Əbɨro 8 - Gabri Maja

Jesu na mangɨl gɨ da ka-bɔgɛ kɨbar konagɨŋ

¹ Te kɔl nɔm gɨ ni ba ye le bambadi ba kɛ: Leen̰ cɨndi, na mangɨl gɨ da ka-cay ka-bɔgɛ kɨbar gɨ gɨlɨn̰ hɨn̰ ban gɨ nee le ma mana orɨn̰gɨŋ. Ban som durdi kali-tɨrɨmbala da Kumu ba dɔnɔ gɨ ɗɨn̰ dɔnɔ nɔm a cay kobi gɨ bara gɨŋ a gɨɗɨgɨ-Kumu.

² A nii le, ban lee gɨye a kɨɗɨn̰ ga woy dan̰ cɨndɨge gaŋ, kɨɗɨn̰ ga nee le ma na ƴaa-di-da-Kumu di leege dan̰ ɓala gɨ hɨnde gɨ ungo gɨ ɨndi ba gaɗe naŋ. Ba-gulondɨna gusi ba gaɗe.

³ Mangɨl gɨ da ka-cay ka-bɔgɛ kɨbar gɨ ani ani le, ɗeyge ɗe ban na bɨn̰ Kumu hɨnga ga ni bee bɨ, nare gɨ ni dɨɗe bogɨn̰ kɨbar bɨ. Na toy di hɨn̰ wo̰ ma, ojɨ gɨ Kɨris kalɨn̰ ma, na ɨran̰ dan̰ hɨnga ga ni bee bɨ.

⁴ Hɨn̰ gɨ Kɨris na baa a cay gɨsəŋ gaŋ kɛ na, ban ni kɨya ɓale bɨləŋ ba-bɔgɛ kɨbar naŋ. Kɨya gɨ ka-bɔgɛ kɨbar ga ka bɨn̰ Kumu hɨnga ga ni bee dan̰ gɨyəŋ gɨ da gasɨn̰-kɔl le woyge nee ɨni.

⁵ Gɨye gɨ ka-bɔgɛ kɨbar ga nee leege le, na turnoy hɨnga ga a gɨɗɨgɨ-Kumu gaŋ, kan ƴolge na ƴɔlɛ ƴɔbɨ. Kɨya wa kɨɗɨn̰ ga Moyis baa mɨnde gɨ ni gaɗe ƴaa-di-da-Kumu di leege dan̰ ɓala le, Kumu yeyi hɨn̰: «Ji kɨya lɔɔ hɨnga nɔm ɗe woy gɨlɨn̰ dan̰ kan ga ɨŋ ba gɨlɨn̰ a cay garma gɨŋ le.»

⁶ Ama gɨye gɨ da Jesu le, na gɨye gɨ gumu ɗɨn̰ gɨ da te ka-bɔgɛ kɨbar coŋ. Kɨya wa ban na ba ɨre duroynagɨŋ duroy saɗe kɨbɨ pɨna ɓɨse gusu gɨ kuɗa tɔgɨ ɗɨn̰, gɨ si toyi na a cay hɨnga ga Kumu ye gɨ ɗi na kɨya lɔɔ bɨge ga kuɗa ɗɨn̰ bɨ.

⁷ Hɨn̰ gɨ saɗe kɨbɨ pɨna ɓɨse gusu gɨ cay wase naa saɗe kɨbɨ pɨna ɓɨse gusu gɨ na laa hɨnga nɔm ɨra kɨɗɨn̰dɨge gaŋ na, Kumu ni kɨya ɗɔɔ saɗe kɨbɨ pɨna ɓɨse gusu gɨ cay sɔɔ a ban̰di nee ɗaŋ naŋ ɨni.

⁸ Kumu sol hɨnga ga ɨsɨn gusi te kalaŋ kayi, na toy di hɨn̰ wo̰ ma ban ɗalge ye hɨn̰: «Ba-gulɔŋ Kumu ye hɨn̰: “Wɔlɛn̰əŋ tɨlgage nee, Ɨŋ kɨya lɔɔ dan̰ te wɨn̰je gɨ da Ɨsɨrayɛl bɨ, Te wɨn̰je gɨ da Juda bɨ, Saɗe kɨbɨ pɨna ɓɨse gusu gɨ hɨrɨwa.

⁹ Saɗe kɨbɨ pɨna ɓɨse gusu gɨ nee le, Kɨya wɔyɛ gɨlɨn̰a na hɨn̰, Saɗe kɨbɨ pɨna ɓɨse gusu, Gɨ tumɔ gɨ ɨŋ saɗɨ dan̰ mon̰iigɨŋ le wo̰ naŋ. Kɨɗɨn̰ ga ɨŋ ba ƴomɨn̰ kobɨge andɨn̰ danage, A cay gɨsəŋ ga Ejɨpt gaŋ coŋ wo̰ naŋ. Kan ɨrge a cay saɗe kɨbɨ pɨna ɓɨse gusu, Hɨnge gɨŋ le naŋ, Lee gɨ ɨŋ-bandi kalɨn̰ ma, Ɨŋ kɨya ɗooge coŋ bɨ.” Na ɨŋ-bandi Ba-gulɔŋ ba yɔ.

¹⁰ Ba-gulɔŋ ye ɗaŋ coŋ ye hɨn̰: “Kardi wɔlɛn̰əŋ ga nee le na, Saɗe kɨbɨ pɨna ɓɨse gusu Gɨ ɨŋ kɨya saɗe dan̰ te wɨn̰je, Gɨ da Ɨsɨrayɛln̰əŋ le ba kɛ: Ɨŋ kɨya ɗɔɔ gasɨn̰-kɔl hɨnge, Na boy ɨrɨmedɨge gɨŋ bɨ, Ɨŋ kɨya wale gasɨn̰-kɔl hɨnge, Na a ɗugoyge bɨ, Ɨŋ kɨya wɔyɛ Kumu koge bɨ Kan kɨya wɔyɛ te kalaŋ kange bɨ.

¹¹ Ungo pɨna duroyge gɨ kɨya gɨlɨn̰ mɨgayi Gɨ a cay gɨsəŋ kay gaŋ wala kurɨndi yon̰ hɨn̰: Tɨraba sɔlɛ Ba-gulɔŋ kɨya unɔ, Kɨya wa kan nɔm kɨya sɔlɔŋge, Ayɨn̰ toy a cay karɨn̰aŋ ga n̰ən̰əŋ bɨrɨŋ, Andɨn̰ a cay kalaŋ ga gɨmdəŋ.

¹² Kɨya wa hɨnga ga dan̰ gɨyəŋdɨge naŋ ga kan leege le, Ɨŋ kɨya ɗɔɔ kuduronɨ jalɨwa cay nee bɨ, Ɨŋ kɨya hɨne a cay ɨsɨna koge gɨŋ naŋ bɨrɨŋ bɨ.”»

¹³ Kɨɗɨn̰ ga Kumu ye kɔl gɨ ojɨn̰ cay saɗe kɨbɨ pɨna ɓɨse gusu gɨ hɨrɨwa le, ban ay saɗe kɨbɨ pɨna ɓɨse gusu gɨ cay wase le, leen̰ saɗe kɨbɨ pɨna ɓɨse gusu gɨ ɨlgi. Hɨnga nɔm ga lee ga əsi bɨ, lee ga ɨlgi bɨ le, baa mɨnde kɨya kaɗɨn̰e.