Əbɨro 7 - Gabri Maja

Mɛlgisedɛg na kɨlma bɨ ba-bɔgɛ kɨbar bɨ

¹ Mɛlgisedɛg gɨ nee le, na kɨlma gɨ a cay ƴaa-di-gumu di Salɛm bɨ, na ba-bɔgɛ kɨbar gɨ da Kumu gɨ ɗɨn̰ cay hɨnga nɔm bɨ. Ban or yale cɨn̰ Abɨraham bɨ torɨn̰-kɨbi cayi, kɨɗɨn̰ ga Abɨraham saygan̰ te bɔyɛ kɨmbɨl a cay kɛrɨmbɛlɛŋ gaŋ.

² Ɨni na, Abɨraham dor kɨbɨ hɨnga pɨna duroy hɨnga ga mɔjɨ gɨ da hɨnga nɔm ga ban lobɨ a kɨmbɨl gɨŋ le bii. Gusoŋ gɨ ni Mɛlgisedɛg le, duroy gɨ cay wase na «kɨlma gɨ da hɨnga ga dan̰ durɔ ɗɨngar.» Bɨ kardi nee ban na kɨlma gɨ a cay ƴaa di Salɛm dɨŋ nee coŋ, duroy na «kɨlma gɨ da gusi-dɔbɛ.»

³ Ungo sɨla bayi naŋ bɨ, ƴoyi naŋ bɨ, mon̰ii naŋ bɨ. Ungo dɨra kɔl gɨ ojɨ cay wɔlɛ wɔɔdi naŋ bɨ, gɨ ojɨ cay wɔlɛ tɨmaydi naŋ bɨ. Ban woy gɨlɨn̰ na hɨn̰ Kurɨn̰-Kumu wo̰. Lee gɨ ban woy na ba-bɔgɛ kɨbar dan̰ tumoyi.

⁴ Sɨlagɨŋ Mɛlgisedɛg le gɨmɨwadi ƴee bɨ. Mon̰dɨna gɨ pɨna gɨ ba se te mon̰dɨna Abɨraham kalɨn̰ ma, dor kɨbɨ hɨnga ga pɨna duroy hɨnga ga mɔjɨ ga da hɨnga nɔm ga ɗadɨrdaŋ ga ban lobɨ a kɨmbɨl gɨŋ le bii.

⁵ Kongɨn̰i Lebi ga Kumu torge sige ka-bɔgɛ kɨbar le orɨn̰ge dan̰ te tumɔ, dan̰ gɨyəŋ gɨ da gasɨn̰-kɔl gɨ ni ɨngɨre kɨbɨ hɨnga pɨna duroy hɨnga ga mɔjɨ kobɨ te kalaŋ ga ni Ɨsɨrayɛl, ga na karmɨge. Karmɨge ga nee le kalɨn̰ ma, saygage nɔm na te wɨn̰je gɨ da Abɨraham gɨŋ bɨ.

⁶ Mɛlgisedɛg le, na ungo gɨ a te wɨn̰je gɨ da Lebi gɨŋ naŋ. Ama ban ƴee kɨbɨ hɨnga ga pɨna duroy hɨnga ga mɔjɨ a kobɨ Abɨraham. Ɗaŋ nee coŋ, ban tor-kɨbi a cay ungo gɨ Kumu ye gɨ ɗi na kɨya bii hɨnga.

⁷ Na cɨndi kɔl man̰edi unɔ, ungo gɨ ba-tɔrɛ kɨbi cay mɨgayi le, ban ma na ungo gɨ gumu ɗɨn̰ mɨgayi gɨ nee le.

⁸ Hɨn̰ wo̰ na, kongɨn̰i Lebi ga ka-ƴɔɔ kɨbɨ hɨnga ga pɨna duroy hɨnga ga mɔjɨ le, kan na kalaŋ ga kɨya marege. Ama Mɛlgisedɛg gɨ ba-ƴɔɔ kɨbɨ hɨnga ga pɨna duroy hɨnga ga mɔjɨ le, som-bɨra hɨn̰ gɨ Magtubu di da Kumu ba ye le.

⁹ Na ɓal gɨ ni yɔ gɨ kongɨn̰i Lebi ga ka-ƴɔɔ kɨbɨ hɨnga ga pɨna duroy hɨnga ga mɔjɨ le kalɨn̰ ma, na bɨn̰ge Mɛlgisedɛg kɨbɨ hɨnga ga pɨna duroy ga mɔjɨ gaŋ dan̰ gɨyəŋ gɨ da Abɨraham.

¹⁰ Ban lee dan̰ gɨyəŋ gɨ da Abɨraham, kɨya wa Lebi baa a gɨrnay mon̰di Abɨraham gɨŋ ƴee kɨɗɨn̰ ga Mɛlgisedɛg ba yalɨn̰ cɨn̰ Abɨraham le.

¹¹ Gɨye-lɔɔ gɨ da ka-bɔgɛ kɨbar gɨ a te wɨn̰je gɨ da Lebi gɨŋ le, ban ma na te gasɨn̰-kɔl gɨ Kumu bɨn̰ te kalaŋ ga ni Ɨsɨrayɛl. Ama hɨn̰ gɨ kalaŋ ni na ɓalage bɨləŋ kalaŋ ga kuɗudaŋ duroŋ cɨrɛɗ dan̰ gɨyəŋ gɨ da gɨye-lɔɔ gɨ da ka-bɔgɛ kɨbar ga a te wɨn̰je gɨ da Lebi gɨŋ na, kɛ na kɨya wa ma Kumu kɨya lɔɔ gɨ caga gɨ da ba-bɔgɛ kɨbar gɨ ɗaŋ dan̰ gɨyəŋ gɨ da Mɛlgisedɛg gɨ wɔyɛ nee coŋ ga? Ama ban na ba-bɔgɛ kɨbar gɨ a te wɨn̰je gɨ da Aro̰ gɨŋ hɨn̰ gɨ da Lebi wo̰ naŋ.

¹² Hɨn̰ gɨ na ƴage gɨye gɨ da ka-bɔgɛ kɨbar ga a te wɨn̰je gɨ da Lebi gɨŋ bɨn̰ge te wɨn̰je gɨ ɗaŋ na, naa wa wa kalɨn̰ ma gasɨn̰-kɔl kalɨn̰ ma kɨya bɨləŋ ɗaŋ bɨ.

¹³ Ba-gulondɨna gɨ kɔl gɨ kɛ ojɨ cayi le, ban na ungo gɨ a te wɨn̰je gɨ da Lebi gɨŋ naŋ. Ama ban na a te wɨn̰je gɨ ɗaŋ gɨŋ gɨ ungo pɨna wo̰ laa gɨye bɨn̰ Kumu a kɨɗɨn̰ ga kan gaɗɨge kɨya bogɨn̰ kɨbar nee gaŋ naŋ.

¹⁴ Kalaŋ nɔm solge gɨ Ba-gulondɨna na ungo gɨ wooyge na a te wɨn̰je gɨ da Juda gɨŋ. Bɨ kɨɗɨn̰ ga Moyis dor kɔl gɨ da ka-bɔgɛ kɨbar le, ban ya kɔl pɨna gɨ uja cay te wɨn̰je gɨ nee le naŋ.

Ba-bɔgɛ kɨbar gɨ hɨn̰ Mɛlgisedɛg wo̰

¹⁵ Haw kɛ na, na sol duroy arɨn̰ ɗɨn̰ kɨɗɨn̰ ga na sol ba-bɔgɛ kɨbar gɨ ɗaŋ gɨ gɨlɨn̰ hɨn̰ Mɛlgisedɛg wo̰ ba andaŋ.

¹⁶ Ba-bɔgɛ kɨbar gɨ ɗaŋ gɨ nee le bɨləŋ ba-bɔgɛ kɨbar na dan̰ gɨyəŋ gɨ da te tumɔ di ye gɨ ba-bɔgɛ kɨbar na kɨya ɨrga naa a te wɨn̰je gɨ pɨna gɨŋ da kalaŋ ga ɨndəŋ naŋ. Ama ban bɨləŋ ba-bɔgɛ kɨbar na dan̰ gɨyəŋ gɨ da dɔnɔ di ni somɨn̰-bɨra di kɨya mundoŋ naŋ le.

¹⁷ Kɨya wa Magtubu di da Kumu ye hɨn̰: «Ji kɨya wɔyɛ na ba-bɔgɛ kɨbar dan̰ tumon̰, Hɨn̰ gɨ da Mɛlgisedɛg wo̰.»

¹⁸ Mondɨge te tumɔ di ɨlgi coŋ na hɨn̰ wo̰, kɨya wa gɨ tɔgɔɔ unɔ bɨ, wɨya gɨ ni loon̰ gɨye naŋ bɨ.

¹⁹ Na cɨndi, hɨnga ga gasɨn̰-kɔl gɨ da Moyis lee ɗe duroŋ cɨrɛɗ wo̰ unɔ. Ama Kumu bɨna a ban̰di nee hɨnga ga ni bogɨn̰ ɨrɨmedɨna cay nee, ga kuɗa ɗɨn̰ ga tumɔ coŋ. Lee gɨ na ɓal gɨ ni sɨye gusi Kumu dan̰ gɨyəŋ gɨ da hɨnga ga ni bogɨn̰ ɨrɨmedɨna cay nee ga nee le.

²⁰ Hɨnga ga ɗaŋ woy nee coŋ, na ɓɨse gɨ Kumu ɓɨsɨ gusi. Kalaŋ ga tumɔ ga bɨləŋge ka-bɔgɛ kɨbar le, Kumu ɓɨsɨ gusi kol cayge naŋ.

²¹ Ama Jesu bɨləŋ ba-bɔgɛ kɨbar na dan̰ gɨyəŋ gɨ da ɓɨse gɨ Kumu ɓɨsɨ gusi, kɨɗɨn̰ ga ban ye hɨn̰: «Ba-gulɔŋ Kumu ɓɨsɨ gusi bɨ, Ban kɨya bɨle cay gasɨndi ɗaŋ naŋ bɨ: “Ji kɨya wɔyɛ na ba-bɔgɛ kɨbar dan̰ tumon̰.”»

²² Naa hɨn̰ wo̰ kalɨn̰ ma, na orɨn̰ dan̰ hɨnga ga ni saɗe kɨbɨ pɨna ɓɨse gusu ga kuɗa ɗɨn̰ dan̰ Kumu. Jesu le, ban na ba lɔɔ gɨ saɗe kɨbɨ pɨna le na usa.

²³ Hɨnga ga ɗaŋ woy nee coŋ. Ka-bɔgɛ kɨbar ga ɗaŋ ga a te wɨn̰je gɨ da Lebi kondɨ dege te gusɨge, kɨya wa tɨma dii cayge narge leen̰ gɨye koge cɨndɨge jɨn̰ tumɔ tumɔ.

²⁴ Ama gɨye-lɔɔ bɔgɛ kɨbar gɨ da Jesu le, ungo kɨya ƴɔɔ ban̰di nee naŋ bɨrɨŋ. Kɨya wa ban som-bɨra dan̰ tumoyi.

²⁵ Na toy di hɨn̰ wo̰ ma, kan ga ba ɨrgage gusi Kumu dan̰ gɨyəŋ gɨ da Jesu le, ban ɓal gɨ ni poɗɨge cay pɨna ƴɔbɨ dan̰ tumoyge. Kɨya wa Jesu le som-bɨra dan̰ tumoyi. Ban ye kɔl bɨn̰ Kumu kol cayge.

²⁶ Jesu le, na mangɨl gɨ da ka-cay ka-bɔgɛ kɨbar gɨ na or n̰agedi. Ban na ungo gɨ woy dan̰ cɨndi bɨ, dan̰ naji toyi bɨ, ɨsɨna pɨna wo̰ cilii naŋ bɨ. Ban gɨlɨn̰ dan̰ ka-lɔɔ ɨsɨna naŋ bɨ, Kumu ayi orɨn̰ danayi gɨɗɨgɨ-Kumu gɨŋ daa nii bɨ.

²⁷ Jesu wɨya gɨlɨn̰ na hɨn̰ te mangɨl gɨ da ka-cay ka-bɔgɛ kɨbar ga ɗaŋ wo̰ naŋ. Ban na ba-bɔgɛ kɨbar gɨ dan̰ wɔlɛ pɨna pɨna kol ɨsɨna koyi bɨ, kol ɨsɨna gɨ da karɨn̰ Ɨsɨrayɛl bɨ, naŋ. Ban bee kɨbar gɨ nee le, na cay pɨna wo̰ ƴɔbɨ, kɨɗɨn̰ ga ban ay gusi be leen̰ hɨnga ga ni bogɨn̰ kɨbar.

²⁸ Gasɨn̰-kɔl gɨ da Moyis si kalaŋ mangɨln̰əŋ ga da ka-cay ka-bɔgɛ kɨbar, ama kan kuɗudaŋge duroŋ cɨrɛɗ naŋ. Ama ɓɨse gɨ Kumu ɓɨsɨ gusi ayɨn̰ te tumoyi le ɨrga na kardi gasɨn̰-kɔl. Kɔl gɨ Kumu ɓɨsɨn̰ gusi gɨ nee le, dor Kurɨn̰ Kumu sii mangɨl gɨ da ka-cay ka-bɔgɛ kɨbar gɨ kuɗa duroŋ cɨrɛɗ dan̰ tumoyi.