Gɨye-lɔɔ 13 - Gabri Maja

Dorge Barnabas bɨ Sol bɨ gɨygege

¹ Ka-yɔɔ-kɔl-gɨ-Kumu-ba-yɔɔ bɨ, ka-gɨlɨn̰ kalaŋ kɔl gɨ da Kumu bɨ, woyge a duroy Ka-Daye ga Antɨyɔs gaŋ. Kalaŋ ga nee le na: Barnabas bɨ, Simin̰o gɨ teeyige ungo gɨ ɓaladi ɨndi bɨ, Lisɨyus ungo gɨ Sirɛn bɨ, Manahɛn gɨ kan gamgege dan̰ Ɛrɔd Antipas gɨ di cay gɨsəŋ ga Galile bɨ, Sol bɨ.

² Wɔlɛ gɨ pɨna wo̰, kɨɗɨn̰ ga kan dayge cayge kɨya n̰ɨre Ba-gulɔŋ bɨ, haye kɨbɨge bɨ na, Turnɔ ɗe-kuduroy-bɛrɛ yege hɨn̰: «Dɨragɨŋ Barnabas bɨ, Sol bɨ, ɗagegɨŋ dan̰ cɨndɨge bəŋ kɨya loon̰ gɨye gɨ ɨŋ teege koldi le.»

³ Kɨɗɨn̰ ga kan hay kɨbɨge bɨ, olge Kumu bɨ ɨni na, kan dɨbɨge kobɨge cayge torɨn̰-kɨbɨge bɨ, ɗegege or.

Barnabas bɨ Sol bɨ a Sɨpɨr

⁴ Barnabas bɨ, Sol bɨ le, na Turnɔ ɗe-kuduroy-bɛrɛ ba gɨyge ɗe gɨ kan na ɨrage Selesi. Kan nayge boy koburo gɨ gumu taa taa gɨŋ a kɨɗɨn̰ ga nee gaŋ le bɨ, kan say orge cɨndɨge jɨn̰ hɔgɨwa gɨ Sɨpɨr gɨŋ.

⁵ Kɨɗɨn̰ ga kan gɨsɨnge a cay ƴaa-di-gumu di Salamin dɨŋ ɨni na, kan teege bɛrnɛ di da kɔl gɨ da Kumu duroy ƴaa-daye-di-da-Jubɨn̰əŋ dɨŋ bɨ. Kan orɨn̰ge dan̰ Ja̰ Marg kobɨge ɗe na awnɨge.

⁶ Kan gayge hogɨwa bɨrɨŋ andɨn̰ge a Papos. Kan wayge ba-tɨmba gɨ pɨna wo̰, gɨ teeyige Bar-Jesu a nee. Ungo gɨ nee le na Jubɨ bɨ, lee gusi leen̰ na ba-yɔɔ-kɔl-gɨ-Kumu-ba-yɔɔ bɨ.

⁷ Ban na Serjus Pawlos gɨ na ba-dɔɔ cay gɨsəŋ le ba-pogii gɨ dɛj. Serjus Pawlos le, na ungo gɨ cay woy bɨra. Ban te Barnabas dan̰ Sol, kɨya wa ban orɨn̰ dan̰ tabɨlaŋdi jɔɔ kɔl gɨ da Kumu.

⁸ Ama Elimas gɨ gusondi duroy na ba-lɔɔ tɨmba dan̰ kɨbɨ koge le, jɨbɨge sɛdɨ coŋ bɨ, mal gɨyəŋ gɨ ni gosɨrɛ ba-dɔɔ cay gɨsəŋ ɗe gɨ ban na gɨ aye kuduroy naŋ.

⁹ Kɨɗɨn̰ ga nee le Turnɔ ɗe-kuduroy-bɛrɛ ƴee kuduroy Sol gɨ kan teeyige Pol le pɨl pɨl, lee gɨ ban si cɨndi jɛr jɛr cayi,

¹⁰ bɨ ban yey hɨn̰: «Ji na ungo gɨ terɨn̰ walɨn̰ kuduron̰ bɨ, ba-jɨba bɨ, ji na kurɨn̰ Haban̰ bɨ, ji na ba-baa gɨ da hɨnga ga dan̰ durɔ ɗɨngar bɨ, kɛ ji gɨ ɗɔɔ kɔngɨdɛ gɨyəŋ gɨ dan̰ durɔ ɗɨngar gɨ da Ba-gulɔŋ le baa naŋ ga?

¹¹ Sɨla haw kɛ na, dɔnɔ di da Ba-gulɔŋ kɨya bɨbɨn̰, ji gɨ sɔlɛ tɨwa naŋ, sɨm.» Ɨni na, kɨɗɨn̰di ga nee gaŋ le bɨ, cɨn̰ Elimas dobɨ ɨndi tɨlɨm bɨ, dɨlɨm ƴee cay cɨɗɨgɨ bɨ. Ban ay te lɔɔ lɨwɨn̰ lɨwɨn̰ malɨn̰ ungo gɨ ba ƴɔmɛ kobi gɨlii gɨyəŋ.

¹² Kɨɗɨn̰ ga ba-dɔɔ cay gɨsəŋ sol hɨnga ga ba lee gusɨge le ɨni na, ban ay kuduroy. Kɨya wa hɨnga ga ni gɨle ga da Ba-gulɔŋ le dor turnoyi.

Pol dan̰ Barnabas a Pisidi

¹³ Pol dan̰ kalaŋ ga danayi nayge boy koburo gɨ gumu taa taa gɨŋ, ayɨn̰ toy a cay ƴaa di Papos gan̰ge kuray bɨrɨŋ orɨn̰ bugoŋge a cay ƴaa di Pɛrjɨ, di woy a cay gɨsəŋ ga Pampili gaŋ. Ja̰ Marg ɗege a kɨɗɨn̰ ga nee gaŋ le, bɨlɨn̰ cayi jogɨn̰ a cay ƴaa-di-gumu di Jerusalɛm dɨŋ.

¹⁴ Ama kan orge tɨrga toge cɨndɨge tumɔ, ayɨn̰ toy a Pɛrjɨ orɨn̰ bugoŋ cay ƴaa-di-gumu di Antɨyɔs, di woy a cay gɨsəŋ ga Pisidi gaŋ. Wɔlɛ dɔrɛ gɨlale gɨ da Jubɨn̰əŋ gɨŋ na, kan andaŋge duroy ƴaa-daye-di-da-Jubɨn̰əŋ dɨŋ orge sɔmɛ dugo.

¹⁵ Ungo gɨ pɨna wo̰, say ɗongɨsɨ magtubu gasɨn̰-kɔl gɨ da Moyis bɨ, di da ka-yɔɔ-kɔl-gɨ-Kumu-ba-yɔɔ bɨ. Kardi nee ɨni na, ka-sɔmɛ a cay ƴaa-daye-di-da-Jubɨn̰əŋ le, gɨyge yege hɨn̰: «Karmɨni, hɨn̰ gɨ kɨŋ na ɨran̰ dan̰ kɔl gɨ kɨya dɔbɛ bandɨ kuduroy kalaŋ ga ba dayaŋge kɛ le na, yanigɨŋ.»

¹⁶ Ɨni na, Pol say daa leege kobi gɨ kan na sɨma kɨɗɨn̰ pɨna bɨ yege hɨn̰: «Kɨŋ kalaŋ ga Ɨsɨrayɛl, kɨŋ ka-bɔgɛ kɔl cay Kumu, jagɨŋ kɔl hɨnge.

¹⁷ Kumu gɨ da te wɨn̰je gɨ da Ɨsɨrayɛl ba-dɔrɛ mon̰inagɨŋ. Ban ba ɗoge gɨ kan na wɔɔ tɔgɨ kɨɗɨn̰ ga kan somɨn̰ge a cay gɨsəŋ ga Ejɨpt gaŋ le. Kardi nee ɨni na, ban dorge a cay gɨsəŋ ga Ejɨpt gaŋ coŋ, dan̰ gɨyəŋ gɨ da dɔnɔ di da kobi.

¹⁸ Kumu gamge a duroy dal dɨŋ ɓal ɨlge toyi-poɗɨn̰.

¹⁹ Ban mondɨ te wɔɔ gɨ da kalaŋ ga ɗaŋ won̰ jurgum a cay gɨsəŋ ga Kana gaŋ bɨ, ayɨn̰ cay gɨsəŋ kage bɨn̰ te wɔɔ gɨ da kalaŋ kayi ɗe bɨləŋ kage.

²⁰ Hɨnga ga nee le, lee gusɨge ɓal ɨlge aru-poɗɨn̰ dan̰ toyi-bay wo̰. Kardi nee ɨni na, ban bɨge ka-bɔyɛ kɔl bɨrɨŋ andɨn̰ boy wɔlɛ gɨ da ba-yɔɔ-kɔl-gɨ-Kumu-ba-yɔɔ Samɨyɛl gɨŋ.

²¹ Kardi nee ɨni na, kan ɨngɨrn̰ge Kumu kɨlma ɨni na, ban bɨge Sawɨl kurɨn̰ Kis. Ban na ungo gɨ a te wɨn̰je gɨ da Bɛ̰jamɛ̰ gɨŋ. Ban dii cay ƴaa ɓal ɨlge toy-poɗɨn̰.

²² Kardi nee ɨni na, Kumu dorii coŋ bɨ, si kɨlma Dabid ban̰di. Ban ye kɔl gɨ ojɨ cayi hɨn̰: “Ɨŋ way Dabid kurɨn̰ Jese, ban na ungo gɨ ƴee kuduronɨ. Ban kɨya lɔɔ hɨnga nɔm ga kuduronɨ gey.”

²³ «Kumu andɨn̰ dan̰ ba-pɔɗɛ a te wɨn̰je gɨ da Ɨsɨrayɛl na a te wɨn̰je gɨ da Dabid gɨŋ hɨn̰ gɨ ban ba ye gɨ ɗi na kɨya lɔɔ bɨge le, ban na Jesu.

²⁴ Tumɔ pa dɨm ma gɨ Jesu kɨya ɨrga ƴee le, Ja̰ ba-lɔɔ batɛm tee bɛrnɛ bɨn̰ te wɨn̰je gɨ da Ɨsɨrayɛl ɗe gɨ kan na bɨl gɨye-lɔɔdɨge bɨ, ɨrege gusi ay na leege batɛm bɨ.

²⁵ Kɨɗɨn̰ ga baa mɨnde gɨ Ja̰ ba-lɔɔ batɛm kɨya dɨɗe kɨbɨ gɨye koyi na, ban ye hɨn̰: “Kɛ kɨŋ ɨrɨm gɨ ɨŋ na waŋ ga? Ɨŋ na ungo gɨ kɨŋ som gamii le naŋ ƴee. Ama sɨlagɨŋ ungo gɨ pɨna wo̰, tɨlga karɨnɨ nee gɨ gangɨdi gɨyabe ga a tɨbayi kalɨn̰ ma ɨŋ ɓala pɨndɨre naŋ.”

²⁶ «Karmɨnɨ, kɨŋ kongɨn̰ɨn̰ Abɨraham bɨ, kɨŋ ga kɨŋ hɨndar Kumu bɨ le, kɔl gɨ ni pɔɗɛ gɨ kɛ le, Kumu gɨygɨn̰ bɨnagɨŋ na na-gandi.

²⁷ Kalaŋ ga Jerusalɛm bɨ, kɛrɨmbɛlɛŋ kage bɨ, sɨlage gɨ Jesu le naa Kɨris ban gɨ Kumu dorii kɨya poɗɨge le naŋ. Kan sɨlage te kɔl gɨ da ka-yɔɔ-kɔl-gɨ-Kumu-ba-yɔɔ, gɨ kalaŋ ba ɨre ɗongɨsɨge dan̰ wɔlɛ dɔrɛ gɨlale gɨ da Jubɨ nɔm le naŋ bɨ, kan say boyge kɔl gɨ ni tɨma cayi. Na hɨn̰ wo̰ ma kan leen̰ge hɨnga ga kan ba walge koldɨge, duroy magtubu di da ka-yɔɔ-kɔl-gɨ-Kumu-ba-yɔɔ dɨŋ ojɨn̰ cayi le.

²⁸ Kan waage hɨnga pɨna ga ojɨ gɨ kan kɨya dɨɗiige koldɨge naŋ, ama kan ɨngɨrn̰ge Piladɨ ɗe na dɨɗii.

²⁹ Kɨɗɨn̰ ga kan dɨɗɨge kɨbɨ hɨnga nɔm ga ojɨ cayi ga kan walge koldɨge duroy magtubu dɨŋ ɨni na, kan doriige cay sɨya-gɨ-dagɨli gɨŋ bɨ, orge dɨbiige boy umboŋ kamɨn̰aŋ gaŋ.

³⁰ Ama Kumu boyi lɨbii duroy kalaŋ ga madɨrdaŋ gaŋ.

³¹ Kalaŋ ga gorge dan̰ Jesu saygan̰ge danayi cay gɨsəŋ ga Galile gaŋ ɨrgan̰ge cay ƴaa-di-gumu di Jerusalɛm dɨŋ le, Jesu gɨl gusi bɨge wɔlɛ kondɨ. Haw kɛ na, kan na ka-lɔɔ tɨmon̰ toyi tumoy karɨn̰ Ɨsɨrayɛl.

³² «Haw kɛ na, ni-gandi na, ni tee na bɛrnɛ Kɔl-gɨ-Ɗari gɨ nee le bɨgɨŋ: Na hɨnga ga Kumu ye gɨ ɗi na kɨya lɔɔ bɨn̰ mon̰inagɨŋ.

³³ Ma ban lee hɨnga ga nee le haw kɛ bɨni ni-gandi kongɨn̰ii. Kɨya wa Jesu gɨ ba ma le, ban boyi lɨbii duroy kalaŋ ga madɨrdaŋ gaŋ, hɨn̰ gɨ kan ba walge a duroy magtubu sɔɔdo dɨŋ da Kɨbe-Kɨra Sɔm le. Walge yege hɨn̰: “Ji na kuronɨ, Ayɨn̰ toy labɨde na, ɨŋ na ban̰.”

³⁴ «Kumu ye ɗaŋ coŋ hɨn̰ gɨ ɗi na kɨya boyi lɨbii duroy kalaŋ ga madɨrdaŋ gaŋ, ɗe gɨ kuyoŋdi-gusi na gɨ ɔsɨn̰ɛ naŋ. Ban ye kɔl gɨ nee le hɨn̰ wo̰: “Hɨnga ga woy dan̰ cɨndɨge Ga ɨŋ ay nonɨ ga ɨŋ kɨya lɔɔ dan̰ Dabid le, Ɨŋ kɨya loogɨŋ bɨ.”

³⁵ «A duroy magtubu Kɨbe-Kɨra di ɗaŋ dɨŋ, kan ye boy nee ɗaŋ coŋ hɨn̰: “Ji kɨya ɗɔɔ gundi ungo kon̰ gɨ woy dan̰ cɨndi le, Ɔsɨn̰ɛ a boy umboŋ kamɨn̰aŋ gaŋ naŋ bɨrɨŋ bɨ.”

³⁶ «Dabid lee hɨnga nɔm ga kuduroy Kumu gey a boy ɨlgedi gɨŋ. Kardi nee ɨni na, ban ma bɨ, or wan̰ mon̰ii bɨ, gundi osɨn̰ bɨ.

³⁷ Ama gun gɨ da ban gɨ Kumu boyi lɨbii le, usɨn̰a naŋ bɨrɨŋ.

³⁸ «Karmɨnɨ, kuɗa gɨ kɨŋ sɨla kɔl gɨ ni ba yəgɨŋ kɛ le kuɗa: Gasɨn̰-kɔl gɨ da Moyis le kɨya ɓale dɔrɛ kɔl caygɨŋ naŋ bɨrɨŋ. Ama labɨde, ni tee bɛrnɛ di da kuduroy jalɨwa cay ɨsɨna na kɨya cay Jesu.

³⁹ Waŋ waŋ gɨ na bɨga kuduroy cayi na, Kumu dor kɔl cayi coŋ ɨni.

⁴⁰ Hɨn̰ wo̰ na ɗagɨŋ muɗɔlɛ cay gusɨgɨŋ gɨŋ ɗe hɨnga ga ka-yɔɔ-kɔl-gɨ-Kumu-ba-yɔɔ ba yege koldɨge le, ɗɔɔ loogɨŋ naŋ. Kan yege hɨn̰:

⁴¹ “Kɨŋ ka-cɔrɛ kɨɗɨn̰ le, Kuɗa gɨ turnoygɨŋ gɨr kayaŋ bɨ, mundoŋ gɨŋ bɨ, Kɨŋ kɨya marɨn̰ coŋ bɨ. Kɨya wa ɨŋ kɨya lɔɔ hɨnga pɨna duroygɨŋ, Kɨɗɨn̰ ga kɨŋ ban̰ dan̰ cɨndɨgɨŋ ƴee, Hɨn̰ gɨ ungo na yagɨŋ koldɨge kalɨn̰ ma, Kɨŋ kɨya bɔgɛ kuduroygɨŋ cay nee naŋ.”»

⁴² Kɨɗɨn̰ ga Pol dan̰ Barnabas andaŋge doŋ ɨni na, kan olge, ma jɨgage olge nee, ɗe gɨ kan na jɨge yage kɔl gɨ nee le, dan̰ wɔlɛ dɔrɛ gɨlale gɨ da Jubɨn̰əŋ gɨ ɗaŋ coŋ.

⁴³ Kɨɗɨn̰ ga kalaŋ ga ba dayaŋge le busoŋge ɨni na, Jubɨ bɨ, kan ga bɨle gusɨge Jubɨ ga ka-n̰ɨre Kumu bɨ, kobɨge kardi Pol dan̰ Barnabas. Boy are-kɔl koge gɨŋ na, kan dobɨge bandɨ kuduroyge ɗe kan na ƴɨman̰ ɗarwa di Kumu ba lee danage le usa bɨ.

⁴⁴ Dan̰ wɔlɛ dɔrɛ gɨlale gɨ da Jubɨn̰əŋ gɨ ɗaŋ na, kalaŋ ga a cay ƴaa-di-gumu dɨŋ nɔm dayaŋge, toyge di baa na dḛ wo̰ kɨya jon̰ kɔl gɨ da Ba-gulɔŋ.

⁴⁵ Kɨɗɨn̰ ga Jubɨn̰əŋ ba solge dɨmdɨrdi kalaŋ ga ba dayaŋge le na, cɨn̰-pɨɗɨma say leege tɔgɨ lee gɨ kan jɨbɨ kɔl nɔm ga da Pol sɛdɨ coŋ bɨ, yagɨdiige bɨ.

⁴⁶ Kɨɗɨn̰ ga nee le, Pol dan̰ Barnabas yege kɔl dan̰ cɨn̰-bandɨ yen̰ge hɨn̰: «Kumu ojɨ gɨ kɨŋ na ba ja kɔl koyi cay wase pa dɨm. Ama hɨn̰ gɨ kɨŋ ba jɨbɨ sɛdɨ coŋ bɨ, kɨŋ sol sɔmɛ-bɨra gɨ dan̰ cɨndɨgɨŋ hɨn̰ hɨnga ga uja caygɨŋ naŋ wo̰ bɨ le, na toy di hɨn̰ wo̰ ma haw kɛ na, ni kɨya bɨle gusɨni gusi kalaŋ ga toyge na Jubɨ naŋ le.

⁴⁷ Kɨya wa Ba-gulɔŋ boy cay gɨye gɨ ban beeni kobɨni dan̰ gɨyəŋdi, kɨɗɨn̰ ga ban ye hɨn̰: “Ɨŋ ɗen̰ na hɨn̰ kɨɗɨn̰ ga woli ga da te wɔɔ gɨ da kalaŋ Ga a cay gɨsəŋ gaŋ wo̰, Ɗe gɨ ji na aya kol pɔɗɛ gɨ kɛ le, Ɨran̰ bɨrɨŋ ƴan̰ cay gɨsəŋ nɔm.”»

⁴⁸ Kɨɗɨn̰ ga kalaŋ ga toyge na Jubɨ naŋ ba jege kɔl gɨ nee le na, kan say leege gusi-mɔwa bɨ, hɨramge kɔl gɨ da Ba-gulɔŋ Kumu bɨ. Kan nɔm ga Kumu torge ɗe gɨ kan na waa sɔmɛ-bɨra gɨ dan̰ cɨndi le, ayge kuduroyge.

⁴⁹ Kɔl gɨ da Ba-gulɔŋ, ƴee cay gɨsəŋ ga nee le nɔm.

⁵⁰ Ama Jubɨn̰əŋ gosɨrge kandɨ ga gɨmdəŋ gɨmdəŋ ga ka-n̰ɨre Kumu bɨ, kalaŋ ga gɨmdəŋ gɨmdəŋ bɨ, ga a boy cay ƴaa di nee dɨŋ le, lee gɨ kan dɨbɨn̰ge Pol dan̰ Barnabas cɨn̰-gɨle-cɨn̰ bɨ, taygege a cay gɨsəŋ kage gaŋ coŋ bɨ.

⁵¹ Pol dan̰ Barnabas gagɨdege bundu di cay tɨbayge dɨŋ ɗɨga ɗɨga, dorɨn̰ naji toge cayge coŋ orɨn̰ge a Ikonɨyɔm.

⁵² Naa hɨn̰ wo̰ kalɨn̰ ma, ka-aye-cay-tɨbay Jesu somge dan̰ gusi-mɔwa bɨ, Turnɔ ɗe-kuduroy-bɛrɛ ƴee kuduroyge pɨl pɨl nee bɨ.