Gɨye-lɔɔ 21 - Gabri Maja

Pol or jɨn̰ Jerusalɛm

¹ Kɨɗɨn̰ ga ni ɗege ɨni na, ni say nay boy koburo gɨ gumu taa taa gɨŋ bɨ, orɨn̰ dan̰ durɔ bɨrɨŋ andɨn̰ a cay hɔgɨwa gɨ Kos gɨŋ. Wan̰dodo dɨŋ na, ni bugoŋ a hɔgɨwa gɨ Rod. Ni say nee or cay ƴaa-di-gumu di Patara.

² Ni way koburo gɨ gumu taa taa gɨ pɨna wo̰ gɨ or jɨn̰ Pinisi. Ni say nay boy nee bɨ, ni orɨn̰.

³ Ni bugoŋ mɨnde a kɨɗɨn̰ ga ni sol cay gɨsəŋ ga Sɨpɨr cɨndɨni ɨni na, ni cangɨ cɨn̰ ga manga da hɔgɨwa gɨ nee gɨŋ le, kɨya orɨn̰ jɨn̰ cay gɨsəŋ ga Siri gaŋ. Ni ɨre dugo a Tir kɨya gɨsɨnɨn̰ hɨnga ga a boy koburo gɨ gumu taa taa gɨŋ a nee.

⁴ Ni way ka-aye-cay-tɨbay Jesu a nee, lee gɨ ni som danage lee wɔlɛ jurgum. Turnɔ di da Kumu jɨbɨge lee gɨ kan yen̰ Pol hɨn̰: «Ɔrɛ a cay ƴaa-di-gumu di Jerusalɛm dɨŋ naŋ.»

⁵ Ama kɨɗɨn̰ ga ni dɨɗɨ kɨbɨ wɔlɛ gɨ jurgum le ɨni na, ni say bugoŋ gɨyəŋ codɨn̰ gɨyəŋ tɨrga toni. Kan nɔm dan̰ kandɨge bɨ, karɨndɨge bɨ, beenige bɨrɨŋ andɨn̰ kɨbɨ cay ƴaa-di-gumu dɨŋ doŋ. Nɔm toni dɨŋ ni poy gɨbayni dugo a cay kɨlay gɨ kɨbɨ kuray gɨ gumu taa taa gɨŋ kɨya olɨn̰ Kumu.

⁶ Kɨɗɨn̰ ga ni leen̰ gusɨni lapɨya ɗen̰ gusɨni ɨni na, ni nay duroy koburo gɨ gumu taa taa gɨŋ bɨ, kan bɨle cayge jogɨge duroy ƴaadɨge dɨŋ bɨ.

⁷ Ni dɨɗɨ kɨbɨ ɔrɛ tɨrga toni dan̰ koburo gɨ gumu taa taa, gɨ ni san̰ a Tir jɨn̰ Pɨtolemayis le. Ni andaŋ a cay ƴaa-di-gumu di nee le, leen̰ karmɨni ga somge nee lapɨya bɨ, ni som danage lee wɔlɛ pɨna.

⁸ Wan̰dodo dɨŋ na, ni or a cay ƴaa-di-gumu di Sejare dɨŋ bɨ, ni gɨsɨn a da Pilib ba tɔgɛ bɛrnɛ Kɔl-gɨ-Ɗari. Ban na ungo gɨ pɨna wo̰, duroy ban̰aŋ ga jurgum ga kan torge kɨya jɨbe te Ka-Daye le.

⁹ Ban orɨn̰ dan̰ karɨndi ga kandɨ poɗɨn̰ ga na kambɨle ga cɨl. Kan na ka-yɔɔ-kɔl-gɨ-Kumu-ba-yɔɔ.

¹⁰ Ni somɨn̰ danage leen̰ wɔlɛ kondɨ ɨni na, ba-yɔɔ-kɔl-gɨ-Kumu-ba-yɔɔ gɨ pɨna wo̰, gɨ sayga a cay gɨsəŋ ga Jude gaŋ ɨrga bugoŋ, gusondi na Agabus.

¹¹ Ban ɨrga wayni bɨ, ay sɔndurɔŋ gɨ da Pol saɗɨn̰ tɨbayi toyi bɨ, kobi koyi bɨ ye hɨn̰: «Kɔl gɨ Turnɔ ɗe-kuduroy-bɛrɛ ba ye ba kɛ: Ba-gulɔŋ sɔndurɔŋ gɨ ba kɛ le, Jubɨn̰əŋ kɨya saɗɨdiige hɨn̰ wo̰, a cay ƴaa-di-gumu di Jerusalɛm dɨŋ bɨ, kɨya dobiige kobɨ kalaŋ ga toyge na Jubɨ naŋ bɨ.»

¹² Kɨɗɨn̰ ga ni je kɔl gɨ nee le na, ni-gandi bɨ, kan ga Sejare bɨ, ni ol Pol gɨ ban na gɨ ɔrɛ Jerusalɛm naŋ.

¹³ Ama ban dɨbni cay nee yeni hɨn̰: «Kɨŋ ɨle bɨ, kɨŋ mal ɗe gɨ kuduronɨ na mundoŋ bɨ, na kɨya wa ga? Ɨŋ-bandi ɨŋ som pɛɗɛɗɛ a cay tɨbanɨ dɨŋ na kɨya gɨ kan na gɨ saɗɨdaŋ ƴɔbɨ naŋ, ama kɨya cay guson̰ Ba-gulɔŋ Jesu na, ɨŋ-bandi ɨŋ som pɛɗɛɗɛ a cay tɨbanɨ dɨŋ na kɨya marɨn̰ a Jerusalɛm.»

¹⁴ Hɨn̰ gɨ ban ba kan̰ jɔɔ kɔl kɨbɨni na, ni laa ləgɨnə toyi naŋ bɨ, ni yey hɨn̰: «Kuɗa gɨ Ba-gulɔŋ laa kuduroy geye koyi.»

¹⁵ Kardi wɔlɛ gɨ nee le, kɨɗɨn̰ ga ni n̰an cay hɨnga kani daa ɨni na, ni say nay kɨya ɔrɛ jɨn̰ cay ƴaa-di-gumu di Jerusalɛm dɨŋ.

¹⁶ Ka-aye-cay-tɨbay Jesu ga malge gɨyəŋ gɨ ni ɔrɛ Jerusalɛm bɨ le, ƴomge gɨyəŋ danani. Kan orɨn̰ge danani a da gɨlmi gɨ pɨna wo̰ gɨ gusondi na Mɨnaso̰, lee gɨ ni woy a tayi. Ban na ungo gɨ jɨn̰ cay ƴaa di Sɨpɨr dɨŋ bɨ, ban na ba-aye-cay-tɨbay Jesu gɨ jɨne hayi bɨ.

Pol or sɔlɛ Jag

¹⁷ Kɨɗɨn̰ ga ni bugoŋ a cay ƴaa-di-gumu di Jerusalɛm dɨŋ na, karmɨni ƴomnige gusɨge dan̰ gusi-mɔwa tɔgɨ.

¹⁸ Wan̰dodo dɨŋ ɨni na, Pol say or danani a da Jag, kɨɗɨn̰ ga nee gaŋ le, kan ga muɗoldoŋ nɔm dayge cayge a nee.

¹⁹ Pol leege lapɨya bɨ, ban dorge kol hɨnga nɔm ga Kumu lee dan̰ gɨyəŋ gɨ da gɨye koyi, a duroy kalaŋ ga toyge na Jubɨ naŋ.

²⁰ Kɨɗɨn̰ ga kan jege kɔl koyi coŋ ɨni na, kan hɨramge Kumu bɨ, jɨgage yen̰ge Pol hɨn̰: «Kurɨndɨni, ji sɨla, a kɛ kalaŋ ga ni Jubɨ dubu kondɨ ayge kuduroyge bɨ, kan nɔm kobɨge na gasɨn̰-kɔl gɨ da Moyis dan̰ ɗugoyge ga pɨna bɨ.

²¹ Kan jege kɔl kɨbɨ kalaŋ ga yege gɨ ji na gɨlɨn̰ kalaŋ ga ni Jubɨ nɔm ga somge a cay jaa di da te wɔɔ gɨ da kalaŋ ga toyge na Jubɨ naŋ gaŋ, ji na yege gɨ na ojɨ gɨ kan na ɗa gasɨn̰-kɔl gɨ da Moyis coŋ bɨ, ojɨ gɨ kan na gɨ walɨn̰ karɨndɨge ban̰a naŋ bɨ, ojɨ gɨ kan na gɨ kɔbɛ hada ga da mon̰inagɨŋ naŋ bɨ.

²² Na wa ma ojɨ gɨ ni lɔɔ ga? Kɨya wa naa wa wa kalɨn̰ ma, kan kɨya jɔɔ gɨ ji na ɨrga bugoŋ a kɛ le ɨni.

²³ Naa hɨn̰ wo̰ na, ji laa hɨnga ga ni ba kɨya yon̰ kɛ. Ni orɨn̰ dan̰ ban̰aŋ won̰ poɗɨn̰ kɛ ga ayge noyge bɨn̰ Kumu.

²⁴ Ɨran̰ danage kobɨn̰ bɨ, ɨra dɔrɛ gusɨn̰ mɨra danage bɨ, bee hɨnga kol cayge ɗe kan dɨlɨn̰ cayge bɨ. Kɨɗɨn̰ ga nee le, kalaŋ nɔm kɨya sɔlɛge gɨ ji naa ba lɔɔ hɨnga ga gasɨn̰-kɔl gɨ da Moyis ba ye bɨ, kɔl gɨ ba ye ojɨ can̰ le, kan kɨya sɔlɛ leen̰ kɔl gɨ kalɨn̰ wo̰ dugo.

²⁵ Ama gɨ ojɨ cay kalaŋ ga toyge na Jubɨ naŋ ga ayge kuduroyge le, ni ay noyni wal duroy magtubu dɨŋ gɨyɨn̰ bɨge ɨni. Ni yege gɨ kuɗa gɨ kan na gɨ dɔɔ culom gɨ dɨɗɨge n̰ɨrɨn̰ge kulan̰əŋ naŋ bɨ, dɔɔ kɨbar naŋ bɨ, dɔɔ culom gɨ asɨri naŋ bɨ, kan na gɨ yɔyɛ dan̰ gangɨ cayge naŋ bɨ.»

²⁶ Wan̰dodo dɨŋ ɨni na, Pol orɨn̰ dan̰ ban̰aŋ ga poɗɨn̰ le bɨ. Ay te ɔrɛ dɔrɛ gusi mɨra danage. Kardi nee ɨni na, ban andaŋ duroy ƴaa-di-da-Kumu dɨŋ bɨ. Yege wɔlɛ gɨ kan kɨya dɨɗɨn̰ kɨbɨ dɔrɛ gusɨge mɨra bɨ, wɔlɛ gɨ kan kɨya ɨrgan̰ dan̰ hɨnga ga ni bogɨn̰ kɨbar bɨn̰ Kumu ga ojɨ cayge pɨna pɨna bɨ.

Ƴomge Pol a boy ƴaa-di-da-Kumu dɨŋ

²⁷ Kɨɗɨn̰ ga baa mɨnde gɨ wɔlɛ gɨ jurgum gɨ ojɨ gɨ ni dorɨn̰ gusɨ mɨra ɓal dɛj ɨni na, kalaŋ ga ni Jubɨ ga saygage a cay gɨsəŋ ga Aji gaŋ solge Pol duroy ƴaa-di-da-Kumu dɨŋ na, kan gosɨrge dɨmdɨrdi kalaŋ bɨ, ƴomge Pol.

²⁸ Kan dege sɨle yege hɨn̰: «Gɨrnigɨŋ daa, kalaŋ ga Ɨsɨrayɛl! Sɨlagɨŋ ungo gɨ ba gɔrɛ dan̰ kɨɗɨn̰ kɨɗɨn̰ nɔm gɨlɨn̰ kalaŋ nɔm ɗe na kayɨn̰ge te wɔɔ gɨ da kalaŋ kana bɨ, gasɨn̰-kɔl gɨ da Moyis bɨ, ƴaa-di-da-Kumu di ba woy kɛ bɨ le, ban ba kɛ! Bɨ haw kɛ kalaŋ ga toyge na Jubɨ naŋ kalɨn̰ ma, ban dorge andɨn̰ danage boy ƴaa-di-da-Kumu di woy dan̰ cɨndo dɨŋ le, say bɨloo leen̰ kɨɗɨn̰ ga lee kɨni.»

²⁹ Kan ye kɔl gɨ nee le, na kɨya gɨ kan tumɔ solge Tɨropim gɨ na ungo gɨ Epɛs dan̰ Pol a duroy cay ƴaa-di-gumu dɨŋ bɨ, kan ɨrɨm gɨ Pol na gɨ ɗoyi andaŋ danayi boy ƴaa-di-da-Kumu dɨŋ bɨ.

³⁰ Kɔl gɨ nee le, ƴee cay ƴaa-di-gumu nɔm, lee gɨ kalaŋ dulomge nɔm ɨrgage. Kan ƴomge Pol, siriige doriige coŋ duroy ƴaa-di-da-Kumu dɨŋ bɨ, kɔl gɨ kɨbɨna kɛ bɨ, kan lɨgɨdege kɨbɨ ƴaan̰əŋ daa bɨ.

³¹ Kɨɗɨn̰ ga kan gey gɨ ni dɨɗii ɨni na, koldi or bɔɔ a sɨmay gumu gɨ ba-sɔmɛ cay asɨgarn̰əŋ ga dubu le, lee gɨ kan yeyge hɨn̰ kalaŋ nɔm nɔm ga a cay ƴaa-di-gumu di Jerusalɛm dɨŋ, orge na lɨwdɨn̰ lɨwdɨn̰ cay gusɨge.

³² Kɨɗɨn̰di ga nee gaŋ le bɨ, gumu gɨ ba-sɔmɛ a cay asɨgarn̰əŋ le, tor ka-sɔmɛ cay asɨgarn̰əŋ bɨ, dan̰ asɨgarn̰əŋ bɨ, gɨrɨn̰ orɨn̰ wan̰ dɨmdɨrdi kalaŋ ga dayge cayge le. Kɨɗɨn̰ ga kan solge gumu gɨ ba-sɔmɛ cay asɨgarn̰əŋ dan̰ asɨgarn̰əŋ ɨni na, kan ɗege tɔgɛ Pol baa,

³³ ɨni na, gumu gɨ ba-sɔmɛ cay asɨgarn̰əŋ le, or gusi Pol ƴomii bɨ, ay noyi gɨ kan na saɗɨdɨdayige dan̰ mɔrɨyɔŋ won̰ sɔɔ. Kardi nee ɨni na, ban ɨngɨr hɨn̰: «Kɛ ungo le na waŋ ga bɨ, kɛ ban lee na wa bɨ ga?»

³⁴ Ama duroy kalaŋ ga ba dayaŋge le, waŋ waŋ kalɨn̰ ma, dor noy daa tɔgɨ yen̰ kɔl koyi bɨ, mɨgay gɨ durdi ye kɔl gɨ toyi ɗaŋ bɨ. Kɨɗɨn̰ ga noyge ye tɔgɨ na, ban ɓala gɨ ni jɔɔ te kɔl le naŋ. Lee gɨ ban ay noyi gɨ kan na ɨran̰ dan̰ Pol a kɨɗɨn̰ ga da asɨgarn̰əŋ gaŋ.

³⁵ Kɨɗɨn̰ ga Pol ay te nɔɔ jɨn̰ daa cay hɨnga ga ni non̰ daa na, asɨgarn̰əŋ say ayige daa kɨya gɨ dɨmdɨrdi kalaŋ orɨn̰ge danayi tɔgɨ.

³⁶ Kɨya wa kalaŋ nɔm kobɨge kardi den̰ge sɨle yen̰ge hɨn̰: «Dɨɗiigɨŋ.»

Pol dor kɔl dorɨn̰ kɔl cayi

³⁷ Kɨɗɨn̰ ga baa mɨnde gɨ kan kɨya andɨn̰ dan̰ Pol duroy ƴaa gɨ da asɨgarn̰əŋ na, ban ɨngɨr gumu gɨ ba-sɔmɛ a cay asɨgarn̰əŋ ga dubu le hɨn̰: «Kɛ ji gɨ ɗɔŋ yɔɔ kɔl pɨna naŋ ga?» Ɨni na, ban dɨbii cay nee yeyi hɨn̰: «Hay! Ji sol kɨbɨ Gɨrɛg ga?»

³⁸ Kɛ ji na ungo gɨ Ejɨpt gɨ nagɨni nagɨni dugo kɛ, gosɨr kalaŋ ɗe na san̰ge dan̰ ka-dɔɔ cay ƴaa bɨ, dorɨn̰ kalaŋ ga ɨrege pḛḛ kɨya dɨɗe kalaŋ torge dubu poɗɨn̰ beege can̰ orɨn̰ danage duroy dal dɨŋ le naŋ ga?

³⁹ Pol jɨga dɨbii cay nee yeyi hɨn̰: «Ɨŋ na Jubɨ gɨ wɔɔŋge a Tars, a cay gɨsəŋ ga Sɨlisi gaŋ. Ɨŋ na kɨye gɨ ba cay ƴaa-di-gumu di gusɔndɔ ye tɔgɨ. Ɨŋ olɨn̰, ɗaŋ aŋ yen̰ kalaŋ kɔl.»

⁴⁰ Ba-sɔmɛ cay asɨgarn̰əŋ le ɗe Pol dor kɔl. Ɨni na, Pol ɨre a cay kɨɗɨn̰ ga ni non̰ jɨn̰ daa duroy ƴaa gɨŋ le bɨ, ban lee kobi, ɨni na, kalaŋ nɔm ɨrege sɨndɨŋ. Bɨ Pol say yege kɔl dan̰ kɨbɨ əbɨro.