Gɨye-lɔɔ 2 - Gabri Maja

Turnɔ ɗe-kuduroy-bɛrɛ caga

¹ Kɨɗɨn̰ ga wɔlɛ gɨ ni leen̰ kɨdɨrɛ gɨ ni Pantekot ɓal ɨni na, kan nɔm dayge cayge kɨɗɨn̰ ga pɨna gaŋ.

² Kɨɗɨn̰di ga nee gaŋ le bɨ, noy hɨnga sayga gɨɗɨgɨ-Kumu gɨŋ, hɨn̰ noy kal gɨ yaga dan̰ togi tɔgɨ wo̰. Noy hɨnga le, ƴee duroy ƴaa gɨ kan ba somɨn̰ge nee le nɔm.

³ Ɨni na, kan solge hɨnga andɨdaŋ gɨlɨn̰ hɨn̰ kɨlen̰ tɨwa wo̰ busdoŋ bɨ, sugudɔŋ cayge pɨna pɨna nɔm bɨ.

⁴ Turnɔ ɗe-kuduroy-bɛrɛ ƴee kuduroyge nɔm, lee gɨ waŋ waŋ kalɨn̰ ma ay te yɔɔ kɨbɨ gɨ ɗaŋ, hɨn̰ gɨ Turnɔ di da Kumu ba bɨge tɔgɨ di ni yon̰ wo̰.

⁵ A boy wɔlɛdi gɨ nee le, kalaŋ ga ni Jubɨ ga jege kɔl kɨbɨ Kumu somge a cay ƴaa-di-gumu di Jerusalɛm dɨŋ. Kan saygage na duroy te wɔɔ gɨ da kalaŋ nɔm ga a cay gɨsəŋ gaŋ ɨrgage somge nee.

⁶ Kɨɗɨn̰ ga noy hɨnga le ba ye na, kan andaŋge dan̰ dɨmdɨrdɨge. Bɨ kɔl kayge yɔd, kɨya wa waŋ waŋ kalɨn̰ ma je kɔl koge dan̰ kɨbɨ wɔɔdi.

⁷ Hɨnga ga nee le, dor turnoyge bɨ, kɔl kayge sɛl sɛl nee bɨ. Lee gɨ kan yege hɨn̰: «Kalaŋ ga ba yege kɔl kɛ le, na kalaŋ ga saygage na cay gɨsəŋ ga Galile gaŋ naŋ ga?

⁸ Kɛ lee na mɨna ma, waŋ waŋ kalɨn̰ ma a duroynagɨŋ je kɔl gɨ kan ba ye le, dan̰ kɨbɨ wɔɔdi hɨn̰ wo̰ ga?

⁹ Kan na kalaŋ ga Partɨ bɨ, Mɛdɨ bɨ, Elam bɨ, kalaŋ ga saygage cay ƴaa di Mesopotami bɨ, Jude bɨ, Kapadosɨ bɨ, Po̰ bɨ, Aji bɨ,

¹⁰ Pɨrɨji bɨ, Pampili bɨ, Ejɨpt bɨ, kan ga saygage cay ƴaa di Sirɛn di woy a cay gɨsəŋ ga Libi gaŋ bɨ, kan ga Rɔm bɨ,

¹¹ Kalaŋ ga ni Jubɨ ga ka-ƴaa bɨ, kan ga bɨle gusɨge Jubɨ bɨ, kan ga Kɨrɛtɨ bɨ, Arabɨn̰əŋ bɨ. Naa hɨn̰ wo̰ kalɨn̰ ma kalaŋ ga nee le, dorge te hɨnga lɔɔ ga da Kumu ga ɗɨn̰ cɨn̰-kɨɗɨn̰, ɗe gɨ na jegɨŋ dan̰ kɨbɨ wɔɔdɨnagɨŋ.

¹² Kan nɔm kɔl kayge yɔd bɨ, waage kɔl gɨ ni dɨbe cay nee naŋ bɨ.» Lee gɨ kan nɔm ɨngɨrge gusɨge yege hɨn̰: «Hɨnga ga kɛ le toyge na mɨna ga?»

¹³ Ama kan ga pɨna sogɨge ka-gɨre-gɨye ga da Jesu yen̰ge hɨn̰: «Na cɛrɛ di suru ba koyge bɨ gaa, na wa ga ɗaŋ coŋ ga!»

Tɔgɛ bɛrnɛ di da Pɨyɛr

¹⁴ Kɨɗɨn̰ ga nee le bɨ, Pɨyɛr say ɨre daa dan̰ ka-gɨre-gɨye ga da Jesu ga mɔjɨ-cayge-pɨna le, ayɨn̰ noy daa teen̰ bɛrnɛ yen̰ dɨmdɨrdi kalaŋ le hɨn̰: «Kɨŋ kalaŋ ga ni Jubɨ bɨ, kɨŋ kalaŋ nɔm ga ba som a cay ƴaa-di-gumu di Jerusalɛm dɨŋ bɨ le, hɨnga ga ba lee gusɨge kɛ le, kuɗa gɨ kɨŋ sɨla toyge kuɗa bɨ, kɨŋ dɨra sɨmaygɨŋ kuɗa jan̰gɨŋ kɔl hɨnge bɨ.

¹⁵ Kɨŋ ye gɨ kalaŋ ga nee le na koyge naa kɔyɛ. Na cɨndi naŋ. Na waŋ ba kɔyɛ cɛrɛ dan̰ tɨwa dɨngɛsɨ di ni jogɨɗu ga?

¹⁶ Ama na hɨnga ga ba-yɔɔ-kɔl-gɨ-Kumu-ba-yɔɔ Jowɛl ba ye koldɨge tumɔ le ba lɔɔ gusɨge wɔyɛ kɔ. Ban ye tumɔ hɨn̰:

¹⁷ “Sɨlagɨŋ hɨnga ga ba kɨya caga wɔlɛ kagadi gɨŋ le ba kɛ, Kumu ye hɨn̰: Ɨŋ kɨya lɔɔ gɨ ɗe Turnonɨ busoŋ cay kalaŋ nɔm bɨ, Karɨndɨgɨŋ ga ban̰aŋ dan̰ karɨndɨgɨŋ ga kandɨ Kɨya bɨləŋge ka-yɔɔ-kɔl-gɨ-Kumu-ba-yɔɔ bɨ, Ɨŋ kɨya yon̰ marɨne kagɨŋ kɔl, Boy hɨnga ga buyoŋ cɨn̰ ungo hɨn̰ dḛḛ wo̰ bɨ, Ɨŋ kɨya yon̰ kandɨgɨŋ ga əsɨdəŋ kɔl boy sɔndɛ gɨŋ bɨ.

¹⁸ Na cɨndi, boy wɔlɛdi gɨ nee le, Ɨŋ kɨya lɔɔ gɨ ɗe Turnonɨ busoŋ, Cay marɨne ka-gɨye kange ga ban̰aŋ dan̰ ga kandɨ, Ɗe kan na bɨlɨn̰ge ka-yɔɔ-kɔl-gɨ-Kumu-ba-yɔɔ bɨ.

¹⁹ Ɨŋ kɨya lɔɔ hɨnga ga ni beli gɨɗɨgɨ-Kumu gɨŋ bɨ, Hɨnga ga ɗɨn̰ cɨn̰-kɨɗɨn̰ cay gɨsəŋ gaŋ kɛ bɨ. Kɨbar bɨ, tɨwa bɨ, gusa gɨ say hɨn̰ gɨrɨmbale wo̰ bɨ, Kɨya wɔyɛ.

²⁰ Tɨwa kɨya ɨndɨwa bɨ, kɨdɨrɛ kɨya yɨlwa hɨn̰ kɨbar wo̰ bɨ, Tumɔ pa dɨm ma wɔlɛ gɨ da Ba-gulɔŋ kɨya caga ƴee. Wɔlɛ gɨ nee le na wɔlɛ gɨ gumu bɨ, Na wɔlɛ gɨ ni gusoŋ-tɔgɛ bɨ.

²¹ Boy wɔlɛdi gɨ nee le, Waŋ waŋ gɨ na tɨga guson̰ Ba-gulɔŋ na, Kɨya pɔɗɛ.”

²² «Kalaŋ ga Ɨsɨrayɛl jagɨŋ kɔl hɨnge: Kɨŋ nɔm kɨŋ sol hɨn̰ gɨ Jesu gɨ Najarɛt le, Kumu gɨlgɨŋ gɨ ɗi na gey kɔl koyi. Kɨya wa ban ayi leen̰ hɨnga ga ni beli bɨ, hɨnga ga ɗɨn̰ cɨn̰-kɨɗɨn̰ bɨ, hɨnga ga ni gɨle bɨ, a duroy gɨŋ.

²³ Gɨlmi gɨ nee le, kɨŋ dobii kobɨ ka-lɔɔ terɨn̰ ɗe kan dɨɗiige a cay sɨya-gɨ-dagɨli gɨŋ, dan̰ gɨyəŋ gɨ Kumu ojɨ jɨne hayi.

²⁴ Ama Kumu boyi lɨbii duroy kalaŋ ga madɨrdaŋ gaŋ bɨ, dorii kɨbɨ gusi lɔɔ gɨ da tɨma dɨŋ bɨ. Kɨya wa tɨma ɓala ƴomii a te dɔnɔ tɔɔ dɨŋ naŋ.

²⁵ Kɨya wa Dabid kalɨn̰ ma ye koldi tumɔ hɨn̰: “Ɨŋ sol cɨn̰ Ba-gulɔŋ dan̰ wɔlɛ pɨna pɨna tumonɨ. Kɨya wa ban ɨre a cay kɔbɔŋ gɨ bara gɨŋ, Ɗe gɨ hɨnga na gɨ yɨbagdaŋ naŋ.

²⁶ Na toy di hɨn̰ wo̰ ma gusɨnɨ mɔŋ bɨ, Ɨŋ kɨbɨn̰ kɨra dan̰ gusi-mɔwa di gumu taa taa nee bɨ. Hɨn̰ gɨ ɨŋ na mara coŋ kalɨn̰ ma, Ɨŋ bee ɨrɨmenɨ can̰.

²⁷ Kɨya wa ji kɨya ɗɔŋ duroy kɨɗɨn̰ Ga da kalaŋ ga madɨrdaŋ gaŋ naŋ bɨ, ji kɨya ɗɔɔ gundi ungo kon̰ gɨ woy dan̰ cɨndi le, Ɔsɨn̰ɛ a boy umboŋ kamɨn̰aŋ gaŋ naŋ bɨrɨŋ bɨ.

²⁸ Ji gɨləŋ gɨyəŋ gɨ ni somɨn̰-bɨra dan̰ cɨnɨ bɨ, A tumon̰ le gusi-mɔwa kɨya ƴɔɔ gusɨnɨ nɔm nɔm nee bɨ.”

²⁹ «Karmɨnɨ ga ban̰aŋ dan̰ ga kandɨ, ɗe aŋ yəgɨŋ kɔl gɨ ojɨ cay mon̰ina Dabid daa waŋ: Dabid ma bɨ, ɨmgiige bɨ, labɨde cay kamɨn̰aŋdi woy a duroyna kɛ ƴee.

³⁰ Ama ban na ba-yɔɔ-kɔl-gɨ-Kumu-ba-yɔɔ bɨ, ban sol gɨ Kumu ay noyi dorɨn̰ gusi bii gɨ ɗi na kɨya dɔrɛ ungo pɨna duroy kongɨn̰ii gaŋ ɗoyi a cay kali-tɨrɨmbala toyi dɨŋ bɨ.

³¹ Dabid sol bɔyɛ lɨbe gɨ da Kɨris na jɨne hayi bɨ, na kɨya cayi ban ma ban ye hɨn̰: “Kumu kɨya ɗɔɔ Kɨris ban gɨ Kumu dorii le, A kɨɗɨn̰ ga da kalaŋ ga madɨrdaŋ gaŋ naŋ bɨ, Ban kɨya ɗɔɔ kuyoŋdi ɔsɨn̰ɛ duroy kamɨn̰aŋ gaŋ naŋ bɨ”.

³² «Jesu ban gɨ nee le, Kumu boyi lɨbii bɨ, na-gandi nɔm na soliigɨŋ dan̰ cɨndɨnagɨŋ bɨ, nana tɨmon̰ kayi bɨ.

³³ Kumu ayi si cay kobi gɨ bara gɨŋ. Haw kɛ Bayi bii dan̰ Turnɔ ɗe-kuduroy-bɛrɛ hɨn̰ gɨ ban ba ye gɨ ɗi na kɨya lɔɔ bii bɨ, ban bɨsɨn̰o caynagɨŋ le. Na toy di hɨn̰ wo̰ ma hɨnga ga kɨŋ ba sol bɨ, je kɛ bɨ le lee gusɨge.

³⁴ Na cɨndi, Dabid le sa ɨra daa nii naŋ, ama ban ye hɨn̰: “Ba-gulɔŋ Kumu yen̰ Ba-gulonɨ hɨn̰: Sɨma a cay kɔbɔŋ gɨ bara gɨŋ,

³⁵ Bɨrɨŋ gɨsɨn̰ gɨ ɨŋ kɨya bɨle ka-baadɨn̰, Leen̰ hɨnga ga ji kɨya bogɨn̰ gondɨn̰ cay nee.”

³⁶ «Hɨn̰ wo̰ na, kuɗa gɨ waŋ waŋ gɨ a te wɨn̰je gɨ da Ɨsɨrayɛl sɨla kɔl gɨ kɛ le kuɗa: Jesu gɨ kɨŋ ba gagɨlii a cay sɨya-gɨ-dagɨli gɨŋ le, na ban ma Kumu bɨlii Ba-gulɔŋ bɨ, Kɨris ban gɨ Kumu dorii nee bɨ.»

Kalaŋ kondɨ ayge kuduroyge

³⁷ Kɨɗɨn̰ ga kalaŋ le jege kɔl gɨ nee le na, ɗugoyge adɨldɨge been̰ been̰. Lee gɨ kan ɨngɨr Pɨyɛr bɨ, ka-gɨre-gɨye ga ɗaŋ bɨ yege hɨn̰: «Karmɨni, kɛ ni gɨ lɔɔ na mɨna ga?»

³⁸ Pɨyɛr dɨbɨge cay nee yege hɨn̰: «Bɨlgɨŋ gɨye-lɔɔdɨgɨŋ nɔm bɨ, ɗagɨŋ gɨ kan laagɨŋge batɛm pɨna pɨna dan̰ guson̰ Jesu-Kɨris bɨ, ɗe gɨ Kumu ɗe kuduroy jal cay lɔɔ ɨsɨna kogɨŋ gɨŋ bɨ. Ɨni na, kɨŋ kɨya wɔɔ Turnɔ ɗe-kuduroy-bɛrɛ di Kumu bɨn̰ kalaŋ le.

³⁹ Kɨya wa Kumu ye gɨ ɗi na kɨya bee Turnɔ ɗe-kuduroy-bɛrɛ di nee le, naa kɨya caygɨŋ bɨ, kɨya cay karɨndɨgɨŋ bɨ, kɨya cay kalaŋ nɔm ga woyge kɨɗɨn̰ ga hen̰ gaŋ bɨ, kɨya waŋ waŋ gɨ Ba-gulɔŋ Kumu kɨya togii bɨ.»

⁴⁰ Pɨyɛr yege kɔl gɨ ɗaŋ dan̰ kondi kɨya boyge jɨgan̰ ɗe kan na ayan̰ kuduroyge, kɨya dobɨn̰ bandɨ kuduroyge bɨ, yege hɨn̰: «Ƴagɨŋ pɔɗɛ gɨ da Jesu agɨŋ andɨn̰ duroy kalaŋ ga ka-lɔɔ terɨn̰ ga haw kɛ coŋ.»

⁴¹ Kalaŋ ga ba ƴeege kɔl kɨbɨ Pɨyɛr le, kan leegege batɛm. Wɔlɛdi gɨ nee le, kalaŋ ɓal dubu-sɨbɨ ga bugoŋge cay kamdɨge ga ka-aye kudurɔ.

Hɨnga ga ka-aye kudurɔ leege dan̰ gusɨge

⁴² Kan dorge sɨmayge kuɗa jen̰ge kɔl gɨ ka-gɨre-gɨye gɨlgege bɨ, dayge gusɨge kɨɗɨn̰ dayaŋ ga da ka-karme gaŋ bɨ, dɨn̰ge hɨnga pɨna bɨ, gosnɨn̰ge gusɨge dɔɔ gɨ da Ba-gulɔŋ bɨ, olɨn̰ge Kumu pɨna daa daa bɨ.

⁴³ Ka-gɨre-gɨye leege hɨnga ga ni beli bɨ, hɨnga ga ɗɨn̰ cɨn̰-kɨɗɨn̰ dan̰ kondiige bɨ, lee gɨ kalaŋ somge dan̰ hɨndɔrɔ kuduroyge.

⁴⁴ Ka-aye kudurɔ nɔm dayge gusɨge bɨ, hɨnga nɔm ga kan wayige le, gosnɨn̰ge gusɨge duroyge bɨ.

⁴⁵ Kan kɨl kɨɗɨn̰ kage coŋ bɨ, hɨnga wɔɔdɨge coŋ bɨ, ɗege gursudɨge gosnɨn̰ge gusɨge duroyge ojɨn̰ cay hɨnga ga waŋ waŋ kalɨn̰ ma ba or n̰agedɨge.

⁴⁶ Kan beege noyge pɨna dayɨn̰ge dan̰ wɔlɛ pɨna pɨna duroy gulɔŋ ƴaa-di-da-Kumu dɨŋ bɨ, diige hɨnga pɨna kɨbɨ-ƴaadɨge gɨŋ bɨ, diige hɨnga dan̰ gusi-mɔwa bɨ, dan̰ kuduroy-bɛrɛ bɨ.

⁴⁷ Kan hɨramge Kumu bɨ, kan ƴeege cɨn̰ kalaŋ nɔm nee bɨ. Ɨni na, kan ga ban poɗɨge le, Ba-gulɔŋ ɨrgan̰ danage beege cay kamdɨge ga ka-daye gusɨge le, dan̰ wɔlɛ pɨna pɨna.