Gɨye-lɔɔ 20 - Gabri Maja

Pol or a cay gɨsəŋ ga Masedɨwan bɨ Gɨrɛs bɨ

¹ Kɨɗɨn̰ ga do̰ di baa le tɔɔ ayaŋ ɨni na, Pol te ka-aye-cay-tɨbay Jesu bɨ, dobɨ bandɨ kuduroyge bɨ. Kardi nee ɨni na, ban leege lapɨya bɨ ay gɨyəŋ orɨn̰ Masedɨwan.

² Ban kayde cay gɨsəŋ ga nee le bɨ, dobɨ bandɨ gɨɗaŋ kuduroy ka-aye kudurɔ ga somge nee. Ban say nee or bɨrɨŋ bugoŋ a cay gɨsəŋ ga Gɨrɛs gaŋ.

³ Bɨ ban som nee leen̰ kɨdɨrɛ sɨbɨ. Kɨɗɨn̰ ga ban or kɨya aye koburo gɨ gumu taa taa kɨya orɨn̰ a cay gɨsəŋ ga Siri gaŋ ɨni na, ban je gɨ Jubɨn̰əŋ na boyge koldi kɨya looyiige ɨsɨna. Ɨni na, ban ojɨ gɨ ni bɨle cay jɔgɛ Siri dan̰ gɨyəŋ gɨ Masedɨwan dan̰ tɨbayi.

⁴ Kan ga beeyige te gɨyəŋ di tɨrga toyi dɨŋ le gusondɨge ba kɛ: Sopater, kurɨn̰ Pirus gɨ a Bere bɨ, Aristarg dan̰ Sugundus gɨ a Tesalonigɨ bɨ, Gayus gɨ a Dɛrbɨ bɨ, Timote bɨ, Tisig dan̰ Tɨropim, kan na kalaŋ ga a cay gɨsəŋ ga Aji gaŋ bɨ.

⁵ Kan ga nee le nɔm orge tumoyni gamnige a cay ƴaa-di-gumu di Tɨrowas dɨŋ.

⁶ Ni-gandi na, ni nay koburo gɨ gumu taa taa gɨŋ a Pilib na a kardi kɨdɨrɛ gɨ ojɨ cay mapa gɨ kan laage dan̰ subugu naŋ. Leen̰ wɔlɛ bay a cay kaŋ gaŋ dɨm ma mani wayge a Tɨrowas ƴee. Ni somɨn̰ danage ɓal dɨmasɨ pɨna.

Pol a cay ƴaa-di-gumu di Tɨrowas

⁷ Ni dayaŋ dan̰ wɔlɛ gɨ ni dɨmasɨ kɨbɨ hɨnga ga ni dɔɔ ga da Ba-gulɔŋ gaŋ, kɨya doon̰ mapa pɨna ɨni na, Pol say dor kɔl bɨn̰ kalaŋ ga dayaŋ le bɨrɨŋ andɨn̰ duroy kɨɗɨn̰, kɨya wa ban gey ɔrɛ tɨrga dan̰ jogɨɗɨ.

⁸ Ƴaa di woy a cay mɨga dɨŋ daa di ni ba dayaŋ boy nee le, tɨwa di ni lamba kondɨ asɨn̰ kɨɗɨn̰ boy nee.

⁹ Marɨna gɨ pɨna wo̰ gɨ gusondi na Etis som a cɨn̰ holoŋdi ƴaa gɨŋ. Kɨɗɨn̰ ga Pol dor kɔl kardi sɨngɨɗɨ tɔgɨ na, kuŋ ƴom cɨn̰ marɨna le, lee gɨ ban woy kuŋ sɨlag bɨ, ban sɨroŋ cɨn̰ holoŋdi ƴaa gɨ woy cay mɨgay gɨ sɨbɨdi gɨŋ daa le ba vbib dugo. Kɨɗɨn̰ ga kan ɨrga age na ayi daa na, kan wayge na tɨmaydi.

¹⁰ Ɨni na, Pol gɨsɨn dugo dan̰ gɨre gɨ daa or gusi, ayi duroy kobi gɨŋ bɨ yege hɨn̰: «Ɗɔɔgɨŋ ɗugoygɨŋ algɨŋ naŋ! Kɨya wa habedi baa gusi haw kɛ ƴee.»

¹¹ Pol jogɨ nɔɔ daa a cay ƴaa gɨŋ boy mapa dii danani. Kardi nee na, ban say dor kɔl bɨrɨŋ andɨn̰ te kɨɗɨn̰ dɨm ma san̰ orɨn̰ tɨrga toyi ƴee.

¹² Marɨna le, kan jogɨn̰ge danayi a tayi dan̰ cɨndi bɨ, kalaŋ nɔm ɗugoyge baa dugo bɨ.

Pol say Tɨrowas or Mile

¹³ Ni-gandi na, ni say nay boy koburo gɨ gumu taa taa gɨŋ orɨn̰ tumoy Pol. Ni or bɨrɨŋ andaŋ a Asos, na kɨɗɨn̰ ga ni ojɨ aye Pol kobɨni a nee, kɨya wa Pol ojɨ aye gɨyəŋ dan̰ tɨbayi.

¹⁴ Kɨɗɨn̰ ga ban ɨrga wayni a Asos na, ni ayi a boy koburo gɨ gumu taa taa gɨŋ bɨ, ni orɨn̰ a Mitilɛn.

¹⁵ Kardi nee, ni say a nee or dan̰ koburo gɨ gumu taa taa bɨrɨŋ wan̰dodo dɨŋ na, ni sol hɔgɨwa gɨ Cɨyo tumoyni. Bɨ ɗaŋdodo dɨŋ na, ni bugoŋ mɨnde dan̰ Samos. Bɨ wɔlɛ gɨ ɗaŋ kardi nee na, ni ɨre dugo a Tɨrogɨlyo̰ bɨ, ni orɨn̰ bugoŋ a cay ƴaa-di-gumu di Mile dɨŋ.

¹⁶ Kɨya wa Pol gey pɨde Epɛs dɨle ɨre dugo, kɨya gɨ ban gey nɨngɨdɨde tɔgɨ a cay gɨsəŋ ga Aji gaŋ naŋ. Kɨya wa ban gey ɔrɛ haw dan̰ cɨndi tumɔ. Bɨ hɨn̰ gɨ na uja na, ban gey bugoŋ a cay ƴaa-di-gumu di Jerusalɛm tumoy wɔlɛ gɨ ni leen̰ kɨdɨrɛ gɨ ni Pantekot.

Pol yen̰ kalaŋ ga muɗoldoŋ ga Epɛs kɔl

¹⁷ Kɨɗɨn̰ ga ni ɨre Mile na, Pol ƴobɨ tee kan ga muɗoldoŋ ga a duroy Ka-Daye ga Epɛs ɗe kan na ɨrgage wayi.

¹⁸ Kɨɗɨn̰ ga kan ɨrga wayi ɨni na ban yege hɨn̰: «Ayɨn̰ toy gɨ ɨŋ ba dɨbɨ tɨbanɨ a cay gɨsəŋ ga Aji gaŋ le, kɨŋ sol hɨnga lɔɔnɨ ga ɨŋ le daa daa somɨn̰ duroy gɨŋ le kuɗa.

¹⁹ Ɨŋ lee gɨye gɨ da Ba-gulɔŋ dɨle dogɨn̰ jorgɨnɨ bɨ, dan̰ ɨle bɨ, duroy cɨn̰-n̰age dɨŋ bɨ, kɨya wa Jubɨ ga pɨna boyge kolnɨ gɨ ni looŋ ɨsɨna.

²⁰ Kɨŋ sol gɨ ɨŋ wɨsagɨŋ cay hɨnga pɨna ga kɨya laa danagɨŋ dugo naŋ: Ɨŋ tee bɛrnɛdi hɨnga nɔm bɨ, ɨŋ gɨlgɨŋ hɨnga nɔm bɨ, na a kɨɗɨn̰ ga woli gaŋ bɨ, a duroy ƴaadɨgɨŋ dɨŋ bɨ.

²¹ Tɨmon̰ tɨnge di ɨŋ ba lee kɨya cay Jesu le, tee na kalaŋ ga ni Jubɨ bɨ, Gɨrɛg bɨ, ɗe na bɨlege gɨye-lɔɔdɨge bɨlɨn̰ge gusɨge gusi Kumu bɨ, ɗe gɨ kan na bɨgan̰ kuduroyge a cay Ba-gulondɨna Jesu bɨ.

²² «Haw kɛ na, ɨŋ or na jɨn̰ Jerusalɛm, na Turnɔ ɗe-kuduroy-bɛrɛ ba jɨbəŋ gɨ ɨŋ na ɨra. Bɨ ɨŋ sɨla hɨnga ga ba kɨya andaŋ canɨ a nee naŋ.

²³ Ama boy cay ƴaa ga gɨmdəŋ gɨmdəŋ nɔm le, Turnɔ ɗe-kuduroy-bɛrɛ dɨbəŋ sɨmanɨ gɨ: Dangay bɨ, dɔsɛ-ɗugɔ bɨ, na woyge amaŋge nee.

²⁴ Ama ɨŋ sɨla sɔmɛ-bɨra hɨnge laan̰ hɨnga cɨnɨ naŋ. Hɨnga ga ɨŋ ba mal na, na gɨ ɨŋ na ɨr usa cay tɨbanɨ dɨŋ bɨ, dɨɗɨn̰ kɨbɨ gɨye gɨ Ba-gulɔŋ Jesu ba bəŋ le dan̰ ɗarway bɨ. Ban ma na lɔɔ tɨmon̰ tɨnge di ojɨ cay Kɔl-gɨ-Ɗari gɨ ojɨ cay ɗarwa di da Kumu le.

²⁵ «Haw kɛ na, ɨŋ sol kuɗa gɨ kɨŋ-gandi nɔm ga ɨŋ gor duroygɨŋ teen̰ bɛrnɛ kɔl gɨ ojɨn̰ cay dɔɔ-ƴaa gɨ da Kumu le, kɨŋ kɨya sɔlɛ cɨnɨ naŋ bɨrɨŋ ɨni.

²⁶ Ɨŋ ɓal yogɨŋ labɨde tumoygɨŋ waŋ: Hɨn̰ gɨ ungo pɨna duroygɨŋ na kayaŋ na, koldi ƴɨma canɨ naŋ ɨni.

²⁷ Kɨya wa ɨŋ tee bɛrnɛdi hɨnga nɔm ga Kumu ba ojɨ lɔɔ bɨgɨŋ le, dɨle wɔsɛ cay hɨnga pɨna dugo.

²⁸ Sɨgɨŋ muɗɔlɛ cay gusɨgɨŋ gɨŋ bɨ, a cay kalaŋ ga Turnɔ ɗe-kuduroy-bɛrɛ ba beege kobɨgɨŋ hɨn̰ gamge wo̰ bɨ le. Aban̰gɨŋ Ka-Daye ga da Kumu ga ban kɨlge dan̰ kɨbardi gusi koyi hɨn̰ ba sɔlɛ kardi gamge wo̰ le.

²⁹ «Ɨŋ sol kuɗa gɨ karɨnɨ na, kalaŋ ga ɨsɨndəŋ hɨn̰ gaye-ga-coŋ wo̰, kɨya andaŋge duroy gamge gaŋ sugudɨge coŋ.

³⁰ Bɨ duroygɨŋ kɨŋ-gandi gusɨgɨŋ kogɨŋ gaŋ kalɨn̰ ma, kalaŋ ga pɨna kɨya sɔ gɨ ni dɔrɛ kɔl poy gɨ ni dorɨn̰ ka-aye-cay-tɨbay Jesu bogɨge kardɨge bɨ.

³¹ Hɨn̰ wo̰ na, sɨgɨŋ muɗɔlɛ cay gusɨgɨŋ gɨŋ bɨ. Hɨngɨŋ cay ɨlge gɨ sɨbɨ, gɨ son̰do bɨ, tɨwa di ɨni bɨ, ɨŋ ba dɨl halgɨŋ pɨna pɨna dan̰ ɨle cɨnɨ naŋ le.

³² Haw kɛ na, ɨŋ ɗegɨŋ na kobɨ Kumu bɨ, kobɨ kɔl gɨ da ɗarwa toyi bɨ, gɨ ɨŋ ba yəgɨŋ koldi le. Kɨya wa kɔl gɨ nee le, orɨn̰ dan̰ dɔnɔ di kɨya lɔɔ gɨ kɨŋ kɨya malge te aye kudurɔ kogɨŋ gɨŋ bɨ, wan̰ hɨnga ga ni ban̰di gulɔŋ ga Kumu kɨya bɨn̰ kalaŋ kayi ga ban torge sige dan̰ cɨndɨge le.

³³ Ɨŋ dɨŋga gursu wala, lɔr wala, badɨge ga da ungo kayi cay pɨna naŋ bɨrɨŋ.

³⁴ Kɨŋ gusɨgɨŋ gaŋ kalɨn̰ ma, kɨŋ sol gɨ ɨŋ lee gɨye na dan̰ kɔbɔŋ ma maŋ wan̰ hɨnga ga n̰agedɨge ləŋ bɨ, lee ka-pogɨn̰ɨnɨ ga danaŋ bɨ le.

³⁵ Ɨŋ-bandi, ɨŋ gɨlgɨŋ daa daa gɨ ojɨ gɨ ni lɔɔ gɨye hɨn̰ wo̰ kɨya jɨbɨn̰ te kan ga wɔɔdɨge unɔ bɨ, agɨŋ na hɨnɨn̰ a cay kɔl gɨ Ba-gulɔŋ Jesu gusi koyi gaŋ ba ye hɨn̰: “Tumoy wolwa gɨ da ba bee hɨnga le, ɗɨn̰ gɨ da ban gɨ ba-ƴɔɔ coŋ.”»

³⁶ Kardi kɔl gɨ nee le, ban poy gɨbayi dugo danage nɔm bɨ, olɨn̰ Kumu.

³⁷ Kɨɗɨn̰ ga nee le, kalaŋ nɔm bugoŋge daa dan̰ ɨle bɨ, bugoŋge kordi Pol bɨ, ƴomiige gasɨbiige bɨ.

³⁸ Hɨnga ga ba leege cɨn̰ kula le, na kɔl gɨ ban ye hɨn̰ kan na gɨ sɔlɛ cɨndi naŋ bɨrɨŋ ɨni le. Kardi nee ɨni na, kan beeyige bɨrɨŋ andɨn̰ danayi kɨbɨ koburo gɨ gumu taa taa gɨŋ.