Əbɨro 9 - Gabri Maja

Gɨyəŋ gɨ cɨndi gɨ ni n̰ɨrɨn̰ Kumu

¹ Saɗe kɨbɨ pɨna ɓɨse gusu gɨ cay wase orɨn̰ dan̰ gasaŋ ga ojɨ cay lɔɔ gɨye bɨn̰ Kumu bɨ, orɨn̰ dan̰ ƴaa-di-da-Kumu di cay gɨsəŋ gaŋ kɛ bɨ.

² Lee gɨ leege ƴaa di da Kumu di nee le na dan̰ ɓala. Ƴaa-ɓala le duroy won̰ sɔɔ. Duroy gɨ cay wase gɨ teeyige naa kɨɗɨn̰ ga woy dan̰ cɨndɨge le, ɗege nare lamba gɨ kobi jurgum bɨ, tabɨl di ɗege mapa gɨ woy dan̰ cɨndi gɨ ni bɨn̰ Kumu cay nee nee bɨ.

³ Duroy gɨ ni cay sɔɔdi gɨ teeyige naa kɨɗɨn̰ ga woy dan̰ cɨndɨge ɗɨn̰ coŋ le, woy na a kardi badɨge ga boy duroy ƴaa-di-da-Kumu di leege dan̰ ɓala.

⁴ Na a kɨɗɨn̰ ga nee gaŋ le ma ɗege hɨnga ga gaɗɨge ga ƴomge kardɨge dan̰ lɔr ga ni ulɨn̰ hɨnga ga ɗo̰ tɨna cay nee bɨ, sandugu di ni saɗe kɨbɨ pɨna ɓɨse gusu di ƴomge kardo nɔm dan̰ lɔr nee bɨ. A duroy sandugu le, pɨray gɨ ni lɔr gɨ man woy duroy nee woy a nee bɨ, jor gɨ da Aro̰ gɨ laɗɨ bɨ, garma gɨ habili gɨ walge gasɨn̰-kɔl gɨ ojɨ cay saɗe kɨbɨ pɨna ɓɨse gusu woy nee bɨ.

⁵ A cay sandugu le, kan uyge hɨnga se ga daa nii ga gɨlɨn̰ hɨn̰ ba-ƴɔbɛ gɨ daa nii wo̰. Kan bɨl majɨbiige jɨn̰ tumɔ bɨn̰ gusɨge tolɨn̰ cay sandugu bɨ, na kɨɗɨn̰ ga da kuduroy jalɨwa cay ɨsɨna gɨŋ bɨ. Ama haw kɛ na, kɨɗɨn̰ ga ni dɔrɛ te kol hɨnga ga nee le dan̰ gɨyəŋdɨge gɨyəŋdɨge unɔ.

⁶ Kɨɗɨn̰ ga ƴomge cay hɨnga ga nee le nɔm ɗege woy kɨɗɨn̰dɨge gaŋ ɨni na, ka-bɔgɛ kɨbar andaŋge a boy kɨway ƴaa-di-da-Kumu di leege dan̰ ɓala gɨ cay wase gɨŋ dan̰ tɨwa nɔm kɨya loon̰ gɨye koge.

⁷ Ama na mangɨl gɨ da ka-cay ka-bɔgɛ kɨbar ƴɔbɨ, ma na ba andaŋ a boy duroy ƴaa-ɓala gɨ sɔɔdi gɨŋ le. Ban andaŋ nee na cay pɨna duroy ɨlge pɨna, dan̰ kɨbar gɨ ni bɨn̰ Kumu kɨya cay ɨsɨna koyi ban gaŋ bɨ, kɨya cay ɨsɨna gɨ da te kalaŋ ga Ɨsɨrayɛl gɨ kan leege dan̰ kuduroy geye koge naŋ bɨ.

⁸ Na hɨn̰ wo̰ ma Turnɔ ɗe-kuduroy-bɛrɛ gɨl gɨ kɨɗɨn̰ ga duroy ƴaa-di-da-Kumu di leege dan̰ ɓala gɨ cay wase na baa nee ƴee na, gɨyəŋ gɨ jɨn̰ kɨɗɨn̰ ga woy dan̰ cɨndɨge ɗɨn̰ coŋ le hangaŋ naŋ ƴee.

⁹ Hɨnga ga nee le, na kɨradi hɨnga ga gɨlna caa di na ba somɨn̰ nee haw kɛ. Kɨradi hɨnga le, gɨl gɨ hɨnga ga ni aye bee bɨ kɨbar gɨ ni bɔgɛ bɨn̰ Kumu bɨ le, na ɓalage lɔɔ gɨ ka-n̰ɨre Kumu dan̰ gɨyəŋ gɨ nee le, ɨrɨmedɨge na kuɗa duroŋ cɨrɛɗ naŋ.

¹⁰ Gɨyəŋdi n̰ɨre gɨ nee le, ojɨ na cay hɨnga ga ni dɔɔ bɨ, hɨnga ga ni sɔɔ bɨ, pɨle gusɨn̰ gɨ toyi kan̰di kan̰di gɨ dorɨn̰ kalaŋ mɨra ƴɔbɨ bɨ. Hada di nee le ojɨ na cay hɨnga ga ni kuyoŋdi-gusi ungo doŋ kɛ ƴɔbɨ bɨ, kan kɨya loon̰ gɨye bɨrɨŋ gɨsɨn̰ tɨwa di Kumu kɨya bɨle te hɨnga ga nee le.

Kɨris a ƴaa-ɓala gɨ gɨɗɨgɨ-Kumu gɨŋ

¹¹ Ama haw kɛ Kɨris andɨgaŋ dus ɨni. Ban bɨle mangɨl gɨ da ka-cay ka-bɔgɛ kɨbar gɨ da hɨnga ga ɗadɨrdaŋ ga kɨya caga. Ƴaa-di-da-Kumu di leege dan̰ ɓala gɨ Kɨris andaŋ nee le, na ƴaa-ɓala gɨ gumu cɨla bɨ duroŋ cɨrɛɗ cɨla bɨ. Na kalaŋ ba lɔɔge ƴaa di nee le dan̰ kobɨge naŋ bɨ. Duroy kɔl le, na ƴaa di cay gɨsəŋ gaŋ kɛ naŋ.

¹² Kɨris andaŋ a kɨɗɨn̰ ga woy dan̰ cɨndɨge cɨla gaŋ ga Kumu ɨre nee, na cay pɨna ƴɔbɨ dan̰ cɨndi. Ban andaŋ nee na dan̰ kɨbar gɨ da kugan̰əŋ naŋ bɨ, karɨn̰ sɨn̰əŋ naŋ bɨ, ama na dan̰ kɨbardi koyi. Na hɨn̰ wo̰ ma ban dorna beena daa kɨbɨ ɨsɨna konagɨŋ dan̰ tumoyna.

¹³ Tumɔ kalaŋ ga mɨdagɨdaŋge tumoyi Kumu le, kan dorge mɨra na dan̰ wɨje gɨ da kɨbardi kuga bɨ, si gɨ bara bɨ, bundudi si di tama di ulge bɨ.

¹⁴ Ama hɨn̰ gɨ kɨbardi nare na ɓala lɔɔ hɨn̰ wo̰ na, kɨbardi Kɨris kɨya lɔɔ ɗɨn̰ ɗɨn̰ coŋ. Kɨya wa kɨbardi ɗɨn̰ gɨ da nare coŋ. Ban ay gusi bɨn̰ Kumu dan̰ tumoyi hɨn̰ hɨnga ga ni bogɨn̰ kɨbar ga masadɨge unɔ, dan̰ dɔnɔ di da Turnɔ di som dan̰ tumɔɔ. Na kɨbardi gɨ nee le ba mɔndɛ ɨrɨme gɨ da gɨye-lɔɔ gɨ ɨsɨni gɨ woy kuduroynagɨŋ nɔm coŋ, lee gɨ na duroŋ mɨra, ɗe ana na leen̰ gɨye gɨ da Kumu gɨ som-bɨra dan̰ tumoyi.

¹⁵ Na toy di hɨn̰ wo̰ ma, Kɨris bɨle ba ɨre duroyna duroy saɗe kɨbɨ pɨna ɓɨse gusu gɨ hɨrɨwa le. Ban ma na kɨya boyɨn̰ cay kan ga hangɨɗɨge cay gasɨn̰-kɔl a te saɗe kɨbɨ pɨna ɓɨse gusu gɨ cay wase gɨŋ le. Na toy di hɨn̰ wo̰ ma, kalaŋ ga Kumu teege le, kɨya ɓalege wɔɔ hɨnga ga ni wɔɔ ga woy dan̰ tumoyge, ga Kumu ye gɨ ɗi na kɨya bɨn̰ karɨndi le.

¹⁶ Kɨɗɨn̰ ga ungo na wala magtubu di ojɨ cay gɔsɨnɛ hɨnga ga ni ban̰di-gulɔŋ ɗa ban̰di na, ojɨ gɨ kan kɨya kɔbɛ gɨ ni solɨn̰ tɨma da ba waledo leen̰ cɨndi dɨm ma kan kɨya gɔsɨnɛ hɨnga le ƴee.

¹⁷ Magtubu di walge ojɨn̰ cay gɔsɨnɛ hɨnga ga ni ban̰di-gulɔŋ le, ba waledo na mara dɨm ma, kan kɨya aye loon̰ gɨye ƴee. Kɨɗɨn̰ ga ba waledo na sɨma-bɨra dan̰ cɨndi nee ƴee na, ungo pɨna wo̰ kalɨn̰ ma, kɨya ɓale aye loon̰ gɨye naŋ.

¹⁸ Na toy di hɨn̰ wo̰ ma, saɗe kɨbɨ pɨna ɓɨse gusu gɨ cay wase le, beege kɨbar dugo pa dɨm ma ayge te loon̰ gɨye ƴee.

¹⁹ Kɨɗɨn̰ ga Moyis dor te tumɔ pɨna pɨna nɔm di woy duroy magtubu gasɨn̰-kɔl dɨŋ, bɨn̰ karɨn̰ Ɨsɨrayɛln̰əŋ ɨni na, ban ay kɨbar gɨ da karɨn̰ sɨn̰əŋ bɨ, gɨ da kugan̰əŋ bɨ, pol dan̰ kaŋ bɨ, teɗi gamge ga yɨle bɨ, kabɨn̰ hɨnga ga teegege ijopɨ bɨ, wɨjɨde a cay magtubu di nee le bɨ, cay karɨn̰ Ɨsɨrayɛl bɨ.

²⁰ Ban ye hɨn̰: «Gɨ ba kɛ le, na kɨbar gɨ ni saɗe kɨbɨ pɨna ɓɨse gusu gɨ Kumu ay noy koldi gɨ kɨŋ na bɨga kɔl cay nee.»

²¹ Kardi nee na Moyis wɨjɨde kɨbar a cay ƴaa-di-da-Kumu di leege dan̰ ɓala bɨ, cay kɔjɛn̰əŋ ga kan leen̰ge gɨye gɨ da Kumu nɔm bɨ.

²² Dan̰ gɨyəŋ gɨ da gasɨn̰-kɔl na, kondɨwadi hɨnga na dorge mɨra na dan̰ kɨbar bɨ, hɨn̰ gɨ kɨbar na bugoŋ dugo naŋ na, kuduroy jalɨwa unɔ bɨ.

²³ Hɨn̰ gɨ turnoy hɨnga ga woy gɨɗɨgɨ-Kumu gɨŋ le, kan na dɨrage mɨra naa hɨn̰ wo̰ na, gusɨge gɨ a gɨɗɨgɨ-Kumu gɨŋ le kalɨn̰ ma orge n̰age na gɨ kan na dɨrage mɨra naa dan̰ hɨnga ga ni bogɨn̰ kɨbar ga kuɗa ɗɨn̰ ɗɨn̰ ga tumɔ coŋ bɨ.

²⁴ Ho’o, kɨɗɨn̰ ga woy dan̰ cɨndɨge ga Kɨris andaŋ boy nee le, na ga kobɨ ungo ba lɔɔ naŋ. Kɨɗɨn̰ ga nee le na turnoy hɨnga ga cɨndi ƴɔbɨ naŋ. Ama ban andaŋ a gɨɗɨgɨ-Kumu gɨŋ jada ɗe na ɨrɨn̰ tumoy Kumu kol cayna boy tɨwa di haw kɛ dɨŋ.

²⁵ Mangɨl gɨ da ka-cay ka-bɔgɛ kɨbar le, andaŋge a kɨɗɨn̰ ga woy dan̰ cɨndɨge gaŋ ɨlge dan̰ ɨlge, dan̰ kɨbar di nare. Ama Kɨris andaŋ boy nee na kɨya aye gusi bogɨn̰ kɨbar tɨba nee nee naŋ.

²⁶ Hɨn̰ gɨ na wɨya naa hɨn̰ wo̰ na, ayɨn̰ toy gɨ Kumu ɗen̰ gɨɗɨgɨ-Kumu bɨ, cay gɨsəŋ bɨ bɨrɨŋ gɨsɨn̰ haw kɛ le, ojɨ gɨ Kɨris ni kɨya sɔlɛ cɨn̰-gɨle-cɨn̰ tɨba nee nee. Ama haw kɛ gɨ na kagadi wɔlɛ le, ban ɨrga gɨl-cɨn̰ na cay pɨna ƴɔbɨ. Kɨya mondɨn̰ ɨsɨna coŋ dan̰ gɨyəŋ gɨ da gusi koyi gɨ ban ay been̰ kɨbar le.

²⁷ Na cɨndi, Kumu gɨsɨ gɨ waŋ waŋ kalɨn̰ ma na kɨya mare naa cay pɨna ƴɔbɨ bɨ, kardi nee bɔyɛ kɔl na ba kɨya ɨrga kardi tɨma dɨŋ.

²⁸ Kɨris kalɨn̰ ma ay gusi been̰ kɨbar na cay pɨna ƴɔbɨ kɨya dorɨn̰ ɨsɨnan̰əŋ ga da kalaŋ ga dan̰ kondige. Ban kɨya andaŋ gɨ ni tɨba sɔɔdi na gɨ ni dorɨn̰ ɨsɨnan̰əŋ naŋ ɨni, ama na gɨ ni poɗɨn̰ kalaŋ ga somge amiige.