨn̰ wol ɨni na, Jubɨ ga pɨna boyge kol Pol bɨ, ɓɨsɨn̰ge gusɨge bɨn̰ gusɨge, yen̰ge gɨ ke na kɨya dɔɔ hɨnga naŋ bɨ, sɔɔ hɨnga naŋ bɨ, bɨrɨŋ gɨsɨn̰ gɨ ke na gɨ dɨɗɨn̰ Pol pa dɨm.

¹³ Kalaŋ ga wayge gusɨge ɓɨsɨn̰ gusɨge le, ɗɨn̰ge kalaŋ toyge-poɗɨn̰.

¹⁴ Kan or wan̰ge ka-cay ka-bɔgɛ kɨbar bɨ, kan ga muɗoldoŋ bɨ, yege hɨn̰: «Ni ɓɨse gusɨni leen̰ cɨndi, gɨ ni kɨya dɔɔ hɨnga naŋ bɨ, sɔɔ hɨnga naŋ bɨ, bɨrɨŋ gɨsɨn̰ gɨ ni gɨ dɨɗɨn̰ Pol pa dɨm.

¹⁵ Kɨŋ-gandi dan̰ ka-cay ka-bɔgɛ kɨbar bɨ, ga muɗoldoŋ bɨ na, bɨgagɨŋ noygɨŋ pɨna dan̰ ka-bɔyɛ kɔl ga gɨmdəŋ bɨ, ɨran̰gɨŋ wayan̰ ba-cay asɨgarn̰əŋ le, ɨngɨriigɨŋ ɗe ban ɨrgan̰ dan̰ Pol bɨgɨŋ agɨŋ jogɨn̰ kobɨn̰ te kɔl koyi le sol ɗaŋ coŋ. Ɨni na, ni-gandi na ni kɨya ƴɔmɛ cay tɨbayni bɨ, kɨɗɨn̰ ga kan kɨya ɨrgan̰ danayi na, ni kɨya dɨɗii te gɨyəŋ gɨŋ.»

¹⁶ Ama Pol tɨmdi kurɔndɔɔ je kɔl gɨ nee le, lee gɨ ban say or a duroy ƴaa di da asɨgarn̰əŋ dɨŋ le, dɨbɨn̰ Pol koldi sɨmayi.

¹⁷ Pol te gumu gɨ da asɨgarn̰əŋ le bɨ yey hɨn̰: «Ɨran̰ dan̰ marɨna le gusi ba-cay asɨgarn̰əŋ le. Kɨya wa ban orɨn̰ dan̰ kɔl gɨ ni dɨbii sɨmayi.»

¹⁸ Gumu gɨ da asɨgarn̰əŋ ga aru le, orɨn̰ danayi gusi ba-cay asɨgarn̰əŋ ga dubu bɨ, yey hɨn̰: «Na Pol gɨ a dangay dɨŋ le ba tɔgɔŋ bɨ, ɨngɨrəŋ gɨ ɨŋ na ɨren̰ dan̰ marɨna gɨ ba kɛ le gusɨn̰ kɨya gɨ ɗi na orɨn̰ dan̰ kɔl gɨ ni dɨbɨn̰ sɨman̰.»

¹⁹ Ba-cay asɨgarn̰əŋ ga dubu le, ƴom kobɨ marɨna le bɨ, ƴomɨn̰ gusɨge walaŋ. Bɨ ban ɨngɨri yey hɨn̰: «Kɛ na koldi wa ma man̰ mal gɨ ni yɔŋ ga?»

²⁰ Marɨna le jɨga dɨbi cay nee hɨn̰: «Kalaŋ ga ni Jubɨ saɗɨge kɨbɨge pɨna kɨya ɨngɨrɨn̰ge gɨ ji na ɨren̰ dan̰ Pol wan̰do tumoy ka-bɔyɛ kɔl ga gɨmdəŋ. Bɨ ke na gɨ lɔɔ hɨn̰ gɨ ke na gey na kɔbɛ te kɔl koyi sɔlɛ ɗaŋ coŋ wo̰.

²¹ Ama ji jɔɔ kɔl koge naŋ, kɨya wa kalaŋ duroyge ɗɨn̰ toyge-poɗɨn̰ woyge nee ɓɨsege gusɨge bɨn̰ gusɨge gɨ ni dɔɔ hɨnga naŋ bɨ, sɔɔ hɨnga naŋ bɨ, bɨrɨŋ gɨsɨn̰ gɨ ke na gɨ dɨɗɨn̰ Pol pa dɨm. Lee gɨ kan wosɨge te gɨyəŋ gɨŋ amiige nee. Kan haw kɛ somge cay tɨbayge dɨŋ ɨni bɨ, kan gamge na kɔl gɨ kɨbɨn̰ gɨ ji na gey ƴɔbɨ.»

²² Ba-sɔmɛ cay asɨgarn̰əŋ le yey hɨn̰: «Kɔl gɨ ji ba yəŋ kɛ le, yon̰ ungo gɨ ɗaŋ naŋ pa pa. Kardi nee na ban ɗe marɨna le jogɨ ƴaadi gɨŋ.»

Ɗodge Pol orɨn̰ danayi tumoy Peligɨs

²³ Kardi nee ɨni na, ba-sɔmɛ cay asɨgarn̰əŋ ga dubu le, te ka-sɔmɛ cay asɨgarn̰əŋ kage ga aru won̰ge sɔɔ bɨ, yege hɨn̰: «Dɨnagɨŋ asɨgarn̰əŋ aru sɔɔ bɨ, ka-hɨndɛrɛŋ toyge-jurgum bɨ, ka-dagɗɨ ga dan̰ tɨbayge aru sɔɔ bɨ, kɨŋ ƴɨman̰ cay-tɨbaygɨŋ kɨya hɨn̰ gɨ tɨwa dɨngɛsə di ni son̰do na, kɨŋ kɨya ɔrɛ Sejare.

²⁴ Ƴɨmagɨŋ cay-tɨbay hɨndɛrɛŋ ɗe Pol kalɨn̰ ma nay danagɨŋ bɨ, ɨran̰gɨŋ danayi ɗɔɔ hɨnga pɨna looyi naŋ bɨrɨŋ gusi ba-kɨbɨ kɨlma gɨ gumu Peligɨs.»

²⁵ Ɨni na, ba-cay asɨgarn̰əŋ ga dubu le, wal magtubu bɨn̰ ba-kɨbɨ kɨlma gɨ gumu yey hɨn̰:

²⁶ «Peligɨs ba-kɨbɨ kɨlma gɨ gumu gɨ kuɗa tɔgɨ, na ɨŋ-bandi Kɨlod Lɨjɨyas ba gɨye can̰, ɨŋ leen̰ lapɨya!

²⁷ Ungo gɨ ɨŋ ba gɨyii bɨn̰ kɛ le, Jubɨn̰əŋ ƴomiige geyge dɨɗii. Bɨ kɨɗɨn̰ ga ɨŋ je koldi gɨ ban na kɨye gɨ ba-cay ƴaa di Rɔm na, ɨŋ orɨn̰ dan̰ asɨgarn̰əŋ kange bɨ, ɨŋ boɗi kobɨge.

²⁸ Ɨŋ gey sɔlɛ te hɨnga ga kan ba sin̰ge kɔl cayi le, na toy di hɨn̰ wo̰ ma, maŋ orɨn̰ danayi tumoy ka-bɔyɛ kɔl cay Jubɨn̰əŋ ga gɨmdəŋ.

²⁹ Bɨ ɨŋ sol gɨ kɔl gɨ kan si cayi le, ojɨ na cay gasɨn̰-kɔl kage kan, ma kan man̰ge kɔl cay nee. Ama hɨnga pɨna ga ojɨ cayi gɨ ungo kɨya saɗɨdii dan̰ mɔrɨyɔŋ naŋ le, dɨɗii le, unɔ.

³⁰ Yəŋge gɨ Jubɨn̰əŋ na ƴomge cay tɨbayge boyge koldi kɨya dɨɗii. Na toy di hɨn̰ wo̰ ma, maŋ gɨyɨn̰ danayi jugu gusɨn̰. Bɨ ɨŋ yen̰ ka-se kɔl cayi le, ɗe kan na ɨra ɗɔɔ koldi tumon̰.»

³¹ Asɨgarn̰əŋ leege hɨnga ga kan yege le. Kan ayge Pol dan̰ duroy son̰do orɨn̰ge danayi Antipatɨris.

³² Wan̰dodo dɨŋ ɨni na, asɨgarn̰əŋ ɗege ka-hɨndɛrɛŋ ba orɨn̰ danayi kan̰dɨge ƴɔbɨ bɨ, kan jɨgage duroy ƴaa di da asɨgarn̰əŋ dɨŋ le.

³³ Kɨɗɨn̰ ga ka-hɨndɛrɛŋ bugoŋ Sejare ƴɔbɨ na, kan bɨn̰ge ba-kɨbɨ kɨlma magtubu bɨ, dobɨge Pol kobi bɨ.

³⁴ Ban ƴee magtubu le ɗongɨsɨ bɨ, ban ɨngɨr Pol ye hɨn̰: «Kɛ ji na ungo gɨ a cay gɨsəŋ ga ani gaŋ ga?» Ban dɨbii cay nee hɨn̰: «Ɨŋ na ungo gɨ wɔɔŋge na cay gɨsəŋ ga Sɨlisi gaŋ.»

³⁵ Ba-kɨbɨ kɨlma le yey hɨn̰: «Kɨɗɨn̰ ga kalaŋ ga ka-segɨn̰ le, na ɨrege bugoŋ pa dɨm ma, maŋ gɨ jɔɔ kɔl gɨ kɨbɨn̰ ƴee.» Bɨ ban ay noyi gɨ kan na gama Pol a duroy ƴaa tɨrɨmbala di tumɔ Kɨlma Ɛrɔd ba-sɔmɛ nee dɨŋ.