Gɨye-lɔɔ 12 - Gabri Maja

Ɛrɔd dɨɗɨ Jag bɨ ƴom Pɨyɛr dangay bɨ

¹ Boy ɨlgedi gɨ nee gɨŋ le, kɨlma gɨ cay wase Ɛrɔd ay te gɨlɨn̰ ka-aye kudurɔ ga pɨna ga duroy Ka-Daye cɨn̰-n̰age.

² Dan̰ te tumɔ toyi, kan dɨɗɨge Jag, gɨ na Ja̰ kurɨndi dan̰ pəlɨm.

³ Bɨ kɨɗɨn̰ ga ban ba sol gɨ hɨnga ga ban lee le ƴee cɨn̰ Jubɨn̰əŋ na, ban ay noyi bɨge gɨ kan na ƴɨma Pɨyɛr nee coŋ. Na boy wɔlɛ gɨ kan kɨya leen̰ kɨdɨrɛ gɨ da mapa gɨ kan laage dan̰ subugu naŋ le.

⁴ Ban ƴom Pɨyɛr dɨbii dangay dɨŋ bɨ, ɗe asɨgarn̰əŋ mɔjɨ-cayge-jii ƴeege te gusɨge poɗɨn̰-poɗɨn̰ gamiige. Ban ɨrɨm gɨ ni dorii doŋ bɔyɛ kɔl cayi cɨn̰ dɨmdɨrdi kalaŋ kardi kɨdɨrɛ gɨ ni Pakɨ.

⁵ Pɨyɛr woy dangay dɨŋ, ama kalaŋ ga Ka-Daye olge Kumu ye man̰ kɔl cayi.

Kumu dor Pɨyɛr a dangay dɨŋ

⁶ Duroy son̰do di tumɔ pa dɨm ma Ɛrɔd kɨya dorɨn̰ Pɨyɛr cɨn̰ dɨmdɨrdi kalaŋ ƴee na, saɗɨdege Pɨyɛr dan̰ mɔrɨyɔŋ won̰ sɔɔ bɨ ban woy duroy asɨgarn̰əŋ gaŋ won̰ge sɔɔ bɨ. Ama asɨgarn̰əŋ ga ɗaŋ ɨrege kɨbɨ ƴaa dangay dɨŋ amɨn̰ge kɨɗɨn̰.

⁷ Ɨni na, kɨɗɨn̰di ga nee gaŋ le bɨ, ba-ƴɔbɛ gɨ daa nii gɨ da Ba-gulɔŋ gɨ pɨna wo̰ andaŋ cay hɨrɨj bɨ, asɨn̰a ƴee duroy ƴaa dangay bɨ. Ba-ƴɔbɛ gɨ daa nii le ɨsɨbɨ Pɨyɛr a gasɨbi lɨbii daa bɨ, yeyi hɨn̰: «Sa kɨlaw daa.» Kɨɗɨn̰di ga nee gaŋ le bɨ, mɔrɨyɔŋ ga a kobi le turoŋ bugoŋ dugo.

⁸ Kardi nee ɨni na, ba-ƴɔbɛ gɨ daa nii le yeyi hɨn̰: «Saɗa sɔndurɔŋ kon̰ daa bɨ, tɨba gaybe tɨban̰ bɨ.» Pɨyɛr lee hɨn̰ wo̰. Ɨni na, ba-ƴɔbɛ gɨ daa nii le yey hɨn̰: «Dɨba gɔdɔŋ kon̰ gusɨn̰ bɨ, kɨban̰ karɨnɨ.»

⁹ Pɨyɛr andaŋ doŋ ay gɨyəŋ kardi. Hɨnga ga ba-ƴɔbɛ gɨ daa nii ba lee le, ban sɨla gɨ naa hɨnga ga cɨndi naŋ. Ban ɨrɨm gɨ naa hɨnga na ba buyoŋ cɨndi hɨn̰ dḛḛ wo̰.

¹⁰ Ɨni na, ba-ƴɔbɛ gɨ daa nii dan̰ Pɨyɛr pɨdege ka-game kɨbɨ ƴaa ga cay wase bɨ, ga cay sɔɔdɨge bɨ ɨni na, kan orge bugoŋ kɨbɨ ƴaa di gumu gɨ kan leege dan̰ nare. Kɨbɨ ƴaa gɨ nee le, or na jɨn̰ duroy cay ƴaa-di-gumu dɨŋ. Kɨɗɨn̰di ga nee gaŋ le bɨ, kɨbɨ ƴaa le hangaŋ cay gusi ɓɨla. Kan sɨygɨge kɨbɨ gɨyəŋ gɨ pɨna gɨŋ bɨ, kɨɗɨn̰di ga nee gaŋ le bɨ, ba-ƴɔbɛ gɨ daa nii le ɗeyi.

¹¹ Ɨni na, cɨn̰ Pɨyɛr buyoŋ cay gusi gɨŋ bɨ ban ye hɨn̰: «Na cɨndi, haw kɛ na ɨŋ sol hɨn̰ gɨ na Ba-gulɔŋ gusi ba gɨye dan̰ ba-ƴɔbɛ koyi gɨ daa nii ɗe na ɨrga dɔrɔŋ kobɨ Ɛrɔd bɨ, duroy hɨnga ga ɨsɨni ga dɨmdɨr di kalaŋ ga ni Jubɨ ba geyge looŋ le.»

¹² Kɨɗɨn̰ ga ban sol te hɨnga ga ba andaŋ cay le arɨn̰ ɨni na, ban say or a da Mari di ni Ja̰ ƴoyi, Ja̰ le tɨrɨmbalay na Marg. Kalaŋ kondɨ dayaŋge a taa olge Kumu.

¹³ Kɨɗɨn̰ ga ban de kɨbɨ babɨ gɨ doŋ na, turmɔ ɗe-gɨye di pɨna wo̰ di gusɔndɔ na Rod ɨrga kɨya haŋge kɨbɨ ƴaa.

¹⁴ Bɨ kɨɗɨn̰ ga hɨndi sol gɨ naa Pɨyɛr tumoyi na ba yɔɔ ɨni na, hɨndi lee gusi-mɔwa tɔgɨ bɨrɨŋ gɨ halɨn̰ gɨybəŋ dɨle hangɨn̰ kɨbɨ-ƴaa bɨlɨn̰ caa jogɨn̰. Ama hɨndi gɨre dan̰ gusi-mɔwa jogɨ ƴen̰, kɨya yon̰ kalaŋ ga dayaŋge le, gɨ Pɨyɛr na ɨre kɨbɨ ƴaa gɨŋ doŋ nee.

¹⁵ Kan dubooge cay nee yooge hɨn̰: «Me dɨngal.» Ama hɨndi ƴom kɨbo osɨ ye hɨn̰ na cɨndi. Ɨni na, kan yege hɨn̰: «Gɨ lɔɔ na ba-ƴɔbɛ gɨ daa nii gɨ ba game Pɨyɛr.»

¹⁶ Ama Pɨyɛr woy te dɔgɛ kɨbɨ-ƴaa hurɔg bɨrɨŋ gɨsɨn̰ gɨ kan haŋgii. Kɨɗɨn̰ ga kan soliige na, kɔl kayge sɛl sɛl.

¹⁷ Ban leege kobi gɨ kan na sɨgɨyage dugo. Bɨ ban dorge te gɨyəŋ gɨ Ba-gulɔŋ ba lee dorii dangay dɨŋ le bɨge. Bɨ ban yege ɗaŋ coŋ hɨn̰: «Ɨragɨŋ yan̰ Jag dan̰ karmɨna ga ɗaŋ koldi.» Kardi nee ban andaŋ or kɨɗɨn̰ ga ɗaŋ gaŋ.

¹⁸ Kɨɗɨn̰ ga kɨɗɨn̰ wol yarara ɨni na, asɨgarn̰əŋ waage cay tɨbayge naŋ bɨrɨŋ, ɨngɨrɨn̰ge gusɨge kɔl yen̰ge hɨn̰: «Kɛ Pɨyɛr le bɨləŋ na wa ɨni ga?»

¹⁹ Ɛrɔd bee kalaŋ maliige, ama kan maliige bɨrɨŋ wayayge naŋ. Ban te ka-game kɨɗɨn̰ le ɨngɨrge kɔl hal bɨ, ay noyi bɨn̰ asɨgarn̰əŋ gɨ kan na dɨɗɨge coŋ bɨ. Kardi nee ɨni na, Ɛrɔd say or a cay gɨsəŋ ga Jude gaŋ or somɨn̰ dḛ a cay ƴaa di Sejare dɨŋ.

Kɨlma Ɛrɔd ma

²⁰ Ɛrɔd le kuduroy homi tɔgɨ cay kalaŋ ga Tir bɨ, Sido̰ bɨ. Kan beege noyge pɨna orge wan̰ Ɛrɔd. Ama kan orge wan̰ Bɨlastus ba sɔlɛ duroy ƴaa gɨ da kɨlma Ɛrɔd dɨbiige kardɨge pa dɨm ma orɨn̰ge gusi Ɛrɔd ɨngɨrige gɨ ban na gɨ dɨbe kɨmbɨl danage naŋ ƴee. Kan ɨngɨriige hɨn̰ wo̰, na kɨya gɨ na dan̰ gɨyəŋ gɨ da cay ƴaa toge ma hɨnga ga ni wɔɔ bɨ, dɔɔ bɨ, saygan̰ nee ɨrgan̰ boy cay ƴaa di Tir dan̰ Sido̰ dɨŋ.

²¹ Wɔlɛ gɨ kan ojɨ kɨya wan̰ gusɨge le ɓal. Boy wɔlɛdi gɨ nee le, Ɛrɔd tobɨ badɨge kay ga ni tɨrɨmbala gusi bɨ, somɨn̰ a cay kali tɨrɨmbala dɨŋ bɨ, yen̰ dɨmdɨrdi kalaŋ le kɔl adɨldɨn̰ toyi cɨndɨge.

²² Ɨni na, dɨmdɨrdi kalaŋ le say dege sɨle yen̰ge hɨn̰: «Na tumoyi kumu gɨ pɨna wo̰ ba-yɔɔ kɔl wala, na tumoyi ungo gɨ ɨndi naŋ.»

²³ Kɨɗɨn̰di ga nee gaŋ le bɨ, ba-ƴɔbɛ gɨ daa nii gɨ da Ba-gulɔŋ andɨ Ɛrɔd kɨya wa ban dɨbɨ gusoŋ-tɔgɛ a cay Kumu naŋ. Bɨ suboŋn̰əŋ bugoŋge kuduroy dii muɗɔgɨ dɨɗii coŋ.

²⁴ Bɨ kɨɗɨn̰ ga nee le, kɔl gɨ da Kumu or jɨn̰ tumɔ tumɔ bɨ, say cay mɨgay gɨŋ bɨ.

²⁵ Kɨɗɨn̰ ga Barnabas dan̰ Sol, dɨɗɨge kɨbɨ gɨye gɨ kan gɨyge koldɨge le, a boy cay ƴaa-di-gumu di Jerusalɛm dɨŋ ɨni na, kan bɨle cayge jogɨ. Barnabas dan̰ Sol, golge Ja̰ gɨ tɨrɨmbalay na Marg le kobɨge.