Gɨye-lɔɔ 16 - Gabri Maja

Pol ay Timote

¹ Pol or bugoŋ a Dɛrbɨ bɨ, Listɨr bɨ. Ba-aye-cay-tɨbay Jesu gɨ pɨna wo̰ som a cay ƴaa di Listɨr dɨŋ, gusondi na Timote. Ban na kurɨn̰ tama Jubɨ di pɨna wo̰. Ƴoyi na ɗe-aye kudurɔ bɨ, bay na Gɨrɛg bɨ.

² Guson̰ Timote ye kuɗa tɔgɨ duroy karmɨni ga Listɨr bɨ, Ikonɨyɔm bɨ.

³ Pol gey gɨ ban na ɨra danayi. Lee gɨ ban ayi bɨ, walii ban̰a kɨya cay Jubɨ ga somge a cay gɨsəŋ ga nee gaŋ le. Kɨya wa kan nɔm solge gɨ bay naa Gɨrɛg.

⁴ A boy cay ƴaa nɔm ga kan pɨde nee le, Pol dan̰ Sɨlas yege kol te tumɔ di ka-gɨre-gɨye bɨ, kan ga muɗoldoŋ ga a cay ƴaa-di-gumu di Jerusalɛm ba ayge bɨge bɨ le. Bɨ kan ɨngɨrge gɨ kan na bɨgage kɔl cay nee, laan̰ gɨye.

⁵ Kalaŋ ga a duroy Ka-Dayen̰əŋ gaŋ ɨrege osu a cay aye kudurɔ koge gɨŋ bɨ, kondɨwayge say cay kamdɨge gaŋ dan̰ wɔlɛ pɨna pɨna bɨ.

Hɨnga buyoŋ cɨn̰ Pol hɨn̰ dḛḛ wo̰ a cay ƴaa-di-gumu di Tɨrowas

⁶ Pol dan̰ Sɨlas kaydege cay gɨsəŋ ga Pɨrɨji bɨ, Galasi bɨ, andɨn̰ge, kɨya wa Turnɔ ɗe-kuduroy-bɛrɛ narge tɔgɛ bɛrnɛ a cay gɨsəŋ ga Aji gaŋ.

⁷ Kɨɗɨn̰ ga kan ɨrgage mɨnde dan̰ cay gɨsəŋ ga Miji ɨni na, kan malge gɨyəŋ gɨ ni ɔrɛ a cay gɨsəŋ ga Bitini gaŋ, ama Turnɔ di da Jesu narge coŋ.

⁸ Ɨni na, kan kaydege cay gɨsəŋ ga Miji, andɨn̰ge orɨn̰ge cay ƴaa-di-gumu di Tɨrowas dɨŋ.

⁹ Duroy son̰dodo dɨŋ na, hɨnga buyoŋ cɨn̰ Pol hɨn̰ dḛḛ wo̰: Ban sol ungo gɨ Masedɨwan gɨ pɨna wo̰. Ungo gɨ nee le ɨre daa dan̰ tɨbay olii yey hɨn̰: «Ɨre gɨrni daa, a Masedɨwan.»

¹⁰ Kardi hɨnga ga ba buyoŋ cɨn̰ Pol hɨn̰ dḛḛ wo̰ le, kɨɗɨn̰di ga nee gaŋ le bɨ, ni mal gɨyəŋ gɨ ni ɔrɛ a Masedɨwan, kɨya wa ni sol kuɗa gɨ Kumu teeni gɨ ni na ɨra tɔgɛ bɛrnɛ Kɔl-gɨ-Ɗari a cay gɨsəŋ ga nee gaŋ le.

Lidi bee kudurɔ cay Ba-gulɔŋ a cay ƴaa-di-gumu di Pilib

¹¹ Ni nay boy koburo gɨ gumu taa taa gɨŋ a Tɨrowas, orɨn̰ dan̰ durɔ cɨndɨni jɨn̰ hogɨwa gɨ Samotɨras. Wan̰dodo dɨŋ ɨni na, ni or Nɨyapolis.

¹² Ni say nee or a cay ƴaa-di-gumu di Pilib dɨŋ. Hɨndi na cay ƴaa di a cay gɨsəŋ ga Masedɨwan di ɗɨn̰ kamdo nɔm bɨ, kalaŋ ga somge nee kondɨ, na kalaŋ ga Rɔm bɨ. Ni wol a cay ƴaa-di-gumu di nee dɨŋ le, lee wɔlɛ kondɨ.

¹³ Dan̰ wɔlɛ gɨ ni dɔrɛ gɨlale gɨ da Jubɨ na, ni andaŋ ɗe cay ƴaa-di-gumu coŋ bɨ, or cɨndɨni jɨn̰ kɨbɨ kuray gɨ pɨna wo̰ gɨŋ, na kɨɗɨn̰ ga ni ɨrɨm gɨ ni na kɨya wɔɔ kɨɗɨn̰ ga ni ɔlɛ Kumu ga da Jubɨ nee. Ni say som dugo bɨ, yen̰ kandɨ ga ɨrgage dayaŋge a kɨɗɨn̰ ga nee gaŋ le kɔl.

¹⁴ Tama di pɨna wo̰ di Tɨyatir som duroy kandɨ ga nee le, gusɔndɔ na Lidi. Hɨndi na ɗe-lɔɔ gɨyaw di da badɨge ga kɨledɨge osɨdoŋ tɔgɨ bɨ, na tama ɗe n̰ɨre Kumu bɨ. Ba-gulɔŋ lee gɨ hɨndi si sɨma kuɗa jen̰ kɔl kɨbɨ Pol.

¹⁵ Kan looge batɛm dan̰ ka-ƴaado pɨna bɨ, hɨndi molni, yeni hɨn̰: «Hɨn̰ gɨ kɨŋ na sɨla gɨ ɨŋ naa ɗe-aye kudurɔ bɨn̰ Ba-gulɔŋ na, kɨŋ ɨre sɨma tange.» Hɨndi loɗɨdɨde toyni bɨrɨŋ gɨ ni ɨrga som a taa.

Pol bɨ Sɨlas bɨ duroy dangay

¹⁶ Wɔlɛ gɨ pɨna wo̰ gɨ ni or jɨn̰ kɨɗɨn̰ ɔlɛ Kumu gɨŋ ɨni na, turmɔ ɗe-gɨye di pɨna wo̰ yal cɨndɨni. Hɨndi na tama di orɨn̰ dan̰ turnɔ di ɨsɨni di lee gɨ hɨndi bee garme. Bɨ ka-gulondo wan̰ge hɨnga wɔɔ tɔgɨ, kɨya garme ga hɨndi bee le.

¹⁷ Turmɔ ɗe-gɨye le ay te kɔbɛ kardini ni-gandi dan̰ Pol bɨ, den̰ sɨle ye hɨn̰: «Kalaŋ ga kɛ le, na ka-lɔɔ gɨye ga da Kumu gɨ ɗɨn̰ cay hɨnga nɔm! Kan kɨya gɨlgɨŋ na gɨyəŋ gɨ ungo na aya na, kɨya wan̰ pɔɗɛ.»

¹⁸ Hɨndi le hɨn̰ wo̰ cɨndo tumɔ tumɔ ɓal wɔlɛ kondɨ. Ɗɨn̰ cay Pol na, ban bɨle cɨndi jɨn̰ caa bɨ, ay noy bɨn̰ turnɔ di ɨsɨni di woy guso le bɨ yo hɨn̰: «Dan̰ guson̰ Jesu-Kɨris, me andaŋ coŋ gusi tama le.» Ɨni na, kɨɗɨn̰di ga nee gaŋ le bɨ, turnɔ le andaŋ gusoo coŋ.

¹⁹ Kɨɗɨn̰ ga ka-gulondo solge gɨ kɨɗɨn̰ wɔɔ hɨnga kage toyge ayaŋ coŋ ɨni na, kan ƴomge Pol dan̰ Sɨlas sɨdɨrdege orɨn̰ danage a gɛgɛr gɨŋ tumoyi ka-dɔɔ cay ƴaa.

²⁰ Kan orɨn̰ge danage tumoy ka-bɔyɛ kɔl bɨ, yen̰ge ka-bɔyɛ kɔl le hɨn̰: «Kalaŋ ga kɛ le, dɨbɨge do̰ a boy cay ƴaa tona di gumu dɨŋ. Kan na kalaŋ ga ni Jubɨ.

²¹ Bɨ kan gɨlɨn̰ge kalaŋ na hada di gasɨn̰-kɔl, gɨ ɨra dan̰ gasɨn̰-kɔl kana na-gandi ga ni kalaŋ ga Rɔm naŋ. Na toy di hɨn̰ wo̰ ma, ni kɨya ɓale geye cay nee naŋ bɨ, aye leen̰ gɨye naŋ bɨ.»

²² Dɨmdɨrdi kalaŋ ga cay ƴaa-di-gumu di nee le kalɨn̰ ma, san̰ge danage bɨ. Ɨni na, ka-bɔyɛ kɔl torge badɨge gusi Pol dan̰ Sɨlas coŋ bɨ, ayge noyge bɨn̰ asɨgarn̰əŋ gɨ kan na sɨmdage dan̰ bɨraw.

²³ Kɨɗɨn̰ ga kan teegege kuɗa dan̰ kɨlɛŋ ɨni na, kan beegege ƴaa dangay dɨŋ bɨ, ayge noyge bɨn̰ ba-game kɨbɨ ƴaa dangay na gamage pɛɗɛɗɛ bɨ.

²⁴ Kɨɗɨn̰ ga ba-game dangayn̰əŋ ba je noyge gɨ kan ba ay bii le hɨn̰ wo̰ ɨni na, ban say orɨn̰ danage bogɨge duroy ƴaa di woy a sogɨne bɨ, tobɨge gɨrgaŋ tɨbayge.

²⁵ Baa mɨnde dan̰ duroy son̰do bɔb ɨni na, Pol dan̰ Sɨlas olge Kumu bɨ, dege kɨra hɨramɨn̰ge Kumu bɨ. Kamdige ka-dangay jege noyge bɨ.

²⁶ Kɔl gɨ kɨbɨna kɛ bɨ, cay gɨsəŋ yɨbagde gusɨge dan̰ togɨyge yɨbag yɨbag lee gɨ te ƴaa dangay yɨbagdaŋ bɨ, kɨbɨ ƴaa dangay haŋdaŋ nɔm bɨ, hɨnga nɔm ga kan saɗɨdɨn̰ge tɨbay ka-dangay le pɨndɨrdoŋ nɔm coŋ bɨ.

²⁷ Ba-game dangayn̰əŋ le say wɨɗag a cay kuŋ gaŋ. Bɨ kɨɗɨn̰ ga ban sol kɨbɨ ƴaa dangay nɔm woy hangɨwa ɨni na, ban dor pəlɨm toy kɨya dɨɗɨn̰ gusi. Kɨya wa ban ɨrɨm hɨn̰ gɨ kalaŋ ga ƴaa dangay dɨŋ nɔm na andaŋge gɨrege tol ɨni.

²⁸ Ama Pol teeyi dan̰ tumoyi di daa pəŋ pəŋ yey hɨn̰: «Loon̰ gusɨn̰ hɨnga ga ɨsɨni naŋ! Ni woy nee nɔm kɛ ƴee.»

²⁹ Ɨni na, ba-game ka-dangay le, ɨngɨr tɨwa bɨ, say gɨrɨn̰ daa andɨn̰ pɨla boy ƴaa dangay dɨŋ bɨ, ban̰ tumoyi Pol dan̰ Sɨlas. Hundɔrɔ leeyi gɨ ban saydɨde paɗɨ paɗɨ.

³⁰ Ɨni na, ban andɨn̰ danage doŋ bɨ, ɨngɨrge yege hɨn̰: «Ka-gulonnɨ, kɛ ojɨ gɨ ɨŋ gɨ lɔɔ na wa ma maŋ gɨ wan̰ pɔɗɛ ga?»

³¹ Kan dɨbiige cay nee yeyge hɨn̰: «Bɨga kuduron̰ a cay Ba-gulɔŋ Jesu bɨ, ji kɨya wɔɔ pɔɗɛ dan̰ ka-ƴaadɨn̰.»

³² Kɨɗɨn̰ ga nee le, kan teege bɛrnɛ kɔl gɨ da Ba-gulɔŋ bii bɨ, bɨn̰ ka-ƴaadi bɨ.

³³ Ba-game ka-dangay le donge orɨn̰ danage duroy son̰dodo di nee dɨŋ le pɨle cɨn̰ ɨya toge bɨ, kardi nee ɨni na, kan leeyige batɛm kɨɗɨn̰di ga nee gaŋ le, dan̰ ka-ƴaadi nɔm.

³⁴ Ban orɨn̰ dan̰ Pol bɨ, Sɨlas bɨ, a tayi. Bɨ bɨge hɨnga ga ni dɔɔ diige bɨ, leen̰ge gusi-mɔwa dan̰ ka-ƴaadi, kɨya cay bɔgɛ gɨ kan bee kuduroyge cay Kumu.

³⁵ Kɨɗɨn̰ ga kɨɗɨn̰ wol ɨni na, ka-bɔyɛ kɔl gɨygɨge ka-gɨye kage yen̰ge ba-game ka-dangay le ye hɨn̰: «Ɗa kalaŋ ga nee le daa ɗe orge.»

³⁶ Ba-game ka-dangay le ɨrga yen̰ Pol kɔl gɨ nee le yey hɨn̰: «Ka-bɔyɛ kɔl nɔm gɨygɨge yəŋ, gɨ ɨŋ na ɗagɨŋ daa. Hɨn̰ wo̰ na, kɨŋ andaŋ ɨra dan̰ gusi-dɔbɛ!»

³⁷ Pol yen̰ ka-gɨye ga da ka-bɔyɛ kɔl le yege hɨn̰: «Cə, kɨya wɔyɛ na hɨn̰ wo̰ naŋ! Ni na karɨn̰aŋ ga a cay gɨsəŋ ga Rɔm gaŋ, ma kan tenige dan̰ kɨlɛŋ cɨn̰ kalaŋ bɨ, beenige dangay dɨŋ dɨle gɨ kɔl ƴom cayni bɨ. Ɨni na, kan gusɨge coŋ ba male gɨyəŋ gɨ ni dorni dangay dɨŋ dan̰ wɔsɛ ga? Ɗagegɨŋ kan gusɨge ba ɨrege dɨranige dangay dɨŋ daa.»

³⁸ Ka-gɨye ga da ka-bɔyɛ kɔl le, jogɨge yen̰ ka-bɔyɛ kɔl, kɔl le. Kɨɗɨn̰ ga kan je gɨ Pol dan̰ Sɨlas naa karɨn̰aŋ ga a cay gɨsəŋ ga Rɔm na, hundɔrɔ say leege tɔgɨ.

³⁹ Kan ɨrgage gusɨge ƴom cay tɨbayge. Kardi nee ɨni na, kan dorge doŋ bɨ, olge gɨ kan na saa ɨra ɗa cay ƴaa-di-gumu le coŋ.

⁴⁰ Kɨɗɨn̰ ga Pol dan̰ Sɨlas andaŋge dangay dɨŋ ɨni na, kan say jogɨge a da Lidi wan̰ karmɨge dobɨn̰ bandɨ kuduroyge pa dɨm ma san̰ge orɨn̰ge tumɔ ƴee.