Gɨye-lɔɔ 11 - Gabri Maja

Pɨyɛr gɨlɨn̰ kalaŋ ga dayaŋge a Jerusalɛm te hɨnga ga lee gusɨge

¹ Ka-gɨre-gɨye bɨ, karmɨni bɨ, ga somge a cay gɨsəŋ ga Jude gaŋ le, jege gɨ kalaŋ ga toyge na Jubɨ naŋ le na ƴeege kɔl gɨ da Kumu bɨ.

² Kɨɗɨn̰ ga Pɨyɛr jogɨ a Jerusalɛm ɨni na, Jubɨ ga ayge kuduroyge say ɗalige,

³ yege hɨn̰: «Kɨya wa ma man̰ andaŋ duroy ƴaa di da kalaŋ ga toyge na Jubɨ naŋ bɨ, mɨn̰ dii hɨnga danage bɨ ga?»

⁴ Ɨni na, Pɨyɛr say dorge te kɔl gɨ nee le, dan̰ gɨyəŋdi gɨyəŋdi pɨna pɨna nɔm yege hɨn̰:

⁵ Kɨɗɨn̰ ga ɨŋ som ol Kumu a boy cay ƴaa-di-gumu di Jope dɨŋ ɨni na, ɨŋ sol hɨnga buyoŋ cɨnɨ hɨn̰ dḛḛ wo̰ woy gɨlɨn̰ hɨn̰ kɨbɨ badɨge ga gumu ga ƴomge tɨbɨn̰dɨge ga poɗɨn̰ wo̰, sayga gɨɗɨgɨ-Kumu gɨŋ daa gɨsɨngɨ bugoŋ mɨnde gusɨnɨ.

⁶ Ɨŋ dɨŋde hɨnga ga nee le ɨni na, ɨŋ sol kɨmɛnɛ ga tɨbayge poɗɨn̰ bɨ, ga caa gɨŋ bɨ, ga n̰ar dugo bɨ, cɨɗəŋ bɨ.

⁷ Kɨɗɨn̰di ga nee gaŋ le, ɨŋ je noy ungo yəŋ hɨn̰: «Pɨyɛr sa daa, dɨɗɨ daa.»

⁸ Ama ɨŋ jɨga dɨbii cay nee hɨn̰: «Ba-gulɔŋ, ɨŋ cɨle naŋ bɨrɨŋ, kɨya wa hɨnga ga Kumu nar dɔɔ, wala hɨnga ga mɨdagi le, cɨl kɨbɨnɨ naŋ ƴee.»

⁹ Bɨ noy ungo le ye gɨɗɨgɨ-Kumu gɨŋ ɗaŋ coŋ hɨn̰: «Hɨnga ga Kumu ba ye gɨ na hɨnga ga duroŋ mɨra le, ji ɗɔɔ ba sɔlɛ leen̰ hɨnga ga ni kɨni naŋ.»

¹⁰ Hɨnga ga nee le, lee gusɨge hɨn̰ wo̰ cay sɨbɨ bɨ, kardi nee ɨni na, kan sɨrge hɨnga le nɔm jogɨn̰ gɨɗɨgɨ-Kumu gɨŋ coŋ.

¹¹ Kɨɗɨn̰di ga nee gaŋ le bɨ, kalaŋ won̰ge sɨbɨ ɨrgage ɨre a kɨbɨ ƴaa gɨ ni somɨn̰ nee gɨŋ le. Kan saygage na Sejare bɨ, na ungo ba gɨyge karɨnɨ bɨ.

¹² Turnɔ di da Kumu yəŋ ɨŋ na sa ɨra danage dɨle ɗɔɔ ɗugonɨ alaŋ. Karmɨnɨ ga jii ga ba ɨrege kɛ ga ɨŋ ɨrgan̰ danage le bəŋge a Sejare bɨ, ni andaŋ nɔm toni dɨŋ a duroy ƴaa di da Kɔrney dɨŋ bɨ.

¹³ Kɔrney dorni kardɨ sɔlɛ gɨ ban sol ba-ƴɔbɛ gɨ daa nii le. Ungo le ɨrga ɨre duroy ƴaadi gɨŋ bɨ yey hɨn̰: «Ban na gɨy kalaŋ a Jope kardi Simo gɨ tɨrɨmbalay na Pɨyɛr le, ɗe na ɨrga.

¹⁴ Ban kɨya yon̰ kɔl gɨ kɨya poɗɨn̰ ji-bandi gusɨn̰ bɨ, ka-ƴaadɨn̰ nɔm bɨ.»

¹⁵ Kɨɗɨn̰ ga ɨŋ ay te kɔl kɨya yɔ ƴee bɨ ga ma, Turnɔ ɗe-kuduroy-bɛrɛ gɨsɨn cayge hɨn̰ gɨ ba gɨsɨnɨn̰ cayna cay wase le wo̰ bɨ.

¹⁶ Kɨɗɨn̰di ga nee gaŋ le bɨ, ɨŋ ɨrɨm cay kɔl gɨ Ba-gulɔŋ ba ye tumɔ le ban ye hɨn̰: «Ja̰ leen̰ kalaŋ batɛm na dan̰ kaŋ, ama kɨŋ na kan kɨya loogɨŋ batɛm na dan̰ Turnɔ ɗe-kuduroy-bɛrɛ.»

¹⁷ Hɨn̰ gɨ hɨnga ga Kumu bɨge le, na ɓalɨn̰a dan̰ hɨnga ga Kumu bɨna kɨɗɨn̰ ga na ba been̰ kuduroyna cay Ba-gulɔŋ Jesu-Kɨris le na, kɛ ɨŋ na waŋ ma maŋ gɨ narɨn̰ Kumu lɔɔ hɨnga kayi ga?

¹⁸ Kɨɗɨn̰ ga kan jege kɔl gɨ nee le ɨni na, ɗugoyge jɨga baa cay mɨgaa dɨŋ bɨ, hɨramge Kumu yege hɨn̰: «Hɨnga le woy na hɨn̰ wo̰ leen̰ cɨndi hage, kalaŋ ga toyge na Jubɨ naŋ le, Kumu bɨge gɨyəŋ gɨ ni bɨle gɨye-lɔɔdɨge, ɗe gɨ kan na wan̰ sɔmɛ-bɨra gɨ leen̰ cɨndi bɨ.»

Ka-Daye ga Antɨyɔs

¹⁹ Kalaŋ ga kan gɨlge cɨn̰-kɨɗɨn̰ ga kan dɨɗɨn̰ Etɛn le, busdoŋge a cay kɨɗɨn̰ gaŋ. Ga pɨna duroyge orge bɨrɨŋ andaŋge a cay gɨsəŋ ga Pinisi gaŋ bɨ, ga Sɨpɨr gaŋ bɨ, cay ƴaa-di-gumu di Antɨyɔs dɨŋ bɨ. Kan tee bɛrnɛ kɔl gɨ da Kumu bɨn̰ kalaŋ, ama kan tee bɨn̰ na Jubɨn̰əŋ ƴɔbɨ.

²⁰ Ama ga pɨna duroyge ga na kalaŋ ga a cay gɨsəŋ ga Sɨpɨr gaŋ bɨ, cay ƴaa-di-gumu di Sirɛn dɨŋ bɨ le, kɨɗɨn̰ ga bugoŋge a Antɨyɔs ɨni na, kan teege bɛrnɛ Kɔl-gɨ-Ɗari gɨ da Ba-gulɔŋ Jesu-Kɨris bɨn̰ kalaŋ ga na Gɨrɛgn̰əŋ.

²¹ Dɔnɔ da Ba-gulɔŋ baa danage, lee gɨ kalaŋ kondɨ ayge kuduroyge bɨ, bɨlege gusɨge gusi Ba-gulɔŋ bɨ.

²² Kɔl gɨ nee le, baa a sɨmay Ka-Daye ga Jerusalɛm, lee gɨ kan gɨyge Barnabas a Antɨyɔs.

²³ Kɨɗɨn̰ ga ban say or sɔlɛ ɗarwa di Kumu lee le ɨni na, gusi-moy tɔgɨ bɨ, ban dobɨ bandɨ kuduroyge nɔm, ɗe kan na ɨrɨn̰ cay tɨbayge dɨŋ usa kardi Ba-gulɔŋ bɨ.

²⁴ Kɨya wa Barnabas na ungo gɨ kuɗa bɨ, Turnɔ ɗe-kuduroy-bɛrɛ ƴee kuduroy pɨl pɨl bɨ, aye kudurɔ koyi man̰edi unɔ bɨ. Na toy di hɨn̰ wo̰ ma, kondɨwadi kalaŋ beege kuduroyge cay Ba-gulɔŋ bɨ, dayaŋge dan̰ ka-aye kudurɔ bɨ.

²⁵ Kardi nee ɨni na, Barnabas say or a Tars kɨya male Sol.

²⁶ Kɨɗɨn̰ ga ban wayi ɨni na, ban ɨrgan̰ danayi a Antɨyɔs. Kan sɔɗɨmɔŋ toge dɨŋ ɨlgɨge daa pɨna, duroy kalaŋ ga Ka-Daye ga a Antɨyɔs bɨ, gɨlɨn̰ge dɨmdɨrdi kalaŋ kɔl tɔgɨ bɨ. Cay wase cɨg cɨg na, na a cay ƴaa-di-gumu di Antɨyɔs dɨŋ ma kalaŋ ayge te tɔgɛ ka-aye-cay-tɨbay Jesu, naa kalaŋ ga ka-kɔbɛ Kɨris.

²⁷ Boy wɔlɛ gɨ nee gɨŋ le, ka-yɔɔ-kɔl-gɨ-Kumu-ba-yɔɔ saygage Jerusalɛm ɨrgage Antɨyɔs.

²⁸ Ungo gɨ pɨna wo̰ duroyge gɨ gusondi na Agabus le, Turnɔ di da Kumu gɨlii gɨ badɨra na kɨya bɔɔ a cay gɨsəŋ gaŋ nɔm. Lee gɨ ban say daa yen̰ kalaŋ. Badɨra le baa leen̰ cɨndi boy ɨlge gɨ Kɨlod diin̰ cay ƴaa.

²⁹ Ka-aye-cay-tɨbay Jesu ojɨge jɨbe te ka-aye kudurɔ ga somge a cay gɨsəŋ ga Jude gaŋ. Waŋ waŋ kalɨn̰ ma dan̰ hɨnga wɔɔ ga woy kobi.

³⁰ Kɨɗɨn̰ ga kan lee hɨnga ga kan ojɨ lɔɔ le ɨni na, kan ayge hɨnga wɔɔdɨge le beege kobɨ Barnabas kan dan̰ Sol, ɗe kan na ɨran̰ge bɨn̰ kan ga muɗoldoŋ ga a cay gɨsəŋ ga Jude gaŋ.