Gɨye-lɔɔ 17 - Gabri Maja

Pol dan̰ Sɨlas a cay ƴaa di Tesalonigɨ

¹ Pol dan̰ Sɨlas gayge cay gɨsəŋ ga Ampipolis bɨ, Apoloni bɨ andɨn̰ge, orɨn̰ge bugoŋ a cay ƴaa-di-gumu di Tesalonigɨ dɨŋ. Ƴaa-daye-di-da-Jubɨn̰əŋ woy a cay ƴaa di nee dɨŋ le.

² Duroy dɨmasɨ sɨbɨ, Pol som duroy ƴaa gɨ ni daye gɨŋ dan̰ wɔlɛ dɔrɛ gɨlale gɨ da Jubɨ nɔm, hɨn̰ gɨ ban ba leede daa daa bɨ, arɨn̰ kɔl danage ojɨn̰ cay kɔl gɨ kan walge duroy Magtubu di da Kumu dɨŋ di woy dan̰ cɨndo le.

³ Ban dor te kɔl gɨ kan walge duroy Magtubu dɨŋ le ɗe tumoyge bɨ, gɨlge gɨ hɨn̰ gɨ kan ba walge duroy magtubu dɨŋ le. Naa wa wa kalɨn̰ ma Kɨris ban gɨ Kumu dorii le, na kɨya wɔɔ cɨn̰-gɨle-cɨn̰ bɨ, mare bɨ, bɔyɛ lɨbe duroy kalaŋ ga madɨrdaŋ gaŋ bɨ. Ban yege hɨn̰: «Jesu gɨ ɨŋ ba tee bɛrnɛdi kɛ le, na ban ma na Kɨris ban gɨ Kumu dorii le.»

⁴ Jubɨn̰əŋ ga pɨna wo̰ duroyge orge kardi kɔl koyi gɨŋ le, lee gɨ kan bugoŋge te Pol dan̰ Sɨlas. Gɨrɛgn̰əŋ ga ka-n̰ɨre Kumu ɗɨn̰ ɗɔngɨsɛ bɨ, kandɨ ga gusondɨge ye dan̰ kondiige leege hɨn̰ wo̰ bɨ.

⁵ Ama jangɨ say lee Jubɨ ga ayage kuduroyge naŋ, lee gɨ kan donge kalaŋ ka-matɨr, ga kan waygege te gɨyəŋ gɨ woli gɨŋ bɨ, dayge kan ga kan gosɨrge le pɨna bɨ, leege gɨ kalaŋ san̰ge dan̰ kuduroy-hɔmɛ a cay ƴaa-di-gumu dɨŋ. Kardi nee na, kan orge a da Jaso̰ malɨn̰ge Pol dan̰ Sɨlas kɨya orɨn̰ danage tumoyi dɨmdɨrdi kalaŋ ga dayaŋge le.

⁶ Bɨ kɨɗɨn̰ ga kan wayage naŋ ɨni na, kan sɨdɨrdege Jaso̰ bɨ karmɨni ga pɨna wo̰ bɨ, orɨn̰ge danage tumoy ka-dɔɔ cay ƴaa gaŋ. Kan dege sɨle yege hɨn̰: «Kalaŋ ga kɛ le dɨbɨge do̰ a kɨɗɨn̰ gaŋ nɔm bɨ, haw kɛ kan bugoŋge a cay ƴaa toni dɨŋ bɨ.»

⁷ Jaso̰ ƴomge gusi. Kan nɔm na ka-kan̰e gasɨn̰-kɔl gɨ da kɨlma gɨ gumu Sejar bɨ, kan yege gɨ kɨlma gɨ ɗaŋ gɨ gusondi naa Jesu na woy nee bɨ.

⁸ Kɔl gɨ nee le, lee gɨ dɨmdɨrdi kalaŋ bɨ, ka-dɔɔ cay ƴaa bɨ, ɗugoyge ba dugo naŋ.

⁹ Lee gɨ ka-dɔɔ cay ƴaa-di-gumu ɨngɨrɨn̰ge Jaso̰ bɨ, kamdi ga ɗaŋ bɨ, na bɨgage gursu dugo pa dɨm ma, ke na kɨya ɗoge daa ƴee.

Pol bɨ Sɨlas bɨ a Bere

¹⁰ Kɔl gɨ kɨbɨna kɛ bɨ, karmɨni say gɨyge Pol dan̰ Sɨlas duroy son̰dodo dɨŋ a Bere. Kɨɗɨn̰ ga kan bugoŋge a nee ɨni na, kan sayge orge a boy ƴaa-daye-di-da-Jubɨn̰əŋ dɨŋ.

¹¹ Jubɨ ga Bere orɨn̰ge dan̰ ɨrɨme gɨ kuɗa ɗɨn̰ Jubɨ ga Tesalonigɨ. Kan ƴeege kɔl gɨ da Kumu haw tɔgɨ bɨ, dan̰ wɔlɛ pɨna pɨna kan kobɨge te kɔl gɨ kan ba walge duroy Magtubu di da Kumu dɨŋ kɨya solɨn̰ kɛ, kɔl gɨ Pol ba gɨlge le, naa nee hayi ga?

¹² Kalaŋ kondɨ duroyge bɨlege ka-aye kuduroyge bɨn̰ Jesu. Duroy Gɨrɛgn̰əŋ ga ay kuduroyge le, kandɨ ga gusondɨge ye bɨ, ban̰aŋ bɨ kondɨ woyge danage nee bɨ.

¹³ Ama kɨɗɨn̰ ga Jubɨ ga Tesalonigɨ jege gɨ Pol na tee bɛrnɛ kɔl gɨ da Kumu a cay ƴaa-di-gumu di Bere dɨŋ na, kan ɨrgage gosɨrge kalaŋ bɨ, dɨbɨge do̰ ɗe kuduroy kalaŋ na homge cay Pol bɨ.

¹⁴ Ɨni na, kɨɗɨn̰di ga nee gaŋ le bɨ, karmɨni gɨyge Pol ɗe na or nɔ koburo gɨ gumu taa taa gɨŋ orɨn̰. Ama Sɨlas dan̰ Timote na, baage dugo a cay ƴaa di Bere dɨŋ.

¹⁵ Kan ga beege Pol le, orɨn̰ge danayi bɨrɨŋ andɨn̰ge a Atɛn dɨm ma jɨgage ƴee. Bɨ Pol ay noyi bɨge ɗe gɨ kan na yan̰ Sɨlas bɨ, Timote bɨ, gɨ kan na ɨre haw wayay a cay ƴaa-di-gumu di Atɛn dɨŋ.

Pol or a cay ƴaa-di-gumu di Atɛn

¹⁶ Kɨɗɨn̰ ga Pol som gamge a cay ƴaa di Atɛn dɨŋ le, ɨrɨmedi wɨya kɨɗɨn̰ pɨna naŋ, kɨya wa ban sol kulan̰əŋ ƴee kɨɗɨn̰ a boy cay ƴaa-di-gumu di nee dɨŋ le.

¹⁷ Ban ar kɔl boy ƴaa-daye-di-da-Jubɨn̰əŋ dɨŋ dan̰ Jubɨn̰əŋ bɨ, dan̰ kalaŋ ga ɗaŋ ga ka-n̰ɨre Kumu bɨ. Ban ar kɔl a gɛgɛr gɨŋ dan̰ wɔlɛ pɨna pɨna dan̰ kalaŋ ga ban wayge nee bɨ.

¹⁸ Ka-gɨlɨn̰ kalaŋ kɔl ga pɨna wo̰, say man̰ge kɔl dan̰ Pol. Kan na kalaŋ ka-ɨrɨme kɔl tɔgɨ cay kɔl nɔm ga da Epikursin̰ḛn̰əŋ bɨ, Ɛstoyisin̰ḛn̰əŋ bɨ, kan jege kɔl gɨ ojɨ cay Jesu bɨ, cay bɔyɛ lɨbe koyi bɨ. Ɨni na, kan ga pɨna wo̰ yege hɨn̰: «Na kɔl wa ma ba-yɔɔ kɔl tɔgɨ gɨ kɛ le ɨre ye wo̰ ga?» Bɨ kan ga ɗaŋ yege hɨn̰: «Ni sol cɨndi woy hɨn̰ gɨ da ba tɔgɛ bɛrnɛ gɨ da kulan̰əŋ ga a cay gɨsəŋ ga ɗaŋ gaŋ wo̰.»

¹⁹ Kan ƴom Pol bɨ, orɨn̰ge danayi boy kɨɗɨn̰ dayaŋ ga ka-dɔɔ cay ƴaa dayaŋge nee, ga teege naa Arewopaj bɨ yeyge hɨn̰: «Kɔl gɨ hɨrɨwa gɨ ji ba gɨlɨn̰ kalaŋ kɛ le, ji gɨ ɓale dɔrɛ toy bɨni gɨ ni gɨ jɔɔ naŋ ga?

²⁰ Kɨya wa kɔl gɨ ji ba dor gɨ ni ba je le, dor turnoyni. Bɨ ni gey sɔlɛ toyi.»

²¹ Kalaŋ ga cay ƴaa-di-gumu di Atɛn, dan̰ kɨrge ga som duroyge le, gɨye-lɔɔdɨge gɨ ɗaŋ unɔ. Ama na are-kɔl bɨ, jɔɔ kol hɨnga ga ba andaŋ hɨrɨwa bɨ, ma na gɨye-lɔɔdɨge dan̰ wɔlɛ pɨna pɨna.

²² Kɨɗɨn̰ ga nee le, Pol say ɨre daa a kɨɗɨn̰ dayaŋ ga da ka-dɔɔ cay ƴaa ga kan teege Arewopaj bɨ yege hɨn̰: «Kɨŋ kalaŋ ga Atɛn, ɨŋ sol hɨn̰ gɨ kɨŋ na kalaŋ ga kɨŋ gey n̰ɨre kulan̰əŋ ga toyge kan̰dɨge kan̰dɨge tɔgɨ.

²³ Kɨya wa kɨɗɨn̰ ga ɨŋ gor a cay ƴaa togɨŋ di gumu dɨŋ na, ɨŋ sol kɨɗɨn̰ ga kɨŋ n̰ɨrɨn̰ hɨnga nee bɨ, ɨŋ or bɨrɨŋ wɔɔ kɨɗɨn̰ n̰ɨre hɨnga kagɨŋ ga pɨna wo̰, ga kan walge kɔl gɨ kɛ le cay nee yege hɨn̰: “Na kɨya cay kumu gɨ pɨna wo̰, gɨ ni sɨlay naŋ.” Kuɗa! Hɨnga ga kɨŋ n̰ɨrge dɨle solge le, na ban ma maŋ ɨrga kɨya tɔgɛ bɛrnɛdɨge bɨgɨŋ.

²⁴ Kumu gɨ ba lɔɔ gɨɗɨgɨ-Kumu bɨ, cay gɨsəŋ bɨ, hɨnga nɔm ga boy nee bɨ le, ban ma na Ba-gulondi hɨnga ga gɨɗɨgɨ-Kumu gɨŋ bɨ, cay gɨsəŋ gaŋ bɨ. Ban sɨma na a boy ƴaan̰əŋ ga kalaŋ n̰ɨrɨn̰ kumu gɨ pɨna wo̰, gɨ kalaŋ ba gaɗe naŋ bɨ.

²⁵ Gɨye koyi kalɨn̰ ma, gey kobɨ kalaŋ ga ɨndəŋ naŋ bɨ, ban ɨran̰ dan̰ n̰agedi hɨnga pɨna wo̰ ɗe ungo na bii naŋ bɨ. Kɨya wa ban mana ba bɨn̰ kalaŋ nɔm sɔmɛ-bɨra bɨ, ba dɔbɛ habe kuduroyge bɨ, ba bɨge hɨnga nɔm ga ba baa bɨ.

²⁶ «Na dan̰ gɨyəŋ gɨ da ungo gɨ pɨna hayi kəɗ kəɗ ma ban ɗen̰ te wɔɔ gɨ da kalaŋ nɔm ga somge a cay gɨsəŋ gaŋ bɨ. Ban ojɨ wɔlɛ gɨ hɨnga nɔm kɨya loon̰ gusɨge bɨ, gɨsɨ cay kɨɗɛlɛ gɨ kan kɨya somɨn̰ nee bɨ.

²⁷ Ban lee hɨn̰ wo̰ na gɨ ɗe kan na malan̰ge Kumu, gajanaŋ kan na da mami wayi. Kɨya wa ban wɨya hen̰ dan̰ ungo pɨna duroynagɨŋ naŋ.»

²⁸ «Na cɨndi, kɨya gɨ na kol cay ma mana somɨn̰gɨŋ-bɨra bɨ, mana leen̰ gɨŋ gusɨna gɨŋ daa bɨ, mana somɨn̰ gɨŋ ban̰ nee bɨ, hɨn̰ gɨ ka-kɨbe kɨra kagɨŋ ga pɨna wo̰ ba yege tumɔ hɨn̰: “Ni-gandi kalɨn̰ ma, ni na kongɨn̰ii bɨ.”»

²⁹ «Hɨn̰ gɨ na naa kongɨn̰i Kumu na, ojɨ gɨ na kɨya ɗɔɔ boy ɨrɨmedɨnagɨŋ gɨŋ gɨ Kumu na gɨlɨn̰ naa hɨn̰ kula lɔr naŋ bɨ, wala kula nare gɨ ni arja̰ naŋ bɨ, wala kula garma gɨ ni marbɨr gɨ kan dosdege dan̰ kobɨge dan̰ gɨyəŋ gɨ da ɨrɨme gɨ da ungo naŋ bɨ.

³⁰ Gɨye-lɔɔ gɨ da kalaŋ boy wɔlɛ gɨ jɨne gɨ kan sɨlan̰ Kumu naŋ ƴee le, Kumu ay cɨndi cay nee coŋ. Ama haw kɛ na, ban ay noyi bɨn̰ kalaŋ nɔm dan̰ kɨɗɨn̰ nɔm ɗe gɨ kan na bɨl gɨye-lɔɔdɨge.

³¹ Kɨya wa ban boy wɔlɛ gɨ ban kɨya bon̰ kɔl dan̰ gɨyəŋdi cay kalaŋ nɔm ga a cay gɨsəŋ gaŋ le. Ban kɨya bɔyɛ kɔl cay kalaŋ dan̰ gɨyəŋ gɨ da ungo gɨ ban dorii ɗeyi. Ungo le ma ama ban boyi lɨbii, gɨlɨn̰ kalaŋ nɔm gɨ ban na kɨya bɔyɛ kɔl na dan̰ gɨyəŋ gɨ da ungo gɨ nee le, leen̰ cɨndi.»

³² Kɨɗɨn̰ ga kan je kol mare bɨ, bɔyɛ lɨbe bɨ ɨni na, kan ga pɨna sogiige bɨ, kan ga ɗaŋ yege hɨn̰: «Wɔlɛ gɨ ɗaŋ gɨŋ dɨm ma, ma ni gɨ jɔɔ kɔl kon̰ a cay kɔl gɨ nee le ƴee.»

³³ Na hɨn̰ wo̰ ma, Pol say andaŋ coŋ duroyge kɨɗɨn̰ dayaŋ gaŋ or ɗege.

³⁴ Ama na hɨn̰ wo̰ kalɨn̰ ma, kan ga pɨna duroyge bugoŋge kardi bɨ, ayge kuduroyge bɨ. Deni dan̰ Damaris tama di pɨna wo̰ bɨ, dan̰ kan ga ɗaŋ ayge kuduroyge duroy kalaŋ ga bugoŋge kardi Pol le. Deni le, ban na gɨ pɨna wo̰ duroy ka-dɔɔ cay ƴaa ga dayaŋge kɨɗɨn̰ ga kan teege naa Arewopaj le.