Gɨye-lɔɔ 14 - Gabri Maja

Pol dan̰ Barnabas a cay ƴaa-di-gumu di Ikonɨyɔm

¹ Hɨnga ga nee le, lee gusɨge ɗaŋ coŋ a duroy cay ƴaa-di-gumu di Ikonɨyɔm dɨŋ: Pol dan̰ Barnabas andaŋge boy ƴaa-daye-di-da-Jubɨn̰əŋ bɨ, dorge kɔl gɨ lee gɨ Jubɨn̰əŋ dan̰ kondɨge bɨ, Gɨrɛgn̰əŋ dan̰ kondɨge bɨ, an̰ge kuduroyge.

² Ama Jubɨn̰əŋ ga ba ayage kuduroyge naŋ le, gosɨrge kalaŋ ga toyge na Jubɨ naŋ, lee gɨ kan ɨrɨmge gɨ ni lɔɔ hɨnga ga ɨsɨni dan̰ karmɨni ka-aye kudurɔ.

³ Naa hɨn̰ wo̰ kalɨn̰ ma, Pol dan̰ Barnabas somge Ikonɨyɔm kardige sɨngɨɗɨ. Kan ɗe kuduroyge na a cay Ba-gulɔŋ yen̰ge kɔl dan̰ cɨn̰-bandɨ. Ba-gulɔŋ kalɨn̰ ma baa danage lee gɨ kan leege tɨmon̰ di da ɗarwa toyi di ban lee danage le, lee gɨ kan leen̰ge hɨnga ga ɗɨn̰ cɨn̰-kɨɗɨn̰ bɨ, hɨnga ga ni beli bɨ.

⁴ Kalaŋ ga a cay ƴaa-di-gumu di nee le, cudroŋge dugo: Ga pɨna bugoŋge te Jubɨn̰əŋ bɨ, ga ɗaŋ bugoŋge te ka-gɨre-gɨye ga da Jesu gaŋ bɨ.

⁵ Jubɨ bɨ, kalaŋ ga toyge na Jubɨ naŋ bɨ, bugoŋge pɨna dan̰ ka-dɔɔ cayge age na leen̰ Pol dan̰ Barnabas ɨsɨna bɨ, worɨn̰dɨge dan̰ oru dɨɗɨge coŋ bɨ.

⁶ Kɨɗɨn̰ ga kan jege kol hɨnga ga kan gey lɔɔ danage na, kan or male kɨɗɨn̰ ga ni dobɨn̰ cayge nee a boy cay ƴaan̰əŋ ga gɨmdəŋ ga Listɨr dan̰ Dɛrbɨ di woy a cay gɨsəŋ ga Ligawoni dan̰ cay ƴaan̰əŋ ga nɨwɨre cayge.

⁷ Kan teege bɛrnɛ di da Kɔl-gɨ-Ɗari a cay ƴaan̰əŋ ga nee gaŋ le bɨ.

Pol dan̰ Barnabas bugoŋge a Listɨr

⁸ Ungo gɨ pɨna wo̰ gɨ ɓala ɨre dan̰ tɨbay daa naŋ som a cay ƴaa di Listɨr dɨŋ. Ban na ungo gɨ ƴoyi wooyi na ba-modo gɨ cay pɨna ɨra daa naŋ.

⁹ Wɔlɛ gɨ pɨna wo̰ ban som je kɔl gɨ Pol dor. Kɨɗɨn̰ ga Pol solii gəɗəɗə ɨni na, ban sol gɨ ungo gɨ nee le orɨn̰ dan̰ aye kudurɔ gɨ kɨya poɗii.

¹⁰ Kɨɗɨn̰di ga nee gaŋ le, Pol ay noyi dan̰ tumoyi di daa ye hɨn̰: «Saa ɨr dan̰ tɨban̰ daa.» Ɨni na, ba-modo le de say cud ɨre daa bɨ, ay te ɔrɛ daa.

¹¹ Kɨɗɨn̰ ga dɨmdɨrdi kalaŋ le ba solge hɨnga ga Pol ba lee le na, kan dege sɨle dan̰ kɨbɨ Ligawoni yege hɨn̰: «kumun̰əŋ bɨləŋge kalaŋ ga ɨndəŋ bɨ gɨsɨnge duroyni.»

¹² Kan teege Barnabas na «Jɛs» bɨ, Pol na «Ɛrmɛs» bɨ. Kɨya wa ban ma na ba-yɔɔ kɔl dan̰ guson̰ kamdi.

¹³ Ba-bɔgɛ kɨbar gɨ da Jɛs gɨ ƴaa-kula koyi woy a kɨbɨ cay ƴaa-di-gumu dɨŋ le, ɨrgan̰ dan̰ sɨn̰əŋ ga ban̰aŋ ga kan nongɨrdege bɨn̰e di hayaŋ tobɨdɨgege kordige kɨbɨ ƴaa-kula gɨŋ. Ban bɨ, dɨmdɨrdi kalaŋ bɨ, geyge dɨɗe sɨn̰əŋ le bogɨn̰ kɨbar bɨn̰ Barnabas dan̰ Pol.

¹⁴ Kɨɗɨn̰ ga ka-gɨre-gɨye, Pol dan̰ Barnabas jege kol hɨnga ga nee le ɨni na, kuduroyge homge na hɔmɛ gɨ dugo kɛ naŋ bɨ, sagɨdege badɨge kage bɨ, kɨya gɨlɨn̰ gɨ ke na gey danage naŋ, gɨrgɨn̰ge bugoŋ duroy dɨmdɨrdi kalaŋ le, den̰ge sɨle yege hɨn̰:

¹⁵ «Ka-pogɨn̰ɨni, kɨŋ le na wa ba hɨn̰ wo̰ ga? Ni na kalaŋ ga ɨndəŋ hɨn̰ kɨŋ-gandi wo̰ bɨ! Kɔl-gɨ-Ɗari gɨ ni ba tee bɛrnɛdi le, na gɨ agɨŋ na ɗen̰ kardi kulan̰əŋ ga kalɨn̰ wo̰ coŋ bɨ, agɨŋ na bɨlɨn̰ gusɨgɨŋ gusi Kumu gɨ som-bɨra. Ban na ba ɗɔɔ gɨɗɨgɨ-Kumu bɨ, cay gɨsəŋ bɨ, kuray gɨ gumu taa taa bɨ, hɨnga nɔm ga ba woy boy kuray gɨ gumu taa taa gɨŋ bɨ, gɨɗɨgɨ-Kumu gɨŋ bɨ.

¹⁶ Boy ɨlge nɔm ga pɨde le, Kumu ɗe te wɔɔ gɨ da kalaŋ nɔm orge, waŋ waŋ kalɨn̰ ma ay gɨyəŋ gɨ kuduroy gey.

¹⁷ Naa hɨn̰ wo̰ kalɨn̰ ma, Ban gɨl lɔɔ ɗarwa toyi di ban lee danage jɨn̰ tumɔ tumɔ. Kɨya wa ban bɨgɨŋ kaŋdi Kumu ga sayga daa bɨ, ɨlge nɔm gɨ gasa andɨn̰ kondɨ bɨ, bɨgɨŋ hɨnga ga ni dɔɔ ga kɨŋ dii ɗe kuduroygɨŋ sɨdɨldəŋ bɨ, ban lee gɨ gusɨgɨŋ moogɨŋ tɔgɨ bɨ.»

¹⁸ Kɨɗɨn̰ ga Pol dan̰ Barnabas yege kɔl dan̰ dɨmdɨrdi kalaŋ hɨn̰ wo̰ ɨni na, kan jɨga puyoŋge murug murug dugo. Naa hɨn̰ wo̰ kalɨn̰ ma, narge bɔgɛ kɨbar bɨn̰ ka-gɨre-gɨye na, osɨ gɨɗaŋ.

¹⁹ Kardi nee na, Jubɨn̰əŋ ga pɨna wo̰ ga saygage Antɨyɔs bɨ, Ikonɨyɔm bɨ, gosɨrge dɨmdɨrdi kalaŋ. Bɨ worɨn̰dege Pol dan̰ oru kɨya dɨɗiige. Ɨni na, kan say sɨriige orɨn̰ge danayi dɨbiige doŋ kardi cay ƴaa-di-gumu dɨŋ coŋ. Boy ɨrɨme koge gɨŋ na, kan ɨrɨmge gɨ ban na ma hayi ɨni.

²⁰ Ama kɨɗɨn̰ ga ka-aye kudurɔ dayaŋge cayi ɨni na, ban de say daa bɨ jogɨ cay ƴaa-di-gumu dɨŋ. Wan̰dodo dɨŋ ɨni na, ban say or Dɛrbɨ dan̰ Barnabas.

Pol dan̰ Barnabas jogɨge Antɨyɔs

²¹ Pol dan̰ Barnabas teege bɛrnɛ Kɔl-gɨ-Ɗari a boy cay ƴaa-di-gumu di Dɛrbɨ. Kan leege gɨ kalaŋ kondɨ bɨləŋge ka-aye-cay-tɨbay Jesu. Kardi nee ɨni na, kan bɨlege jogɨge a Listɨr bɨ, Ikonɨyɔm bɨ, Antɨyɔs di woy a cay gɨsəŋ ga Pisidi gaŋ bɨ.

²² A boy cay ƴaan̰əŋ ga pɨna pɨna ga nee le, kan dobɨge bandɨ kuduroy ka-aye-cay-tɨbay Jesu bɨ, ɨngɨrge gɨ kan na sɨma cay tɨbayge dɨŋ a cay aye kudurɔ gɨŋ. Bɨ kan say yege hɨn̰: «Naa wa wa kalɨn̰ ma hɨnga ga ni dɔsɛ-ɗugɔ kɨya looni tɔgɨ pa dɨm ma, mani kɨya andɨn̰ a boy dɔɔ-ƴaa di da Kumu dɨŋ ƴee.»

²³ A duroy Ka-Daye gaŋ pɨna pɨna na, kan torge kalaŋ ga muɗoldoŋ duroy nee bɨn̰ ka-aye kudurɔ. Kardi nee ɨni na, kan hayge kɨbɨge bɨ, olge Kumu bɨ, pa dɨm ma kan beegege kobɨ Ba-gulɔŋ gɨ kan beege kuduroyge cayi le ƴee.

²⁴ Kardi nee kan gayge cay gɨsəŋ ga Pisidi andɨn̰ a cay gɨsəŋ ga Pampili gaŋ.

²⁵ Kan teege bɛrnɛ kɔl gɨ da Kumu a Pɛrjɨ bɨ, kardi nee ɨni na, kan say orge a cay ƴaa-di-gumu di Atali dɨŋ.

²⁶ A nee le kan nayge koburo gɨ gumu taa taa gan̰ge kuray gɨ gumu taa taa, kɨya bɨlɨn̰ jogɨn̰ a cay ƴaa-di-gumu di Antɨyɔs, di woy a cay gɨsəŋ ga Siri gaŋ. Na hɨn̰ wo̰ ma, kan bɨlege wan̰ ka-aye kudurɔ ga tumɔ olge Kumu kol cayge ɗe gɨ ban na gɨr cayge dan̰ ɗarwa toyi kɨɗɨn̰ ga kan orɨn̰ge kɨya loon̰ge gɨye gɨ haw kɛ kan dɨɗɨ kɨbi le.

²⁷ Kɨɗɨn̰ ga kan bugoŋ a Antɨyɔs ɨni na, kan teege ka-aye kudurɔ nɔm na dayage cayge bɨ, kan dorge te hɨnga nɔm ga Kumu ba lee dan̰ gɨyəŋ koge bɨ, gɨyəŋ gɨ hangaŋ bɨn̰ kalaŋ ga toyge na Jubɨ naŋ ayɨn̰ kuduroyge bɨ le.

²⁸ Bɨ Pol dan̰ Barnabas somge dan̰ ka-aye-cay-tɨbay Jesu ɓal kɔl lam a cay ƴaa di Antɨyɔs dɨŋ.