Gɨye-lɔɔ 19 - Gabri Maja

Pol a cay ƴaa-di-gumu di Epɛs

¹ Kɨɗɨn̰ ga Apolos baa a Korɛ̰t ƴee na, Pol gay cay gɨsəŋ ga Aji ga garman̰əŋ kondɨ nee bɨ, ɨrgan̰ bugoŋ a cay ƴaa-di-gumu di Epɛs dɨŋ. Ban way ka-aye-cay-tɨbay Jesu ga pɨna wo̰ a nee.

² Bɨ ban ɨngɨrge hɨn̰: «Kɛ Turnɔ ɗe-kuduroy-bɛrɛ gɨsɨn caygɨŋ kɨɗɨn̰ ga kɨŋ ba ayɨn̰ kuduroygɨŋ le ga?» Kan jɨga dɨbi cay nee yeyge hɨn̰: «Naŋ! Ni sɨla Turnɔ ɗe-kuduroy-bɛrɛ naŋ bɨ, ni ja kɔldɔ naŋ bɨ.»

³ Kɨɗɨn̰ ga nee le, Pol ɨngɨrge yege hɨn̰: «Ma kɛ, kan leegɨŋge na batɛm di mɨna ga?» Kan jɨga dɨbiige cay nee yeyge hɨn̰: «Na batɛm da Ja̰ ba-lɔɔ batɛm.»

⁴ Ɨni na, Pol yege hɨn̰: «Batɛm di Ja̰ ba-lɔɔ batɛm ba leen̰ kalaŋ le, na batɛm di gɨl gɨ kalaŋ na bɨlege gɨye-lɔɔdɨge. Bɨ ban yen̰ karɨn̰ Ɨsɨrayɛl gɨ na ojɨ gɨ kan na bɨga kuduroyge a cay ungo gɨ ni ba kɨya ɨrga kardi le. Ungo gɨ nee le, na Jesu.»

⁵ Kɨɗɨn̰ ga kan jege kɔl gɨ da Pol ɨni na, kan leegege batɛm dan̰ guson̰ Ba-gulɔŋ Jesu.

⁶ Pol dɨbɨ kobi cayge ɨni na, Turnɔ ɗe-kuduroy-bɛrɛ gɨsɨn cayge. Kɨɗɨn̰di ga nee gaŋ le, kan say ye kɔl dan̰ kɨbɨ gɨ toyi kan̰di kan̰di bɨ, yen̰ge-kɔl-gɨ-Kumu-ba-yɔɔ bɨ.

⁷ Kalaŋ ga nee le nɔm ɓalge na hɨn̰ kalaŋ mɔjɨ-cayge-sɔɔ wo̰.

⁸ Pol or boy ƴaa-daye-di-da-Jubɨn̰əŋ dɨŋ bɨ, dor kɔl dan̰ cɨn̰-bandɨ ɓal kɨdɨrɛ sɨbɨ. Ban dor kɔl gɨ ojɨ cay dɔɔ-ƴaa di da Kumu, malɨn̰ gɨyəŋ gɨ ni ɨrgan̰ dan̰ kan ga ka-jɔɔ kɔl koyi le, a te gɨyəŋ gɨŋ.

⁹ Ama kondɨwadɨge leege cay osɨwa kan̰ɨn̰ge bɔgɛ kuduroyge cay nee bɨ, yen̰ge kɔl gɨ ɨsɨni ojɨn̰ cay gɨyəŋ gɨ da Ba-gulɔŋ tumoy kalaŋ ga dayge cayge le. Kɨɗɨn̰ ga nee le, Pol dor gusi coŋ bɨ, don ka-aye-cay-tɨbay Jesu orɨn̰ danage. Ban gɨlge kɔl gɨ da Kumu dan̰ wɔlɛ pɨna pɨna a duroy ƴaa gɨle hɨnga ga da Tiranus dɨŋ.

¹⁰ Ban lee hɨn̰ wo̰ ɓal ɨlge sɔɔ, lee gɨ kalaŋ nɔm ga a cay gɨsəŋ ga Aji gaŋ, kalaŋ ga ni Jubɨ bɨ Gɨrɛg bɨ jege kɔl gɨ da Ba-gulɔŋ.

¹¹ Kumu lee hɨnga ga ni belin̰əŋ ga ɗɨn̰ cɨn̰-kɨɗɨn̰ dan̰ gɨyəŋ gɨ da Pol.

¹² Lee gɨ kalaŋ donge hɨnga ga ɨsɨbɨ Pol gusi hɨn̰ kɨbɨ badɨge ga ban handɨn̰ kɨjan̰e, wala badɨge ga ni gɨye, orɨn̰ge ɨsɨbɨn̰ge gusi kalaŋ ga gusɨge leege. Ɨni na, gusɨge gɨ leege le say ɗege bɨ, turnɔ ga ɨsɨndəŋ andaŋge gusɨge coŋ bɨ.

¹³ Kalaŋ ga ni Jubɨ ga pɨna ga ka-gɔrɛ dan̰ kɨɗɨn̰ kɨɗɨn̰ tan̰ turnɔ ga ɨsɨndəŋ le, samge gɨ ni tɔgɛ guson̰ Ba-gulɔŋ Jesu, cay kan ga orɨn̰ dan̰ turnɔ ga ɨsɨndəŋ yen̰ge hɨn̰: «Ɨŋ ay nonɨ bɨgɨŋ! Andaŋgɨŋ coŋ dan̰ guson̰ Jesu gɨ Pol tee bɛrnɛdi le.»

¹⁴ Kan ga leege hɨnga ga nee le, na karɨn̰ Jubɨ ba-cay ka-bɔgɛ kɨbar nɔm gɨ pɨna wo̰ gɨ gusondi na Seba. Kan won̰ge jurgum.

¹⁵ Turnɔ di ɨsɨni di kan geyge tayoo le dɨbɨge cay nee yege hɨn̰: «Ɨŋ sol Jesu bɨ, ɨŋ sol kɛ Pol na waŋ ga bɨ, ama kɨŋ-gandi na, kɨŋ na kalaŋ ga ani ga?»

¹⁶ Bɨ ungo gɨ turnɔ di ɨsɨni woy kuduroy le, baa cayge leege ɨsɨna gɨɗaŋ, togi ɗɨn̰ toge nɔm. Kan dege kɨɗɨn̰ andaŋge duroy ƴaa dɨŋ doŋ dan̰ gɨre, gusɨge kalɨn̰ bɨ dan̰ ɨya gusɨge bɨ.

¹⁷ Kalaŋ ga Epɛs nɔm, kalaŋ ga ni Jubɨ bɨ, kalaŋ ga ni Gɨrɛg bɨ, jege kol hɨnga ga ba lee gusɨge le. Kan nɔm hundɔrɔ ƴee gusɨge bɨ, kalaŋ hɨramge guson̰ Ba-gulɔŋ Jesu bɨ.

¹⁸ Kondɨwadi kalaŋ duroy kan ga ka-aye kudurɔ le, ɨrgage torge te ɨsɨna koge bɨ, torge te gɨye-lɔɔdɨge gɨ woy a kɨɗɨn̰ wɔsɛdi gɨŋ doŋ bɨ.

¹⁹ Kalaŋ kondɨ duroy kan ga ka-lɔɔ tɨmba, ɨrgan̰ge dan̰ magtubun̰əŋ kage ga ni leen̰ tɨmba bɨ, tobɨge tɨwa cay nee cɨn̰ kalaŋ nɔm bɨ. Kɨɗɨn̰ ga kan ɗongɨsɨ kɨledi magtubun̰əŋ ga nee le na, ɓal sɨle di ni arja̰ sag toyi-bay.

²⁰ Na toy di hɨn̰ wo̰ ma, dan̰ gɨyəŋ gɨ da dɔnɔ di da Ba-gulɔŋ, kɔl gɨ da Kumu ƴee kɨɗɨn̰ jɨn̰ tumɔ tumɔ bɨ, osɨ boy nee bɨ.

Do̰ ba a Epɛs

²¹ Kardi hɨngan̰əŋ ga ba lee gusɨge le, Pol ojɨ gaye cay gɨsəŋ ga Masedɨwan bɨ, ga Agay bɨ, andɨn̰ kɨya orɨn̰ jɨn̰ cay ƴaa-di-gumu di Jerusalɛm dɨŋ. Ban ye hɨn̰: «Hɨn̰ gɨ ɨŋ na bugoŋ ni na, naa wa wa kalɨn̰ ma, ɨŋ kɨya ɔrɛ sɔlɛ Rɔm bɨ.»

²² Ban gɨy kalaŋ sɔɔ duroy ka-lɔɔ gɨye danayi, na Timote bɨ, Erasɨ bɨ. Kan orge Masedɨwan tumoyi, ama na ban ba bɔɔ karu a cay gɨsəŋ ga Aji gaŋ ɓale wɔlɛ lam.

²³ A boy ɨlgedi gɨ nee le, kɔl gɨ gumu baa a cay ƴaa-di-gumu di Epɛs dɨŋ, kɨya cay gɨyəŋ gɨ da Ba-gulɔŋ.

²⁴ Ungo gɨ pɨna wo̰ som nee, gusondi na Demetrɨyus. Ban na ba uye nare gɨ ni arja̰. Ban uy nare gɨ ni arja̰ leen̰ karɨn̰ ƴaa-di-da-kula di tama di pɨna wo̰ di da Artemis ga n̰ən̰əŋ. Lee gɨ ka-uye hɨnga ga ban bɨge gɨye gɨ nee le wan̰ge hɨnga tɔgɨ cay nee.

²⁵ Ban day cayge kɨɗɨn̰ pɨna, dan̰ kan ga gɨye-lɔɔdɨge or dan̰ koge bɨ yege hɨn̰: «Ka-pogɨn̰ɨnɨ, kɨŋ sol gɨ na somgɨŋ kuɗa na kɨya cay gɨye gɨ nee le.

²⁶ Ama hɨnga ga Pol gɨ nee ba lee le, kɨŋ sol bɨ je bɨ. Ban ye hɨn̰: “Kulan̰əŋ ga kalaŋ na leege dan̰ kobɨge le, naa kumun̰əŋ naŋ.” Ban nar kalaŋ lee gɨ kalaŋ kondɨ bugoŋge kardi. Na a cay ƴaa toni di Epɛs dɨŋ kɛ ƴɔbɨ naŋ, ama baa dḛ wo̰ gɨ kɨya ƴɔɔ cay gɨsəŋ ga Aji nɔm.

²⁷ Na gɨye koni ƴɔbɨ ba kɨya mundoŋ naŋ, ama na Artemis di na kula di tama di gumu le kalɨn̰ ma, kol ƴaado kɨya yɔɔ naŋ bɨ! Ɨni na, kumu di tama di pɨna wo̰ di kalaŋ nɔm ga cay gɨsəŋ ga Aji gaŋ bɨ, ga cay gɨsəŋ gaŋ nɔm bɨ, ba n̰ɨrooge le, gusoŋ-tɔgɛ kɔɔ kɨya unɔ bɨ.»

²⁸ Kɨɗɨn̰ ga kan jege kɔl gɨ nee le na, kuduroyge say homge gɨɗaŋ, lee gɨ kan dege sɨle yen̰ge hɨn̰: «Artemis di da kalaŋ ga Epɛs le, na di gumu tɔgɨ.»

²⁹ Kɔl gɨ nee le ƴee cay ƴaa-di-gumu nɔm, lee gɨ kalaŋ kondɨ dulomge orge kɨɗɨn̰ dayaŋ gaŋ, bɨ sɨdɨrdege Gayus dan̰ Aristarg ga na kalaŋ ga a cay ƴaa di Masedɨwan dɨŋ bɨ, na Pol ka-pogɨn̰ii bɨ, orɨn̰ge danage.

³⁰ Pol gey ɔrɛ ɨre tumoy dɨmdɨrdi kalaŋ kɨɗɨn̰ dayaŋ gaŋ le, ama ka-aye-cay-tɨbay Jesu nariige coŋ.

³¹ Ɨni na, kalaŋ ga pɨna wo̰ ga gɨmdəŋ ga woyge a cay gɨsəŋ ga Aji gaŋ, ga na ka-pogɨn̰ii kalɨn̰ ma gɨyge gusi oliige gɨ ban na gɨ ɔrɛ a kɨɗɨn̰ dayaŋ gaŋ le naŋ.

³² Kɨɗɨn̰ ga nee le na, ungo ja noy mɨgay kɨɗɨn̰ dayaŋ gaŋ le naŋ: Ga pɨna dege sɨle yen̰ge kɔl gɨ toyi pɨna bɨ, kamdɨge ga ɗaŋ dege sɨle yen̰ge kɔl gɨ toyi ɗaŋ bɨ, lee gɨ kondɨwayge sɨlage te kɔl gɨ kan ba dayɨn̰ge le naŋ.

³³ Kalaŋ ga pɨna wo̰ duroy dɨmdɨrdi kalaŋ le, dorge te kɔl le bɨn̰ge ungo gɨ pɨna wo̰ gɨ gusondi na Alegjandɨr gɨ kalaŋ ga ni Jubɨ nongige ɗeyge tumɔ. Ban say lee kobi: Gɨ ɗi na gey yɔɔ kɔl bɨn̰ kalaŋ, gɨ kalaŋ ga ni Jubɨ naa ka te kɔl naŋ.

³⁴ Ama kɨɗɨn̰ ga kan solge gɨ Alegjandɨr naa Jubɨ na, kan nɔm beege kɨbɨge pɨna den̰ge sɨle ɓal hɨn̰ karɨn̰ tɨwa sɔɔ wo̰, yen̰ge hɨn̰: «Artemis di da kalaŋ ga Epɛs na di gumu tɔgɨ!»

³⁵ Kɨɗɨn̰ ga ba-wale magtubu di da ba kɨbɨ kɨlma gɨ gumu gɨ a cay ƴaa di nee le, lee gɨ kalaŋ sogɨyge lam na, ban yege hɨn̰: «Kalaŋ ga Epɛs, kɛ ungo ba sɔlɛ gɨ cay ƴaa-di-gumu di Epɛs di woy dan̰ cɨndo di da kumu di tama di pɨna wo̰ di da Artemis di gumu tɔgɨ bɨ, di da garma gɨ gɨlɨn̰ dana gɨ sayga gɨɗɨgɨ-Kumu gɨŋ ba dugo le woy nee ga?

³⁶ Ungo gɨ kɨya man̰e hɨnga ga nee le unɔ. Naa hɨn̰ wo̰ na, kuɗa gɨ kɨŋ jɨga sɨma ɗɛgɛgɛ bɨ, kɨŋ ɗɔɔ ba sɔ kɨrɛd lɔɔ hɨnga hɨn̰ gɨ kɨŋ na ɨrɨm kɔl naŋ wo̰, naŋ bɨ.

³⁷ Kɨya wa kalaŋ ga kɨŋ ba ɨrgan̰ danage kɛ le, kan hasa hɨnga ga a duroy ƴaa-Kumu di tama di pɨna wo̰ dɨŋ naŋ bɨ, yagɨdage kumu toni di tama naŋ bɨ.

³⁸ Hɨn̰ gɨ Demetrɨyus dan̰ ka-gɨye kay kɔl na dayage dan̰ kalaŋ ga pɨna na, wɔlɛ gɨ ni bon̰ kɔl woy kɛ bɨ, ka-dɔɔ cay ƴaa woyge kɛ bɨ. Kɨɗɨn̰ ga kuɗa gɨ kan kɨya ɔrɛ segi nee woy nee bɨ.

³⁹ Hɨn̰ gɨ kɨŋ na ɨran̰ dan̰ hɨnga ga ɗaŋ ga ni ɨngɨre kɔl cay nee coŋ na, kɨŋ kɨya yɔɔ kɔl gɨ nee le pɨna a kɨɗɨn̰ dayaŋ gaŋ dan̰ gɨyəŋdɨge dan̰ ka-bɔyɛ kɔl.

⁴⁰ Dayaŋ kona gɨ labɨde kɛ le na ɓalgɨŋ won̰ kɔl nee. Bɨ ɓal gɨ kan kɨya ɗɔɔ kɔl gɨ ni gɔsɨrɛ kalaŋ ɗe na kayɨn̰ge kɔl kɨbɨ kɛrɨmbɛlɛŋ kana cayna bɨ. Kɨya wa na ɨran̰ dan̰ kɔl pɨna gɨ ni gɨlɨn̰ kalaŋ te dayaŋ kona le naŋ.» Kɨɗɨn̰ ga ban ye kɔl gɨ nee le ɨni na, ban yen̰ kalaŋ ga ba dayaŋge le, ɗe na busoŋge.