Gɨye-lɔɔ 22 - Gabri Maja

¹ Ban yege hɨn̰: «Karmɨnɨ bɨ, ban̰anɨ bɨ, Jagɨŋ kɔl gɨ ɨŋ ba kɨya yogɨŋ haw kɛ dorɨn̰ kɔl canɨ coŋ.»

² Kɨɗɨn̰ ga kan jege gɨ ban yege kɔl dan̰ kɨbɨ əbɨro na, kan jɨga somge sɨndɨŋ ɗɨn̰ gɨ tumɔ coŋ. Ɨni na, Pol yege hɨn̰:

³ «Ɨŋ na Jubɨ, wɔɔŋge na Tars, a cay gɨsəŋ ga Sɨlisi gaŋ bɨ, ama na a cay ƴaa-di-gumu di Jerusalɛm dɨŋ kɛ ma abaŋge nee bɨ, na Gamalɨyɛl, ma na ba gɨləŋ hɨnga bɨ. Ban gɨləŋ gasɨn̰-kɔl gɨ da mon̰inagɨŋ, lee gɨ ɨŋ sol gɨyəŋ gɨ ni ɨre a cay gasɨn̰-kɔl kage gaŋ, dan̰ gɨyəŋdɨge gɨyəŋdɨge. Kɨya wa tumɔ le gusɨnɨ-hɨmbalaŋ tɔgɨ a cay hɨnga ga da Kumu gaŋ, na hɨn̰ gɨ kɨŋ ba leen̰ nɔm labɨde wo̰ bɨ.

⁴ Kalaŋ ga ba ayge gɨyəŋ gɨ da Ba-gulɔŋ Jesu le, ɨŋ gɨlge cɨn̰ tɔgɨ bɨrɨŋ tɨmaydɨge. Ɨŋ ƴom ban̰aŋ bɨ, kandɨ bɨ, beege dangay dɨŋ bɨ.

⁵ Mangɨl gɨ da ka-cay ka-bɔgɛ kɨbar bɨ, dayaŋ gɨ da kan ga muɗoldoŋ bɨ, ɓalge lɔɔ tɨmon̰ danaŋ a cay kɔl gɨ nee le. Ɨŋ ƴee magtubu na kobɨge kan, kɨya orɨn̰ bɨn̰ karmɨni Jubɨ ga a cay ƴaa-di-gumu di Damas dɨŋ. Lee gɨ ɨŋ say orɨn̰ Damas, kɨya orɨn̰ ƴomɨn̰ ka-aye kudurɔ ga somge nee, kɨya ɨrgan̰ danage a cay ƴaa-di-gumu di Jerusalɛm dɨŋ, ɗe kan na gɨlge cɨn̰.»

Pol dor kol bɨle gɨye-lɔɔdi

⁶ «Kɨɗɨn̰ ga ɨŋ ɨre or, baŋ mɨnde gɨ ɨŋ kɨya andaŋ Damas na, tɨwa baa mɨnde kɨya ɨnwa ɗɨrɨj. Kɔl gɨ kɨbɨna kɛ bɨ, asɨn̰a di ƴee tɔgɨ sayga daa ɨrga nɨwɨre canɨ daa dan̰ asɨn̰ado.

⁷ Ɨŋ buɗoŋ baa dugo bɨ, ɨŋ je noy ungo yəŋ hɨn̰: “Sol, Sol, ji gɨləŋ-cɨn̰ wo̰ na kɨya wa ga?”

⁸ Ɨŋ jɨga dɨbii cay nee yey hɨn̰: “Ji na waŋ ga Ba-gulɔŋ?” Noy ungo le jɨga dɨbəŋ cay nee yəŋ hɨn̰: “Ɨŋ na Jesu gɨ Najarɛt gɨ ji ba gɨləŋ-cɨn̰ le.”

⁹ Kalaŋ ga danaŋ le, solge asɨn̰a le, ama jage noy ungo gɨ ba yəŋ kɔl le naŋ.

¹⁰ Kɨɗɨn̰ ga nee gaŋ le, ɨŋ ɨngɨr kɔl ye hɨn̰: “Kɛ ɨŋ gɨ lɔɔ na wa ɨni ga, Ba-gulɔŋ?” Ɨni na, Ba-gulɔŋ jɨga dɨbəŋ cay nee yəŋ hɨn̰: “Saa daa ɨra a Damas. Kɨya wa na a Damas ma kan kɨya yon̰ hɨnga nɔm ga ji kɨya lɔɔ le.”

¹¹ Ama ɨŋ sɨla kɨɗɨn̰ naŋ kɨya gɨ asɨn̰a le bɨbe cɨnɨ. Ɨni na, na karmɨnɨ ka-ɔrɛ tɨrga danaŋ ba ƴɔmɛge kɔbɔŋ dorɨn̰ tumonɨ bɨrɨŋ andɨn̰ge a Damas.

¹² «Bɨ a cay ƴaa-di-gumu di nee le, bara gɨ pɨna wo̰ gɨ gusondi na Ananɨyas som a nee. Ban na ungo gɨ hɨndar Kumu bɨ, na ungo gɨ ɨre a cay Gasɨn̰-kɔl gɨ da Moyis gaŋ bɨ, kalaŋ ga ni Jubɨ nɔm ga Damas yege koldi kuɗa bɨ.

¹³ Ban ɨrga wayaŋ bɨ, yəŋ hɨn̰: “Kurnɨ Sol, jɨga sɨla kɨɗɨn̰ ɗaŋ!” Ɨni na, kɨɗɨn̰di ga nee gaŋ bɨ, ɨŋ jɨga sol kɨɗɨn̰ ɗaŋ ban̰di nee bɨ, ɨŋ sol Ananɨyas bɨ.

¹⁴ Ban yəŋ ɗaŋ coŋ hɨn̰: “Kumu gɨ da mon̰inagɨŋ dorɨn̰ tumɔ hayi, ɗe an̰ na solɨn̰ hɨnga nɔm ga kuduroyi gey bɨ, ɗe an̰ na solɨn̰ gɨ pɨna hayi kəɗ kəɗ gɨ ba-durɔ ɗɨngar gɨ na Jesu bɨ, ɗe gɨ ji na jan̰ tumoyi bɨ.

¹⁵ Kɨya wa ojɨ gɨ ji kɨya bɨləŋ tɨmon̰ toyi tumoy kalaŋ nɔm bɨ, yoge kol hɨnga nɔm ga ji ba je bɨ, sol bɨ.

¹⁶ Haw kɛ na, ji gam na wa coŋ ga? Saa daa ɨra ɗa ɗe kan leen̰ge batɛm. Bɨ dan̰ gɨyəŋ gɨ da dɔnɔ di da guson̰ Jesu na ɨsɨna kon̰ kɨya duroŋ can̰ coŋ.”»

¹⁷ «Kardi nee na ɨŋ jogɨ a cay ƴaa-di-gumu di Jerusalɛm dɨŋ. Wɔlɛ gɨ pɨna wo̰, ɨŋ ol Kumu duroy ƴaa-di-da-Kumu dɨŋ bɨ, hɨnga buyoŋ cɨnɨ hɨn̰ dḛḛ wo̰.

¹⁸ Bɨ ɨŋ sol Ba-gulɔŋ boy hɨnga ga buyoŋ cɨnɨ gaŋ le bɨ, ban yəŋ hɨn̰: “Saa haw. Andaŋ haw ɗaa cay ƴaa-di-gumu di Jerusalɛm coŋ. Kɨya wa kalaŋ ga a kɛ le, kɨya ƴɔɔge tɨmon̰ ton̰ di ji ba kɨya lɔɔ le naŋ.”

¹⁹ Ama ɨŋ jɨga dɨbii cay nee yey hɨn̰: “Ba-gulɔŋ, kan kalɨn̰ ma solge nɔm gɨ ɨŋ na andɨdaŋ a duroy ƴaa-daye-di-da-Jubɨn̰əŋ dɨŋ, ƴɔmɨn̰ kan ga ayge kuduroyge bɨn̰ le. Bɨ ɨŋ beege dangay dɨŋ bɨ, ɨŋ ɗege teegege bɨ.

²⁰ Etɛn gɨ na ba lɔɔ tɨmon̰ ton̰ le, kɨɗɨn̰ ga kan beege kɨbardi dugo le, ɨŋ ɨre nee bɨ. Ɨŋ bugoŋ dan̰ ka-dɨɗedi bɨ, ɨŋ gam badɨge kage bɨ.”

²¹ Ama Ba-gulɔŋ yəŋ hɨn̰: “Ɨra, ɨŋ kɨya gɨyɨn̰ na hen̰, dan̰ kɨɗɨn̰ ga kɛ gaŋ gusi kalaŋ ga toyge na Jubɨ naŋ”.»

Pol dan̰ ba-sɔmɛ cay asɨgarn̰əŋ ga dubu

²² Kalaŋ kondɨ ɨrege nee jege kɔl gɨ da Pol bɨrɨŋ andɨn̰ cay kɔl gɨ nee gɨŋ le. Ayge te dɔgɛ sɨle tɔgɨ yen̰ge hɨn̰: «Ungo gɨ hɨn̰ wo̰ le, na ungo gɨ ni ɗoyi sɔmɛ cay gɨsəŋ gaŋ naŋ! Kuɗa gɨ ni ɗoyi sɔmɛ dan̰ cɨndi naŋ! Kɨŋ dɨɗii coŋ!»

²³ Kan say kaydege gɔsɛ bɨ, torge gɔdɔŋ kage worɨn̰dege daa bɨ, dondege gɨsəŋ wɨjɨdege jɨn̰ daa nee bɨ.

²⁴ Na toy di hɨn̰ wo̰ ma gumu gɨ da asɨgarn̰əŋ le, ay noyi bɨn̰ asɨgarn̰əŋ kayi ɗe kan na orɨn̰ dan̰ Pol a duroy ƴaa di da asɨgarn̰əŋ dɨŋ. Bɨ kan na sɨmdayge bɨrɨŋ bɨrɨŋ ɗe ban na yege te hɨnga ga kalaŋ na den̰ge sɨle cayi le.

²⁵ Kɨɗɨn̰ ga kan ɨre saɗɨde Pol kɨya somdiige na, ba-cay asɨgarn̰əŋ ga aru gɨ pɨna wo̰ ɨre durdi bɨ, Pol yey hɨn̰: «Kɛ a boy Gasɨn̰-kɔl gaŋ le, ojɨ gɨ kɨŋ kɨya sɔmdɛ kɨye ba-cay ƴaa di Rɔm, wase dɨle bɔyɛ kɔl cay ga?»

²⁶ Kɨɗɨn̰ ga ba-cay asɨgarn̰əŋ ga aru le, je kɔl gɨ nee le na, ban or yon̰ ba-sɔmɛ cay asɨgarn̰əŋ ga dubu le hɨn̰: «Kɛ ji ni gɨ lɔɔ na wa wo̰ ga? Ungo le na kɨye ba-cay ƴaa di Rɔm!»

²⁷ Gumu gɨ da asɨgarn̰əŋ ga dubu le, ɨrga gusi Pol ɨngɨri hɨn̰: «Ji na kɨye ba-cay ƴaa di Rɔm leen̰ cɨndi ga?» Bɨ Pol jɨga dɨbii cay nee hɨn̰: «Əw!»

²⁸ Ba-cay asɨgarn̰əŋ le yey hɨn̰: «Ɨŋ-bandi, ɨŋ bee gursu kondɨ pa dɨm ma, maŋ bɨlɨn̰ kɨye gɨ ba-cay ƴaa di Rɔm ƴee.» Pol jɨga dɨbii cay nee yey hɨn̰: «Ama ɨŋ-bandi na, Ayɨn̰ toy gɨ kan wɔɔŋge na, Ɨŋ na kɨye ba-cay ƴaa di Rɔm.»

²⁹ Kɔl gɨ kɨbɨna kɛ bɨ, asɨgarn̰əŋ ga ba geyge sɔmdɛ Pol ɗe na yege kɔl le, torge toyge doŋ coŋ. Ɨni na, hundɔrɔ lee ba-cay asɨgarn̰əŋ le, kɨya wa ban saɗɨde kɨye gɨ ba-cay ƴaa di Rɔm dan̰ mɔrɨyɔŋ.

³⁰ Wan̰dodo dɨŋ na, ba-sɔmɛ cay asɨgarn̰əŋ le gey sɔlɛ te hɨnga ga leen̰ cɨndi, ga kalaŋ ga ni Jubɨ ba sɨn̰ge kɔl a cay Pol le. Bɨ ban tor mɔrɨyɔŋ gusi coŋ bɨ. Ban te ka-cay ka-bɔgɛ kɨbar bɨ, ka-bɔyɛ kɔl cay kalaŋ ga ni Jubɨ bɨ. Ɗe kan na dayage cayge. Kardi nee na, ban ɨrgan̰ dan̰ Pol sii tumoyge.